Yaba nanaid daggega

Menú baid daggega

Índice daggega

Jehovági sunmagmalad

dule

‘Bab be sabgumai guega, mer egi banguo’

 CAPÍTULO 6

Obunnosiir, mer yogasaar ibmar imaggo

Obunnosiir, mer yogasaar ibmar imaggo

“Ibu be imagdibe, bela Bab Dummad nug odummogega be imagge” (1 CORINTIOS 10:31).

1, 2. Anmar televisión dagsoggalile, música iddosoggalirdibe, ¿ibu anmar imagged abelege?

MANZANA saguar nunule, ¿be igi imasale? ¿Nunudse baggar be gudsale? ¿Bur be meddesunnale? ¿Nunudbi be sigsale, nuedbi gunnega? ¿Bur be igi imasale?

2 Anmar televisión dagdele, geb música iddoderdibe, deyob gumogad. Anmar nueggwa dagdele, abar manzanayobi nunu nanamogad, sun anmar oisgued. Degsoggua, ¿igi anmar imagmosunnoe? Abar dulemar “dagge daggesur” bela ibmar imagmalad. Abar sogdamalad bur merbar an soggwensaar imagsunnoye. Bamaladdi sogdamalad, andi bur egwa egwa imaggoye, mer isganagin guega. Jehová be sabgumai guega, ¿igi bedi imagmogosunna?

3. ¿Ibu ibmar durdaglesoggali?

3 Anmardi ibmar nueganbi imagbisoggua, aaga anmardi egwa egwa imagged, televisión daggalir, música iddogalirdibe. Degsoggu, anmar nueggwa wisgubisunnad, biddi ibmarmala, ibmar nuegan nanae, geb biddimala ibmar isgana nanabali. Anmar we igar durdagged iduale, bin anmar durdaggoloed ¿igi Jehová dagdae anmar ibmar imader, televisión daggalirdibe, música iddogalirdibe?

‘BAB NUG ODUMMOGEGA IBMAR IMAGMALO’

4. Anmar televisión dagsoggalir, música iddoalirdibe, ¿ibigala anmar ieged abelesuli anmar Babga sogsa, an begarbi arbadii guoye?

4 Gwenad 1946 gi bautizar imasad sogsad: “Bautizar imagmaloedga  sunmaglealile, ani an bautizar imaggoeyobi, an boo iddosisadamogad, mer an iegega, an Jehovága sogsamoga an begarbii arbadii guoye, degiile an Jehová igargi banguosurmogad, aagala bautismo igargi sunmaglealir an wissur iggudaed”. Mer be Jehová igargi bangumogagala be ebinsadimogar gebed, an Jehovága sogsamoga an begarbii arbadii guoye (Eclesiastés 5:4 absogo). Anmar bad Jehovága sogsasoggua, an begarbi arbadii guoeye, anmar ibmar imagdiidba mag daglegoed, igi anmar Jehovága arbaed igar dagge. Auggi aabisurbalid anmar televisióngi ibmar daggedbali, geb música iddogedbali, mag daglebaloed, bule anmar Jehovága ibmar sogsadba, ibmar imagdidibe. Aagala apóstol Pablo sogsad: “Degisoggu, be mas gundibe, be gobdibe, ibu be imagdibe, bela Bab Dummad nug odummogega be imagge” (1 Corintios 10:31).

5. Levítico 22:18, 20 segadgi sognasoggu, mer ibmar boni niggad Babga uggoye, ¿ibigala Romanos 12:1 gi ibmar naid anmar dodoaggwa daggedsuli?

