Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

97: Jesús reiyob daniki

97: Jesús reiyob daniki

DULE wilegan ibya surmalad warbo nudasad sorbali, Jesús neggwebur bipigwache nade, Jerusalén walikagwa. E sapingan warbogwadga soge: ‘Neggweburse namalo geb asno mimmi atinnai bemar dakdapoed. Esikmalo geb anga sedamalo.’

Ega asno senonimargua, Jesús aa birgi sigisad. Geb aa birgi sii Jerusalénse nade, wedi itakasaale nai. Neggwebur owarmakdapgua, dule bukidar abin dakmalad ainiali. Bukidar we dulemar na mor unnusmala geb igargi ogichamala. Bamaladi ogob gagangiid e gagan ogitemalad, geb binnasur gotemala: ‘¡Rei Jehová nuggi danikidi, bitiki Bab Dummad nued be daksan gadina!’

Dulemar Jesús abindakbukmalad

Epenne, Israelgi rei binigan nugsalesale, asno mimmi birgi sii dognonidamala Jerusalénse, neggweburse oyolegega. We ibmar Jesús imaknai. Geb we dulemardi na oyonanai, abemarye Jesús e reig guedi. Aukine Jesús, Babse goled negse nadgu ibmar gusadi, anmarse oyoge belagwable dulemar abesurmala Jesús reig guedi. Anmar dakoena.

Babse goled neggi Jesús emar nudakali, dulemar ibya surmaladi geb dulemar abgan burgwarmaladi. Burwigan we ibmar dakarmargu, binnasur oimakarmalad Jesús nug odummoarmalad. Auki sacerdotemar istar itoarmalad, geb Jesúsga sogdemala: ‘¿Ar be itoge burwigan ibmar sogbukmalad?’

Jesús abin sogde: ‘Eye. ¿Ar be absodisurmarsi Bibliag soglenaid: “Burwigan gayagi Bab Dummad na e nug odummogoed?”’ Degsoggu burwigan bogiguchulid, Bab Dummad nuggi rei danikid e nug odummobukwa gudmala.

Anmar we burwigan yobi gubimogad, ¿insoa? Abar dulemar sun abemalale anmar Bab Dummad reinog mer bar sunmakedi. Aukine anmardi amba sunmakdii gumaloe, Jesús ibmar nuegan emarga imakoedgi.

Jesús Napaneggi gudigusgua, amba yoo aunni owarmake reig neg dakmai gued iba. ¿San we iba owarmakoe? E sapingan wisgubi guarmala. Anmar we igarsik emisgi durdakoe.

Mateo 21:1-17; Juan 12:12-16.



Egislenaid

  • Jerusalén walik neggwebur bipi naiche Jesús owarmakdapgua, ¿ibu imakmalag e sapingan barmisa?
  • Sobaled be dake, Jesús, Jerusalén neggweburse owarmasgu, ¿ibu ibmar gusa?
  • ¿Ibu burwigan imasmala dakarmargu, Jesús dulemar ibya surmalad geb dulemar abgan burgwarmalad nudaknai?
  • Sacerdotemar istar itoarmargu, ¿igi Jesús wemarga sogsa?
  • ¿Igi nabir anmar, burwigan Jesús nug odummosmalad yobi gusmarmogale?
  • Jesús sapingan, ¿ibu wisgubi guarmala?

Bamalad egislenabalid

  • Absoge Mateo 21:1-17.

    ¿Igi Jesús Jerusalén sega rei yob dognoniki, geb igi Romag urwemalad e dummagan dina nakwis danikir dognonidamala? (Mat. 21:4, 5; Zac. 9:9; Fili. 2:5-8; Col. 2:15.)

    ¿Nusganagan ibu ibmar nued nabir durdakmala, Jesús Babse goled negse dogsagu israelita burwigan Salmo 118 gine sognaid bali ibmar imasad gine? (Mat. 21:9, 15; Sal. 118:25, 26; 2 Tim. 3:15; 2 Ped. 3:18.)

  • Absoge Juan 12:12-16.

    Dulemar Jesús nug odummosmalad, ogob gagan ebusmalad gine, ¿ibig deyob imasmala? (Juan 12:13; Fili. 2:10; Rev. 7:9, 10.)