Yaba nanaid daggega

Menú baid daggega

Índice daggega

Jehovági sunmagmalad

dule

‘Bab be sabgumai guega, mer egi banguo’

 CAPÍTULO 2

Ibigala nuedi ulubgi nued iddodi gued

Ibigala nuedi ulubgi nued iddodi gued

“Nued nanamar, ulubgi gwen isgudisuli iddogedgi” (1 PEDRO 3:16).

1, 2. Be neg sidsigi igarba gudiile, ¿ibigala nue abelege braslaid sedii gued, geb ibigala Jehová anmarga gwage ulub nasismoga?

BE IGARBA nadabbi bega neg muddig gudele. Mer be neg sidsigi goo yolegega, be, braslaid semair gebed, bega neg mee imaggega.

2 Neg sibbusulidgi, be, braslaid sadde nadabbile geg be igar dagged, sun be boni amiged. Degsoggu boni bibbisulid neg sidsigi braslaid sadde nanaed. Jehová anmarga gwage ulub nasismogad, anmar walagwen mag na iddodii guega, ibu ibmar anmar imagdii (Santiago 1:17). Jehová weyob anmar imassulina, anmar yogasaar ibmar imagdii guoenad. Degsoggu anmar mag iddodibe ibu ibmar nuedi, aaba anmar ibmar imagdidibe, anmar igar isganaba naosulid. ¡Ibiyob nued Jehová anmargi binsas daglege weyob anmar imasadba! Anmar durdaggoed ibigala Jehová weyob anmar imasa, sorba anmar durdagbaloed, 1) igi anmar nabir wisgusale biddi igar nuedi, geb biddi igar issaggwagwadi; 2) ibigala anmar, dulemar bamaladgi binsaed abelebali, geb 3) ibigala nuedi anmar gwage ulubgi nued iddodii gued.

IBUA ULUBYE SOGLEGED

3. ¿Dule gayaba soglegedi “ulubye”, griego gayabardi ibu obardae? ¿Igi dule, ibmar durganbo aggar imaggale?

3 Dule gayaba soglegedi, “ulubye”, griego gayabardina obardaed “ulubgi na dule wisi gudiidi, ibu ibmar imagdii”.  Degsoggua anmarbi na wisid, anmar, dule igi daedi, ibmar durgandi deyob imaglegarsurmalad. Jehová anmarga gwage ulub nasissoggua anmar mag na iddogega ibu anmar imagdii, degsoggu we ibmar anmargi naggulediyobid, anmarga sogdiyobbalid ibu ibmar anmar imagdii, geb ibigala anmar deyob ibmar imagdabali. Aagala anmar ibmar nued imasale, yeer iddodaed; anmar ibmar isgana imasardina, buggib binsadaed.

4, 5. a) ¿Igi anmar wisi Adán, Evabo mag neg iddo imaglesmalana? b) ¿Ibigala Job dobe dobe sogsasuli, an ibmar isgana imagdi gussurye? ¿Ibigala Daviddina buggib binsadii gusa?

4 Jehová, Adánga gwage nasisad mag na ibmar imagdiid iddodii guega; Jehová anba deyob Eva imasmogad. Aaga Bab igargi yolesmargua bingegguarmalad (Génesis 3:7, 8). Mag na iddosmalanad Bab igargi yolesmala, auggi geg bar neg onugumalanad. ¿Ibigala emarga geg bar neg nuguena? Ar nue wismalanad igi Jehová igar maina. Degsoggu nue wismalanad Babgi yolesmalale, Jehová isdaradga gumaloena, auggine bai dagsasurmalad, agga Babgi agbidsamalad. Aaga bar emarga igar nugussulid.

