Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2015

Zeova i Bondye lanmour

Zeova i Bondye lanmour

“Bondye i lanmour.”1 ZAN 4:8, 16.

KANTIK: 18, 91

1. Ki kalite prensipal Zeova e ki mannyer sa i fer ou santi anver li?

LABIB i dir nou ki “Bondye i lanmour.” (1 Zan 4:8) Me ki sa i vedir? Lanmour pa zis enn parmi plizyer zoli kalite Zeova. I son kalite prensipal. Zeova pa zis annan lanmour. Me i lanmour. Tou sa ki i fer i ganny gide par lanmour. Pa nou devret remersye Zeova ki i’n kree liniver ek tou lezot keksoz ki vivan gras a son lanmour!

2. Ki lanmour Bondye i asir nou? (Vwar portre anler.)

2 Zeova i ranpli avek tandres ek santiman profon pour son kreasyon. Son lanmour pour nou i donn nou konfyans ki son plan pour limanite pou vin vre dan pli meyer fason. Tou sa ki obei li pou vreman ere. Par egzanp, gras a son lanmour, “i’n fikse en zour pour li ziz lemonn antye avek lazistis, par en zonm ki i’n swazir,” Zezi Kri. (Akt 17:31) Nou asire ki sa zizman pou arive. Pour bann imen obeisan, i pou vedir en lavenir merveye ki pou dir pour touzour.

 SA KI LISTWAR IN MONTRE

3. Ki mannyer lavi ti pou ete si Bondye pa ti kontan limanite?

3 Ki mannyer lavenir bann imen ti pou ete, si lanmour pa ti sa kalite prensipal Bondye? Imen ti pou kontinyen domin lo kanmarad e ganny enfliyanse par Satan, sa bondye laenn. (2 Korentyen 4:4; 1 Zan 5:19; lir Revelasyon 12:9, 12.) Lavenir ti pou en katastrof si Zeova pa ti kontan nou!

4. Akoz Zeova ti permet rebelyon kont son dominasyon?

4 Kan Satan ti rebel kont dominasyon Zeova, i ti osi enfliyans nou premye paran pour rebele. I ti kestyonn drwa Zeova konman sa Souvren Iniversel. Satan ti dir i pou vin en pli bon dirizan ki Bondye. (Zenez 3:1-5) Zeova ti azir dan en fason saz, par donn Satan en pti pe letan pour prouve ki i ti kapab fer sa ki i’n dir. Me, rezilta i montre ki ni bann imen ni Satan pa kapab vin bann bon dirizan.

Zeova pa’n kree bann imen avek sa abilite oubyen drwa pour viv san son direksyon

5. Ki listwar limanite in prouve?

5 Ozordi lemonn pe kontinyen vin pli pir. Sa dernyen 100 an ki’n pase, plis ki 100 milyon dimoun in ganny touye dan bann lager. Labib i dir ki dan “bann dernyen zour”: “Bann move dimoun ek bann anbeter, zot pou fer touzour plis progre dan sa ki mal.” (2 Timote 3:1, 13) Labib i osi dir: “Mon konnen, O Zeova, ki semen en imen pa pour li. I pa pour en imen ki pe marse pour diriz son lepa.” (Zeremi 10:23) Listwar in prouve ki sa bann parol i vre. Zeova pa’n kree bann imen avek sa abilite, ni sa drwa pour diriz zot lekor san son direksyon.

6. Akoz Bondye in permet mesanste?

6 Par permet mesanste kontinyen pour en pe letan, Zeova in osi prouve ki zis anba son direksyon ki nou kapab trouv vre boner. A lavenir, Bondye pou retir tou bann move dimoun. Apre sa, si okenn dimoun i kestyonn son fason dirize ki i pe fer avek lanmour, Bondye pou azir deswit kont zot. I kapab servi listwar limanite konman laprev ki sa bann rebel i devret ganny tire vitman. Mesanste pa pou zanmen ganny permet ankor.

KI MANNYER BONDYE IN DEMONTRE SON LANMOUR?

7, 8. Ki mannyer Zeova in demontre son lanmour?

