Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

77: Bipisaar sindigar sigichurmala

77: Bipisaar sindigar sigichurmala

¿BE EBINSAE we sapingan warbaagwachik be durdasadi? Daniel e aimala, mas nued gusulid abin obachamaladi. Babilonia dorgan we masmala bimala Sadrac, Mesac geb Abednego. Auki, emisgindi be dakena. ¿Ibigala wemar dina bamalad yobi, dullu dullu gunanasuli ibmar sobaled dummad asabini? Anmar dakoena ibigar dibe.

¿Be ebinsae Jehová na igarmar narmasgusadi, Igar Sogambegidye bilemaladi? Gebe nodedgi soge: ‘Mer bab dummad bamalache be gormalo, unnila ansebii.’ We sapingan we igar soged bali imaknanai, amba we ibmar imakedi ibigwensur gusuli inigwale.

Nabucodonosor, Babilonia e rei gumaidi, bukidar dule dummagan gudimalache gocha, e ibmar sobsad odummoe gala. Emisgi, bela dulemar ambakgunonimalad gala sogsa: ‘Garmar goled itoarmalale, arpa, geb bamalad garmala, we or sobar gwichid asabinni be sindigar sigmalo. Dule sindigar sigsulile geb we ibmar sega gorsurbalile, madu yoed diopisur siid yabali yog metelegar guoe.’

Nabucodonosor itoargua Sadrac, Mesac geb Abednego sindigar sigwichurmarye, nue sae itoali. Imasa, esega sedamaladi. Gannar ega sogsa bali ibu imakmalad abelege. Auki sapingan Jehová bensurmala. Sogmala: ‘Anmar Bab Dummad gala anmar arbadimaladi nabir anmar bendaked. Aukine, amba anmar bendaksulile, anmar dina be or sobar gwichid asabinni sindigar sigosuli.’

Sadrac, Mesac geb Abednego

Deyob sogmala Nabucodonosor itoargua, aka bur bule sae itoali. Madu yoed itakasaar sii, geb Nabucodonosor soge: ‘¡Madu yoed soo gatik ogannomalo, ilagugle wilup bur bule idualed bali!’ Degidgi imasa, e soldadomar bur yeer gangumaladi, Sadrac edinmala gala geb Mesac, Abednego, geb madu yoed diopisur siid yabali metemala gala. Madu yoed bela bela diopisuli sii, degsoggu we dulemar yeer gangumalad burgwismala, soogi warmakdapmargua. Auki ¿sapingan warbaagwad dina, yabali metelesmalad, adi igi gudmala?

Degidgi, madu yoed siidyab rei ataknadgua, dummad gwakisa. Rei egichali: ‘¿Anmar dulemar warbaa edichasursi, madu yoed diopisur siid yabali anmar metesursi?’

E maigan ega sogmala: ‘Eye, anmar deyobi imasa.’

Geb rei sogdeba: ‘Auki, andi dulemar warbake soo abargi gudii daked. Atinnarsurmala, geb gwen akar soo abinni gusurmala. Degine, wargwendi anger yobi daklege.’ Geb madu yoed wagagse rei walika ataknade, geb binnasur gote: ‘¡Sadrac! ¡Mesac! ¡Abednego! ¡Be nodamala, bemar Bab Dummad Bur Dummad gued e maigan gumalad!’

Noarmargu, bela dulemar daksamala gwen akar guchurmala. Geb rei soggali: ‘¡Sadrac, Mesac geb Abednego Bab Dummad, e nug odummolegedi! Na e anger barmiali geb we sapingan bendasa, ar ibmar soggwensaale wemar sindigar sigega imachulid bali. Unnila na e Bab Dummad asabinni sindigar sigdimala.’

We sapingan weyob ibmar imasmaladi, ¿anmar ogannosur be binsae, Jehová bali innikigwadba nanaedgi?

Éxodo 20:3; Daniel 3:1-30.



Egislenaid

  • Nabucodonosor, Babiloniag reig maidgi, ¿igi dulemarga igar uksa?
  • ¿Ibig Daniel aimar warbaagwadi, or sobar gwichid asabinni dullu dullu gunanasuli?
  • Nabucodonosor gannar we sapingan warbaamalad gala sogsagu ibu ibmar imakmalad abelege, ¿igi we sapingan oyosmala Jehová bensurmala?
  • ¿Ibu Sadrac, Mesac geb Abednego imakmaloye Nabucodonosor e soldadomarga sogsa?
  • ¿Ibu Nabucodonosor daksa, madu yoed yab atasgu?
  • ¿Rei ibig Sadrac, Mesac geb Abednego e Bab Dummad nug odummosa, geb ibu ibmar anmar egi durdake?

Bamalad egislenabalid

  • Absoge Daniel 3:1-30.

    Bela anmar Babga arbamalad wilup daklear sogele, ¿igi sapingan warbaagwad yobi, anmar dae gumogar gebe? (Dan. 3:17, 18; Mat. 10:28; Rom. 14:7, 8.)

    ¿Ibu ibmar wisgueg Jehová, Nabucodonosor imasa? (Dan. 3:28, 29; 4:34, 35.)