5 Bela dulemar noedbimar inigwale abar yogasaar ibmar imassurmalad. Be daggena Job weyob sogsad: “An ibmar isganase adsadisulidba, an argan swilidig gued. Aagala, an sunna nabir be ibmar ogummagleged agla ebirdii gued” (Job 27:6). * Job wisile biddi igar nuedi, aaba ibmar imasdaed. Aaga Job nabir dobe dobe sogsasulid, an ibmar isgana imagdisurye. Emisgi anmar Davidgi sunmaggoena, Daviddi bela belad buggib binsadii gusad. Bibliagi soglenaid,  “David gwage nagbi iddononiggid” ibgwensur Saúl imasgu, ar Saúl, Jehová nuggi reygala mainad (1 Samuel 24:5). Weyob gwage nunmag iddosadbali David durdasad ibgwensur emar imagged nuedsuli.

6. ¿Ibigala abar dulemar Jehovába igar saddamala, anba Bab igar wissurmar inigwale?

6 Unnila Jehová igar wismaladbii wisi gudisurmalad biddimar igarmar nuegana. Apóstol Pablo sogsad: “Judíosurmalad, Moisés Igar Maid wissurmalad, na gusgu e daedba Moisés Igar Maidba nanaele, na emar duggin igarga gumardo, ar igar nigsurmar inigwer. Wemar, deyobi, na e daedgi oyomardo, ar igi Moisés Igar Maid ibmar imaggoye sogmaidi, emarde na e gwagegi sedimarye. Na e ulubgi iddogedba ega igar nabolegoed. Ar ade, inbagwena, na e binsaedi egi gwisgunonidaed, we ibmar be noar imagsaye, igidibe, we ibmar be nabir imagsaye” (Romanos 2:14, 15). Jehová anmarga gwage ulub nasisad, anmar mag na ibmar imagdiid iddodii guega. Aaga dulemar anba Jehová igar wissurmar inigwale, mag na iddodamalad noar ibmar imagdiir, ar Jehová deyob dulemar imasad.

7. Anmar nue wisi inigwale ibu ibmar nuedi, ibu ibmar isgana, ¿ibigala anmar ibmar isgana imaddabali?

7 Anmar nue gwage ulubgi wisi inigwale ibu ibmar nuedi, ibu ibmar isganabali, degidde, ¿ibigala inbagwen anmar ibmar isgana imaddabali? Braslaidgi be binsaena. Braslaid nis bergudele bar geg nueggwa neg mee saed. Anmar deyobmogad, anmar, Biblia durdagsulile, anmar gwage ulubgi naguosulid biddi ibmar nuedi, biddi ibmar isgana. Degsoggu agga bur anmar ibmar isgana imassunnoed. Aaga anmar abeged, Jehová, anmar bendagged, anmar, ulubgi nueggwa wisguega biddi ibmar nuedi, biddi ibmar isgana. Pablo narmasad: “Bab Dummad Burba Isligwaled an ulubgi anga sogbalid, an nabbira ibmar sogye” (Romanos 9:1). Auggi ibu anmar imagger gebe Bab Dummad ibmar  isdar dagged, ulubgi, anmar isdar dagmogaga. Anmar, Biblia durdagger gebed.

IGI NABIR ANMAR ULUBGI IBMAR NUEGAN IMAGDII GUSALE

8. a) ¿Ibigala inbagwen anmar gwage, anmar yardaddabali? Anmar ibmar soggwen imagsoggalir ¿doagine bur anmar binsabie? b) ¿Ibigala anmar geg soge, an ibmar isgana imagdisurye? (Urba naid daggo.)

8 Anmar ibmar soggwen imagsoggalir, ¿igi anmar, ulubgi wisi guoe, anmar ibmar imagsoggalid nueddibe, nuedsurdibe? Buggidar dulemar binsadamalad gwagegi na binsanaidba ibmar imagger nuedye. Sun sogdamaloed: “Weyob an ibmar imagger, gwen andi gwage ulubgi aggar iddosulid”. Sun ulubgi anmar mag iddogeled we ibmar nuedsuli, auggi ebinsao, sun anmar binsaedi [gwage] anmar yardagbalid. Deyob Bibliagi soglenamogad: “Dule binsaedi [gwage], ibmar baiganba bur bule isganad, dule yardaggedgi binsadaed” (Jeremías 17:9). Degsoggu bur anmar, Jehová yeer oiddobied, doggus anmargindi anmar binsabisulid. *