7 Zeova in demontre son lanmour dan plizyer fason. Mazin lo grander ek labote nou liniver. I annan plizyer bilyon galaksi e sak sa bann galaksi i annan plizyer bilyon zetwal ek plannet. Dan nou galaksi ki apel Lavwa Lakte, soley i enn parmi bann zetwal. Si ti napa soley, lavi pa ti pou kapab egziste lo later. Tou sa bann kreasyon i prouve ki Zeova i nou Kreater e zot demontre son bann kalite, tel parey son pwisans, lasazes ek lanmour. Wi, “son bann kalite envizib, setadir, son pisans eternel  ek son natir konman Bondye in ganny revele par bann keksoz ki in fer.”Romen 1:20.

Tou sa ki Zeova in kree lo later i pour byenfe imen ek zannimo

8 Zeova in kree later espesyalman pour ki i annan lavi lo la. Tou sa ki lo later i pour byenfe imen ek zannimo. Bondye ti fer en zoli zarden konman en lakour pour imen reste ladan e i’n donn zot en lespri ek en lekor parfe ki’n ganny fer pour viv pour touzour. (Lir Revelasyon 4:11.) An plis, “i donn manze tou bann vivan, akoz son lanmour fidel i pour touzour.”Psonm 136:25.

9. Menm si Zeova i en Bondye lanmour, kwa ki i ay?

9 Zeova i Bondye lanmour, pourtan i ay sa ki mal. Par egzanp, Psonm 5:4-6 i dir sa lo Zeova: “Ou pa en Bondye ki pran plezir dan sa ki mal. . . .  Ou ay tou sa bann ki fer sa ki mal.” I osi ay “bann dimoun ki vyolan e triker.”

LAFEN MESANSTE I PROS

10, 11. (a) Ki pou arive avek bann move dimoun? (b) Ki mannyer Zeova pou rekonpans bann imen obeisan?

10 Dan son letan apropriye Zeova pou retir mesanste dan liniver antye akoz i en Bondye lanmour e i ay sa ki mal. Parol Bondye i promet ki “bann mesan pou ganny detrir, me sa bann ki met zot konfyans dan Zeova pou reste lo later. Dan ankor en pti pe letan, move dimoun pou nepli la.” Bann lennmi Zeova “pou disparet parey lafimen.”Psonm 37:9, 10, 20.

11 Parol Bondye i osi promet: “Bann dimoun drwat pou ganny later e zot pou reste lo la pour touzour.” (Psonm 37:29) Bann imen fidel “pou trouv bokou plezir dan labondans lape.” (Psonm 37:11) Akoz? Parski nou Bondye lanmour i touzour fer sa ki pli meyer pour son bann serviter. Labib i dir nou: “I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:4) Pa sa i en lavenir merveye pour tou bann imen obeisan ki apresye lanmour Bondye!

12. Lekel “sa enn ki san repros”?

12 Labib i dir nou: “Obzerv sa enn ki san repros e kit ou lizye lo sa enn ki drwat, parski son lavenir pou anpe. Me tou bann ki dezobeir pou ganny detrir, lavenir bann move dimoun pou ganny efase.” (Psonm 37:37, 38) “Sa enn ki san repros” i konn Zeova ek son Garson e fer lavolonte Zeova. (Lir Zan 17:3.) I senserman krwar ki “lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:17) Vi ki lafen sa lemonn i pros, i irzan ki nou “met lespwar dan Zeova e swiv son semen.”Psonm 37:34.

 PLI GRAN AKT LANMOUR BONDYE

13. Ki ti sa pli gran akt lanmour Bondye?

13 Kantmenm nou enparfe, nou kapab obei Bondye. Nou osi kapab annan en relasyon pros avek Zeova gras a sakrifis Zezi. Sa i pli gran akt lanmour Bondye. Zeova in donn sa ranson pour ki bann imen obeisan i kapab ganny libere dan pese ek lanmor. (Lir Romen 5:12; 6:23.) Zezi ti fidel avek Bondye pour bokou letan dan lesyel, alor Zeova ti annan konfyans ki son Garson ti pou reste fidel lo later. Konman en Papa lanmour, leker Zeova ti fermal ler i ti vwar ki mannyer bann dimoun ti maltret son Garson. Malgre sa, Zezi ti kontinyen siport drwa Bondye pour dirize e montre ki en zonm parfe i kapab reste fidel avek Bondye menm dan bann sityasyon difisil.

