Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2015

Eski ou “kontan ou prosen parey ou kontan ou prop lekor”?

Eski ou “kontan ou prosen parey ou kontan ou prop lekor”?

“Kontan ou prosen parey ou kontan ou prop lekor.”MATYE 22:39.

KANTIK: 73, 36

1, 2. Ki mannyer Labib i montre ki lanmour i enportan?

LANMOUR i kalite prensipal Zeova. (1 Zan 4:16) Zezi Kri, ki ti son premye kreasyon, ti pas plizyer bilyon lannen avek son Papa dan lesyel e i’n aprann ki mannyer Zeova i en Bondye lanmour. (Kolosyen 1:15) Zezi in demontre sa menm lanmour tou dilon son lavi, letan i ti dan lesyel e osi lo later. Alor nou kapab asire ki Zeova ek Zezi pou touzour diriz avek lanmour.

2 Ler en dimoun ti demann Zezi lekel pli gran komannman, Zezi ti reponn: “‘Kontan [“Zeova,” NW] ou Bondye avek tou ou leker, avek tou ou lam, e avek tou ou lespri.’ Sa i premye e pli gran komannman. Dezyenm osi parey, i dir: ‘Kontan ou prosen parey ou kontan ou prop lekor.’”Matye 22:37-39.

3. Lekel nou “prosen”?

 3 I enportan pour demontre lanmour dan tou nou bann relasyon. Zezi ti dir nou bezwen kontan Zeova e osi nou prosen. Me lekel nou “prosen”? Si nou’n marye, nou prosen pli pros i nou msye oubyen madanm. Nou prosen i osi nou bann frer ek ser dan kongregasyon e bann dimoun ki nou zwenn dan predikasyon. Dan sa lartik, nou pou aprann ki mannyer pour demontre lanmour pour nou prosen.

KONTAN OU KONZWEN

4. Ki mannyer en maryaz i kapab reisi malgre lenperfeksyon imen?

4 Zeova ti kree Adan ek Ev e ini zot. Sa ti premye maryaz. Bondye ti anvi ki zot annan en bon lavi maryaz e ranpli later avek zot zanfan. (Zenez 1:27, 28) Me, apre ki zot ti dezobei Zeova, zot maryaz ti ganny afekte e pese ek lanmor ti pas avek nou tou. (Romen 5:12) Malgre sa, en maryaz i kapab reisi ozordi. Zeova sa Enn ki’n entrodwir maryaz, i donn bann msye ek madanm bann pli meyer konsey dan Labib.Lir 2 Timote 3:16, 17.

Zeova i ekspekte ki en msye i en sef ki annan lanmour

5. Akoz lanmour i enportan dan en maryaz?

5 Labib i montre ki lanmour ek lafeksyon i enportan pour en relasyon ere. Sa i aplik byen pour maryaz. Zapot Pol ti dekrir vre lanmour ler i ti dir: “Lanmour i pasyan, e i bon; lanmour pa zalou ou vant son prop lekor. I pa arogan e i pa fer nanryen ki fer onte. Lanmour pa rod son prop lentere; i pa pran lakoler, e i pa gard rankin. Lanmour pa montre kontantman dan lenzistis, me i rezouir dan laverite. Lanmour i pardonn tou, i krwar tou, i esper tou, i siport tou. Lanmour i reste pour touzour.” (1 Korentyen 13:4-8) Ler nou reflesir lo parol Pol e met zot an pratik, nou kapab annan en lavi maryaz ere.

Labib i montre nou ki mannyer pour reisi dan maryaz (Vwar paragraf 6, 7)

6, 7. (a) Ki Labib i dir lo bann sef? (b) Ki mannyer en msye Kretyen i bezwen tret son madanm?

6 Zeova ki’n deside lekel ki devret vin sef fanmir. Pol ti eksplike: “Mon oule ki zot konpran ki Kris i sef tou zonm, ki en mari i sef son madanm e Bondye i sef Kris.” (1 Korentyen 11:3) Me Zeova i ekspekte ki en msye i en sef ki okip son fanmir avek lanmour e ki i pa fer dominer ouswa sovaz. Zeova i en Sef ki zantiy e pa egois. Sa i fer ki Zezi i respekte lotorite Bondye ki ranpli avek lanmour. I ti dir: “Mon kontan mon Papa.” (Zan 14:31) Zezi pa ti pou santi koumsa si Zeova ti brit avek li.

7 Labib i dir ki kantmenm en msye i sef son madanm, i bezwen onor li. (1 Pyer 3:7) Ki mannyer en msye i kapab fer sa? I kapab pran an konsiderasyon bezwen son madanm e respekte sa ki i prefere. Labib i dir: “Zot, bann mari, kontan zot madanm parey Kris  in kontan [“kongregasyon,” NW] e in donn son lavi pour li.” (Efezyen 5:25) Wi, Zezi in menm donn son lavi pour son bann disip. Ler en msye i en sef ki annan lanmour parey Zezi, i pou pli fasil pour son madanm kontan, respe e onor son bann desizyon.Lir Tit 2:3-5.

