Yaba nanaid daggega

Menú baid daggega

Índice daggega

Jehovági sunmagmalad

dule

‘Bab be sabgumai guega, mer egi banguo’

 CAPÍTULO 8

Bab abesulid dulemar sunnasur gudi gued

Bab abesulid dulemar sunnasur gudi gued

“Jehová, dule sunnasur gudisulid, be sunnasur daggosurmogad” (SALMO 18:26TNM).

1-3. a) ¿Ibigala nangan agneb mimmigan barmided iduale nue dagsadagwele, bule e mimmi nudaggaggwa nodsoggali? b) ¿Ibiga Jehová abesuli e sordagan sunnasur gudi gued, degsoggu, ibigala anmar sunnasur gudi gubisurmoga?

MIMMIGAN agneb naed iduale, nangan, na nueggwa mimmigan ogdaed, geb na nueggwa ega mor yodamarbalid. Mimmigan nabir bonisuli dungumai guega, nangan na deyob mimmigan aggwedamalad, geb wismarbalid, nueggwa mimmi aggwedisulile egine sunmagledagoe.

2 Jehová abesurmogad anmar sunnasur gudi gued. Bibliagi soglenaid: “Jehová, dule sunnasur gudisulid, be sunnasur  daggosurmogad” (Salmo 18:26TNM). * ¿Ibiga Jehová anmargi nai mer anmar sunnasur gudi guega? Soggwengi, ar Jehová, anmar sabsoggua abeged anmar san nued gudi gued. Sogbogi, dulemar, anmar daggedba sun nued Babgi sunmadamaloed, sulirdi, issaggwa egi sunmadamalodibe. Jehová nug nued nigga masoggua, anmar abesurmogad, dulemar, anmar nuggi Jehovági issaggwa sunmagmalad. Degsoggu bibbisaar anmar ibmar issaggwa imagdii gubisulid, aagala anmar nue daggoed, igi anmar na san aggwedii, geb anmar igi dabali (Ezequiel 36:22; 1 Pedro 2:12 absogo).

3 ¿Ibigala anmar sunnasur gudi gubisurbali? Ar anmar wisid Jehová, dulemar nueggwa na san aggwemalad yeer dagmaid. Anmar, Jehová sabbarsoggua, bela anmar ibmar imagdiidba anmar Bab nug odummodii gubibalid. Bab abesursoggua, anmar sunnasur gudi gued, we capítulogi igar sogbaagi anmar sunmaggoed: ibigala abelesuli anmar sunnasur gudi gued, ibu anmar imagdii gued abelesuli, mer sunnasur gudi guega, geb ibu anmar imagdii guer gebe mer anmar isguega. We ibmar sogbaa durdasad sorba anmar daggoed, bia anmar wis nodimoga, nabir onuguega.

IBIGALA SUNNASUR GUDI GULED ABELESULI

4, 5. a) ¿Ibigala anmar sunnasur gudi gubisuli? b) ¿Igi anmar wisi, Jehová ibmar sunnasur dagleged abesuli?

4 Jehová, anmar odurdaggega igar soggwenna mesissulid. Soggwen anmar sogoena, Jehová ibmar imagmaidba anmar durdaggoed, igi anmar daoe. Ar Bibliagi soglenaid: “Bab Dummad daedba [...] damarsun” (Efesios 5:1). Degsoggu, ¿ibigala anmar sunnasur gudi gubisuli? Ar Jehová, dule gwage swilidiggidid, ibmar issaggwagwad egi naisurbalid, aaga anmar sunnasur gudi gubisurmogad (Levítico 11:44, 45 absogo).

 5 ¿Igi anmar wisi Jehová ibmar sunnasulid abesuli? E daedbali, geb e ibmar imagmaidba mag dagleged Jehová ibmar sunnasulid abesuli (Romanos 1:20). Jehová sogsad, nabbaneg mer sunnasur nai guega, dulemar nabbaneg aggoedye. Jehová yogasaar ibmar imassulid, dii mer isguega “igar niggaa” imaggaled, geb burwa anba deyob imaggarbalid. Degsoggu, ¡ibiyob geger daglege, nabbaneg naidi, bibbisaar isgunasulid! Ar Jehová deyob nasisad. Degsoggu, mag dagleged “Bab Dummad, e ganguedba nabneg nasigsad[i]” abesulid ibmar sunnasur dagle gued (Jeremías 10:12). Sun degsoggu anmar sunnasur gudi gumogosi.