Par son lanmour, Bondye in anvoy son Garson ki ti pare pour obeir (Vwar paragraf 13)

14, 15. Ki lanmor Zezi in anmennen pour bann imen?

14 Malgre Zezi in pas dan bann gro difikilte, i’n touzour reste fidel e siport drwa Zeova pour dirize. Nou devret rekonesan ki par son lanmor Zezi in pey sa ranson, parski i donn bann imen sa loportinite pour viv pour touzour dan sa nouvo lemonn ki Bondye in promet. Zapot Pol in koz lo lanmour ki Zeova ek Zezi in demontre atraver sa sakrifis. I ti dir: “Nou ti ankor san okenn lafors, Kris dan letan fikse, ti mor pour bann peser. Apenn si nou pou aksepte mor pour en dimoun zis; petet i ti a posib ki nou ti a aksepte mor pour en bon dimoun. Me Bondye in prouv son lanmour pour nou: Kan nou ti ankor peser, Kris in mor pour nou.” (Romen 5:6-8) Zapot Zan ti ekrir: “La ki mannyer Bondye in montre son lanmour pour nou: in anvoy son sel Garson dan lemonn pour ki par li nou ganny lavi. Lala ki vedir lanmour: Se pa nou ki’n kontan Bondye, me plito se li ki’n kontan nou e ki’n anvoy son Garson konman en viktim  pour ki par li nou ganny pardon nou bann pese.”1 Zan 4:9, 10.

15 Zezi ti dir ki “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Zeova in donn son Garson konman en ranson kantmenm sa ti fer li soufer. Sa i montre ki kantite i kontan bann imen e sa lanmour pou reste pour touzour. Pol ti ekrir: “Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, ni okenn pisans, ni bann zabitan dan lemonn ki anler, ni dan lemonn ki anba, ni okenn lezot kreatir pa pou zanmen kapab separ nou avek lanmour Bondye dan Kris-Zezi nou Senyer.”Romen 8:38, 39.

RWAYONM BONDYE PE DIRIZE OZORDI

16. Kisisa Rwayonm Bondye e lekel ki Bondye in apwente konman son Dirizan?

16 Gouvernman Bondye, sa Rwayonm dirize par Kris, i osi en laprev lanmour Zeova pour limanite. Ki mannyer sa? Zeova in fini apwent Zezi Kri konman sa Dirizan kalifye ki kontan limanite. (Proverb 8:31) Bondye in swazir 144,000 imen pour diriz ansanm avek Zezi dan lesyel. Ler zot resisite, zot rapel tou zot leksperyans lo konman i ti ete konman en imen. (Revelasyon 14:1) Letan Zezi ti lo later, size prensipal son lansennyman ti lo Rwayonm Bondye e i ti ansenny son bann disip pour priye: “Nou Papa ki dan lesyel ki ou non sen i ganny glorifye; ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:9, 10) Nou pe esper avek pasyans kan bann lapriyer koumsa pou ganny reponn, kan Rwayonm Bondye pou anmenn bann benediksyon pour limanite!

17. Konpar lafason ki Zezi i dirize ek pour bann imen.

17 I annan en gran diferans ant lafason ki Zezi i dirize ek fason ki bann imen i dirize. Lafason ki bann imen in dirize, in anmenn lager ki’n touy plizyer milyon dimoun. Me Zezi ki nou Dirizan, i vreman kontan nou e i imit bann zoli kalite Bondye, espesyalman son lanmour. (Revelasyon 7:10, 16, 17) Zezi ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.” (Matye 11:28-30) Pa sa i en zoli promes!

18. (a) Ki’n arive depi 1914? (b) Ki nou pou egzaminen dan sa prosen lartik?

18 Labib i montre nou ki Rwayonm Bondye in konmans dirize depi 1914 dan lesyel. Apartir sa letan in annan en rasanbleman bann dernyen manm sa bann ki pou diriz ansanm avek Zezi dan lesyel ek rasanbleman “en gran lafoul” dimoun ki pou sirviv lafen sa lemonn e antre dan sa nouvo lemonn. (Revelasyon 7:9, 13, 14) Ki kantite dimoun ki form parti sa gran lafoul ozordi? Ki Bondye i ekspekte avek zot? Nou pou egzamin sa bann kestyon dan sa prosen lartik.