Yaba nanaid daggega

Menú baid daggega

Índice daggega

Jehovági sunmagmalad

dule

‘Bab be sabgumai guega, mer egi banguo’

 CAPÍTULO 5

Ibu anmar imagger gebe mer dulemarba aggaega

Ibu anmar imagger gebe mer dulemarba aggaega

“Bemar we nabnegginedsur[malad]” (JUAN 15:19).

1. Jesús e burgwed idu ¿ibu ibmargi sunmasa?

JESÚS e burgwed iduar, nue e sordaganba buggib binsasad. Aagala, e babga sogsad: “An bese egissulid, dulemar be anga ugsadi we nabneggi gudiidgi be onoye. Suli. An bese egised, nia sagla mer aggar imagged be imagye. Ar wemarde we nabnegginedsurmalad, ar igi an we nabnegginedsurmoga” (Juan 17:15, 16). Weyob Jesús e Babga sogsadba mag dagleged, bela belad e sordagan binalena. Aa muddiggi anba e sordaganga sogsabalid: “Bemar we nabnegginedsur[malad]” (Juan 15:19). Degsoggu mag dagleged, Jesús abessulid e sordagan dulemarba aggamalad.

2. Jesús “nabneg[ye]” sogsagu, ¿ibu obarisa?

2 Jesús “nabneg[ye]” sogsagu, ¿ibu obarisa? Dulemar Babba igar imagsurmaladgi sunmasad, ar aamala Nia sogedba ibmar imagmalad, aagala na unnila eginbi binsamalad, dulemargi obin obin damarbalid (Juan 14:30; Efesios 2:2; 1 Juan 5:19). Degsoggu mag iddolledo ibigala Bibliagi soglenai, “dule we nabneg naidbo ai imagbiele, Bab Dummad e isdaradga gunonidaed” (Santiago 4:4). Anmardi, Jehová, anmar sabgumai gued abesoggua, anmar wisgubisunnad, igi nabir anmar dulemar abargi gudi gusmogale, auggi mer aamarba aggabalidi. Anmar wisguega, igi anmar dulemar baiganba aggassulile, ibmar sogaddargi sunmaglegoed: Bab Reinobarbi aggaedgi, geb mer política igarba aggaedgi; mer dulemar baiganyob daedgi; nue nudaggaggwa gudi guedgi; Bab igarginbi binsadii guedgi; geb Bab Dummad anmarga urwedga ibmar ugsad yoedgi.

 BAB REINOBARBI AGGAO, MER POLÍTICA IGARBA AGGAO

3. a) ¿Ibu igarba Jesúsdi aggaedgi binsassuli? b) Anmar sordagan Bab negse namaloed ¿ibiga Bibliagi bilemala Cristo nuggi barmilearmaladye? (Urba naid dagbalo.)

3 Jesúsdi política igarba aggaedgi binsassulid, bur Bab Reinogi dulemarga sunmagdii gusad. We reinogi Jesús yoogidse, Reyga arbasii guoed (Daniel 7:13, 14; Lucas 4:43; 17:20, 21). Aagala nabir Poncio Pilatoga sogsad: “An Reyga meged igar we nabnegginedsulid” (Juan 18:36). Anmar, Jesús sordagansoggua, aagala anmar Bab Reinobarbi nagubimogad, geb Jesucristo reyga sisoggua anmar egi bangubisurbalid, geb aagala anmar we reinogi bela dulemarga sunmagdibalid (Mateo 24:14). Apóstol Pablo sogsamogad: “Degisoggu, anmar, Cristo nuggi barmilealidga gumarsunnad. Bab Dummad anmarba bemarse wilesaggwaa gornaiyob, Cristo nuggi anmar bemarse wilesunnad: Bab Dummad ebo bemar igar nabomarsunye” (2 Corintios 5:20). *

4. ¿Igi anmar wisi, Cristo sordagan sunsogmaladi unnila Bab Reinogarbi arbadidii? (Recuadro “ Cristo sordagan emarba aggassurmalad” aagi naid dagbalo.)

