Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

79: Daniel leónmar abargine

79: Daniel leónmar abargine

¡BE DAKE! Daniel leónmar abargi gwichi. ¡Boni bipigwaye! ¡Auki leónmar gwen akar Daniel imaksurmala! ¿Be wisi ibigala? ¿We doa Daniel odosa leónmar abargi? Anmar dakoena.

Emisgindi Babiloniag rei neg dakmaid nuga Darío. We reidi nued Danielgi binsae, ar Danieldi dule nued dasoggua geb dule yeer ibmar wisid gubarsoggua, agala Darío e reinogi dummadga Daniel onugsasa, neg dakmai gue gala. Auki dule bamaladi Danielgi nobguarmala, geb ibmar soggwen imasmala.

Darío

Daríos nadmala geb sogdapmala: ‘Reiye, bela anmar abegedbii, be igar mesedi, 30 día gine dule wargwensaale bab dummad baiche golosurye, bab dummadyob melle dulemarse gormarbaloye, unnila be nugbii odummolegoye. Dule wargwen we igar sogedba igar imachulile, leónmar bukwad abarse mellenaoye.’ Daríodi wichuli ibigala we dulemar deyob igar mesbimala. Deginigwale, ega igar nued gumoga, degsoggua, deyob igar mesisa. Emisgi igar megisadi, geg bar ogwalege.

Daniel we igar megisad wisgunonigu, na negse nade Bab Dummad sega golega, igi na iduale imakdi gudae. Dulemar isganamar dina wismalana Daniel, Jehová sega goledi indakosulina. Degsoggu yeer itomala, ar binsamala emisgindi Daniel anmarse obelolechunye.

Darío mag itoargua, igi ibmar imaklenai, wile itoali. Auki geg bar igar megisad ogwalege, degsoggu soge daklearsunna, Daniel, leónmar bukwache mellenaoye. Auki Danielga rei soge: ‘Bitiki Bab Dummad ega be arbadiidi, be bendasan gadina.’

Darío suli suli itoge, aa mutiki gabsur guali. Oibosgu, gwae abarmade leónmar bukwad negse. Be dakena, ataknaid. Geb binnasur Danielse gote: ‘¡Daniel, Bab Dummad dula maidga arbaed! ¿Leónmarse be gullechuli? ¿Be Bab Dummad ega be arbadiidi, un be bendasa?’

Daniel leónmar abargi

‘Bab Dummad na e anger barmiali,’ Daniel abin soge, ‘geb bela leónmar gaka makagwale bukwa imasa, mer an gunmalaga.’

Rei yeer itoge. Geb sogsa gwae Daniel onomaloye. Degi Daniel muchupi, aka Daniel oburgwebi gusmalad egwallesmala leónmar abargi. We dulemar amba yoo napas argwanmala, bat leónmar egi alamakdemala, geb bela e garmar ei ber oubimadmala.

Degid gine, rei Darío bela e neggweburga garda mimisa: ‘Daniel e Bab Dummad maidgi mer dodomaloye. Wedi ibmar dakledisulid nabir imaked. Daniel bendasad, mer leónmarse gullegega.’

Daniel 6:1-28.



Egislenaid

  • ¿Darío doawa, geb Danielgi igi binsae?
  • Abar dulemar nobed bali, ¿ibu ibmar Darío imake gala imasmala?
  • ¿Ibu Daniel imasa, igar gwapid megisad wisgusgu?
  • ¿Ibig Darío wile itoge, geb gabsur guali, oibosgua ibu imasa?
  • ¿Daniel igi Darío abin soge?
  • Dule isganagan Daniel iblobigusmalad, ¿igi gusmala, geb Darío igi garda narmasa bela neggweburmar dakmamaid gala?

Bamalad egislenabalid

  • Absoge Daniel 6:1-28.

    Jehovág sunmakmalad e istarmaladi, ¿ibu ibmar imakdamarmoga, Jehovág sunmakmalad e arbaed galegega, epennegi Daniel oburgwebigusmalad yobi? (Dan. 6:7; Sal. 94:20; Isa. 10:1; Rom. 8:31.)

    ¿Igi Babga arbadimalad, “dummagan neg dakmamaidba” Daniel yobi igar sasmarmogale? (Dan. 6:5, 10; Rom. 13:1; Hech. 5:29.)

    ¿Igi anmar Jehovág arbadiid ‘indachulile’, Daniel yobi? (Dan. 6:16, 20; Fili. 3:16; Rev. 7:15.)