Yaba nanaid daggega

Menú baid daggega

Índice daggega

Jehovági sunmagmalad

dule

Bab igargi be mimmi odurdaggo

 LECCIÓN 6

David bibbisaar dobgussulid

David bibbisaar dobgussulid

¿Dobgualile be ibu imasdae?... Sun be, be nanse abarmadoed, be babsedibe, be bendaggega. Auggi dule wargwen maid, nabir be bendagmogad, adi bur emarba yeer gangued. ¿Be wisi we dule doagi?... Adi Babdummad Jehovád. Degsoggu nabir be Jehovága soged, an bendagye. Bibliagi dule wargwengi sunmaglenaid, Davidye nugad, anmar we dulegi sunmaggoed. David nue wisi gudigusad, Jehová e bendagdaedi, aaga bibbisaar dobgudii gussulid.

David anba bibbigwa, e sergan na Jehová igargi odurdasad. Aaga David dobgudii gussulid, ega neg undar guargua dobgussurbalid. Ar wisinad Jehová e ai nuedi, aa e bendaggoedi. Ibagwengi David, ovejamar aggwedii, león dummad noalid oveja wargwen ese galesad. ¿Be wisi David ibu imasa? David, león balegidsad, un león oburgwisad. Oso, oveja gunbi guargua, David, oso oburgwisbalid. ¿Doa David bendas be soge?... Jehová.

Ibagwengi David, dule buled abinguargua dobgussurbalid. Aa unni Israel dorgan Filistea dorganbo urwenainad. Filistea soldado wargwen bela beladse dunguedi, Goliatye nugadi, Israel soldadomargi dodononidaed, Jehovági dodoardabalid. Israel dorganga soggardaed, anbo urwedamarye, bule bemar angi naggwisardibeye. Bela dobe ebo urwenaedbimalad. David we ibmar wisgusgu Goliatga sogsad, ani an bebo urwoedye, ar Jehová an bendaggosoggua, an begi naggoye. ¿Be dagsa, David bibbisaar dobgussulid?... Eye, bibbisaar dobgussulid. Be wisgubie, sorba ¿igi ibmar gusbali?

David, dub aggwa mied sesad, aggwa gwaaddar sesbalid, geb dule bela beladse dunguedbo urwenaded. Goliat daggargua, massi bibbi egi daniggi, Davidgi dodoalid. David, Goliatga sogsad, bedi es suid an oiddogega sedaniye, andi, an Jehová nuggi begi nadabye. David, Goliatgi aggwa miega dubgi aggwa sisad, Goliatsig abarmaded, geb Goliatgi inniggii aggwa medded. Aggwa, Goliat bebegi yoledabbid, geb ¡Goliat biggin agladed! Filistea  dorgan gwaggidedba duurmadmalad. David, massi bibbigwadde, ¿igi nabir dule bela beladse dunguedgi obidsasunna?... Jehová, David bendasad, ¡ar Jehovádi bur bule yeer Goliatba ganguenad!

David dobgussulid, ar wisinad Jehová e bendaggoedi

¿Ibu ibmargi David, be odurdasa?... Dule wargwensaar Jehováyobi gangued sadded. Jehová, be aimosoggua ibagwengi be dobe iddoalile, ¡Jehová, be bendagmogoed!

BIBLIAGI ABSOGO:

  • Salmo 56:3, 4

  • 1 Samuel 17:20-54