4 Cristo sordagan Bab negse namaloedi, ‘nibneggi’ gudi gumalosoggu, baigan gobiernoba wissur aggamalad (Filipenses 3:20). Gwenadgan Bab negse namaloedi dobe dobe Bab Reinogi sunmagsurmalad, degsoggu, buggidar dulemar nabir Cristo “sibad wawaad baigan[ga]” gunonimarmosunnad (Juan 10:16; Mateo 25:31-40). “Sibad wawaad baigan”, gwenagan Bab negse namaloed nuggi arbadimalad. Gwenagan Bab negse namaloedi, sibad baiganmar buraggwa Bab Reinoga arbadimalad, política igarba aggasurmarbalid (Isaías 2:2-4 absogo).

5. ¿Ebbenne Bab neggwebur sigwisgua, neggwebur sogbigwagi buggusmalana, geb emi ibagi anmardi neggwebur sogbigwagi bugmarmoga?

5 Ebbenne Bab neggwebur sigwisgua, emardi unnila neggwebur soggwennaginbi buggusad, anmardi bar neggwebur  soggwennaginbi bugsulid, aagala anmardi geg política igarba aggabalid (Mateo 28:19; 1 Pedro 2:9). Anmar, política igarba aggadele, agga anmar na isdar dagdemalaled, geb bar anmar ibgwensur dulemarga Bab Reinogi sunmagdi gussurbaliled (1 Corintios 1:10). Guerra noarbalile, agga anmar na gwenagan oburgwenanai gudbaliled. Anmarga soglesoggu gwenagan  sabgumaloye geg anmar guerragi urwenai gued (Juan 13:34, 35; 1 Juan 3:10-12). Aagala Jesús e sordaganga sogsad, ¡mer gingi ebumaloye! Aaga sogsabalid, isdar bemar dagdimalad sabgumarbaloye (Mateo 5:44; 26:52; recuadro “ ¿Be doabali namoga?” aagi naid dagbalo).

6. Bad anmar Babga na san ugsasoggua, César anmarse ibmar egissarmogale, ¿igi anmar imagbaloe?

6 Cristo sordagan sunsogmaladi Babga na san ugsamalad, dulemargarsulid, neggweburmargarsurbalid. Aagala 1 Corintios 6:19, 20 gine soglenaid “bemar na bemargadsulid, bemar Bab Dummadgadid. Ar Bab Dummad gargedgi bemar bagsad”. Cristo sordagan ibgwensur “César” imagsurmarbalid, mani gaardibe bennugmalad, geb eba damarbalid; Césarba ibmar imagmar inigwale “ibmar Bab Dummadgadir[di]” Babga ugmalad (Marcos 12:17; Romanos 13:1-7). ¿Ibu “ibmarmar Bab Dummadgad[sunna]”? Bab abeged anmar unnila esebii goled, abebalid bela beladse anmar gwagegi e sabgued, anmar eba igar saed, mer anmar egi bangued, geb Bab abebalid anmar e ular burgwed, burgwe daglealir (Lucas 4:8; 10:27; Gusmalad 5:29 geb Romanos 14:8 absogo).

MER ‘DULEMAR BAIGANYOB DAO’

7, 8. We gine ‘burbaganye’ soglenaid, ¿ibu obarnai, geb igi dae dulemar imagnai?

7 Mag daglegega anmar emarba agganasuli, anmar emaryob dasurbalir gebed. Aaga Pablo sogsad: “Anmarga we nabneggined burba uglessulid, anmarga Bab Dummadgi Burba daniggid uglesad” (1 Corintios 2:12). Cristo sordagan Éfesoginmaladgardina sogsad, “we nabneg naid sogedba bemar gudimar[ye], degine we neg dirbirnaid e burbagan sogedba be nanadiye, aa burba Bab Dummadba ib imagdisurmalad ogannodiye” (Efesios 2:2, 3, Pap Tummat Karta [PTK], e narmagleged wis ogwalesad).