KONTAN OU BANN FRER EK SER

8. Ki mannyer nou devret santi anver nou bann frer ek ser?

8 Ozordi, plizyer milyon dimoun partou dan lemonn i ador Zeova. Zot nou bann frer ek ser. Ki mannyer nou devret santi anver zot? Labib i dir: “Annou fer dibyen tou dimoun, sirtou nou bann frer dan lafwa.” (Galat 6:10; lir Romen 12:10.) Zapot Pyer ti ekrir ki nou “lobeisans laverite” i devret fer nou ‘kontan nou bann frer senserman.’ Pyer ti osi dir avek bann lezot Kretyen: “Avan tou, zot devre annan en gran lanmour pour kanmarad.”1 Pyer 1:22; 4:8.

9, 10. Akoz pep Bondye i ini?

9 Nou lorganizasyon mondyal i inik. Akoz? Parski nou annan profon lanmour senser pour nou bann frer ek ser.  Sa ki pli enportan, se vi ki nou kontan e obeir bann lalwa Zeova, i donn nou led atraver son lespri sen, ki sa lafors pli pwisan dan liniver. Lespri sen Bondye i ede pour gard sa vre linite parmi nou lasosyasyon frer enternasyonal.Lir 1 Zan 4:20, 21.

10 Pol ti met lanfaz lo sa bezwen pour annan lanmour parmi bann Kretyen, ler i ti ekrir: “Zot devre ranpli avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.” (Kolosyen 3:12-14) Pa nou apresye ki lanmour, “ki soud tou keksoz parfetman ansanm dan larmoni,” i egziste parmi nou san pran kont kote nou sorti!

Lanmour ek linite i idantifye Temwen Zeova konman bann vre disip Zezi, sa pep ki Bondye pe servi pour pres sa bon nouvel Rwayonm dan lemonn antye

11. Kwa ki idantifye lorganizasyon Bondye?

11 Vre lanmour ek linite bann serviter Zeova i idantifye zot konman sa bann ki pratik sa vre larelizyon. Zezi ti dir: “Dimoun pou war ki zot mon bann disip si zot kontan kanmarad.” (Zan 13:34, 35) Zapot Zan ti ekrir: “Dan sa fason, nou kapab disteng zanfan Bondye ek zanfan dyab: tou dimoun ki pa pratik sa ki zis, oubyen ki pa kontan son frer i pa en zanfan Bondye. Lala mesaz ki zot in tande depi okonmansman: Ki nou devre kontan kanmarad.” (1 Zan 3:10, 11) Lanmour ek linite i idantifye Temwen Zeova konman bann vre disip Kris, zot sa bann dimoun ki Bondye pe servi pour pres sa bon nouvel Rwayonm lo later antye.Matye 24:14.

RASANBLE “EN GRAN LAFOUL”

12, 13. Ki sa bann ki form parti “gran lafoul” pe fer ozordi e ki zot pou eksperyanse byento?

12 Laplipar serviter Zeova ozordi i form parti “en gran lafoul” ki sorti dan diferan parti lemonn e zot siport sa Rwayonm. Zot “sa bann ki’n pas par en gran [“ladetres,” NW]. Zot in lav zot rob e blansi li dan disan Lanyo,” par demontre lafwa dan sakrifis Zezi. Sa bann ki dan “gran lafoul” i kontan Zeova ek son Garson e zot ador Zeova “lizour konman aswar.”Revelasyon 7:9, 14, 15.

13 Byento Bondye pou detri sa move lemonn pandan “gran ladetres.” (Matye 24:21, NW; lir Zeremi 25:32, 33. *) (Vwar not.) Me Zeova pou  protez e anmenn son bann serviter dan son nouvo lemonn parski i kontan zot. Parey i ti’n promet preski 2,000 an pase, “i pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” Eski ou enpasyan pour viv dan Paradi apre ki mesanste, soufrans ek lanmor in disparet?Revelasyon 21:4.

14. Ki grander gran lafoul in vini?

14 O konmansman bann dernyen zour an 1914, i ti annan zis apepre senk mil serviter Bondye. Malgre difikilte sa pti group Kretyen swazir ti pres sa bon nouvel Rwayonm, pouse par lanmour pour zot prosen e avek led lespri sen Bondye. Ki rezilta sa in anmennen? Ozordi en gran lafoul dimoun ki annan sa lespwar pour viv pour touzour lo later pe ganny rasanble. I annan apepre 8,000,000 Temwen dan plis ki 115,400 kongregasyon partou dan lemonn e zot pe kontinyen agrandir. Par egzanp, plis ki 275,500 nouvo Temwen ti pran batenm dan lannen servis 2014. Sa i apepre 5,300 batenm par semenn.

