Yaba nanaid daggega

Menú baid daggega

Índice daggega

Jehovági sunmagmalad

dule

‘Bab be sabgumai guega, mer egi banguo’

 CAPÍTULO 1

“Anmar, Bab Dummad saber”, ¿ibu anmar imaggoe?

“Anmar, Bab Dummad saber”, ¿ibu anmar imaggoe?

“Ar anmar, Bab Dummad saber, anmar, e igar mamaidba nanaed, ar ade e igar mamaid duddusursulid” (1 JUAN 5:3).

1, 2. ¿Ibigala be, Jehová sabe?

BE BAD Babga sogsale an begarbii arbadii guoye, bes egislearsundibe, be, Bab Dummad sabmo sogeye be bibbisaar, surye sogosulid. Ar anmargardi Jehová sabgued ibmar gwabbidsulid. Ar Bibliagi soglenaid: “Anmar, Bab Dummad sabed, ar ade Bab Dummad e inse anmar sabgusad”. Jehová inso anmar sabgussoggua, aaga anmar, Bab sabmosunnad (1 Juan 4:19).

2 Jehová anmarga nabbaneg yeer dagle nasisad, geb anmar dula gudi guega bane bane anmarga ibmar ugmabalid. Jehová, anmar sabedba gusgu weyob ibmar imagmadaed (Mateo 5:43-48). Anmar, e igar wisguega Jehová anmarga Biblia ugsabalid. Anmarga sogmabalid anse gormarye, an, bemar iddogoye, geb an, bemar bendaggega, an, bemar ogannomai guoye (1 Juan 5:14; Lucas 11:13). Jehová bela belad anmar sabgusadba anmarga e Massi sabed barmialid anmar bendaggega, mer bar anmar isgudii guega, geb mer bar anmar burgwega. Degsoggua, ¡ibiyob Jehová nue anmar sabe daglege! (Juan 3:16 geb Romanos 5:8 absogo.)

3. a) Jehová, anmar sabgumai guega, ¿ibu anmar imagger gebe? b) ¿Ibu ibmargi anmar binsaed abelege, geb bia anmar we ibmar wisgusale?

3 Jehová abesulid anmar eg bangued, anmar sabgumai  gubied. Jehová, anmar sabgumai guega, ¿ibu anmar imagger gebe? Bibliagi Cristo sordaganga soglenaid we ibmar imagmaloye: “Bab Dummad, bemar sabgumai guega, mer egi bangumalo [...] anmar [nabir] sadegu gudi guega” (Judas 21TNM). Wegi soglenaidi “mer egi bangumalo”, soge iddolledo, Jehová nabir anmar sabgumai guega anmar ibmar soggwen imagmogar gebye. Degsoggua, anmar we ibmargi binsaed abeleged: “¿Ibu an imagger gebe, Jehová daggega, an nue e sabe?”. We ibmar wisguega anmar daggoena igi apóstol Juan sogsa: “Ar anmar Bab Dummad saber, anmar, e igar mamaidba nanaed, ar ade e igar mamaid duddusursulid”  (1 Juan 5:3). Anmar abesoggua Jehová wisguedi anmar bela belad e sabe, apóstol Juan wegi sogsagua nue ibu obarisa.

“ANMAR, BAB DUMMAD SABER”, ¿IBU ANMAR IMAGGOE?

4, 5. a) Apóstol Juan sogsagua “Bab Dummad sabgumaloye”, ¿nue ibu obarisa? b) ¿Ibiga bar be bengudsuli Bab Dummad nue mai?

4 Apóstol Juan sogsagua “Bab Dummad sabgumaloye”, ¿nue ibu obarisa? Bab Dummadba igar imaggedgi sunmasad. We igargi anmar nueggwa sunmagged iduale, emisgi, be binsamogana, ¿igi be iddosmoga gebbe be, Bab Dummad sabgudgu?

Anmar, Babga sogsagu, an begarbii arbadii guoye, anmar bautizar imasbargua, mag daglesad, anmar, Bab sogedba gudi gude

5 Be binsaena gebbe be, Jehová igar durdaggargua, geb be, Jehová ibmar imaggoed wisgudbargua, Bab maidgi be bar bengudsulid. Be mag na iddononibalid, be, Bab igargi yoledimogana; degsoggua be, Babgi binsadisulinad. Degi inigwale Babdina nabir beg binsaedba Cristo bega barmialid, yoowedse be nabir Adán gudi guoenayobi, be nabir sadegu gudi guega (Mateo 20:28; Romanos 5:12, 18). Be mag iddononibalid Jehová dummad wilesad na e Massi sabed be ular burgwega barmiargu. We ibmar wisgusgu be yeer iddoded, degsoggu, be, Bab sabgue daglearsundo (1 Juan 4:9, 10 absogo).