8 We gine ‘burbaganye’ soglenaid, ¿ibu obarnai? Nia gangued obarnaid, aa, dulemar oisgunaidid. ¿Igi dulemar imagnai? Mer dulemar Babba damalaga imagnaid, geb imagbalid  dulemar unnila “ibmar isgana bina soged, ibyagi ibmar nabir daglemalad bina soged” (1 Juan 2:16, PTK, e narmagleged wis ogwalesad; 1 Timoteo 6:9, 10). ¿Ibigala dulemar idumaiyobi, we burbagan dulemar “ogannodiye” soglege? Ar anmar na gusgu ibmar isgana binardamosoggua, anmar ogannonaid, bur bule anmar ibmar isgana imagdii guega, we burbagan, burwayobi, bela neg gasanaid, aagala dulemar dagsulid. ¿Igi dulemar, aa sogedba ‘nanadimarsunna’? Binna binna dulemar oisgunaid, imagnaid dulemar na eginbi binsaega, na dummarba imagmalaga, surbinsa ibmar bin iddomalaga, dulemar galagwensur daega, geb mer emarba igar imagmalaga. * Degsoggu, we ganguedi imagnaid dulemar binna binna Niayobi damalaga (Juan 8:44; Gusmalad 13:10; 1 Juan 3:8, 10).

9. ¿Ibu ibmarbali sun anmar dulemar isganamaryob dae gudmogale?

9 ¿Dulemar isganamar daed nabir anmarse gwagsamogardibe? Anmar basur binsadiir ibigwensur anmarse gwagsamogaled (Proverbios 4:23 absogo). Anmar, dulemar Jehovága arbasurmaladba aggadele sun anmar aamaryob dae gudmogaled, ar aamardina Jehovába igar imagbisurmalad, degsoggu anmar na iddossuli sun emaryob dae gudmogaled (Proverbios 13:20; 1 Corintios 15:33). ¿Anmar ibu ibmar imadele sun anmar Niayob dae gudmogale? Anmar yogsaar gardamar absoder, Internetgi nisaed garda dagdedibe, Internetgi apóstatamar gardamar absoddibe, geb dododer anmar emargi naggwedginbi binsadibe, we ibmarmar sun Niayob dae anmar imadoed.

10. ¿Ibu anmar imagger gebe, mer anmar, dulemar isganamaryob dae gumogaga?

10 ¿Ibu anmar imagger gebe, Jehová, anmar sabgumai guega, geb mer anmar dulemar isganamaryob dae gubaliga? Anmar bane bane Biblia absoger gebed, anmar mer igar iddogedse iggubalir gebed, geb anmar, gardamar nomamaid absobalir gebed. Anmar bali bali Babse gordi gubalir gebed, anmar ogannomai guega. Weyob anmar ibmar imagdiile, anmar Niagi  obinoed, geb anmar, dulemar isganayob daosurbalid (1 Juan 4:4). Aaga nue abeleged anmar bali bali Babse gordii gued.

NUE NUDAGGAGGWA GUDI GUO

11. ¿Igi emi ibagi dulemar mor yogusmala?

11 Anmar na san aggwedba, geb anmar mor yoedba mag daglegoed, anmar emaryob dasuli. Emi ibagindi bar ebbennegwayob mor yosur gusmalad. Aaga dule noticia sogedgi arbaed sogsad, emi ibagi omegan ber massergan binsaed  gaega mor yoeyob dagle gusmarye. Degsoggu, periódicogi soglesad, ‘mor meedde yoi gudiile, dulemar bar binge iddosur gusmarye’. Bunamala burwiganse baggar weyob mor yogusmarmogad. Emi ibagi dulemar yogasaar mor yogusmarbalid, bar nudaggaggwa dagle mor yosur gusmalad; degsoggu gwen na san bai dagge daglesur gusmalad.

12, 13. ¿Igi anmar mor yoed abeleye Bibliagi soglenai?

12 Anmardi Jehovága arbamaladsoggua, anmar nue nudaggaggwa gudi gued abeleged. Degsoggu, anmar nueggwa mor yoi gudi gued abeleged, mor sibbusur yoi gudi gued abelesulid. Geb anmar agneb nasoggalir daggoed mor igiid yoi anmar naoe. Bia anmar gudisundibe, anmar ‘wilubba mor yoed abeleged, dogdar wilub obidsasuli, nue yeer daglegedgi’, nabir anmar “ibmar nuegan imag[dii]” guega, mag daglegega anmar Babga arbamaladi. Yamo dulemar anmar daggega anmar nudaggaggwa gudi guosulid, “Bab Dummad, [anmar] sabgumai guega” anmar deyob gudi guoed (1 Timoteo 2:9, 10; Judas 21TNM). Anmar abesoggua Bab, anmar sabgumai guedi, anmar, “gwage ulubgi” bur nued daer gebed (1 Pedro 3:3, 4).