9. Anmar abesulile Jehová isdar iddogedi, ¿ibu anmar imaggoe?

9 Dule, ulubgi nue wissundibe Bibliagi igi igarmar mamai, ibmar imagsoggalile unnila na eginbi binsaosulid. Bur we dule Jehovági binsadaoed, Jehová melle isdar iddomai guega. Nehemías deyob ibmar imasad. Jerusaléngi Nehemías dummadga mainsoggua e sogedba nabir neggweburgi mani gae wilubbinad. Degi inigwale deyob  imassulid. ¿Ibigala deyob imassuli? Nehemías weyob sogsad: “Ar andi Bab Dummad dobed ular, deyob an imagsasulid” (Nehemías 5:15). Mer Bab Dummad isdar oiddogega neggweburgi mani gassulid. Anmar, Bab Dummad isdar oiddobisurmogale, anmar ibmar soggwen imagsoggalile, Bibliagi bin anmar daggoloed, wisguega, igi Biblia we ibmargi sunmagnai.

10, 11. ¿Bibliagi igi soglenai, cerveza gobed igarsig? Bibliagi ibmar soglenanaidba anmar igar imaggega, ¿ibu anmar imagger gebe, Jehová, anmar bendaggega?

10 Emisgi anmar igar soggwengi sunmaggoena. Ibagwengi anmarga cerveza uggarmardibe, sun anmar binsadagoed, “igi an saoe, an cerveza gobe, an gobosurdibe”. Nabir anmar igar nued imaggega bin ulubgi anmar nasiggweler gebed, Bibliagi igarmar mamaid. Bibliagi soglenasulid issaggwaye wilubba sisa gobed; soglenaid, Bab Dummad ibmar nued imasye anmarga vino ugsadba (Salmo 104:14, 15). Degi inigwale Bibliagi soglenabalid nuedsurye doggus sisa goberdi, geb nuedsurbarye bular bular munguega iba onoleger (Lucas 21:34; Romanos 13:13). Bibliagi soglenaid munguedi ibmar isganaye, igi galagwensur neg sidsigi nanaed ibmar isganamoga, aayobmoye (1 Corintios 6:9, 10). *

11 Bibliagi igarmar mamaid anmar durdasale, anmar ulubgi mag iddodoed, igi daedi igar nuedi. Degsoggu ibagwengi dule wargwen anmarga cerveza daggarmosundibe, anmar we ibmargi binsagweler gebed: “Bamalad, cerveza gobdemarmogale, ¿igi neg gudoe? ¿Sun urwed nodagoe, galagwensur gudmaloe? ¿Anmodina, geg an unnila bibbi cerveza iddoge, an gobebierba guardamoga? Ugginbali, ¿an unnila cerveza daggegwenmoga, geg bar an indagdae? ¿An nabir sogsale, unnila gwagwen an iddogoye, wesegoye?”.  Anmar Bibliagi igarmar mamaidba igar imagbidibe, anmar wisgubibardibe igi Bibliagi igarmar mamaidba ibmar imaglegoe, anmar, Jehovás goler gebed, anmar bendaggega (Salmo 139:23, 24 absogo). Degi anmar imaggele, anmar Jehovága sognailed, bee be, anmar idugoedye. Anmar durdasbalile, igi Bibliagi igarmar mamai, gwage ulubgi anmar, Biblia sogedba igar imadmogoed. Auggi anmar ibmar soggwen imagsoggalir unnila anmarginbi anmar binsabisurbalid, dulemar baigangi anmar wis binsabibalid.

IBIGALA ANMAR BAMALADGI BINSABIBALI

Be wissoggu Bibliagi igi igar mai, bee be sogoed, be sisa gobodibe, gobosurdibe

12, 13. ¿Ibigala anmar ulubgi emarbi binsasuli? Bela anmar emarbi ibmar imagsursoggua, dule wargwen anmarbo emar binsasulile, ¿igi anmar abin iddogoe?