5 Anmar ibmar imagsoggalir ebinsadaoed, anmar Jehovága sogsa, an begarbii arbadii guoye. Pablo aa ibmargi sunmasad Cristo sordagan Romagi buggusmaladga, sogsad: “Ibdurgan Bab Dummadga ogumaggar uglegedyob na be[mar] san gudiid, ega be[mar] ugmar, be[mar] san swilidiggidgi ega [...] ugmar. Degi, Bab Dummad yeer be[mar] daggedgi be[mar] san ega [...] ugmar. Ar weyob Bab Dummadga be[mar] san [...]  uggele, we Bab nug odummoleged nabbiragwadid” (Romanos 12:1). Pablo sogsagua na san ugmarye, ¿ibu obarisa? Anmargi sunmasad, anmar binsadiidgi, anmar ibmar imagdiidgi (Marcos 12:30). ¿Igi anmar na, anmar san Babga ibmar gummaggar uglegedyob ugnamoga? Bela anmar ibmar imagdiidba, anmar Babga na ibmar gumaggaledyobi san ugnamogad. “Ibdurgan Bab Dummadga ogumaggar uglegedyob[ye]” soglenaidi, anmarga sogegalad, we ibmar dodoaggwa daglegedsurye. ¿Ibigala we ibmar dodoaggwa daglegedsuli? Ebbenne Moisésga Igar uglesadgi soglesad, Jehová abesurdaye ibmar durgan wis boni niggad ega ugleged (Levítico 22:18-20). Anmar, Jehovága nueggwa ibmar imagsurmogale, Jehová nued anmar daggosurmogad. Degsoggu, ¿ibu ibmar sun anmar san oisgusmogar sunna?

6, 7. ¿Igi Cristo sorda na san oisgusale, degi gudiidbali igi gudsunnale?

6 Pablo, Cristo sordagan Romaginmaladga sogsad: “Melle [...] abaganmar ibmar isgana imaggegala [...] imagmar”. Pablo sogsabalid: “Be[mar] san ibmar isgana bina soged [...] obelo[marye]” (Romanos 6:12-14; 8:13). Iduale Pablo sogsabalid ibu ibmar imaggedbali dulemar ibmar isgana imaddamala: “E sunmaggedgi dulemar yardagmalad”. “Dulemar oburgwega guagwar gudimalad”. “We dulemar, Bab Dummad dobe nanaodeeye gwen binsasurmalad” (Romanos 3:13-18). ¿Igi gudele Cristo sorda, ibmar isgana imader? Na duggin oissonailed. Anmar nue wisid nisaed garda dagged, abebiin urwemalad dagged ibmar nuedsuli, auggine agga anmar yamo aa ibmar imaddaele, soglegerdo anmar, ‘anmar ibya ibmar isgana imaggegala imagnaye’, degsoggua anmar na duggin oisgunairsunnad, bar Bab Dummad nued anmar dagsasurmogaled (Deuteronomio 15:21; 1 Pedro 1:14-16; 2 Pedro 3:11). Aagala dule yogsaar, televisióngi ibmar dagdele, videojuegogi dododerdibe, sun Jehová bar nued aa dule dagsasuliled.

 7 Degsoggu dule yogasaar, Internetgi ibmar imaggele, videojuegogindibe, boni bibbisulid. Anmardi abesulid, anmar ibmar daggedba Bab isdar anmar dagmai gued, bur anmar abeged Bab nued anmar dagmai gued. Aagala anmar durdaggoena, igi anmar wisgusale, ibmar soggwen nueddibe, nuedsurdibe.

‘IBMAR ISGANA ISDAR DAGMALO’

8, 9. a) ¿Ibigala abar nabir ibmar imaglege, geb ibigala abar geg ibmar imaglebali? b) ¿Ibmar igiiddi anmar bibbisaar imagbisuli?

8 ¿Ibigala Cristo sordagan, geg yogsaar internetgi ibmar imagge, videojuegogindibe? Ar bela ibmarmar nueganbisurnanaed. Degi inigwale, bela ibmar isganabisurbalid, degsoggua, dule na wargwengi sogoed, aa ibmar imaggodibe, imaggosurdibe. Anmar daggoena, ibu ibmarmala Jehová sordagan imaggosurmala.