13 Anmar ebinsaed abelebalid, anmar mor yoedba dulemar wisguoed, bule anmar nue Bab igar sunsogedba nai. Anmar mor yodele yamo emarse oyogega anmar mor garged yoi gudi gubisulid. Anmardi bur Jehovági nued sunmagmalaga nudaggaggwa gudi gubied, geb anmar mor yoedba anmar dulemar obingeggudii gubisulid. Degsoggu, anmar mor yodele, anmarginbi anmar unnila binsabisulid, anmar binsabibalid igi bamalad anmargi binsadamarmogoe. Anmardi abesulid, Jehovági issaggwa sunmagleged, geb e neggweburgi issaggwa sunmaglebalid. Anmar abeged dulemar wisgued, anmar, Jehovága arbadimala. Anmardi “Bab Dummad nug odummogega” ibmar imagbied (1 Corintios 4:9; 10:31; 2 Corintios 6:3, 4; 7:1).

Be, mor yoedba ¿igi Jehovági sunmaglegoe?

14. ¿Ibu ibmargi anmar binsaed abelege?

14 Anmar, Bab igargi dulemarga sunmagnasoggalile, Bab igar iddonasoggalirdibe bur bule anmar nue nudaggaggwa naed abeleged. Nuediled be we ibmargi binsaed: “Be  mor yoedba ¿igi dulemar begi sunmagdamaloe? Be nueggwa obsulidba, geb be nue nugar ebinsulidba, ¿be sunnasur yabbandidae? ¿Aagala dulemar be anar bingedar iddodamala? ¿Ibugi bur be binsadida na be iddoge, nueggwa Jehová neggwebur yagi ibmar imaggedgine, be sogedba bur ibmar imaggedgindibe?” (Salmo 68:6; Filipenses 4:5; 1 Pedro 5:6).

15. ¿Ibigala Bibliagi soglenasuli mor igiid yolegoe, geb irbigwa oblebaloe?

15 ¿Ibigala Bibliagi soglenasuli, mor igiid yolegoe, geb irbigwa obleged abelebali? Ar Jehová abeged, anmar na anmar daggedba ibmar imagdii gued, aagala anmarga yamo ise sogar ibmar imagmasulid. Ar abebalid anmar, Biblia sogedba ibmar imagdii gued, ar “dule[mar] nue Bab Dummad igargi nasgumaimalad[di]” nue wismalad “igid igar nuedi, igid igar isganabali” (Hebreos 5:14). Anmar daggedba anmar ibmar imaggo inigwale, anmar, Jehová iegeddi abelesulid, geb anmar bamalad ieged abelesurbalid (Marcos 12:30, 31 absogo). Aaga mormar soggwenna nigsurmogad. Degsoggu neggwebur soggwengi gudii, be, Jehovági sunmagmalad igar iddogedse naddibe, be daggosulid gwenagan mor emarbi yoi gudidii.

BAB IGARGINBI ‘BINSADI’ GUO

16. ¿Ibu ibmarmar yeer iddo e imaggoye dulemar binsadamala, auggi Jesúsdi igi sogsamoga, geb ibu ibmargi anmardi binsaed abelemoga?

16 Dulemar binsadaed, mani nigguedi, geb ibmar nigguedi,  yeer iddodii dulemar imagye, sun anmar we dulemarse binsaed galemogad. Auggi, Jesúsdi sogsad, “ibmar idsesur niggadgi dule san dula gudi guosulid” (Lucas 12:15). Jesús sogsasurbalid, doggus ibmar sadde gudi gumaloye. Degi inigwale sogsabalid “dulemar bela belad Bab Dummad abedidimalad[bii]”, geb “ibya nued” nigmaladbii, Bab igarginbi binsadimaladbii, yeer iddodii gumaloye, geb aamarbii bendaglemarbaloye (Mateo 5:3; 6:22, 23). Doa sogedba bur be igar imagmogoe: “¿Jesús sogedbali, Nia sogedbardibe?” (Juan 8:44). Degsoggu, “be sunmaggedba, be ibmar imaggedba, be daedba mag daglegoed, be, Jesúsba nadibe, be, Niaba nadibe” (Lucas 6:45; 21:34-36; 2 Juan 6).