6. ¿Igi mag daglegoe be nue Jehová sabe, geb be, Jehová sabedba ibu imassunna?

6 Unnila gaggaginbi geg sogleged an emar sabye. Degsoggua unnila geg anmar gaggaginbi sogmogad: ‘An, Jehová sabye’. Igi dule, Bab bensulir e ibmar imagdiidba mag daglege, aayobi dule, Bab sabele e ibmar imagdiidba mag daglemogoed (Santiago 2:26). Be, dule wargwen sabele, be ega ibmar nuegan imagdaed. Aayobmogad, be, Jehová sabgudgua, be ega ibmar nuegan imagbi guarmogad. Aaga sun be bautizar imasad, Jehovág sunmaggedga  guega. Be bautizar imasale sogledo be bela belad Bab igar bin guarye, geb be bela belad Babba aggadye. Aaga be Babga sogsad, an begarbii arbadii guedsegoye, geb an bautizar imagbaloye (Romanos 14:7, 8 absogo). Anmar, Babga sogsadibe an begarbii arbadii guedsegoye, anmar deyob imaggega, apóstol Juan ibmar sogsadba anmar ibmar imagger gebed.

“ANMAR, E IGAR MAMAIDBA NANAER GEBED”

7. ¿Ibu igarmar, Jehová, Bibliagi mesisa, geb ibu anmar imagger gebe Jehová igarmar mamaidba nanaega?

7 Apóstol Juan sogsad, anmar, Bab sabele, “anmar, e igar mamaidba nanaer geb[ye]”. ¿We igarmarde biddimarsunna? Bibliagi soglenaid, Jehová abesurye dulemar mungued, neg sidsigi galagwensur gudi gued, ibmar baid e Bab Dummadga imagged, addursaed, geb gaggansaed (1 Corintios 5:11; 6:18; 10:14; Efesios 4:28; Colosenses 3:9). Jehová igar mamaidba anmar nanaega, anmar Biblia sogedba gudi guer gebed, Bibliagi soglenaid igi dulemar daed abelege.

8, 9. Bibliagi ibmar ise sogar nasulile, ¿igi anmar wisguosunna Bab Dummad we ibmar nued dagdibe, nued dagsurdibe?

8 Anmar abedibe Jehová weligwar iddomai guedi, Bibliag igarmar ise sogar mamaidbarbii daed unnisulid. Bela anmar ibmar imagdiid irbali Jehová anmarga igar soggwen soggwen mesissulid. Bane bane ibmar imagdiidgi anmar dagnoniggoed Bibliagi abar ibmar ise sogarnanasuli. Ibmar degi gunoniggile, ¿igi anmar wisguosunna Jehová nued dagdibe anmar ibmar imagsoggalid? Degsoggua, ¿bia nue soglenasunna biddi ibmar Jehová nued dagge, geb biddi ibmar issaggwa dagge? Bibliagi soglenaid. Biblia durdadele anmar wisgunoniggoed, biddi ibmar, Jehová nued dagge, geb biddi ibmar issaggwa dagbali  (Salmo 97:10 absogo; Proverbios 6:16-19). Weyob anmar durdagmaoed, igi daedi Jehová nued dagge. Anmar wisguddibe, Jehová, dule igi daedi, anmar mag iddodoed, anmar ibmar imagdiid, Jehová nued dagdibe, nued dagsurdibe. Weyob anmar wisgunoniggoed, ‘biddi ibmar Jehová nued dagge’ Bibliagi ibmar ise sogar soglenasur inigwale (Efesios 5:17).

9 Bibliagi soglenasur inigwale mer televisióngi, cinegindibe dulemar galagwensur gunanair daggoye, na sabsur imagnanairdibe, auggine, ¿abele be binsae Bibliagi anmarga ise sogar imagleged anmar mer we ibmar daggoye? Bad anmar wisid, Jehová igi we ibmar dagge. Bibliagi soglenaid ‘Bab Jehová dule sabsur emar imagdiid isdar dagye’, geb “dulemar neg sidsigi yoledimalad, degine, na abirgunagwar diggarba yolemalad” isdar dagye (Salmos 11:5; Hebreos 13:4). Anmar we igargi nueggwa binsadele, anmar dagnoniggoed, ibu ibmar Jehová nued dagsuli. Aaga televisióngi, cinegindibe, sulirdi internetgindibe anmar ibmar isganamar dagbisulid. Dulemar isgusbuggwadi abeged anmar binsaed, ibmar isgana aggar anmar imaggosurye. Auggine, Jehovádi bibbisaar abesulid, anmar we ibmar isgana dagged. *

10, 11. ¿Ibigala anmar, Jehovába igar imagbidae, geb igi anmar eba igar imagdii gubie?