9 We libro capítulo 1 gine soglesad, Bibliagi soglenaye abar ibmarmala nuegansur nanaye. Televisióngi, Internetgi, películamargi, músicagi be ibmar dagdedibe, be dagdagoed dulemar ibmar nuegan imagnanasuli, abebiin na gagananai, dulemar nisaar nisaar gunanai, Nia na e Bab Dummadga imagnanai dagleardaed, yamo dulemar oisguega weyob ibmar imagdamalad. Dulemar ibmar isganabi imaggussogua anmardi, ¿ibu imagmogoe? Anmardi ibmar wegimalad binar gubisulid (Gusmalad 15:28, 29; 1 Corintios 6:9, 10; Apocalipsis 21:8). Bibliagi ibmar sogbo soglenaid: “Ibmar isgana sae [...] dag[malo]”, geb “ibmar isgana imagged ie[marbalo]”, wegi ibmar soglenaidba anmar daele, Jehová mag dagmamogoed, anmar nue ebali nai. Anmar deyob daele mag dagledo, anmar “nabbiragwadgi” Babba gudii (Romanos 12:9; Salmo 34:14; 1 Timoteo 1:5).

10. ¿Igi abar dulemar sogdamala, geb ibiga boni bibbisuli weyob binsaed?

10 Abar sogdamalad Bibliagi ibmar issaggwaye soglenaid  dagger, aggarsuye. Sun sogdamaloed: “Ar an binsa dagsiid, an eba imaggosulid”. Dule deyob binsaele, na duggin yardaggoed, ega boniga guoed (Jeremías 17:9 absogo). Anmar Jehová ibmar issaggwa dagged, daggele, ¿nabir soglesale anmar “ibmar isgana sae [...] dag[ye]?” Anmar unnila ibmar isgana daggedginbi arbadiile, ibmar isgana anmarga ibmar nuedga gudsunnoed, agga anmar ibmar isgana imadmosunnoed. Geb dulemar ibmar isgana imagdiidi, ibmar nuegan imagdiiyobi, anmar dagdebarsunnoed (Salmo 119:70; 1 Timoteo 4:1, 2).

11. Gálatas 6:7 gi ibmar soglenaidi, ¿igi anmar bendagge ibmar nuegan imagdii guega?

11 Abar Cristo sordagan ibmar isgana daggedginbi arbadidiidbali, agga ibmar isgana imadmalad. Anmardi aamaryob gubisulid. Wegi gudidiidbali dagnonimalad, Bibliagi nabir soglenai, “dule bela ibmar digsadi, a ibmar gannar na weedsebalid” (Gálatas 6:7). Anmar ibmar nueganbi dagdiile, anmar ibmar nueganbi imagdii gudmogoed (recuadro “ ¿Be ibu ibmar imaggoe?” aagi naid dagbalo).

BIBLIA SOGEDBA IBMAR IMAGGO

12. Gálatas 6:5 gi ibmar soglenaid, ¿igi anmar bendagge, mer anmar yogasaar ibmar imaggega, geb mer dule yamo anmarga sogega, bia anmar binsaed nuegan amibaloe?

12 Abar Bibliagi ibmar ise sogar nasulid, we ibmar issaggwaye, anmar aa igargi sunmaggoena. Ibmar wegimaladgindi anmar na sogoedid, imaggodibe, imaggosurdibe (Gálatas 6:5 absogo). Auggi anmar unnila anmar binsaedbarbii ibmar imaggosurbalid, Bibliagi ibmar soglenanaidba anmar ibmar imaggoed. Bibliagi anmarga soglenaid, igi Jehová we ibmarmargi binsamoga. Bibliagi ibmar soglenaid, anmar nueggwa durdagmodibe, anmar wisgunoniggoed, “Bab Dummad na e sogedba igi ibmar abemai”, degiile anmar televisióngi ibmar daggalile, geb dododerdibe, Bab sogedba anmar imadoed (Romanos 12:2).

13. ¿Ibu anmar bendaggoe, mer anmar televisióngi ibmar isgana daggega, geb mer músicagi ibmar isgana iddobaliga?