17. Dulemar, Bab igarginbi binsadimalar ¿igi iddodi gumaloe?

17 Jesús sogsad, “ar dule, Bab Dummad ibmar wisidi, ibmar nuegan imaggedgi mag dagledaed” (Mateo 11:19). Degsoggu, dule unnila Bab igarginbi binsadiile yeer iddodioed (Mateo  11:29, 30). Binsa yogsaar neg gagadiosursoggu bar buggib binsadiosulid, geb bar wile iddodiosurbalid (1 Timoteo 6:9, 10 absogo). Doggus ibmar nigguedgi binsadi guosursoggu nabir na nued mimmiganbo gudi guoed, geb nabir gwenaganse addagdii gubaloed. Gabider bar buggib binsamai gabosurbalid (Eclesiastés 5:12). Dulemarga Bab igargi sunmagdiidba yeer iddodibaloed (Gusmalad 20:35). “Bab Dummad ibmar bensuli” gudi gubaloed, geb “ulubgi bogidig” iddodi gubaloed (Romanos 15:13; Mateo 6:31, 32). ¡Ibiyob nued iddollege weyob gudiir!

“BAB DUMMAD ANMARGA URWEDGA IBMAR UGSAD”

18. ¿Doamar anmar isdarmaladye Bibliagi soglenai, geb igi arbabugmarmoye soglenabali; geb igi anmar urwenaye soglenabali?

18 Bab Dummad, anmar sabgumaile, Nia ibigwensur Bab igargi anmar obanosulid. Niadina abesulid anmar yeer iddodi gudi gued, geb abesurbalid yoogidse anmar sadegu gudi gued (1 Pedro 5:8). Pablo sogsad, “anmar dulemarbo urwenanaisurmalad, burba gandiggidba gangued nigmaladbo urwenaid, anmar, burba isgana dummaganga gumamaidbo urwenaid, we nabneg sidsidnaid isganamar semamaid e dummaganbo urwenaid, degine, niba niamar e dummagan gudimaladbo anmar urwenaid” (Efesios 6:12). “Urwena[ye]” soglegedi, griego gayabali, galamaad dule baidbo urwenai gued obared, banba urwenai gued obarsulid. Pablo, niamargi sunmasgua, anmar isdarmaladgi, weyob sogsad, wemala “dummaganga gumamai[ye]”, “nabneg sidsidnaid isganamar semamaid dummagan[ye]”. Degsoggu mag iddolledo niamar nue igar niggaa, geb igar amisbugmarbali anmar yardaggega.

19. Cristo sordagan ibu ibmar yoiyobi gudigumaloe Nia abin imaggega.

19 Anmar ibmar nueganbii imagsuli inigwale, anba nabir anmar Niagi naggwisaled. ¿Igi anmar nabir egi obidsale? Anmar ‘Bab Dummad e ganguedba’ anmarga ibmar  ugmaid mer indagger gebed (Efesios 6:13). Efesios 6:14, 18 segadgine we ibmargi sunmagnaid, sognaid: Ar igi sordamar urwed idu guaggwaa gudi guegala, [...] saderba molidub nasigdamala, deyob [...] Bab Dummad igar nabbiragwad wisidba [...] guaggwaa gudi gumar. Mer nagligguega, igi sordamar na binasgargi arsoged yodamala, deyob [...] igar inniggigwadgi nanamar. Ar igi sordamar baddo naegala, guaggwaa sabbad yoi gudidae, deyob [...] Bab Gaya burba Nued gwage bogidig saed barsogega, [...] guaggwaa gudi samar. Ar igi sordamar na [...] sigu abgaedgi duggue, deyob [...] Jesucristogi nabbiragwadgi bensuli [...] nanamar. Adi, sunna bemar sigu gwabunyearmalad nia sagla miedi, oginnegar. Igi sordamar nono arsogega bormo gurgin [...] nonogi siidae, deyobi abonoleged igargi nanadii imag[malo]. Degine, nia abin saega, Bab Dummad Burba [...] es suid [...] su[malo]. We es suid an be[marga] sogedi, Bab Dummad e gaya burba gued. Bab Dummad Burbaba bela bela Bab Dummadse gordii imag[malo]. Babse aggar aggar gorlegedgi, degine, bela ese ibmar egisedgi Bab Dummadse [...] gor[mar]”.

