Thukihel-ah kanto

Menu nihna-ah kanto in

Thu kihelte-ah kanto

Jehovah Tecite

Chin (Tedim)

Pasian Kiang Pan A Lungdamhuai Thu!

 Lesson 9

Na Innkuan Bangci Nuamsak Thei Ding Na Hiam?

Na Innkuan Bangci Nuamsak Thei Ding Na Hiam?

1. Innkuan a nop nading kipi kiteenna ba’hang thupi a hiam?

A lungdam Pasian, Jehovah kiang pan hongpai a lungdamhuai thu khatin innkuante lungnuamsak nuam hi. (1 Timoti 1:11) Innkuan a pan masa pen Pasian ahi hi. Innkuan lungnop nading kipi kiteenna thupi hi. Ba’hang hiam cih leh tua in naupangte khantoh nading a muanhuai innkuan sung suaksak hi. Khristiante in omna mun zui-in kiteenna tawh kisai upadi zahtaak ding kisam hi.Luka 2:1, 4, 5 na sim in.

Pasian in kiteenna bangci muh a’hiam? Pasian in kiteenna pen i khantawn hisak nuam hi. Jehovah in nupate khat le khat citak ding a deih hi. (Hebru 13:4) Kimaakna a mudah hi. (Malakhi 2:16) Tua ahih manin Khristiante in mi dang tawh a mawh ciang bekin kikhen thei a, a dang khat tawh kiteng thei pan hi.Matthai 19:3-6, 9 na sim in.

2. Nupate bangci kithuah thei ding hiam?

Jehovah Pasian in nupa khat le khat kipanpih ding cih ngimna tawh a bawl ahi hi. (Piancilna 2:18) Innkuan lutang ahi pasal in a innkuan kisapnate a panpih kul a, Pasian’ thu hilhna-ah zong a makaih kul hi. A zi tung kipiakhia a, itna a lahding zong kisam hi. Khat le khat ki-it in kizahtaak ding zong kisam hi. A kicing nupa ki-om lo ahih manin kimaisakna sinding zong kisam hi. Tua hi leh, innkuan hong nuamsak ding hi.Efesa 4:31, 32; 5:22-25, 33; 1 Peter 3:7 na sim in.

3. Nupa kikaal kilemlohna hangin a kinusia thei diam?

Nupa kikaal buaina na tuah uh ciang, na nih un itna tawh na kiholem ding na hanciam un. (1 Korin 13:4, 5)  Innkuan sung buainate paulap a, kikhen ding Lai Siangtho in na saang lo hi.Korin 7:10-13 na sim in.

4. Naupangte, Pasian in bang hong deihsak a’hiam?

Jehovah in naupangte lungnuam sak nuam hi. Na khangnona uh nop na sak na’ng un, a hoih peen thuhilhna Pasian in hong pia hi. Na nu le na pa’ pilna leh a thu tuah uh pan zong hamphatna hong ngahsak nuam hi. (Kolose 3:20) Nang hong Piangsakpa leh a Tapa Jesuh’ deihnate sepna pan zong hong lungnuamsak nuam lai hi.Thuhilhna 11:9–12:1; Matthai 19:13-15; 21:15, 16 na sim in.

5. Nu le Pate, na tate uh nuntaak nuam a ngah na’ng bangci panpih thei ding?

Tate’ annektuidawn, niikten puansilh dingte, nu le pate’n hanciam in na a sep kul hi. (1 Timoti 5:8) Hi mahtaleh, nuntaak nuam a ngah na’ng, Pasian it-a ama thu sin-in a zuih ding na hilh a kul hi. (Efesa 6:4) Pasian na itna, sepna tawh nalah pen na tate in a lungsim uhah ciamteh a, a khantawnin mangngilh lo ding uh hi. Na tate, thu a ngaihsut theih nading Lai Siangtho pen thuhilhna pi-in na zang in.Thu Hilhkikna 6:4-7; Paunak 22:6 na sim in.

Naupangte phatin tha na piak ciang-in, kipaak uha a hamphat lawh uh hi. Taina le thuhilhna zong kisam veve hi. Tua hi leh, amau lungnopna a susia thei gamtatnate pan a dal na suak hi. (Paunak 22:15) Ahih hangin thuak zawh loh zah dong thuhilhin, tai niloh kei in.Kolose 3:21 na sim in.

Nu le pate leh tate a’ding huhna a pia thei Lai Siangtho kibulphuh laibu tampi Jehovah Tecite’n thohkhia uh hi.Late 19:7, 11 na sim in.