 13 Bela anmar emarbi binsasurmarbalid (Filipenses 1:9). Geb anmar na emarbi ibmar binarsurmarbalid, abar música soggwenna binarsurmalad. Degsoggu, anmar emarbii ibmar imaggosulid. Degi inigwale bane bane anmar binsaed abelebalid, igi Jehová we ibmargi binsamamoga, geb anmar Jehová sogedba ibmar imagdii gubalid abelebalid,  degiile anmar Jehováyobi binsae gudmogoed. Degi anmar gudiile, mer Jehová isdar anmar daggega, anmar televisióngi ibmar isgana dagbiosulid, geb músicagi anmar ibmar isgana iddobiosurbalid (Salmo 119:11, 129; 1 Pedro 2:16).

14. a) Anmar ibmar imader, ¿ibu ibmargi binsaed abelebali? b) ¿Igi nabir anmar bur Babga ibmar imaggedginbi binsadii gusale?

14 Anmar ibmar imagdiidba mag daglegoed, bur anmar ibu ibmar binarmoga, ibmar nueddibe, ibmar isganadibe. Auggi anmar binsabibalid, ibu ibmar imaggega bur anmar osedosidamoga. Anmar wisgusale bur ibu ibmar imaggega anmar osedosidamoga, mag daglegodo bur anmar aa ibmar binardae. Auggi ebinsao, bur anmar Jehovága ibmar imagged abeleged (Mateo 6:33 absogo). ¿Igi nabir bur anmar Jehovága ibmar imagdii gusale? Apóstol Pablo ibmar sogsadba anmar igar saer gebed: “Be[mar] daedgine nue [...] nanamarsun, melle dule ibmar wissurmaladyob [...] damar, dule nue ibmar wisidyob [...] nanamarsun. Ibagan nagumaidgi nue egi be[mar] gudii imagmar. Be[mar] daedgine nue [...] nanamarsun, melle dule ibmar wissurmaladyob [...] damar, dule nue ibmar wisidyob [...] nanamarsun. Ibagan nagumaid nue [...] ebumar” (Efesios 5:15, 16). Anmar igar amisundibe mer doggus dodogedginbi binsaega, degiile nabir anmar bur “igar nueganbi” imagdii guoed, mer anmar Bab igargi banguega (Filipenses 1:10).

15. ¿Ibigala nuedsuli yogsaar ibmar imagged?

15 Mer anmar ibmar isganaginguega, ibmar imagsoggalile, nuedsulid anmar yogsaar ibmar imagged. ¿Ibigala deyob anmar soge? Anmar gannar manzanagi sunmaggoloena, manzana saguar nunule, be doggus nunud nagabba siggosulid, wis be nuedse baggar sigbaloed, mer nunudginguega. Televisión daggedsiggi anbamogad, música iddogedsigdibe, anmar wissundibe Bibliagi ise sogar nai,  we ibmar nuedsurye, anmar aa ibmar imaggosulid. Auggi anmar nueggwa wissulile, we ibmar nueddibe, nuedsurdibe, mer bur anmar imaggoed (Proverbios 4:25-27). Mer anmar ibmar isgana imaggega, Biblia sogedbarbii anmar ibmar imagdiir gebed.

‘IBMAR NUEGANBI IMAGMALO’

Biblia sogedba anmar ibmar imaggele, anmar Jehovági banguosulid

16. a) ¿Igi mag daglegoe anmar Jehová sogedba ibmar imagbimoga? b) ¿Igi anmar bane bane ibmar imagdii gubaloe?