20. Soldadomar guerrase arbid sorbali, ¿ibu imasdamala, anmardi ibu imagsuli?

20 Anmarga “Bab Dummad e gangued[ba]” ibmar ugmasoggu, anmar melle we ibmar indagger gebed, degiile nabir anmar, Nia abin imaggoed. Auggi anmar we ibmar mer indagmogar gebed. ¿Ibigala anmar mer we ibmar indagger gebe? Anmardi soldadomar guerrase nanamaladyobi urwenasulid, soldadomardi guerrase arbile, sorba bin suiddii obunnosdamargweled, sorba baid guerrase nabaliga. Anmardi Niabo urwenaidgi obunnonasulid. Jehová, Nia gugmasale, geb e ángelmar gugmasbalile geb anmar urweddi berguoed (Apocalipsis 12:17; 20:1-3). Degsoggu, mer galaggumogo ibmar nueganbi imagdii guo. Bebii unnila walagwen gaenaisulid mer Jehová igargi banguega, bela gwenagan alamagnanamogad (1 Corintios 9:27). Anmar, Nia abin imagsulirdi, anmar egi naggosur guoed.

21. ¿Ibu anmar imagger gebe nabir anmar Niagi obinega?

 21 Anmar walagwengindi, Niagi obinosulid. Aagala Pablo anmarga sogsad “Bab Dummad ganguedba ese gordii gumalo[ye]”. Aagala nue abelebalid anmar Biblia durdagged, nabir Babba igar imaggega, geb mer anmar igar iddogedse iggu iggu nanabalid, ar aagi anmar, gwenagan anmaryob gaenanamogad anmar abin gudamogoed. Degsoggu unnila anmarbii walagwen Niabo gaenaisulid (Filemón 2; Hebreos 10:24, 25). Bela anmar wegi ibmar soglesadba igar imagdiile, ibgwensur, anmar, Bab igargi banguosulid, geb yoogidse anmar nabir Niagi obinbaloed.

IBU ANMAR IMAGGOE, MER BAB IGARGI BANGUEGA

22, 23. a) ¿Ibigala anmar guaggwa gudi gued abelege, Bab igargi sunmaggega, geb ibu ibmargi anmar binsaed abelege? b) Capítulo daniggidgi, ¿ibu ibmargi sunmaglegoe?

22 Jesús e sordaganga sogsad, bemar “we nabnegginedsursoggu, a ular, we nabneggi dulemar buggwad isdar be[mar] dagmalad” (Juan 15:19). Anmar, dulemar sordagansursoggu, dulemar isdar anmar daggardaed, aagala anmar guaggwa gudimogar gebed, wis anmar aggar imaglearsundibe nabir nuedgi Bibliagi ibmar sognaidba abin imagmogaga, urwedginsuli (1 Pedro 3:15 absogo). Degsoggu, we ibmargi be binsaena: “Be wisi ¿ibigala anmar, dulemar bamaladyobi ibmar imagsuli?”. “¿Nue be wisi, Bibliagi ibmar soglenaidi gaggansanasuli, geb mai nued gaggansasurmoga?” (Mateo 24:45; Juan 17:17). “Be, Jehovági sunmagdiidba galearsundibe, ¿be bingegguosuli emaryob ibmar imagsulidba?” (Salmos 34:2; Mateo 10:32, 33).

23 Auggi, Nia abesoggua anmar emaryob daedi, aagala imaggoed, anmar, ibmar isgana ibmar nuedyob daggega. Ebinsao soglesad, Nia dulemar yardaggega galagwensur ibmar isgana ebuye. Degsoggu capítulo daniggidgi anmar durdaggoed: Ibu anmar imagger gebe, anmar obunnosiile mer yogasaar ibmar imaggega.

^ parr. 3 Cristo na sordagan Bab negse namaloed iduded, Pentecostés año 33 gi (Colosenses 1:13). 1914 gine Cristoga gangued uglesad bela “nabneggi neg selemaid” Reyga guega. Degsoggu gwenadgan Babse namaloedi, Bab Reinoga, Cristo nuggi arbadidisunnad (Apocalipsis 11:15).

^ parr. 8 Libro Razonamiento a partir de las Escrituras página 140, 144 sega daggo, Jehovági sunmagmalad we garda onosad.