6, 7. Moisésga igar uglesadba, ¿igi anmar wisi, Jehová abesuli e sordagan sunnasur gudi gued?

6 ¿Ibigala anmar sunnasur gudi gubisurbali? Jehová, anmar Dummad masoggua, gusgu na e sordaganga sogmaguad mer sunnasur gudi gumaloye. Aagala Jehová israelitamarga sogsad, igi ibmar imaglegoe ese gollealir. Sumo sacerdotegala soglesad, Babga Ibmar Ogummaggar ugged iduale, ilabo oboye (Levítico 16:4, 23, 24). Sacerdotemarga soglesmogad, Jehovága ibmar durgan oburgwemalad iduale, argan enugmaloye, geb nag enugmarbaloye (Éxodo 30:17-21; 2 Crónicas 4:6). Moisésga Igar uglesadgi 70 mergu naid ibu ibmar imasale, israelita sunnasur gusdae, sunnasur gusale, gegbar Jehovága ibmar imagge gusdaed, sunnasur gudii Babga ibmar imadele, sun oburgwileged (Levítico 15:31). Igar megwisbalid dule sunnasur gusale oboye, geb mor enugbaloye. Dule wargwen we igar maidba igar imassulile, “we dule Israel dulemar abargi onolegoed [“oburgwilegoed”, TNM]” (Números 19:17-20).

7 Moisésga Igar uglesadba anmardi igar imaggosur inigwale, mag dagleged, ibiga Jehová abesuli anmar sunnasur gudi gued. Aa igargi soglenaid, dule Babga arbabiele, sunnasur gudisulir gebye. Jehová gwagmasursoggua, e igar gwagmasurmogad (Malaquías 3:6). Degsoggu, anba Jehová emi ibagi abemaid ega arbamalad, “igar nuedba swilidig nana[malad]”  (Santiago 1:27). Aagala anmar wisgubisunnad ibigala Jehová deyob igar mesisa.

IGI ANMAR GUDI GUOE JEHOVÁ NUED ANMAR DAGGEGA

8. ¿Ibu ibmar sogbaggegine anmar sunmagsoggali?

8 Bibliagi unnila san aggwedginbi sunmagnasulid. Jehová abebalid, bela anmar ibmar imagdiidgi anmar nueggwa ibmar imagdii gubalid. Degsoggu, ibmar sogbaggegi anmar sunmaggoed: bamalad Bab igargi sunmagmaladba mer aggaedgi, mer galagwensur gudi guedgi, mer issaggwa binsadii guedgi, geb nued san aggwedgi. Anmar soggwen soggwen egi sunmaggoena.

9, 10. ¿Ibu obare mer bamalad Bab igargi sunmagmaladba aggaed, geb anmardi ibu ibmar imagbisurmala?

9 Bamalad Bab igargi sunmagmaladba, mer aggao. Bab igar sunsoged, noar Bab igar odurdagmaladbo, geg abured. Anmar daggoena, ebbenne israelitamar Babiloniagi galebuggwa gusmargu, igi ibmar imasmala. Gannar Jerusalénse nasoggarmargua, Jehová wemarga sogsad: “Nomar, [...] agi agnimar. [...] San urugmar. ¡Melle ibmar swilidigsulid [...] ebumalo!” (Isaías 52:11). Gannar Jerusalénse nasoggarmalanad, nueggwa Jehovága arbadii gumalaga. Degsoggu, Babiloniagi igi ibmar odurdaglegena, igi damalana, igi ibmar imagmalana, israelitamar Babiloniaginmaladyob ibmar imagged abelessurmalad.

10 Emi ibagi anmar noar Bab igar odurdagmaladba aggabisurmogad (1 Corintios 10:21 absogo). Wemala bela neg gasa nasoggua, bela neggweburmar irbarsaale noar Bab igargi emar odurdagdimalad, sun anmar eba isgudmogaled. Sogdamalad dule burgwisale e burba sorba gudidaye (Eclesiastés 9:5, 6, 10). Cristo sordagan sunsogmaladi, bibbisaar anmar noar Bab igar odurdagmaladyob ibmar imagbisurmalad. * Aagala anmardi dulemar dobedba Jehová igargi annabisulid (Gusmalad 5:29).