10 ¿Ibigala anmar, Bab Dummad igarmar mamaidba gudi gubie? ¿Ibigala anmar bane bane Bab Dummad sogedba dabie? Unnila mer anmarga neg aggar guega, anmar, Bab Dummadba igar imagsulid; Bab Dummad dobedbarsurbalid abaggar anmargi agbinnalile (Gálatas 6:7). Anmar, Bab Dummadba igar imagged, Bab Dummad wisguega anmar bela belad e sabe, igi burwigan e sergan  nued e dagged abedae, aayobi Jehová nued anmar dagged anmar abemogad (Salmo 5:12). Ar Jehová, anmar Babad, aaga anmar bela belad Jehová binaled. Nued iddolleged anmar wisir Bab Dummad ‘nued anmargi binsamai’ (Proverbios 12:2).

11 Aaga anmardi arbabisulid abargi Babga arbasulid. * Anmar ega sogsurbalid an beg arbaega, be, an bendagger gebye, biddi ibmar anmar nued dagge, aabi anmar imagsurbalid. Anmar sogosulid igi anmar Babga arbaoe, anmarga ibmar ibgwensur guerbii anmar eba dasulid, anba anmarga ibmar beedse gualir anmar eba igar imagbalid. Anmardi ‘gwagegi Babba igar imagdiid’ (Romanos 6:17). Salmo narmasadyobi anmar sogmogad: “Bab Dummad, an, be sogedba ibmar imaggedi ibiyobi an yeer iddodae” (Salmo 40:8). Degsoggu, anmardi yeer iddodaed Babba igar imagged. Ar anmar wisid Jehovába igar imagged abelege, ar Jehová anmarga sogmamogad anbali igar imagmaloye; budar imagged abargi anmar eba dasulid (Deuteronomio 12:32). Noé, Bab Dummad sabedba Babba igar imagdii nanasad, anmar, Noéyobi Babba igar sabimogad, Bab Dummad nued anmar dagmogaga. Bibliagi weyob sognaid: “Ar igi Bab Dummad, Noéga sogsa, aaba bela Noé ibmar imagsad” (Génesis 6:22).

12. ¿Igi iddogedgi anmar eba igar imaggele Jehová yeer iddodae?

12 ¿Igi Jehová iddodae anmar yeer iddogedgi eba igar imagger? Bibliagi sognaid Jehová yeer iddodaye (Proverbios 27:11). ¿Nue soge anmar nabir Jehová weligwar iddo imasale? Gwendina. Anmar daggoena, ¿ibigala anmar nabir Jehová yeer iddomai imagge? Jehová, anmar imasad  anmar nabir na walagwengi ibmar imagdii guega. Degsoggu anmargi sisundo, anmar, Babba igar imaggodibe, anmar eba igar imaggosurdibe (Deuteronomio 30:15, 16, 19, 20). Degsoggua anmar, Jehová sabedba eba igar imadele, Jehová yeer iddomadaed (Proverbios 11:20). Ar wegi daed bur igar nuedid.

“E IGAR MAMAID DUDDUSURSULID”

13, 14. ¿Ibigala anmar soge, ‘Jehová igar mamaid duddusursurye’, geb ibug anmar binsasale we ibmar mag iddogega?

13 Mer anmar binsaega, Jehovába igar imagged undarye, apóstol Juan weyob sogsad: “[Jehová] igar mamaid duddusursulid”. 1 Juan 5:3 gi soglenaidi ‘duddusursurye’, griego gayabardi sogleged “uggusursurye”. * Aaga baid Bibliagindi weyob soglenaid, “e igargan mamaid agdiggirbasurye” (Pap Tummat Karta). Jehová igarmar mamaid geg eba imaglesurnanaed, duddusursurnanaed. Anba anmar bela noedbi inigwale, anmar nabir eba igar imagged.

14 We ibmar mag iddogega anmar weyob sogoena. Be ai nued beg soged an neg ogwasoggarye, ibmar berbegega wis an bendagye. Bule isse ibmar ulugi ulugi berbelegoe. Abar ulugwamar uuggunanaed, abar uggusurnanaed, dule ebo berbeger gebed. Be ai beg sogoed biddimar be berbegoedi. Beg sogosulid ulugwa uggusulid walagwen sedye, ar wisid be bengudagoe, sun be boni amiged. Aayobmogad, Bab Dummad, anmar sabsoggua, anmar ibmar soggwen geg imaggele, anmargi nai guosurmogad (Deuteronomio 30:11-14). Jehová daggele ibmar soggwen anmargi obine, anmarga sogosulid imagmarye, “ar  Jehová, anmar wisid, anmar ibu gue. Nue wisid, anmardi unnila nabba gued” (Salmo 103:14).

