Skip to content

BANN ZENN I DEMANDE

Akoz mon devret demann leskiz?

Akoz mon devret demann leskiz?

Ki ou ti pou fer dan sa bann sityasyon swivan?

  1. Ou ansenyan i dispit avek ou akoz ou move konportman dan laklas.

    Eski ou pou demann ou ansenyan leskiz menm si ou krwar ki i’n egzazere?

  2. En zanmi i tande ki ou’n dir en move keksoz lo li.

    Eski ou pou demann ou zanmi leskiz menm si ou krwar ki sa ki ou’n dir i vre?

  3. Ou ankoler avek ou papa e ou reponn dan en fason ki mank respe pour li.

    Eski ou pou demann ou papa leskiz menm si ou santi ki li ki’n fer ou ankoler?

Larepons pour tou le trwa kestyon i wi. Me akoz ou devret demann leskiz menm si ou santi ki ou ti annan rezon?

 Akoz ou devret demann leskiz?

  • Ler ou demann leskiz i montre ki ou matir. Ler ou pran responsabilite pour en keksoz ki ou’n dir oubyen fer, i montre ki ou pe devlop bann bon kalite ki ou pou bezwen ler ou vin adilt.

    “Limilite ek pasyans i kapab ed ou pour demann leskiz e ekout sa ki sa lot dimoun i annan pour dir.”​—Rachel.

  • Ler ou demann leskiz, sa i ed ou fer lape. Dimoun ki demann leskiz i montre ki i pli anvi fer lape olye montre ki li ki annan rezon e sa lot dimoun i annan tor.

    “Menm si ou krwar ou ki annan rezon, sa ki pli enportan i fer lape. I pa kout nanryen pour demann leskiz, me i kapab gard en bon lanmitye.”​—Miriam.

  • Ler ou demann leskiz, ou santi ou pli byen. Si ou’n ofans en dimoun par sa ki ou’n dir oubyen fer, i pou konmsi ou pe anmenn en keksoz lour. Me ler ou demann leskiz, ou pou santi ou pli leze. *

    “I ti annan letan ler mon ti koz brit avek mon paran. Mon ti santi mwan mal, me mon ti vwar li difisil pour demann leskiz. Me ler mon ti demann leskiz, mon ti toultan santi mwan byen akoz sa ti anmenn lape dan mon fanmir.”​—Nia.

    Regre i parey en gro ros lo ou ledo, me ler ou demann leskiz, ou pou santi ou pli leze

Eski i demann zefor pour demann leskiz? Wi! Dena, en zenn fiy ki ti bezwen demann leskiz son manman plizyer fwa i dir: “I pa fasil pour dir ‘Eskize.’ Mon santi konmsi i annan en keksoz dan mon lagorz e napa okenn parol ki sorti!”

 Ki mannyer pour demann leskiz?

  • Si posib, demann leskiz sa dimoun an personn. Ler ou demann leskiz an personn, sa dimoun i kapab vwar ki ou senser e ki ou vreman regrete. Par kont, si ou anvoy en mesaz lo telefonn pour demann leskiz, sa dimoun i kapab pa krwar ou. Menm si ou anvoy en emoji avek en figir sagren, i kapab ki sa dimoun pou santi ki ou pa vreman senser.

    Sizesyon: Si ou pa kapab demann en dimoun leskiz an personn, telefonn li ouswa ekri en kart. Nenport kwa ki ou deside fer, mazin byen sa ki ou pou dir.

    Prensip Labib: “Sa enn ki zis i reflesi avan reponn.”​—Proverb 15:28.

  • Pa tarde pour demann leskiz. Si ou esper tro bokou letan pour demann leskiz, sa problenm i kapab vin pli grav e ou kapab gat ou relasyon avek sa dimoun.

    Sizesyon: Annan en lobzektif. Par egzanp, ‘Ozordi mon pou demann leskiz.’ Deside kan ki ou pou demann leskiz, apre fer li.

    Prensip Labib: “Pa tarde pour rezourd problenm.”​—Matye 5:25.

  • Demann leskiz senserman. Ler ou dir en dimoun “Eskiz mwan si ou santi koumsa,” sa pa en leskiz. En zenn fiy ki apel Janelle i dir: “Sa dimoun ki ou’n ofanse pou annan respe pour ou si i vwar ki ou’n aksepte ki ou ki annan tor.”

    Sizesyon: Demann leskiz san ekspekte nanryen an retour. Pa bezwen dir “Mon pou demann ou leskiz pour sa ki mon’n fer si ou osi ou demann leskiz pour sa ki ou’n fer.”

    Prensip Labib: “Annou rod bann keksoz ki promot lape.”​—Romen 14:19.

^ par. 13 Si ou’n perdi oubyen andomaz keksoz en dimoun, i pou saz si ou pa zis demann leskiz me osi ofer pour pey pour sa keksoz ki’n perdi oubyen repar sa domaz.