Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

86: Niiskwa ganaidba nadapmala

86: Niiskwa ganaidba nadapmala
Niiskwamargi nergumaladi

¿BE DAKSAMOGA niiskwa binnasur ganaidi, we dule aasik goo suui oyosiid? We dulemar Jerusaléngi noarmargua, niiskwa dakleali. We dulemar Dad Nakwechik danimala, geb niiskwamargi nergumaladi. Binsamala we niiskwa gwapidi, dule dummache emar semaye.

Jerusalénse owarmasmargua, egisdapmala: ‘¿Bia machigwa judiomar reig guoed mai?’ Israel dorgan “judiomarye” nabir bilebali. ‘Anmar e niiskwa insogi daksa Dad Nakwechik,’ we dulemar soge, ‘geb asabin sindigar sigeg anmar daniki.’

Deunni Jerusaléngi rei Herodes neg dakmai, geb we ibmar wisguargua, surbinsa itoali. Abesuli dule baid e anale reig meged. Degsoggu, sacerdotemar e dummaganse egichali: ‘¿Bia reig guoeye soglesadi gwalulegoe?’ Sacerdotemar abin sogdemala: ‘Bibliag soge Belén neggwebur ginye.’

Degsoggu Herodes sogsa dulemar Dad Nakwed sikmaladga: ‘Machi bipigwa be aminamalo. Geb be amismalale, be an owisomalo. Asabin sindigar an signabimoga.’ ¡Aukine, Herodesdi bur we machigwa oburgwebiena!

Degidgi, niiskwa we dulemar asabinni aibanmai gusa Belén neggweburse, geb nagunoniki machi bipigwa gudiid neg inniki. We dulemar neg yabali dogsamargua, dakarmala María sii, degine, machigwa Jesús. Geb ibmar Jesúsga uksamala. Auki sorbali, Jehová gabgine we dulemarga sogsa mer bar Herodes sega namaloye. Degsoggu, igar baid bali na e neggweburse nadmarsunna.

Herodes wisguargua dulemar nadmarye, sae itoali. Geb igar uksasunna, goe machimala Belén neggwebur ginmalad, birgabo akuar nikmaladi geb birgabo nikmalache, bela oburgwelemaloye. Aukine, Jehová gabgin José owisosa iduakwa, geb José na gwenadgan sesa Egiptose. Sorbali, José wisguargua Herodes burgwisye, gannar Nazaretse, María sesa geb Jesús sesbali. Degsoggu, Nazaretgi Jesús dunguarsunna.

¿Doa we niiskwa gwapid binnasur ogasad be binsae? Ebinsao, we dulemar gebeun niiskwa dakarmargua Jerusalénse arbimargwele. Nia, Bab Dummad Machi oburgwebiena, degine, wisbalina rei Herodes Jerusaléngi neg dakmaid, we machigwa oburgwebi gudamogoe. Degsoggu, Nia imasar gebe we niiskwa binnasur gaedi.

Mateo 2:1-23; Miqueas 5:2.



Egislenaid

  • Sobaledgi dulemar be dakedi, ¿doamala, geb ibig wargwen niiskwa binnasur ganaid siki goo suui oyosii?
  • ¿Ibig rei Herodes surbinsa itoali, geb ibu imasa?
  • Niiskwa binnasur gaedi ¿bia dulemar sesa, auki ibig gannar neggweburse nadmargu igar baidba nadmala?
  • ¿Herodes igi igar uksa, geb ibigala?
  • ¿Igi Jehová José gala sogsa?
  • ¿Doa we imasa niiskwa gwapid binnasur gaega, geb ibigala?

Bamalad egislenabalid

  • Absoge Mateo 2:1-23.

    ¿Igi año Jesús nikad gine geb ibu neggweburgi gudiidgi, dulemar niiskwag nergumalad ese atakapmala? (Mat. 2: 1, 11, 16.)