12 Inbaggwa anmar dagdabaloed, bela anmar gwenadgan emarbi ulubgi ibmargi binsasurmala, geb emarbi ibmar imagsurmarbali. Degsoggu abar sun binsamalad ibmar soggwen wegi imagger gwen aggar daglesurye, auggi sun bamaladdi binsaed, wegi ibmar imagger gwen nued daglesurye. Anmar gannar sunmaggoena cerveza gobedgi. Abar anmar gwenadgana sun wis neggi cerveza gwagwen iddosii gued, wis yeer iddosii saega, auggi sun gwenadgan baigandi wegi ibmar imagger nued dagsulid. ¿Ibigala abar nued dagdamala, ibigala abar issaggwa dagdamala? ¿Doaba anmardi igar imagmogoe?

13 Bela anmar emarbisursoggua, aaga anmar emarbi binsasurbalid. Abar dulemar, anmar sordaganga gued iduale mungumalanad, aaga wemarga ibgwensur gussulid sisa gobed indagmalaga (1 Reyes 8:38, 39). Anmar sogoena gwenad ebbenne gadi munguenad anmarse addagdiile, anmardi ega wis cerveza gwagwen ugbi guardibe, auggi, edi ulubgi mag na iddogele cerveza ega boniga guoe, degsoggua budar gobe gualile, anmar abin isdar iddogedsulid. Nuedsurbalid anmar egi nai nai gued cerveza gobega. Anmar, gwenadgan sabsoggua, gwenad wargwen anmarga soggardibe,  an, cerveza gobosurye, auggi anmar wisgubi gualile ibigala budar gobe, anmarga sogbisulile, aggarsurbalid.

14, 15. ¿Igi anmar wisi bela dulemar ulubgi emarbi binsasuli, geb igi apóstol Pablo sogsamoga?

14 Ebbenne Pablo dagsad, bela Cristo sordagan ulubgi emarbi binsasurmala. Aa unni dulemar nudsumarga san ugdamalanad, geb aa sanmala sorba mercadose uglenaddaed. Degsoggu abar aa dulemar, Cristo sordaganga gunonimargua, aagala aa san gunnedga bagger issaggwa dagdamalanad (1 Corintios 10:25). Pablodi aggar dagsasulinad we san gulleger, ar Jehová dulemarga mas ugmaidid, Pablogardina nudsumardi ibmarsulinad. Deyob ibmar gunagua Pablo mag iddosbalid bela gwenadgan eyob binsaosurmala. Igar aburnainad ¿igi onudaglessunna?

15 Pablo sogsad: “Degisoggu, anmar, Jesúsgi bensuli gannarba gudimalad, gwenadgan, Jesúsgi bensulid nollo gudimalad bendagge wilubmar. Mer duggin anmar na yeer iddogedginbi binsamar. Ar Cristobela ibmar na duggin yeer iddogega imagsasulid” (Romanos 15:1, 3). Degsoggu anmar, Jesúsyobi ibmar imagged abelemogad, ar igi Jesús ibmar imagsoggalir bamaladgi wis binsasdae, aayobi anmar imagged abelemogad. Pablo sogsabalid mer gwenadgan binsa an ular Babgi banguega, bur an mer we san gunsunnoye, ar Cristodega bela we dulemar ular ablis eyosaddeye, degsoggu sun anginbi an binsao sogeye (1 Corintios 8:13 geb 10:23, 24, 31-33 absogo).

16. Gwenad wargwen ibmar imaggalile, bedi ulubgi aa ibmar nued dagsulile, ¿ibigala be aa dulegi issaggwa sunmaggedsuli?

16 Gwenad wargwengardina ibmar dogdar aggarsulile, anmardi aa ibmar ulubgi nued dagsulile, anmar egi issaggwa sunmaggedsulid, ar bela anmar emarbi binsaosulid (Romanos 14:10 absogo). Jehová anmarga gwage nasisad, anmar, ulubgi mag na iddogega ibu anmar imagdii. Jehová anmarga gwage nasissulid, anmar, emargi sunmagdii  guega. Ebinsao, aaga Jesús weyob sogsad: “Mer yogsaar be sogo, we dule isganaye, adi melle Bab Dummad deyob begi sogmogagar” (Mateo 7:1). Bibliagi igar narmaggarmasursundibe we ibmar issaggwaye, aa ibmarba anmar gwenaganbo gassimagnai guedsulid. Anmar gwenadganbo urwed amidii gued abelesulid, anmar bur na sabgudii gued abeleged (Romanos 14:19).

