BANN ZENN I DEMANDE

Akoz mon devret asiste bann renyon kot Lasal Rwayonm?

ZWE

De fwa par semenn, Temwen Zeova i fer bann renyon kot zot landrwa ladorasyon ki apel Lasal Rwayonm. Kwa ki pase laba e ki mannyer ou kapab benefisye ler ou asiste?

Kwa ki pase dan en Lasal Rwayonm?

Lasal Rwayonm i en landrwa kot nou aprann lo ki mannyer Labib i kapab ed nou dan en fason pratik. Bann renyon ki ganny fer laba i kapab ed ou:

aprann laverite lo Bondye.
konpran rezon ki bann keksoz pe arive dan lemonn ozordi.
vin en pli bon dimoun.
trouv bann pli bon zanmi.

Eski ou ti konnen? Landrwa kot Temwen Zeova i fer zot renyon i apel en Lasal Rwayonm parski Rwayonm Bondye i souvandfwa ganny diskite laba.—Matye 6:9, 10; 24:14; Lik 4:43.

Akoz ou devret asiste?

Sa ki ou aprann laba pou ed ou. Bann prensip Labib ki ganny diskite dan bann renyon ki Temwen Zeova i fer pou ed ou “rod lasazes.” (Proverb 4:5) Sa i vedir ki Labib i vreman kapab ed ou fer bann bon desizyon dan lavi. I osi kapab ed ou trouv larepons bann kestyon enportan dan lavi, parey:

Sa lalis ki swiv i montre zis detrwa tit bann diskour pour bann renyon ki ganny fer dan wikenn:

Akoz nou devret les Labib gid nou?
Kote ou kapab ganny led dan letan ladetres?
Ki Rwayonm Bondye pe fer pour nou la konmela.

“En garson dan mon laklas ti asiste enn nou bann renyon. I ti asiz avek nou fanmir e i ti swiv ansanm avek nou dan nou bann liv. Apre, i ti dir mwan ki i ti vreman enpresyonnen avek larepons ki bann dimoun ti donnen pandan sa moman kot lodyans i kapab partisipe. I ti osi dir ki kot son legliz zot napa bann piblikasyon pour etidye parey nou nou annan.”—Brenda.

Eski ou ti konnen? Ou pa bezwen peye pour ganny en plas asize kot Lasal Rwayonm e nou pa zanmen pas laket.

Ou pou ganny ankouraze avek bann dimoun laba. Labib i dir ki en rezon akoz bann Kretyen i devret zwenn ansanm i pour zot kapab “ankouraz kanmarad.” (Ebre 10:24, 25) Nou ganny bon lasosyasyon avek bann dimoun ki met lentere Bondye ek lezot avan sa ki pour zot e sa i vreman fer dibyen dan en lemonn kot laplipar dimoun i met zot lentere premye.

“Apre en gran lazournen, par ler mon santi mwan tris e fatige, me toultan bann dimoun kot Lasal Rwayonm i fer mwan santi mwan pli byen. Apre renyon ler mon pe retourn kot mwan, mon santi mwan ere e pare pour fer fas avek en lot lazournen.”—Elisa.

Eski ou ti konnen? I annan plis ki 120,000 kongregasyon Temwen Zeova dan lemonn, ki zwenn dan plis ki 60,000 landrwa. Sak lannen, anviron 1,500 Lasal Rwayonm an mwayen i ganny konstrir pour fer plis plas akoz i annan deplizanpli plis dimoun ki asiste nou bann renyon. a

Ki lezot zenn i dir?

“Ler mon ti dan lekol segonder, en fiy dan mon laklas ti asiste detrwa renyon avek mwan. I ti vreman enpresyonnen avek lefet ki bann etidyan Labib ki ti pe aprann ansanm ti annan diferan laz. Tou resaman mon anplwayer ti vini e i ti enpresyonnen avek lakantite fwa ki nou servi Labib. Ler mon ti vwar ki kantite i ti apresye renyon, sa ti ogmant mon prop lapresyasyon!”—Jessica.

“Mon vwar ki bann renyon i en bon fason pour aret mazin lo bann traka ek problenm dan lavi toulezour. Nou aprann ki mannyer pour viv en lavi satisfezan, ki mannyer pour vin en pli bon dimoun e bokou plis ankor. Toultan ler mon pe kit Lasal Rwayonm mon santi mwan byen e ki mon’n ganny ankouraze.”—Timothy.

“En zonm ki mon ti’n envite pour vin renyon ti dir mwan apre: ‘Mon ti asiste zis pour vwar si mon ti pou kapab prouve ki zot bann krwayans i fo. Me pour fini kont, mon bann krwayans ki mal!’ I ti osi enpresyonnen avek lefet ki bann Temwen Zeova ti amikal. I ti dir: ‘Menm si mon’n fek zwenn zot, zot in tret mwan konmsi mon’n konn zot pour plizyer lannen!’”—Jacob.

“Plizyer fwa mon’n mazinen, ‘Dek ki renyon i fini ma zis ale.’ Me pandan renyon, sa santiman i pase. Apre renyon, mon pe koz avek dimoun e mon pa ni rapel akoz mon ti’n santi koumsa avan. Si i ti napa bann renyon, mon ti pou napa sa bann bon zanmi ki mon annan ozordi.”—Madison.