Yaba nanaid daggega

Menú baid daggega

Índice daggega

Jehovági sunmagmalad

dule

Bab igargi be mimmi odurdaggo

 LECCIÓN 3

Rahab, Jehová bengussulid

Rahab, Jehová bengussulid

Anmar binsaoena, anmar Jericó neggweburgi gudimoye. Jericó, Canaán yargi nainad, aaginmaladi Jehová sordasurmalanad. Aa neggweburgi Rahab mamoganad.

Rahab bunologwa unni iddosad, igi ebbenne Moisés, Israel dorgan Egiptogi galebuggwagu onosa, iddosbalid igi Mar Rojo odingusbali, iddosbalid igi Jehová, Israel dorgan bendagmai gusbali, uluarmalar nabir e isdarmaladgi nagmai guega. Rahab emigindi iddoarbalid, Israel dorgan Jericó nagab buggonimarye.

Rahab, Jehová bensulidba neg argadidii gusmalad bendasad

Ibagwengi muddiggidba warbo Israel dorgan nonimalad Jericó neggwebur argaega. Rahab neggi dognonimalad. Aa muddiggidba Jericógi rey maidi iddoalid dule warbo neg argaega e neggweburgi dogsa gudiye, Rahab negse dognonimarye. Degsoggu rey, ega arbamalad barmisad, Israel dorgan amigega. Auggi Rahabdi e neg niba dulemar neg argadidiid oduggusad. Rahab, reyga arbamaladga sogsad, nabirinye, neg argamalad wes arbimalanye, bad nadmarye. Bemar emisgwa naye sogmalale, un bemar balegidsamalarye. ¿Be wisi ibiga Rahab, neg argamalad oduggusa?... Ar Rahab bensulinad Jehová, Israel dorganga Canaán yar uggoye.

Neg argamalad naed iduale Rahabga sogsamalad, Jericó neggwebur obeloledele, be, be gwenadganmala bendaglemaloye. Be wisi Rahab bendaglegega ¿ibu imaggoye ega sogsamala?... Ega sogsamalad, we dub ginnidi be neg ventanagi be nasiggoye. Deyob be imasale bela be neg yabba buggumaloed bendaglemaloye. Rahab, neg argamalad ega ibmar sogsad balilla ibmar imasad. Be wisgubie ¿igi sorba ibmar gusbali?...

Jehová, Rahab bendas, geb e gwenagan bendasba

Israel dorgan, Jericó neggwebur ebiriarmargua, oimagnadab gussurmalad. Iba nergwa Jericó neggwebur ebirdii gusmalad. Ibagwengi irgwen Jericó neggwebur ebirisdamalad. Iba gugle gusgudina, ila gugle neggwebur ebirismalad, degiidgine bule binna goddemala. Aa sorbali Jehová bela Jericó neggwebur yaar imasad. Neg, egi dub ginnid yaarmagnaiddi aggar gussulid. Be dagsa sobar naidgi, ¿bia aa neg sii?... ¡Rahab na e gwenagan buraggwa bendaglesad!

 ¿Ibu ibmargi Rahab be odurdasa?... Rahab iddossoggua Jehová na neggwebur bendagmai gusa, aaga Jehová bengussulid. Emi ibagine, be, Jehová ibmar imagmaid durdagnamogad. ¿Rahabyobi be, Jehová sogedba igar imagmogoe?... ¡Anmar wisid, be, Jehová bensurmoga!

BIBLIAGI ABSOGO

  • Josué 2:1-24; 6:1-5, 14, 15, 20-25

  • Hebreos 11:31