IBIGALA NUEDI ULUBGI NUED IDDODI GUED

Dule neg oaggalodisulile, ulubgi buggib binsadii guosulid

17. Emi ibagi dulemar na isgudiid, ¿igi dag gusmala?

17 Apóstol Pedro na sordaganga sogsad: “Ulubgi gwen isgudisuli” iddodi gumaloye (1 Pedro 3:16). Emi ibagi dulemar gadi ibmar isgana imag gusmarsoggua bar na gwen gwage ulubgi nued iddodisur gusmalad, ar Babba igar sadisurmalad. Pablo sogsad, we “dulemala gwen bar binge  iddosurmalad. Isguedga na san urmagsa gudimarsunnad. Bela ibmar sunnasur imagdimaladgi na wergudimarsunnad” (Efesios 4:19). Wegi soglenaid, dulemar ibmar isgana imagdidiidba gwen binge iddodisurmarye, geb gwen ibmar isgana imagdidii na iddodisurmarbarye.

18, 19. a) ¿Ibigala nue abelege dule wis nosale, mag na iddo gued, nue nosa, geb aaba wis binge iddobalid? b) Be anba ebbenne ibmar imasadba buggib binsadiile, ¿ibu ibmargi binsaed belege?

18 ¿Ibigala nue abelege dule wis nosale, ulubgi mag na iddoged, nue nosa? Degiile mag daglegoed dule gwage nunmag iddodii nosadba. Anmar, ulubgi mag na iddossundibe, anmar nue nosa, bar anmar gannar aa ibmar imaggedgi binsasurbalile, Jehová bar anmar isguedgi binsaosurmogad, aggarsulid bule anmar egi nosa. Deyob rey David gusad, rey David yeer Jehová igargi yolesanad, auggi sorba mag na iddosad nue nosa, aaga Jehová bar e ibmar  isgana imasadgi ega binsassulid. Rey David mag na iddosadbali inniggigwad Babgi yolesa, ibmar isgana imasadba nue buggib binsadii gusad; aaga Jehová sognoniggid: “Bab Dummad, be dule nued gued, isgudsuliyob be emar daggedid” (Salmo 51:1-19; 86:5). Inbaggwa sun anmar buggib binsadii gumogad ebbenne anmar ibmar isgana imasadba. Degi anmar iddodiile, ¿ibu anmar imaggoe?

19 Anmar bad mag na iddosdibe nue nosa, anmar bar ibmar isgana imagbisurbalile, ibig bar anmar ulubgi buggib binsadibalosunna. Anmar ulubgi buggib binsadiile ibmar isgana imasadba, anmar ebinsaoed, Jehová bur nue wisid ibiga anmar degi iddodii. Sun be emarga sogdiir sogdimogad, “Jehová, be sabed, be ibmar isgana imasadgi Jehová bar binsamasulid”, aaba be igar imagmogoed (1 Juan 3:19, 20 absogo). Bar be neg aggar imagdisulile, nued be gudi gudoed, be yeer iddodii gudi gudoed; emi ibagi dulemardina deyob iddodisurmalad. Ebbenne dulemar Jehovági nue yolesmaladi, emidi bar ibmar aggar imagdisurmarsoggua, nued Jehovága arbadidimalad, bar ulubgi buggib binsadidisurmalad (1 Corintios 6:11).

20, 21. a) ¿Ibigala we libro imaglesa? b) Be nabir be daggedba ibmar imagdii gue inigwale, ¿ibu ibmardina imagged abelesuli?

