Yaba nanaid daggega

Menú baid daggega

Índice daggega

Jehovági sunmagmalad

dule

Bemar nabir neguyagi yeer iddodi gudigued

 SECCIÓN 8

Bega neg dargwen gunoniggir

Bega neg dargwen gunoniggir

“Ar a ular, emigindi be wergudimarsunnad. Degi inigwele, amba be wegi siggwas wilubdaglenanaimalad.” (1 Pedro 1:6)

Anba be alamaggo inigwale be gwenagan nued gudigumalaga ibagwengi sun bemarga neg aggar gunonibaloed (Eclesiastés 9:11). Bega wis neg aggar gunoniggo inigwale Babdummaddi be iegosurmogad. Bibliagi ibmar nanaidba be igar imaggele, anba bega bela belad neg gagalenoniggile, be ibigwensur abin siggirmaggosulid.

 1 MER JEHOVÁ BENGUO

BIBLIAGI SOGLENAID: “Bemar surbinsa iddodiidi, bela Babdummadga be ugmar, ar Babdummad bela bemar nue aggwediid” (1 Pedro 5:7). Ebinsao, bega neg dargwen gudele, Jehová nugginsurdaed (Santiago 1:13). Be, egi bangusulile be bendagmogoed (Isaías 41:10). “Babdummad asabin be nadele, bela be boni niggad ega be sogo.” (Salmo 62:8.)

Be bane bane Biblia absodibe, geb be nueggwa durdagbardibe we ibmar be bendaggoed. Be deyob imaggele be dagdagoed, “Babdummad bela anmar wilediidgine anmar gwage armagged” (2 Corintios 1:3, 4; Romanos 15:4). Ar Jehová sogmaid, “ulubgi bogidig iddoged bemarga uggo[ye]” (Filipenses 4:6, 7, 13).

WEYOB BE NABIR IMAGGED:

  • Jehovága sogo, an bendagye mer binsassuli yogsaar an ibmar imaggega

  • Nueggwa igar amigo, daggega igi bur ibmar imaglegoe

2 NUEGGWA OME AGGO, NUEGGWA MIMMIGAN AGGWEBALO

BIBLIAGI SOGLENAID: “Dule iddoaggwaadaed ibmar nuegan baramied. Dule binsaed ibed gaddig ibmar wisgued nigguegala, nue ibmar iddodaed” (Proverbios 18:15). Nueggwa daggo ibu be ome abege, geb ibu be mimmigan abemarmoga. Be omebo, geb be mimmiganbo nueggwa sunmaggo. Nueggwa abin iddobalo (Proverbios 20:5).

Be neguyagi dule wargwen burgwisale ¿ibu be imagbaloe? Mer binge boo. Ebinsao, Bibliagi soglenaid “Jesús bo[smoye]” (Juan 11:35; Eclesiastés 3:4). Obunnoged abelegoed, nueggwa gabed abelebaloed (Eclesiastés 4:6). Degiile be nabir binsaed nigga ibmar imadoed.

WEYOB BE NABIR IMAGGED:

  • Iduaggwa be, be omebo, be mimmibo sunmagdaele, bemarga neg dargwen gudele emarmoga dobe dobe bebo sunmaggosurmarmogad

  • Dule baid bad deyob gusmogale, aa dulebo sunmaggo

 3 EMARSE BENDAGGED EGISO

BIBLIAGI SOGLENAID: “Dule, ai guedgine, gusgu ai sabguerbad. Degisoggu, boni dummad ibagan noniggile, gwenad gargwenadyob gued” (Proverbios 17:17). Be aimar sun be bendagbieled, auggi sun aggu iddomalaled ibu bega imagger gebe, degsoggu sogo ibu bega imagged be abege (Proverbios 12:25). Gwenagan idudimalad nabir be bendagmarmogad, Biblia sogedba bega binsaed dagmaloed, mer be doggus buggib binsadii guega (Santiago 5:14).

Be aimala inniggigwad Babga arbamaladile, geb Bab bengudisurmarbalile, wemala be bendagmarmogoed. Be, gwenagan buggib binsadidimalad bendagmogale, we ibmar be ogannobaloed. Gwenaganga sogdao, ibiga be Jehová bensuli, Jehová yoogidse ibu ibmar nuegan anmarga imaggoe. Emar bendaggedgi bur binsadii guo, mer aimar nuegangi banguo, ar wemala be bendaggedgi binsadimarmogad (Proverbios 18:1; 1 Corintios 15:58).

WEYOB BE NABIR IMAGGED:

  • Be ai nuedbo sunmaggo, bega ibmar soggalir nueggwa abin iddogo

  • Ise sogar imaggo ibu ibmar bur be abege