Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

95: Igi Jesús emar odurdake

95: Igi Jesús emar odurdake

IBAGWEN gine Jesús dule wargwenga soge, dule bamalad sabguedi abeleye. Geb we dule egichali: ‘¿Doa dule baidi, an sabguosunna?’ Jesúsdi wisi we dule igi binsagwichi. We dule binsae, unnila e dulemarbi geb eyob babse gormarmogadbi sabguoye. Anmar dakoena igi ega Jesús sogsa.

Emar odurdakeg, imbakwa Jesús, ibmar soggwengi emarga sunmasdae. Deyob emisgi emar odurdakde. Judío wargwengi sunmaded geb Samaria dule wargwengi. Anmar iduar bat durdasa, bukidar judiomar istar Samaria dorgan dakdamala. Emisgi Jesús wegi soge:

Ibagwengi judío wargwen yar imbab daniki, Jericó neggweburse nadapi. Degidgi atursamalad egi noali. Geb ei mani atursasmala, degine, sarsosmarbali geb burgwednaga metemala.

Undargi, judío sacerdote, igarba danimoga. Dakali dule sarsolegar igarba melledii. ¿Ibu imas be binsae? Igar baidba nade, gwisguchuli. Degidgi, dule baid Bab igar nue wismogadi danimoga. Adi levita. ¿Gwisgus be binsae? Suli, gwisguchurmoga we dule bendakega. Be dakena echaa aidemamaid, sacerdote, levita bogwa.

Auki be dakena, doa sarsolesad walik sii. Wedi Samaria dule. Geb judío bendaksii. Sarsolegaled gine ega ina maknai. Sorbali neg soggwense sesbali, judío nabir obunnogega geb nuguega.

Samaria dule

Ibmar gusad sogsiid ogusgua, dule es ibmar egichad sega Jesús egichali: ‘Emisgin dina we dulemar warbaagwadi, ¿biti bur dule sarsolesad sabguchunna? ¿Sacerdote, levita, Samaria dule dibe, bitidi?’

Machered soge: ‘Samaria dule. Ar wedi dule sarsolesad nue akwisad.’

Jesús, abin sogde: ‘Inniki be sogsa. Degisoggu, be namodo geb deyob dule bamalad be sabgumogodo.’

¿Bur nued be dakmoga, Jesús weyob emar odurdaked? Anmar nabir bukidar igarmar nuegan durdake, Jesús ibmar odurdasad Bibliag naidgi, ¿insoa?

Lucas 10:25-37.



Egislenaid

  • ¿Dule wargwen igi Jesús sega ibmar egisnoniki, geb ibigala?
  • Imbakwa Jesús ¿ibu ibmargi sunmakdae emar odurdakega, geb ibu ibmar anmar durdasa judíomar siki geb Samaria dorgan siki?
  • ¿Igi Jesús, judío wargwen gusye sogsa, Jericó igarba nadapgu?
  • Judío sacerdote geb levita, ¿ibu imasmala we igarba nasmargua?
  • Sobaledgi be dakena, ¿doa judío sarsolesad bendaksii?
  • Jesús ibmar gusad sogsiid ogusgua, ¿igi dules ibmar egichali, geb dule, igi Jesús abin soge?

Bamalad egislenabalid

  • Absoge Lucas 10:25-37.

    Dule Moises igar e wisid es ibmar egichagu, Jesús yog abin sogar imachursoggua, ¿igi Jesus we dule obinsasa mag ibmar ito guega? (Luc. 10:26; Mat. 16:13-16.)

    ¿Igi Jesús emar odurdasdae mer ichakwa bamaladgi binsamalaga? (Luc. 10:36, 37; 18:9-14; Tito 1:9.)