20 Emi ibagi neg duggu mos naidgi Nia, dulemar binsaed gabi gunaid. Mer anmar ese binsaed galegega, geb anmar, ulubgi nued iddodi gubaliga we libro imaglesad. Auggi we librogi bergwable bega soglenasurbalid igi Bibliagi igarmar mamai. Inbaggwa Bibliagi soglenasurdasoggua igi ibmar imaglegoe, degsoggu we gardagi soggwen soggwen soglenanasurmogad igi ibmar imaglenanaoe. We librogi anmar durdaggoed, igi anmar Bibliaba igar sadii gusale, nabir ulubgi anmar mag iddogega ibu ibmar nuedi, geb ibu ibmar isgana. Anmar ebinsabaloed, ebbenne Moisés igar ugsagua, Jehová ise sogar dulemarga imasad igi ibmar imaglenanaoe. Auggi ‘Cristo igar mesnonigudina’ bar  ise sogar imaglessurnanaed igi ibmar imaglenanaoe, degi inigwale sogsabalid, wisgumaloye, ibigala Bibliagi deyob igarmar megwisnanae (Gálatas 6:2). Jehová anmarga sogmai inigwale na bemar daggedba ibmar imagdii gumaloye, auggi soglesulid, anmar, “ibmar isgana” imagdii gusunnoye, bur anmar, Jehová sabgudii nanaed abeleged (1 Pedro 2:16).

21 Be, Jehová igar durdadgua be, igar nued durdaded, nabir yoogidse sadegu gudi guega, mer be, igar nuedgi banguega, be wisguer gebed Bibliagi igarmar mamaidba igi ibmar imaglegoe, nabir be eba igar sadii gumogaga, aaga, be, Babse goler gebed. Be degi imagdisundibe be mag dagnoniggoed “igid igar nuedi, igid igar isganabali” (Hebreos 5:14). Igi braslaid dulemarga neg mee imagdae, mer goo yolegega, aayobi be nueggwa durdasmosundibe Bibliagi igi igarmar mamai, be noar noar ibmar imagdii guosurmogad; degiile be, Bab Dummad sogedba nanadii gumogoed. Degi anmar ibmar imagdiile, Bab Dummad, anmar sabgumai guoed.

^ parr. 5 Bibliagi, Hebreo gayaba ise sogar sognasurdaed, “ulubye”, auggine wegi sognaidgindina mag iddolleged, dule gwage ulubgi ibmar naidgi sunmagnai. Bibliagi, hebreoba, gwagegine sunmaglealile, dule igi dae, aa obardaed, auggine we versículogindina gwageye soglenaidi, nue mag iddolleged, dule gwage ulubgi ibmar naidgi sunmagnai. Griego gayabardi ulubgi sunmagledele, ise sogar nadaed, “ulubye”. Griego gayaba, treinta mergu narmaggar naid, ulubye.

^ parr. 8 Bibliagi soglenaid, anmar sogoedsurye, an gwen ulubgi ibmar isgana imagdii an na iddosurye. Be iddogena Pablo weyob sogsad: “An ulubgi na iddogua, gwen ibmar oaggalodi an iddolesulinad. Degi inigwele, geg an soged, ibmar gwen an oaggalodisurye. Ar unnila Bab Dummadbi sogoed, an ibmar nued imagsadibe, ibmar issaggwa an imagsadibe” (1 Corintios 4:4). Degsoggu anmar unnila binsaedsulid, ulubgi gwen neg aggar imagdii an na iddosurye. Abar dulemar ibmar nued imagdiiye binsaedba Cristo sordagan baleginnardamalad, Pablo ebbenne deyob binsadi gusmogad. Degsoggu, Bab Dummad sogoedid, ulubgi, anmar nued ibmar imagdiye, anmar sogoedsulid, igi anmar ibmar imagdii (Gusmalad 23:1; 2 Timoteo 1:3).

^ parr. 10 Doctormar sogdamalad dule gadi sisa gobedile, sisa gobed indagbiele, mer wis bibbibela bar ebugoye.