11. Bab, anmar sabgumai guega, ¿anmar ibu imagged abelege, geb ibigala anmar, Bab sogedba igar imagged abelege?

 11 Mer galagwensur gudi guo. Bab anmar sabgumai guega, anmar galagwensur gudi gued abelesulid (Efesios 5:5 absogo). Capítulo 9 gine sunmaglegoed, ibigala Cristo sordagan, “neg sidsigi” yoledii gued abelesuli. Dule neg sidsigi galagwensur gudiile, geb degi daed indagbisulile, “Bab Dummad e neg dagmaidse dogosu[lid]” (1 Corintios 6:9, 10, 18). Dulemar “ibmar isgana imaggedba isdar dagle[da]malad”, Jehová, aamar isdar dag[mamogad]”, geb na daed ogwasurmalale ‘ilabo oburgwelemaloed’ (Apocalipsis 21:8).

12, 13. ¿Anmar ibmar isganaginbi binsadiir, anmar ibu ibmar imadoe, geb ibu anmar imagger gebe mer ibmar isganagi binsadii guega?

12 Mer sunnasur binsadii guo. Dule ibmar imagged idu egi binsasdagweled, anmar ibmar isganaginbi binsadiile, nabbis ibagwengi anmar ibmar isgana imadsunnoed (Mateo 5:28; 15:18-20). Anmar ibmar nueganginbi binsadiirdi, anmar ibmar isgana imaggedgi binsadiosulid (Filipenses 4:8 absogo). ¿Ibu anmar imagger gebe mer anmar ibmar isganagi binsadii guega? Anmar mer ibmar isganagan televisióngi dagger gebed, Internetgindibe. * Geb anmar bali bali Bab garda durdagbalir gebed (Salmo 19:8, 9).

13 Bab, anmar sabgumai guega, anmar mer bamalad Bab igargi sunmagmaladba aggaer gebed, anmar mer galagwensur gudi gubalir gebed, geb anmar mer issaggwa binsadii gubalir gebed. Bamalad capítulomargi anba we igarmargi sunmaglebaloed. Emidi bur anmar sunmaggoed, nued san aggwedgi.

¿IBU ANMAR IMAGGOE NUEGGWA SAN AGGWEGA?

14. ¿Ibigala nuedi anmar nueggwa na san aggwedii gued?

14 Unnila anmar sanbii anmar na nueggwa aggosulid, bela anmar ibmar niggadi, anmar na nueggwa aggwebaloed. Abar dulemar binsadamalad, dule anga sogedsurye weyob be daoye,  weyob be neg aggoye. Auggi anmardi deyob binsabisulid. Unnila anmar nued gudi guedgarbii Jehová deyob anmarga sogmasulid, ar anmar daedba sun Jehová nug isgumogad. Be ebinsae iduar anmar sogsad dule wargwen na nueggwa mimmi aggwesulile, e sergangi issaggwa sunmagledagoye, aayobmogad, anmar nueggwa na san aggwesulile, geb anmar nueggwa ibmar aggwedisurbalile, Jehovági issaggwa sunmagledamogoed, geb Jehová igargi issaggwa sunmagledabaloed. Degsoggu, ¿ibu anmar imagger gebe anmar nueggwa ibmar aggwedii guega? Anmar Bibliagi ibmar sognaidba igar imagger gebed: “Anmar bemarga igar isgana oyodisurmalad, adi, melle dulemar anmar Babga arbaedgi issaggwa sunmagmalagar. [...] Anmar bur oyodimalad, anmar Bab Dummadga arbaed gumarye” (2 Corintios 6:3, 4). Emidi anmar dagbaloena, ¿ibu anmar imagger gebe mer anmar ibmar sunnasur aggwedii guega?

15, 16. ¿Anmar ibu ibmar imaggele, anmar nued gudi guoe, geb igi anmar, mor yoi gudi gued abelebali?

 15 Igi anmar na san aggoe. Aggarsulid dule wilesaggwa gudidibe, nue mani nigga gudidibe, auggi wis bali balisaar obeddi abeleged. Belagwablesaar dulemar dii niggadbimalad, morgaug niggadbibalid, degsoggu anmar morgauggi obed abeleged, anba mimmigan morgauggi ogleged abelemogad. Anmar mas imagsoggardibe, mas gunsoggardibe, morgauggi argan enugged abeleged; anmar diise arbidibe, mimmiganga pañales ogwasardibe, anba argan enugged abelebalid. Weyob anmar ibmar imaggele, anmar doggus uweles uweles gudi guosulid. Degiile anmar dogdar disegadba waladagdii guosurbalid. Anmar maidgi servicio saddele, surba nueggwa geg imaglebarsundibe aggunaega, anmar yaa gwisar imaggoed, aagi anmar ibisgana digoed, ebbenne israelitamar imasayob (Deuteronomio 23:12, 13).

