Thukihel-ah kanto

Menu nihna-ah kanto in

Thu kihelte-ah kanto

Jehovah Tecite

Chin (Tedim)

Pasian Kiang Pan A Lungdamhuai Thu!

 Lesson 4

Jesuh Khrih in Kua A Hiam?

Jesuh Khrih in Kua A Hiam?

Jesuh ii bang a hoihnate’n ama kiangah hong zuan sak hiam?MATTHAI 11:29; MARKA 10:13-16.

1. Jesuh’ nuntakna koici kipat hiam?

Jesuh pen mihingte tawh kibang lo-in mihinga a suah ma-in vantungah kha pumpi-in a nungta hi. (Johan 8:23) Pasian’ piansak masak peen hi a, a dangte khempeuh a bawl ciang Jesuh in a huh hi. Jesuh pen Jehovah in direct-a amah bek a piansak ahih manin Pasian’ Tapa “khat bek” ci-a min kilawh pen a kilawm hi. (Johan 1:14) Jesuh in ­Pasian’ taanga thugen khuan nei ahih manin “Thu” zong kici thei hi.Paunak 8:22, 23, 30; Kolose 1:15, 16 na sim in.

2. Jesuh ba’hang leitung hong pai ahi tam?

Pasian in a Tapa vantung panin leitungah sawl a, a nuntakna pen Jew nungak siangtho Mary’ naubu sungah a suankhia hi. Tua ahih teh, Jesuh in leitung’ pa mihing a nei kei hi. (Luka 1:30-35) Jesuh leitung hong paina a hang pen (1) Pasian tawh kisai thuman a hilh ding, (2) hatsakna i tuah teh Pasian’ deihna bangci sep ding cih limlak ding, (3) a cingtaak ama nuntakna pen “tatkhiat” nadingin a piakkhiat na’ng ahi hi.Marka 10:45 na sim in.

3. Ba’hang tatkhiatna kisam i hi hiam?

Tatkhiatna pen mikhat sihna ii khut sungpan a suahtaak nading a kipia thaman ahi hi. (Paikhiatna 21:29, 30) Mihingte teeka si dingin Pasian in na gel lo hi. Tua pen bangci theih ding? Mihing masa Adam pen Pasian in a genna ah “mawhna” a kici thukham a pelh leh a si ding hi a, a pelh kei leh cikmah hunin si lo ding cihna ahi hi. (Piancilna 2:16, 17; 5:5) Lai Siangtho cihna-ah,  sihna pen Adam kiangpan mihingte tungah “hong luut” hi. Adam in ama suan le khak tungah mawhna i thaman sihna hong pia sawn hi. Tua Adam kiang pan i luah sihna khut sung pan ih suahtaak na’ng tatkhiatna kisam hi hang.Rom 5:12; 6:23 na sim in.

Kua in tatkhiatna pia thei ding hiam? I sih ciangin ei le ei thaman piaksa suak ih hih teh, midang a’ding i pia thei kei hi.Late 49:7-9 na sim in.

4. Jesuh ba’hang hong si hiam?

Ei tawh kibang lo-in Jesuh pen a cingtaak hi. Mawhna bawl lo ahih teh a sih kul lo hi. Jesuh a sihna pen midang mawhneite a’ding hi zaw sop hi. Hi munah, a Tapa leitung­ah sawl a, ei a’ding a hong sihsak pen Pasian itna bangzah taka lian hiam cih kilang hi. Jesuh in zong ei a’ding a nuntakna hong piakna leh ei a’ding a Pa’ thu a manna tawh itna hong lak hi.Johan 3:16; Rom 5:18, 19 na sim in.

5. Tu’n Jesuh in bang a sem tam?

Jesuh leitung a om lai-in, cinate damsak a, a site hingkiksak in, mi cimawhte noptuamna a pia hi. Hih te’n, Jesuh in thumaang mite a’ding mailam hun ah a bawlsak dingte lahkholna ahi hi. (Matthai 15:30, 31; Johan 5:28) Jesuh a sih khit teh, Pasian in kha pumpi tawh a nungta dingin hingkiksak hi. (1 Peter 3:18) Jesuh pen leitung a Uk dingin Jehovah in a vang a piak masiah, Pasian’ taklamah na ngak hi. ­(Hebru 10:12, 13) Tu’n ahih leh Jesuh in vantungah Kumpi-in ukta a, a nungzuite’n tua a lungdamhuai thu leitung mun khempeuhah na taangko uh hi.Daniel 7:13, 14; Matthai 24:14 na sim in.

A sawt lo-in, Jesuh in a Kumpi thuneihna zangin gimnate leh gimna a piangsak mite sumaimang ding hi. Jesuh tung upna lak a, amah thu a maang mite na kipaak dinga leitung paradais ah teeng ding uh hi.Late 37:9-11 na sim in.