16 Ibu ibmar anmar imagsoggardibe, bin anmar binsagoloed igi Jehová we ibmargi binsamamoga. Wisguegala anmar Bibliagi amigoed, ar Bibliagi Jehová binsaed naid, geb Jehová na Bibliagi e igarmar mesisbalid. Be daggena, rey Salomón sogsad, ibu ibmarmar Jehová nued dagsuli, sogsad Jehová isdar dagye: “Dule gadi gaggansaed, dule binsarsunna aimar gindagged, dule galagwensuli dule baidgi binsaed, dule ibmar isganabi imagdidaed” (Proverbios 6:16-19). Anmar wisgusdibe, igi Jehová ibmar soggwen dagge, ¿ibu anmar imaggoe? Salmogi sognaid: “Bab Jehová, dule ibmar isgana isdar dagmalad, sabed[ye]” (Salmo 97:10). Degsoggu, Jehová sogedbarbi anmar ibmar imaggele, mag daglegoed, Jehová ibmar isdar dagged, anmar isdar dagmoga (Gálatas 5:19-21). Auggi unnila anmar emar abargi siirbii sogosulid we ibmar issaggwaye, walagwen gudiile anmar ibmar isgana imaggosurbalid (Salmo 11:4; 16:8). Anmar inniggigwad Jehová sogedba igar imagbiele, bin anmar dagdagoloed, Bibliagi igi igarmar mamamoga,  degibi anmar imagdii gued abeleged (2 Corintios 3:18).

17. ¿Anmar ibmar soggwen imagged iduar, ibu ibmargi wis binsaed abeledae?

17 Anmar wisguega película soggwen, músicadibe, Jehová nued dagdibe, nued dagsurdibe, ¿ibu ibmargi anmar binsaed abelebali? Anmar binsaed abeleged: “Be we ibmar imagsoggalidi, ¿igi be imaggoe? ¿We ibmarba be Bab igargi yoledodibe?”. Anmar película dagsoggalile anmar we ibmargi binsabalidid: “¿We película dagsad sorba, ibugine be binsadagoe, ibmar isganagi agga be obinsadoe?”. Anmar daggoena Bibliagi igi soglenamoga.

18, 19. a) ¿Igi Filipenses 4:8 anmar bendagge, nabir anmar ibmar nuegan imagdii guega? b) ¿Bia Bibliagi binsaed nuegan nanabalidi, nabir anmar bendasbalile? (Urba naid daggo.)

18 Filipenses 4:8 gine sognaid: “Bela ibmar nabbiragwadgi, bela nug nued nigguedgi, bela igar inniggigwadgi, bela ibmar swilidiggidgi, bela sabguedgi, degi, bela ibmar nued egi soglediidgi be[mar] binsamala. Degine, bela igar nued mamaidgi, degi, egi nabir nug odummolegedgi be[mar] binsamala”. Pablo wegi sogsagu, dodoged igargi sunmagnasulinad, película dagged igargi sunmagnasurbalinad. Bur Pablo sunmagnainad, ibu ibmar Jehová nued dagge, anmar aa ibmargi binsadii guedgi (Salmo 19:14). Degi inigwale Pablo ibmar sogsad nabir anmar bendagbalid, anmar wis película dagge binsaalir, Internet ebuge binsaalirdibe.

19 Weyob anmar sogoena, anmar película dagsale, videojuegogi dodosdibe, música iddosdibe, “¿ibmar ‘nuegangi’ binsaega anmar imasdadibe?”. Binsa anmar sogoena, be película dagsad sorbali, ¿ibu ibmargi be obinsasdae? Dagsad sorba anmar issaggwa binsasurdaele, sogledo anmar nabir igar imasye. Auggi sorba ibmar isganagi binsaega anmar imasardina, sogledo anmar noar igar imasye (Mateo 12:33; Marcos 7:20-23). ¿Ibigala nuedsuli ibmar isganagi  binsadii gued? Ar ibmar isgana buggib binsaega anmar imagged, geb agga sun anmar ibmar isgana, ibmar nuediyob dagdabaloed, geb sun agga anmar Babgi bangubalid (Efesios 5:5; 1 Timoteo 1:5, 19). Yogasaar ibmar dagged boni bibbisulid, degsoggu anmar ibmar isgana dagbisulid (Romanos 12:2). * Salmo narmasadyobi, anmar Jehovága sogbimogad: “Melle ibmar binsaarmaladbina sogega be an imagge” (Salmo 119:37).

DULEMAR BAMALADGI BINSABALO

20, 21. ¿Igi anmar 1 Corintios 10:23, 24 gine ibmar soglenaidba igar imasale, anmar ibmar soggwen imagbi gualir?