15. ¿Ibigala anmar nue wisi Jehová nued anmargi binsaedba anmarga igarmar mesisa?

15 Jehová igarmala beedsesurnanaed, anmar nued gudi guega mesilesnanaed (Isaías 48:17 absogo). Moisés israelitamarga sogsad: “Bab Dummad Jehová anmarga sogsad, bela e Igar ugsadba anmarde nanamaloye. E dobeggwaa nanamaloye, adi, anmarga bela ibmar nueganbi naegarye, degine, suiddi gudii guegarye, igi emi ibadse anmar gudii” (Deuteronomio 6:24). Anmar nue wismogad Bab Dummad nued anmargi binsaedba anmarga igarmar mesisad, anmar yeer iddodii guega. Jehová we igarmar mesissoggua, igarmar nuegannanaed, ar Jehovádi wisid ibu ibmar anmarga nued guoe. Ar Jehovádi binsaed ibedid (Romanos 11:33). Jehová bela belad dulemar sabbalid (1 Juan 4:8). Jehová yeer dulemar sabsoggua, ibmar sogdele, geb ibmar imadbalile, sabedgi imagged, degsoggu sabedba anmarga igarmar mesisad.

16. Dulemar isganamar abargi anmar buggwa inigwale, geb anmar bela noedbibar inigwale, ¿ibu anmar bendaggoe, anmar, Babba igar imagdii guega?

16 Auggine soglesurbalid Babba igar imagged ibigwensurdeye. Anmar, dulemar isgusbuggwad abargi bugsoggu, mer anmar emarba galegega, anmar alamagnair gebed, ar “we nabneg naidgi bugmaladi nia sagla sogedba gudidimalad” (1 Juan 5:19). Anmar ber noedbibarsoggua ibgwensur anmar Bab igargi yoleddabalid, degsoggu anmar alamagnabalir gebed mer galagguega (Romanos 7:21-25). Anmar nue Bab Dummad sabele, anmar galagguosulid. Dule, Jehová sabedba eba igar imagnaile, Jehová, we dule bendagmai gumogoed. Aaga “Bab Dummadi we Burba Isligwaled dulemar eba damaladga ugmaid” (Gusmalad 5:32). Jehová e ganguedi anmar bendagged anmar ibmar  nuegan imagdii guega, degiile geb anmar, Jehová sogedba gudi gudoed (Gálatas 5:22, 23).

17, 18. a) ¿Ibu ibmar anmar we librogi durdaggoe, geb anmar, aa ibmar durdadele ibu ibmargi anmar binsaed abelegoe? b) Baid capítulogi, ¿ibu igargi sunmaglegoe?

17 We librogi anmar durdaggoed Jehová igarmar narmaggar mamai, igi anmar daoe; anmar durdagbaloed, abar igarmar ise sogarnanasuli, madar sognanai, igar baigan anmarga soglebaloed anmar eba nanaega. Anmar we ibmar durdadele ibmar sogbaagi anmar binsadaoed: Jehová bibbisaale anmar ebibbigosulid anmar e igarba nanaega, ar Jehovádi abeged anmar eba igar imagbiedba eba igar imaggedi; Jehová sogmaid, be anba igar imaggele emi ibagi be nued gudi guoye, geb yoogidsedi be sadegu gudi gudoye. Anmar, Jehová sogedba daele, mag daglegoed, anmar bela belad Jehová sabe.

18 Jehová, anmar imasad anmar na ulubgi mag na iddo gued, anmar ibmar nued imagdidibe, anmar ibmar isgana imagdidibe. Capítulo dosgi we igargi sunmaglegoed.

^ parr. 11 Jesús niamarga sogsagu dulemargi nomarye, Niamarbela Jesúsba igar imagbisulid abargi igar imasmalad. Jesúsba igar imagbisurmalando, auggi ar Jesúsdi emarba bur dule dummadinsoggu eba igar imagge daglearmarsundo (Marcos 1:27; 5:7-13).

^ parr. 13 Mateo 23:4 gine aagisaar soglenamogad, soglenagua escribamar geb fariseomar dulemarga “duddusur igar mesma[rye]”. Dulemar we ibmarba igar imagmalaga, escribamar geb fariseomar yogasaar dulemarga we igarmar mesismalad.