16 Mer anmar sunnasur mor yoi gudi guega, anmar bali bali mor enugged abeleged. Soglesurbalid anmar mor binid, geb mor garged bagsunnoye mor nued yoi gudi guega (1 Timoteo 2:9, 10 absogo). Degsoggu, bia anmar gudidibe, anmar daglegedba, geb anmar ibmar imaggedba dulemar dagmaloed “Bab Dummad, anmar Abonoged e Igar, igar nuedi” (Tito 2:10).

17. ¿Ibigala anmar sunnasur neg sedi gubisuli, geb ibigala anmar ibmar bamalad sunnasur sedi gubisurbali?

17 Igi neg aggwelegoe. Aggarsulid anmar cemento neg nigdibe, urwa neg nigdibe, auggi anmar nueggwa neg nudagged abeleged. Be, carro nigdibe, ur nigdibe nueggwa aggwed abelebalid, bur buledo we ibmar be Bab igargi sunmaggega ebubalir. Bela anmar ibmar niggadi, sunnasur sedii gued abelesulid. Wegi anmar ibmar aggwele, dulemar nued Bab igargi sunmagdamaloed. Ar anmar emarga sogdasoggua, Jehová, ‘dulemar neg oissodimalad’ obelogoye, geb sorba e Reino bela neg yeer dagle imaggoye, aagala anmar ibmar nueggwa aggwed abelemogad (Apocalipsis 11:18; Lucas 23:43). Degsoggu, anmar sunnasur neg sedisulile, geb anmar ibmar niggad  sunnasur sedisurbalile, mag daglegodo nue anmar durdagmai, yoogidse dulemar degi ibmar aggwemaladbii neg nuedgi gudi gumaloye.

Nueggwa na san aggo, geb nueggwa ibmar aggwebalo

18. ¿Igi mag daglegoe anmar Igar Iddoged Neg dodoaggwa dagsuli?

18 Igi Igar Iddoged Neg aggwelegoe. Igar Iddoged Neg Jehováse golega ebulesoggua, anmar abesulid sunnasur daglesii gued, mer dulemar egi issaggwa sunmaggega. Degsoggu, anmar igar amiger gebed we neg nueggwa aggwelesii guega. Degi anmar imaggele mag daglegoed, anmar dodoaggwa Babse goled neg dagsuli. Anmar wisid we neg siid Jehovágadi, degsoggu, anmar we neg ‘nudaggele, geb obinobalile’, yeer anmar iddodaoed (2 Crónicas 34:10). Anba deyob anmar bular igar iddoged neg aggwed abelebalid.

IBU IBMARMAR ANMAR SAN OISSOGE

19. Mer anmar na san oissogega, ¿ibu ibmar ebuged abelesuli, geb Biblia igi anmar bendasale, anmar mag iddo guega, ibigala we ibmarmar issaggwagwa?

19 ¿Igi anmar na san oissossulile? Mer anmar, ibmar anmar oissomalad ebuger gebed. Aagala anmar sigali usulid, anmar wissur mungubalid, doctor anmarga sogsasuli yogasaar anmar inamar dosurbalid. Bibliagi ise sogar nasulid ibu ibmarmar anmar san oissoge, deginigwale, mag iddollebalid ibigala Jehová soge abar ibmarmar nuegansur nanaye. Anmar, Jehová sabsoggu, ibmar sogaddargi anmar sunmaggoed, eba gar imaggega.

20, 21. ¿Ibu imagged Jehová anmar abesuli, geb ibigala anmar Jehová bali igar imagbie?

20 “Weyob anmarga ibmar nuegan uglegoye soglesoggu, bela ibmar isgana anmar sangi, degi, anmar burbagi naid osulomarsun, Bab Dummad dobegwaa, gaddig gwage swilidig gumai anmar gumarsun” (2 Corintios 7:1). Jehová abesulid anmar, ibmar anmar “san” oissomalad ebuged, geb abesurbalid anmar, ibmar anmar “burba” (anmar binsaed) oissomalad ebubalid. Aagala anmardi sigaligimalad ebubisulid, ar indaggega sorba  undar guleardaed, anmar san oissobalid, geb anmar nono oissobalid.

