Skip to content

Eski Noe ek Deliz ti vreman egziste?

Eski Noe ek Deliz ti vreman egziste?

Sa ki Labib i dir

Deliz ti vreman arive. Bondye ti anmenn sa Deliz lo later pour detri bann move dimoun, me i ti demann Noe pour konstri en lars pour ki bann bon dimoun ek zannimo i ganny sove. (Zenez 6:11-20) Deliz ti vreman arive akoz Labib ki’n “ganny enspire par Bondye,” i koz lo la.​—2 Timote 3:16.

 Eski i vre oubyen i zis en zistwar?

Labib i montre ki Noe ti vreman egziste e ki Deliz pa zis en zistwar me i ti vreman arive.

  • Bann ekriven Labib ti krwar ki Noe ti vreman egziste. Par egzanp, Ezra ek Lik, de ekriven Labib ki ti bann bon istoryen ti enkli Noe lo lalis desandans nasyon Izrael. (1 Kronik 1:4; Lik 3:36) Matye ek Lik ki ti ekri Levanzil i mansyonn sa ki Zezi ti dir lo Noe ek Deliz.​—Matye 24:37-39; Lik 17:26, 27.

    Profet Ezekyel ek zapot Pol osi i dir ki Noe i en bon legzanp lafwa ek ladrwatir. (Ezekyel 14:14, 20; Ebre 11:7) Eski i ti pou fer sans pour sa bann ekriven koz lo en dimoun ki pa’n zanmen egziste konman en legzanp pour swiv? I evidan ki Noe, lezot zonm ek madanm fidel i bann bon legzanp ki nou devret swiv parski zot ti vreman egziste.​—Ebre 12:1; Zak 5:17.

  • Labib i donn bann detay spesifik lo Deliz. Dan Labib, sa resi lo Deliz pa konmans avek: “Alors en zour,” konmsi i pe rakont en zistwar ki pa’n zanmen arive. Me Labib i mansyonn lannen, mwan ek zour ki relye avek Deliz. (Zenez 7:11; 8:4, 13, 14) I osi mansyonn longer, larzer ek oter sa lars ki Noe ti konstri. (Zenez 6:15) Sa bann detay i montre ki dapre Labib, Deliz ti vreman arive, i pa zis en zistwar.

 Akoz Bondye ti anmenn en deliz lo later?

Dapre Labib, avan Deliz, “mesanste zonm ti gran lo later.” (Zenez 6:5) I osi dir ki Bondye ti vwar ki “later ti’n koronpi” akoz i ti’n ranpli avek vyolans ek imoralite seksyel.​—Zenez 6:11; Zid 6, 7.

Labib i dir ki en kantite problenm ti konmanse ler bann move lanz ti kit lesyel e annan relasyon seksyel avek bann madanm lo later. Sa bann lanz ti ganny bann zanfan ki ti apel Nefilim e zot ti fer bann dimoun soufer en kantite. (Zenez 6:1, 2, 4) Alor, Bondye ti deside detri tou sa ki ti move lo later e donn bann bon dimoun loportinite pour viv dan lape.​—Zenez 6:6, 7, 17.

 Eski dimoun ti konnen ki i ti pou annan en deliz?

Wi, Bondye ti dir Noe sa ki ti pou arive e i ti demann li pour konstri en lars pour ki son fanmir ek bann zannimo i ganny sove. (Zenez 6:13, 14; 7:1-4) Noe ti averti bann dimoun konmkwa i ti pou annan en deliz, me zot pa ti ekoute. (2 Pyer 2:5) Labib i dir: “Zot pa ti pran kont nanryen ziska ki Deliz ti vini e balye zot tou.”​—Matye 24:37-39.

 Ki mannyer lars Noe ti ete?

Sa lars ti parey en gro kof. I ti apepre 133 met longer, 22 met larzer e 13 met oter. Sa lars ti ganny fer avek en kalite dibwa ki annan lakol ladan e i ti ganny kouver avek koltar anndan deor. I ti annan trwa letaz e diferan konpartiman. I ti annan en laport lo kote e tre probab lafnet anler tou dilon sak kote. I posib ki son twa ti annan en pti lapant dan milye pour delo koule.​—Zenez 6:14-16.

 Ki kantite letan Noe ti pran pour konstri lars?

Labib pa dir ki kantite letan Noe ti pran pour konstri lars, me i paret ki i ti pran plizyer dizenn lannen. Noe ti annan plis ki 500 an ler son premye garson ti ne e i ti annan 600 an ler Bondye ti anmenn Deliz. *​—Zenez 5:32; 7:6.

Ler Bondye ti demann Noe pour konstri lars, son trwa garson ti’n fini vin adilt e marye. Sa ti’n kapab pran apepre 50 a 60 an. (Zenez 6:14, 18) Si sa i vre, i rezonnab pour krwar ki i ti pran apepre 40 a 50 an pour konstri lars.

^ par. 23 Konsernen lakantite letan ki dimoun parey Noe ti viv, vwar lartik “Did People in Bible Times Really Live So Long?” dan Latour Veyer le 1 Desanm 2010, an Angle.