Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

78: Galu gine ibmar narmaklesad

78: Galu gine ibmar narmaklesad
Galugi ibmar narmaklesad

¿IGI weg emisgi neg gunabali? We dulemar iba dummad onobukwa. Babilonia e rei, miliba mergu dulemar nug nikmalache gocha, ese dagmalaga. Jerusaléngi, Jehovás goled neg siidgi, noggobemar olobimalad onolesmaladi geb noggobemar manisibu sobarmaladi, bormomar gobed simaladi, ebunanai. Geb ukiagwale, dule argan noali, geb neg galug e goo ibmar narmakali. Bela gwakismala.

Belsasar e sordagan

Belsasar, Nabucodonosor e wagwa, emisgi reig mai. Geb binnasur emarse gote, e dulemar ibmar wismaladi ega sedamaloye. Geb rei sogdesunna: ‘Dule nabir we narmakarnaid absosale, geb anga sogsundibe ibu we obarnai, ibmar bukidar an ega ukoe, bamalad bali bur nug dummad nikguoe neg dakmai guega, an yarbali.’ Auki, wargwensaale e ibmar wismaladye sogmaladi, ega gwen absochurmala ibmar galug narmakar naid, geb ega gwen sogsasurmar bali ibu obarnai.

Rei e nana, ibmar binnasur gole itoargua, mas gunned negyab dognoniki. ‘Mer be doggus dobedar itoge,’ reig soge. ‘Be reinog dule wargwen gudii, aa dule bab dummad gwage swilidikmalad wisi. Be dad Nabucodonosor reig magua, we dule onugsasa, dulemar ibmar wismalad e dummadga. Danielye nuga. We dule be sedager gebe, geb Daniel beg sogoedi ibu we ibmar obare.’

Degsoggu gwae Daniel senonimala. Auki Daniel soge, ibmar eg uklegoedi abin suosurye. Geb sorba Daniel sogdesunna ibig Jehová, Belsasar e dada reig neg dakmagua ibagwengi obacha gusa. Daniel soge: ‘Dogdar na dummarba imasad bali, geb Jehová agala odurdachunna.’

‘Ar be wisina igi bela ibmar gusa,’ Daniel Belsasarga soge, ‘degi inigwale amba Nabucodonosor yobi be na dummarba samogad. Jehovás goled neg yagi noggobemar onolesmalad geb bormomar gobed simalad be sealid; we nogmar be ebusad. Suar sobarmalad geb akwa sobarmalad na bab dummadga be imasad, geb Bab Dummad anmar Obinnisad nug gwen be odummochulid. Agala Bab Dummad we argan barmialid ibmar narmakega.

Geb Daniel sogde bali: ‘Narmakar naidi, wegi narmakale: MENE, MENE, TEKEL, degine, PARSIN.’

‘MENE soglege Bab Dummad be reino dakmaid ibagana ebichaye geb ega bergued iba nasisye. TEKEL soglege, nibirgi be wilupdaklesye, geb be daklesye be nued suli. PARSIN soglege be reino, medomarga geb persamarga uklegoye.’

Geb amba Daniel sunmakgwichi medomala geb persamala Babiloniag ubononimala. Bela neggwebur susmala geb Belsasar oburgwismala. ¡Degsoggu, neg galug igi ibmar narmakar nai gusa, aka aa mutiki deyob ibmar gusa! Auki Israel dorgandi, ¿igi emisgi gudmosunnoe? Sorba anmar dakoe, auki anmar bin dakoloe, igi Danieldi gudmoga.

Daniel 5:1-31.



Egislenaid

  • ¿Igi ibmar gusa Babilonia rei iba dummad onosigua, geb Jerusalén gine Jehovás goled neg siid e noggobemala geb bormomar gobed simaladi, ebusigua?
  • ¿Igi Belsasar sogsa e dulemar ibmar wismalad gala, auki ibu geg imake gusmala?
  • Belsasar gala ¿igi e nan sogsa?
  • Daniel reig sogsa yobi, ¿ibig Jehová imasa, argan neg galu gine ibmar narmaked?
  • ¿Ibu sognaye Daniel sogsa, neg galu gine narmakarnaidi?
  • Amba Daniel sunmakgwichi, ¿igi ibmar gunoniki?

Bamalad egislenabalid

  • Absoge Daniel 5:1-31.

    Bab Dummad gine dobe itoged, ¿ibug akar gue Belsasar dobe itosad bogwa, galu gine ibmar narmaklesad daksagu? (Dan. 5:6, 7; Sal. 19:9; Rom. 8:35-39.)

    ¿Igi Daniel na oyosa dobsuli, Belsasar asabinni sunmasgu, geb bamalad dummagan bukmalad asabinni? (Dan. 5:17, 18, 22, 26-28; Hech 4:29.)

    ¿Igi Daniel 5 gine anmarse oyolege unnila Jehovábii dule dummad guye bela neg dakmai guega? (Dan. 4:17, 25; 5:21.)