Temwen Zeova i distribye Labib​—Tradiksyon nouvo lemonn avek nenport dimoun ki anvi lir li.

Kantmenm i annan bann sosyete biblik ki’n enprim bilyon kopi Labib ek diferan tradiksyon, lapovrete ek diskriminasyon relizye i fer ki bokou dimoun pa kapab ganny en Labib dan zot prop langaz. Se pour sa ki Temwen Zeova i ofer Labib Tradiksyon nouvo lemonn dan plis ki 115 langaz.

Annou vwar serten legzanp:

• Rwannda: Silvestre ek Venantie ki annan kat zanfan i eksplike, “Nou mizer, alor nou pa ti pou kapab aste en Labib pour sak manm fanmir. Aprezan sakenn i annan son prop kopi Tradiksyon nouvo lemonn dan langaz Kinyarwanda e nou lir Labib ansanm toulezour.”

  En paster Anglikan dan sa landrwa i dir: “Sa en Labib ki mon kapab konpran. I pli bon ki tou lezot Labib ki mon’n lir. Temwen Zeova i vreman enterese avek dimoun!”

• Repiblik Demokratik Kongo: Serten legliz in refize vann Labib dan langaz Lingala avek Temwen Zeova. Lingala i enn bann langaz ki pli ganny servi dan sa pei.

  I pa sirprann nou alor ki depi Labib Tradiksyon nouvo lemonn in sorti dan langaz Lingala, bann Temwen Kongo in servi e distribye li avek bokou lantouzyazm. Anfet, Tradiksyon nouvo lemonn in kree sitan bokou leksitasyon ki ler i ti ganny lanse dan en lasanble Temwen Zeova, bann zofisye lapolis ki ti la prezan kot sa stad ti met laliny pour ganny zot prop kopi.

• Fidyi: Labib dan langaz Fijian i sitan ser ki dan lepase bokou Temwen Zeova ti prefere servi Tradiksyon nouvo lemonn an Angle. Me an 2009, bann dimoun Fidyi ti resevwar New World Translation of the Christian Greek Scriptures (Nouvo Testaman) dan zot lalang maternel.

  En zonm ti sitan enpresyonnen par lefet ki Tradiksyon nouvo lemonn dan langaz Fijian ti fasil pour konpran ki i ti demann en kopi. Me bann Temwen dan sa pei ti eksplik li ki i ti pou bezwen esper omwen en mwan pour prosen kargezon Labib ariv dan son lavil. Sa zonm pa ti anvi espere, alors i ti dakor pour al en zistans plis ki 35 kilomet avek kot i ti reste pour rankontre en lot Temwen ki ti annan en Tradiksyon nouvo lemonn pour donn li. Sa zonm ti dir: “Sa tradiksyon i bokou pli bon ki sa enn ki nou abitye servi. I kler e fasil pour konpran.”

• Malawi: Ler Davide ti konmans etidye avek Temwen Zeova, bann manm en lorganizasyon Baptist laba ti antre dan son lakaz e pran sa Labib ki zot ti’n donn li. Alor rev Davide ti vin vre ler Tradiksyon nouvo lemonn ti sorti dan langaz Chichewa.

  Vi ki Labib i sitan ser Malawi, Davide ti pe trakase ki mannyer i pou ganny en lot. Me ler i ti resevwar en kopi Tradiksyon nouvo lemonn, i ti dir: “Aprezan mon’n ganny en pli bon Labib ki sa enn ki mon ti annan!”

Plis ki 60 an pase, ler premye parti Tradiksyon nouvo lemonn an Angle ti sorti dan en lasanble lavil New York, lodyans ti ganny ankouraze: “Lir li antye. Etidye li . . . Met li dan lanmen dimoun.” Pour akonpli sa lobzektif, Temwen Zeova in pibliy plis ki 175 milyon kopi Tradiksyon nouvo lemonn. Deplis, ou kapab aprezan lir Labib lo Enternet dan apepre 50 langaz.