Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

80: Israel dorgan Babiloniag nodmala

80: Israel dorgan Babiloniag nodmala

BIRGABO guchaale Babilonia, medomarse geb persamarse sulesad akale. ¡Emisgi be dakbalina igi neg gunabali! Israel dorgan Babiloniag nomamai. ¿Igi nabir onolesmala? ¿Doa emar onosadi?

Ciro emar onosadi, Persia e rei. Dikasur gusa, Ciro gwaluleged iduar, Jehová e gaya berbeged Isaíasga sogsa, weyobi garda narmakoye we dulesik: ‘Igi be ibmar imaked an abege, aa bali be ibmar imako. Wagag beg argaar sigoe, neggweburgi be nabir ubomalaga.’ Degine gakansuli, Ciro Babilonia suedgi emar idusadi. Medomar geb persamar mutikidba neggweburgi ubosmala, wagag argaar sigwisad bali.

Aukine Isaías, Jehová gaya berbegedi, amba sogsa bali Ciro igar ukoedye, Jerusalén neggwebur geb Jehovás goled neg sii gusadi, gannar sobmalaga. Degite, ¿Ciro we igar uksa? Eye. Israel dorganga weyob sogsa: ‘Jerusalénse namalo, geb agine bemar Bab Dummad Jehová sega goled neg sobmalo.’ Emisgi Israel dorgan we ibmar imakeg nadapmala.

Israel dorgan babiloniag wakinmamaid

Aukine, Israel dorgan Babiloniag gudimaladi bergwable geg namala, ar we nanalegoedi yeer sugu nanamaloenad, 800 kilómetrosaar. Ar bukidar Israel dorgan bat nue sered gusmalad, nue boni nikmarbalid, namalaga. Degine, ibmar soggwen ulale abar geg namarbali. Auki, Israel dorgan naosurmaladga, Ciro sogsa: ‘Mani be ukmalo geb olo, degine, ibmar bamalad, Jerusalén sobnamaloedga geb Jehovás goled neg sobnamaloedga.’

Degsoggu, Israel dorgan Jerusalénse namaloedi, ibmar bukidar nikgusmala. Degine, amba Ciro ega uksa gusbali noggobemala geb bormo gobed simaladi, Jehovás goled neg siid yaba onolesmaladi, rei Nabucodonosor Jerusalén obelosgua. Degsoggu, neggwebur ibmar bukidar sesmala.

Niwarbake guchaled sorba, Israel dorgan Jerusalénse owarmakdapmala, ibamar soglesad balillagwa. Nue innikigwadgi, 70 año gusa, Jerusalén neggwebur obelolesad akale, geb neggwebur ollo nagusad akale. Auki, Israel dorgan na neggweburse nonimar inigwale, iba bulegan emargi danikoe. Anmar dakoena igi gudmala.

Isaías 44:28; 45:1-4; Esdras 1:1-11.



Egislenaid

  • Sobaled gine, Israel dorgan ¿ibu imaknanai?
  • ¿Igi Jehová iduakwa Isaías gala ibmar sogsad, Ciro imaknoni gusa?
  • ¿Igi Ciro sogsa, Israel dorgan geg Jerusalén sega nae gusmalad gala?
  • ¿Ibu Ciro dulemarga uksa Jerusalén sega sedmalaga?
  • ¿Bule suid Israel dorgan galesmala, Jerusalén sega owarmakmala gala?
  • ¿Birga bigwa Jerusalén dulemar sate mellenai gusa?

Bamalad egislenabalid

  • Absoge Isaías 44:28 geb 45:1-4.

    ¿Igi Jehová sogsadgi oyolege, ibmar iduakwa Cirosik soglesad gakan guchuli? (Isa. 55:10, 11; Rom. 4:17.)

    ¿Igi Isaías iduakwa Ciro siki ibmar sogsad gine oyolege, ibmar amba yoo gued Jehová dina bat iduakwa wisdae? (Isa. 42:9; 45:21; 46:10, 11; 2 Ped. 1:20.)

  • Absoge Esdras 1:1-11.

    Jerusalénse geg nae gusmalad yobi, ¿igi anmar nabir Jehovág arbaed na e arbaedga imakmalad bendasmarmogale? (Esd. 1:4, 6; Rom. 12:13; Col. 4:12.)