15. Ki mannyer bokou i tann sa bon nouvel ozordi?

15 I enkrwayab pour vwar ki kantite ki’n tann sa bon nouvel Rwayonm. Ozordi nou bann piblikasyon i disponib dan plis ki 700 langaz. Latour Veyer i sa magazin ki pli ganny distribye dan lemonn. Plis ki 52,000,000 kopi i ganny enprimen sak mwan e sa magazin i ganny pibliye dan 247 langaz. Nou liv letid Ki Labib i vreman dir? in ganny tradwir dan plis ki 250 langaz. Ziska la, plis ki 200,000,000 kopi an tou in ganny enprimen.

16. Akoz lorganizasyon Zeova i kontinyen agrandir?

16 Nou lorganizasyon pe kontinyen agrandi parski nou annan lafwa dan Bondye e nou aksepte Labib konman son Parol enspire. (1 Tesalonisyen 2:13) Nou kontinyen ganny benediksyon Zeova malgre laenn ek lopozisyon Satan.2 Korentyen 4:4.

TOUZOUR KONTAN LEZOT

17, 18. Ki mannyer Zeova i ekspekte nou santi anver sa bann ki pa ador li?

17 Dan predikasyon dimoun i reakte dan diferan fason. I annan dimoun ki ekout nou tandis ki lezot pa kontan nou mesaz. Ki mannyer Zeova i ekspekte nou santi anver sa bann ki pa ador li? Nenport ki mannyer dimoun i reazir anver nou mesaz, nou swiv sa konsey ki trouve dan Labib. I dir: “Ki zot parol i touzour agreab e enteresan, pour zot kapab donn bann repons valab tou dimoun.” (Kolosyen 4:6) Sak fwa nou defann nou krwayans, nou anvi fer li “avek labonte ek respe” akoz nou kontan nou prosen.1 Pyer 3:15, 16.

18 Kantmenm ler dimoun i ankoler e rezet nou mesaz, nou demontre lanmour pour nou prosen e imit legzanp Zezi. “Kan zot ti ensilte [Zezi], i pa ti reponn par lensilt. Dan son soufrans, i pa’n fer okenn menas.” O kontrer, Zezi ti annan konfyans dan Zeova. (1 Pyer 2:23) Alor, nou toultan  demontre limilite e aplik sa konsey: “Pa rann lemal pour lemal, ni lensilt pour lensilt. Okontrer reponn par benediksyon.”1 Pyer 3:8, 9.

Nou devret kontan nou lennmi nenport ki fason ki zot tret nou

19. Ki mannyer nou devret tret nou lennmi?

19 Limilite i ed nou obei en prensip enportan ki Zezi in donnen. I ti eksplike: “Zot in tande ki i’n ganny dir: ‘Kontan zot zanmi e ay zot lennmi.’ Me mwan mon dir zot: kontan zot lennmi e priy pour bann ki persekit zot, koumsa, zot a vin garson zot Papa ki dan lesyel. Akoz i fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:43-45) Konman serviter Zeova, nou devret kontan nou lennmi nenport ki fason ki zot tret nou.

20. Ki mannyer nou konnen ki lanmour pour Bondye ek nou prosen pou ranpli later antye? (Vwar portre lo paz 21.)

20 Nou devret toultan demontre ki nou kontan Zeova ek nou prosen. Menm si dimoun i opoz nou ek nou mesaz, nou ed zot ler zot dan bezwen. Zapot Pol ti ekrir: “Pa fer det avek personn, apar lanmour pour kanmarad; se sel det ki ou devre annan. Parski sa ki kontan son prosen in akonpli sa ki lalwa i demande. Konmannman ki dir, ‘Pa fer adilter, pa fer krim, pa vole, pa konvwate,’ tousala ek lezot ankor i konpri dan sa sel konmannman: ‘Kontan ou kanmarad parey ou prop lekor.’ Lanmour pa fer ditor son prosen. Ler nou kontan nou prosen nou pe akonpli lalwa konpletman.” (Romen 13:8-10) Dan sa move lemonn vyolan e divize ki ganny dirize par Satan, bann serviter Bondye i demontre vre lanmour pour zot prosen. (1 Zan 5:19) Apre ki Zeova i detri Satan, son bann demon ek sa move lemonn, lanmour pou ranpli later antye. Pa sa pou en gran benediksyon ler tou sa ki lo later pou kontan Zeova ek zot prosen!

^ par. 13 Zeremi 25:32, 33: 32 Sa ki Zeova bann larme in dir: ‘Gete! En maler pe tonm lo en nasyon apre lot e en gro tanpet pou ganny large sorti dan bann landrwa pli lwen lo later. 33 “‘Sa zour bann ki Zeova i touye pou depi en bout later ziska en lot bout later. Napa personn ki pou an dey pour zot, ni pou rasanble zot ouswa anter zot. Zot pou vin parey fimyen lo sirfas later.’”’”