¿Sanawa omegan dunuar ibmar imaggoe? ¿Ibiga inbaggwa omegan dunuar ibmar imagged abelege, Jehovága ibmar imagsoggalir? Anmar daggoena, Bab Dummad sogedba igi apóstol Pablo narmasa we igargi sunmasgu. Anmar nueggwa ibmar imagdi guega, geb mer anmar Bab Dummad ibgwensur imagbaliga 1 Corintios 11:3, 16 segadgi binsaed nuegan nanaid. Aagi Pablo ibmar sogbaa sogsad. 1) Ibu ibmar imagnaile omegan dunued abelege, 2) bia we ibmar imaglenaile dunued abelege, geb 3) ibigala dunued abelege.

Ibu ibmar imaglenair, dunulegoe. Pablo ibmar sogbogi sunmasad: Babse gorlesoggalir, geb Bab Dummad gaya burbagi sunmaglesoggalir (versículo 4, 5). Dule Babse goddele, sogleged dule Babga ibmar imagnaye; geb Bab gaya burbagi sunmaggeddina, Bibliagi dulemar odurdagged obared, bela Cristo sordagan we ibmar imaggedgi arbamalad. Omegan, Bibliagi dulemar odurdagmarmogosoggua, geb Babse gordamarbarsoggua, ¿soglesunde geg dunuarsuli we ibmar imagmarye? Suli. Anmar sogega, omegan dunuar we ibmar imaggoye, bin anmar wisgugweler gebed bia we ibmar imaglegoe.

Bia ibmar imaglenair, dunulegoe. Pablo ibmar sogbogi sunmasad: ome na neguyagi ibmar imagsiir, geb gwenagan Cristoba nanaid abargi ibmar imagnair. Weyob narmasad: “Massergan, omegan nonoga gumogad; [...] ar omedi nono dunwesuli  Bab Dummadse gorgwissile, igi, Bab Dummad gaya burba abin gasad barsoggwissile, gwen nabirsulid, e nonogi isdar binsanaiyob gunaido” (versículo 3, 5, Bab Dummad Jesucristoba Igar Mesisad Garda, [NVS]). Jehová masserganga sogsasoggua, neguya sedii gumaloye, igi gudersunna, e ome, e sui ibmar imagged imagge daglealir. Ome bai dagsulile Jehová e suiga neguya seed igar ugsa, degsoggua yogsaar e sui ibmar imagged imadele, inniggigwad e sui obingeggunailed. Sanawa omegan dunued abelegosunna: e sui, neggi sii, Bibliagi dule baid odurdagsiir, aggarsuloed, e sui batizargardibe, bautizargarsurdibe. * E massi bautizargalad neggi siile, anba bibbidibe aggarsulid, Babse gole daglealir, Bibliagi emar odurdagge dagleardibe, dunuar we ibmar imagbaloed. E massi neg sedisur inigwale, omegwa ar wisid, Cristo sordagan idugedgi arbaedi, massergangadi, aa wisidba dunuar we ibmar imaggoed.

Pablo sogsabalid, gwenagan Cristoba nanaid buggwad abargi omegan ibmar imaggalir, dunued abelebarye. Weyob soglesad: “Dule wargwen we igargi abin abin sunmagbiele, unnila an bemarga sogdo, anmar igar baidgi gwen odurdagdisurye, degi, [...] Jesúsba nanaimalad danar anbiggunoni damalad, Bab Dummadse goledsig, igar baid niggasurbarye” (versículo 16, NVS). Jehová, massergan urbisad gwenagan Cristoba nanaid idudii gumalaga (1 Timoteo 2:11-14; Hebreos 13:17). Aaga unnila masserganbii, idudimalad geb gwenagan bendagmalad, na e neggwebur aggwega nugsasad (Gusmalad 20:28). Inbaggwa omegan, massergan bautizargarmalad ibmar imagged imagge dagleardaed. Bab igargi sunmaglenaega igar iddolleged imaggega massergan saddele, sunna ome we imagge dagledagoed. We ibmar gwenagan odurdaggega imaglesoggua, massergan imagge wilubbinad, aaga ome we ibmar imagsiile, dunued abeleged. Massered bautizargalad gudii, ome Bibliagi dule baid odurdagsiile, bad dule nueggwa Biblia durdagnaid, dunuar imagged abelegoed, ar massergan emar odurdaggega  nugsalessoggua, ome dunuar we ibmar imagsiile mag daglegoed, ome we ibmar dodoaggwa dagsuli.

Igar Iddoged Neggi ibmar durdaglenai ibmar egislealir omegan dunuar sisuli nabir abin sogmogad. Emarga neguyase neguyase e suibo (gwenad baid bautizargaladbodibe) Bab igargi sunmagdiir, dunuarsur gudiir aggarsurbalid. ¿Igi imaglebarsunnoe, ome binsaele, an dunusulir abaggar an Jehová igargi annadagerye? Degiirdina nueggwa balamiged abelegoloed, mer yogsaar ibmar imaggega. * ¿Igi imaglebalosunna dunusulir Jehová igargi annao na iddogele? Degiirdina, sunna ome fotogi siidyobi dunumogad.

Ibigala dunued abelege. Versículo 10 (NVS) gi ibmar sogbo sognaid ibiga omegan dunuar ibmar imagged abelege, wegi naid: “Ome [...] dunwer gebed, [...] mag daglegegar, massered urbalii daed, deginbali, angermar dagmogagar, ome massered urbalii nanadiiye”. Be daggena wegi sognaid “mag daglegegar[ye]”, auggine ¿we ibu obarnai? Omegan dunuar ibmar imaggele, aaba ‘mag dagleged’, omegan mag iddoge Jehová massergan bautizargarmalad onugsasa gwenagan idudii gumalaga. Degsoggua mag iddollebalid omegan nue Bab sabe, geb nue Babba nanabali, aaga omegan dunuar ibmar imagdamalad. Sorbali sognabalid “angermar dagmogagar[ye], ome massered urbalii nanadiiye”. ¿Ar ibiga ángelmarde we ibmar dagged abelemoga?

Bela ángelmar neg dagdidimalad bule dulemar, geb ángelmarmoga nue Babba nanai, Bab ibgwensur imagmardibe. Degsoggua daggarmalale dulemar nue Babba igar imagmala, nued  iddodamalad. Ar ángelmar Bab sogedba igar imagdii gued abelemarmogad. Anmar wisid bela ángelmala Babba igar imassurmarmoga (Judas 6). Omegwa, Babga arbadiid ibgwensur massergan imagsulile, anba sun masseredba bur nue ibmar wisinsundibe, bur masseredba nono nued nigbardibe, ángelmar weyob ome ibmar imagdii daggalile, igar nued durdagmarmogad. Omegwa, Bab negse naoed deyob dae daggarbalile bur buledo, ar Bab negmosale reyga sigoed, ángelmargi ise obinaloed. Degsoggua omegan ibgwensur massergan imagsulile mag dagleged nue Babba nanai; ángelmar dagdimarmogad omegan na dummarba imagsurmala, geb Bab sogedba damarbali.

^ parr. 3 E sui Cristo sordar, ome geg binnasur e sui wagab Babse gorsii gued. Auggine e sui boni soggwenba geg bar sunmaggusale, adi aggarsulid mag iddollegedgi e sui wagab Babse goler.

^ parr. 1 Nabbi wisguega La Atalaya julio 15 gad, 2002 gi nosad, página 26,  27 se daggo, geb julio 15 gad, 1977 gi nosad, página 445, 448 segadgi dagbalo.