20 Pablo sogsabalid anmar ibmar imagsoggalile, mer we igar iemaloye: “Belagwabba sunna an ibmar imaggedbiid, degi inigwele, belagwabba ibmar nueganbisulid. Belagwabba sunna an ibmar imaggedbiid, degi inigwele, belagwabba burbar nasguega an imaggosulid. Melle begadbi ibmar nued imaggedgi be binsamalo. Suli, degisuli. Aimar baigangi be binsamarmogoed” (1 Corintios 10:23, 24). Anmar ibmar soggwen imadele, ¿igi anmar Pablo ibmar sogsadba igar imasale? Bin anmar we ibmargi binsagweler gebed: “¿Igi bamalad binsadamarmogoe, be videojuegogi dodosoggalidba, música iddosoggalidbardibe?”.

21 Sun anmardi binsaed we ibmar an imagsoggalidi ‘nuedye,’ auggi dule baiddi sun binsaed, we ibmar imagger nuedsurye, degiile bar anmar aa ibmar imaggosulid, ibmar baid anmar aa anar amisunnoed. ¿Ibigala anmar deyob imaggoe? Ar anmar abesulid, anmar gwenad, anmar ular Bab igargi bangued. Degiirdi agga “anmar gwenadgan oisgudeled”, Pablo sogsabalid agga anmar ‘Cristogine isgudbalirye’. Anmar we igar ieged abelesulid,  Bibliagi soglenabalid: “Mer be[mar] nuggi isguega [dulemar] imagged be[mar] imaggo” (1 Corintios 8:12; 10:32). Anmar sogdidibe, anmar Cristo sordagan sunsogmaladye, anmar gwenagan ibmar soggwen “nued” dagsulile, bur anmar “mer” imagmogoed. Degiile mag daglegoed Pablo ibmar sogsadba anmar igar imagnamoga (Romanos 14:1; 15:1).

22. ¿Ibiga anmar imaggosuli, dulemar anmaryobi ibmar imagmarmogaga?

22 Anmar ibmar soggwen nued dagsurmosundibe, anmar nai guosurmogad anmar sogedba ibmar imaglegega. Anmar binsaedsulid, ibu ibmar anmar imagge, dulemar aa ibmar imagmarmogoye. Degi anmar binsaele, sogeyob iddollesundo carromar na emarbi abarmagmai gued abeleye. Degsoggu dule wargwen ibmar imagsoggalile, auggi we ibmar Bibliagi yolenasulile, ¿ibu anmar imaggoe? Anmar emarbo gassimagnai guosulid. Deyob anmar ibmar imagdiile mag anmar dagmaloed, “sabedgi ibmar imagged dulemarye”, anmar naisurdaer anmar sogedba ibmar imaglegega (Filipenses 4:5; Eclesiastés 7:16).

23. ¿Ibu anmar imaggoe mer yogasaar televisióngi ibmar daggega, geb mer yogsaar música iddobaliga?

23 Degsoggu, ¿ibu anmar imaggoe mer yogasaar televisióngi ibmar daggega, geb mer yogsaar música iddobaliga? Bin anmar daggoloed, Bibliagi sognadibe we ibmar isganaye, degiile anmar aa ibmar imaggosulid. Auggi anmar daggarsundibe, Bibliagi ise sogar nasuli we ibmar nuedsurye, degiirdi bin anmar daggoloed, Bab igi binsamai daglege aa ibmargi. Anmar na gwage oisgubisulid, mer anmar binsaega ibmar isgana, ibmar nuedye, aagala anmar ibmar isgana dagbisulid. Ugginbali anmar sogedbarbii anmar ibmar imagdii guosurbalid, anmar wis bamaladgi binsabaloed. Anmar ibmar nueganbi imagdidibe, anmar neguyagi gwenadgan buraggwa Jehová nug odummodii gudoed. Degiile Jehová anmar sabgumai guoed.

^ parr. 19 Wegine binsaed nuegan nanabalid, Proverbios 3:31; 13:20; Efesios 5:3, 4 geb Colosenses 3:5, 8, 20.