Yaba nanaid daggega

Menú baid daggega

Índice daggega

Jehovági sunmagmalad

dule

‘Bab be sabgumai guega, mer egi banguo’

 APÉNDICE

¿Igi Bibliagi soglenai niggumamaid na meddebi guarmalale?

¿Igi Bibliagi soglenai niggumamaid na meddebi guarmalale?

Jehová abeged dulemar na niggusmaladi, na niggunanagu ibmar sogsadba igar imagmalad. Jehová, Adánga ome ugnagua sogsad: “Massered e ome ebo garmagdii guoed. E bogwadi san wargwennagwadga gunoniggoed”. Sorba Jesucristo aa sunnad sogsamogad, geb uggi sognonimogad: “Bab Dummad  abirgunagwar dule imagsadi mer na medded imagmar” (Génesis 2:24; Mateo 19:3-6). Degsoggua Jehová sogsad geb Jesús sogsamogad, dule abirgin niggusale bar na meddegarsurmarye; e bogwad burgwisarbii na gi bangumarsunnoed (1 Corintios 7:39). Bab Dummad, abirgin niggued igar mesissoggua, anmar dodoaggwa we igar daggedsurmogad. Aaga Jehová isdar dagged dule Biblia sogedbarsuli binsa yogsaar na e abirgin meddesiir (Malaquías 2:15, 16).

Igi Bibliagi soglenai, ¿sanawa nabir dule leygi abirgin meddersunna? E bogwad neg sidsigi galagwensur gudi gusarbii nabir abirgin meddeleged (Génesis 39:9; 2 Samuel 11:26, 27; Salmo 51:4). Ar Jehová isdar dagged dule neg sidsigi galagwensur gudi gued. (Capítulo 9, párrafo 7 gine nueggwa soglenaid nue ibua galagwensur gudi gued.) Bab Dummad sogsad dule bensulesadi sogoedye na e abirgin meddodibe, meddosurdibe (Mateo 19:9). Degsoggu we dule e abirgin meddeye soggalile, Jehová igargi annaosulid. Bamaladdi geg ega soged be be abirgin meddeye. Dule bensulesad dagsundibe e bogwad mag na iddosa nue nosa geb bar aa ibmar imagbisur daglege, sun meddesuliled. Degsoggu dule bensulesadi na sogoedid meddodibe, meddosurdibe, ar eedi na ganar sorba ebo gudi gudbaloed (Gálatas 6:5).

Inbaggwa neg yaggi dummad neg gagalealile, na gi bangue dagledamarsunnoed, sulirdi leygi na meddemarsunnodibe anba e bogwad neg sidsigi galagwensur gudi gussuli inigwale. Deyob neg gusale Bibliagi soglenaid dule e bogwad medde nadedi ‘geg bar dule baid nigguye, sulirdi gannar na e abirginse naoye’ (1 Corintios 7:11). Deyob ibmar gusale ebober geg bar abirgin baid nigguedgi binsamalad (Mateo 5:32). Anmar daggoena igi neg gualidba inbaggwa dulemar na meddedgi binsaardamala.

Budar neguya see gualir. Abar massergan budar e omega geb e mimmiganga ibmar ami guardamalad, geg arbaed amigedbarsurdaed, budar neguya seedbardaed, degsoggu wiledi guddamarsunnad. ¿Igi Bibliagi soglenai dulemar wegi damaladgi? Bibliagi soglenaid: “Ar dule wargwen e gwenadgangi basur binsadibeye, degine agga bur e neg yagginmaladgindibeye, aa  dule gwage ulubgi bensurye sogdiid ies gudiye degine dule wargwen gwage ulubgi bensulid nigsulidba agga bur ege gudiye” (1 Timoteo 5:8, Pap Tummat Karta, e narmagleged wis ogwalesad). Dule degi gudiidba e mimmigan wiledii gudele, geb e ome wiledii gudmogale, ome dagsunnoed nabir leygi e suigi bangusardibe. Ome idudimaladga sogsasundibe an sui anmarga budar ibmar amidaye, idudimalad nueggwa balamimaloed bule nabirdibe, ar degi daedba sun e sui onoleged.

Gadi ome bibyoger. Abar dulemar gadi omegan bibyodamalad, degsoggu sun na e omega boni amiged, oburgwed naga imaggodibe. Dule degi daed Jehovági sunmaggedile, idudimalad nueggwa we ibmar balamimaloed; ar dule gwae gwae sae iddoged, geb sabsur emar imagdabalidi deyob daedba sun onoleged (Gálatas 5:19-21).

Bab igargi banguo na iddoger. Abar dulemar alamaggardamalad e bogwad mer Jehovága arbaedga guega, yamo e bogwad Jehová igargi annaega imaggardamarbalid. Deyob ibmar gualile we dule daggoed, nabir “Bab Dummad sogedba” igar saega e bogwadgi bangued bur nabirdibe (Gusmalad 5:29).

Nibba ibmar soglesadyob dule wargwen wiledii anmar daggalile nuedsulid anmar ega soger, be be abirgin meddesunye; anba nuedsurbalid anmar ega soger, mer meddoye. Idudimaladi, geb gwenagan bamalad nue Bab igarba nanamalad nabir we dule bendagmala inigwale, nuediled ebinsamarmogad unnila Jehovábii wisid igi na imagdidii. Dule wargwen yamo e suigi bangubiedba, e omegi bangubiedbardibe yamo ibmar obulodele, Babgi dodonailed, geb abirgin niggued igar dodoaggwa dagbalided. Auggi dule yamo nue ibmar nabiriyob sognadibe, Jehovádi bad wisoed yamo dule ibmar obulonai. Ar “bela ibmar obinnilesadi, Bab Dummadgi duggunaisulid, bela e asabin magar daglenaidbiid. Anmar Bab Dummadga ibmar sogoedgi, ibmar duggunaisulid” (Hebreos 4:13). Degsoggu dule wargwen bela beladse oiddollenaidba na e abirgingi banguoye binsaarsundibe, anmar egi issaggwa sunmagged abelesulid, ar “Bab Dummad[gindi]” anmar wagginnosur guoed (Romanos 14:10-12).