21 Anba aagi soglenabalid ibigala anmar, anmar sangi ibmar isgana ‘osuloged’ abelege. Be daggena, 2 Corintios 7:1 gine soged: “Anmarga ibmar nuegan uglegoye”. ¿Ibu ibmar nuegana? Jehová sogsad: “Degiir an be abingamaloed. [...] Ani an bemar Babga guoed” (2 Corintios 6:17, 18). Igi babgan na mimmigan sabe, aayobi anmar sabgumai guoye Bab anmarga sogmaid. Auggi anmar ibmar soggwen imagmogar gebed, anmar “ibmar isgana anmar sangi, degi, anmar burbagi naid osulo[ger]” gebed. Degsoggu, dogdar dolle anmar ibmar isganabin Jehovági banguder.

22-25. ¿Ibu binsaed nuegan Bibliagi nanai, mer anmar ibmar isganagan ebudii guega?

22 “Jehová, be Bab Dummad bela be gwage gine be sabguoed, bela be sangi, geb bela be binsaedgi” (Mateo 22:37). Jesús sogsad, igar bamaladba, weedi bur igar biriginedye (Mateo 22:38). Degsoggu, anmar ibmar imagdiidgi anmar Jehová sabgubimogad, anmar binsadiidgi, anmar gwagegi. Aagala anmar ibmar anmar san oissomalad ebugosulid, mer anmar binsa nussuggwa burgwega, geb mer anmar nono isgubaliga.

23 “[Jehová] belagwabba san burba ugmaid, bunnoged, degi, belagwabba ibmar ugmaibalid” (Gusmalad 17:24, 25). Bab nuggi anmar dula gudisoggu, anmar na san oissodi gued abelesurmogad. Aagala, ibmar soggwen anmar san oissogoele, anmar ebugosulid. Anmar na san sabsur imagdiile soglegerdo, Jehová anmarga san ugsad anmar nued dagsurye (Salmo 36:9).

24 “Ar na be san na be sabguedyobi, dule baid be sabgumogoed” (Mateo 22:39). Dule ibmar isgana ebugele, sun na ebi boni amigosulid. Be daggena, dule gadi sigali uwedi, sigali waabali agga sun emarga boni amimogad. Dule we ibmar indagbisulile, Bab igargi yolenaid, ar Jehovádi sogmaid emar sabgumaloye, geb we dule, bai Jehová dagge daglesurbardo (1 Juan 4:20, 21).

25 “Dulemar neg semamaimalad, degine, amar e dummagan  urbaligwaa nanamalo” (Tito 3:1). Abar neggweburmargi gobiernomar igar mesisad, sigali mummud geg uleye, geg uglebarye. Aagala anmardi we ibmar ugsulid, geb anmar usurbalid (Romanos 13:1).

26. a) Bab anmar sabgumai guega, ¿ibu anmar imagger gebe? b) ¿Ibigala nuedi nueggwa anmar na san aggwediir?

26 Bab anmar sabgumai guega, unnila anmar ibmar soggwenbi nued imagdii guosulid, bela anmar ibmar imagdiidgi anmar ibmar nueganbi imagdioed. Ibigwensursulid ibmar isgana indaggega, auggi soglesulid, geg ibmar isgana indagleye. * Igar nuedid anmar nued na san aggwedii gued. Nued anmargi binsaedba Jehová anmarga sogmaid, weyob na san aggwedii gumaloye (Isaías 48:17 absogo). Jehová nue anmar sabgumaid, anmar nue Jehová sabmogad, aagala anmar Jehová nug oisgudisulir yeer iddogoed.

^ parr. 2 We capítulogi sunmaglealile ibmar “sunnasulidgi” (gassaarsulid), unnila san aggwedginbi sunmaglegosulid, sunmaglebaloed, ibigala nuedsuli galagwensur gudi gued, ibigala nuedsuli ibmar isganaginbi binsadii gued geb ibigala nuedsurbali bamalad Bab igargi sunmagmaladba aggaed.

^ parr. 26 Recuadro “ ¿Ibmar nued imaggega be alamagnamodibe?”aagi naid dagbalo, geb “ Babgardi, bela ibmar guedbiid”, aagi naid dagbalo.

^ parr. 67 We e nug sunnadsulid.