Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

101: Jesús oburgwismala

101: Jesús oburgwismala

IBMAR imaklenaid be dake! Jesús oburgwelenai. Suargi bioklegale nai. Argangi geb nag gine bioklegarbali. ¿Ibigala dule weyob ibmar imakbie gualirsunna?

Jesús burgwenaid

Dakargua abar dulemar istar Jesús dakmala. ¿Be wisi doamala? We dule wargwen, anger isgana gue, Nia. We anger imasgusa Adán, Evabo mer Jehová bali ibmar imakmalad. Geb Nia emisgi imasbali Jesús e istarmalad Jesús oburgwemaladga.

Jesús biokleged iduar, e istarmalad sabsur imasmala. ¿Be ebinsae Getsemaní neg nugache noniki gusmaladi, geb degine dulemar Jesús sesmalad? E istarmalad, ¿doa dulemarsunna? Bab igargi emar idumaladi. Anmar dakoena igi sorbali gusbali.

Bab igargi emar idumalad Jesús sesmargua, Jesús apóstolmar wakitemala. Gwakidmala, geb walagwen Jesús metemala e istarmalad abargi. Aukine apóstol Pedrodi geb apóstol Juandi dikasur nachurmala. Dulemar sorba nadapi gusmala, dakega igi Jesús imaklego dibeye.

Sacerdotemala Jesús sesmala dador Anás nugache, we duledi sacerdote e dummadga mai gusadi. Dulemar undar weg ambikguchuli. Sorba Jesús sesmala, dule Caifás nugad negse, we dule aunni sacerdote e dummadga mai. Aa negyag, bukidar Bab igargi emar idumalad bukwa.

Wegine, Caifás negyag, soglegoedi igi Jesús imaklegoe. Emisgi dulemar senonimala Jesúsgi gakansamalaga. Bela Bab igargi emar idumalad sogmala: ‘Jesús oburgweleged abelege.’ Geb Jesús wagargi wiagdemala geb argan olole sarsosmarbali.

Bela we ibmar imaklenagua, Pedrodi neg magabali gwichi. Aa mutik neg diopigwa, degsoggu dulemar soo ogasmala. Degi soo ebiris wabukwadgi, ome maiga gudiidi Pedro dakali geb soggali: ‘We dule Jesúsba gudimogana.’

Pedro, abinni soge: ‘¡Suli, andi we dule bali gudisulina!.

Ilabaa dulemala Pedrog sogsa, be Jesúsba gudigusye. Aukine Pedrodi osulosdae. Ilabaa gine Pedro deyob osulosdaedgi, Jesús, Pedrosik aibiride geb Pedro dakde. Pedro wile itoali gakansasad bali, degine, nachunna geb boali

Dad gaargua viernes wagdar, sacerdotemala Jesús sesmala e igar itoged neg dummad siiche, Sanedrín we neg nuga. Wegine igar amiarmala igi Jesús imakmaloe. Poncio Pilato sega sesmala, we duledi Judea yargi aunni neg dakmai.

Pilato gala sogmala: ‘We dule, dule isgana. Oburgweleged abelege.’ Geb Jesús sega ibmar egichad sorba, Pilato soggali: ‘We dule gwen ibmar isgana imas an daksulid.’ Degidgi Pilato, Herodes Antipas sega, Jesús sedmalag imachunna. Herodes Antipas, Galilea yar dakmaidi, aunni Jerusaléngi gudii. We dule amba Jesús gwen ibmar isgana imakdii daksurmoga, geb gannar Pilatos, Jesús barmileali.

Pilatodi, Jesús onobie. Aukine Jesús istarmalad dina abemala Pilato dule baid galesiidi onogedi, we dule baiddi nuga Barrabás, dule atursili. Emisgi neg yooruku gubinne, Pilato neg magaba Jesús onosa. Geb Pilato dulemarga soge: ‘¡Dakmalana! ¡Bemar rei!’ Aukine sacerdote e dumagan, binnasur gotemala: ‘¡Oburgwe!’ Degi Barrabás onolechunna, geb Jesúsdi selesa oburgwelegega.

Viernesgi, gebe Dad ailudegi, suargi Jesús bioksamala. Sobarnaidgi be dake, aukine Jesús dikarba egeg dule isganamar warbo suargi nasiklesmarmoga burgwemalaga. Geb Jesús burgwed iduale, wargwen Jesúsga soge: ‘Be reinog be arbadele, an ebinsao.’ Geb Jesús abin sogde: ‘An beg soge, Neg Yeer Daklegedgi be anbo gudisaoe.’

¡Ibiyob nued gue ega ibmar soglesad! ¿insoa? ¿Be wisi we neg yeer dakleged Jesús obarisadi, ibu obare? ¿Bia gebe unni Bab Dummad neg yeer dakleged nasichunna? Napaneg gine. Geb Jesús nibneggi neg dakmai gude sogele, gannar we dule odulogoe Napaneggi Neg Yeer Dakleged gannar nagunonikoedgi yeer itodi guega. ¿We nued gusur be binsae?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30



Egislenaid

  • ¿Doa bur nue alamasadi Jesús oburgwega?
  • Bab igar gine emar idumaladi Jesús sesmargua, ¿ibu imasmala Jesús apostolmar?
  • Sacerdote e dummad Caifás neg yagine, ¿ibu ibmar gusa?
  • ¿Ibigala Pedro nade geb ibig boali?
  • Gannar Pilato asabinni Jesús sesmargu, ¿igi sacerdote e dumagan gollarmala?
  • Viernesgi Dad ailuded siki ¿igi Jesús imaklesa, geb e nagab suargi dule isgana nai gusad gala, ¿ibu imakoye sogsa?
  • Neg yeer dakleged Jesús obarisadi, ¿bia nagunonikoe?

Bamalad egislenabalid

  • Absoge Mateo 26:57-75.

    Judíomargad igar itoged neg dummad siid gine arbamalad ¿igi na oyosmala gwage isgana nikmala? (Mat. 26:59, 67, 68.)

  • Absoge Mateo 27:1-50.

    ¿Ibig anmar sogsale Judas binsasadi ibig an weyob ibmar imakdibeye, binsa gordi daklege? (Mat. 27:3, 4; Mar. 3:29; 14:21; 2 Cor. 7:10, 11.)

  • Absoge Lucas 22:54-71.

    Pedro, Jesús bali gudiguchurye na sognai gusad gine, ¿ibu anmar durdake? (Luc. 22:60-62; Mat. 26:31-35; 1 Cor. 10:12.)

  • Absoge Lucas 23:1-49.

    Sabesur e imaknanagu, Jesús ¿ibu imasa, geb, ibu we gine anmar durdake? (Luc. 23:33, 34; Rom. 12:17-19; 1 Ped. 2:23.)

  • Absoge Juan 18:12-40.

    Pedro dulemar dobgusadba sikirmas inigwale, sorba gannar gannales bali geb Jesús apóstol bur yeer alamasad gala gusa. Weyob Pedro gusad gine, ¿ibu anmar sega oyolege? (Juan 18:25- 27; 1 Cor. 4:2; 1 Ped. 3:14, 15; 5:8, 9.)

  • Absoge Juan 19:1-30.

    ¿Igi Jesús binsasa ibmar nikgued siki? (Juan 2:1, 2, 9, 10; 19:23, 24; Mat. 6:31, 32; 8:20.)

    ¿Igi Jesús napi ibmar sogsad gine na oyosa, Jehová na wargwen gine neg dakmaid bali nue nai gusa? (Juan 16:33; 19:30; 2 Ped. 3:14; 1 Juan 5:4.)