Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  October 2015

Eski ou vwar lanmen Bondye dan ou lavi?

Eski ou vwar lanmen Bondye dan ou lavi?

“Bann serviter Zeova pou vwar son lanmen.”IZA. 66:14.

KANTIK: 65, 26

1, 2. Ki serten dimoun i krwar lo Bondye?

BOKOU dimoun i krwar ki sa ki zot pe fer napa nanryen pour fer avek sa ki Bondye pe fer. Anfet, serten i krwar ki Bondye pa tro enterese avek sa ki pe arive avek bann imen. Apre ki Siklonn Haiyan ti frap Filipin an Novanm 2013, mer en gran lavil ti dir: “I bezwen ki Bondye ti en lot landrwa.”

2 Lezot dimoun i azir konmsi Bondye pa vwar sa ki zot pe fer. (Iza. 26:10, 11; 3 Zan 11) Zot parey sa bann ki zapot Pol ti dekrir ler i ti dir: “[Zot] in refize rekonnet Bondye.” Sa bann dimoun ti “ranpli avek tou sort mesanste, move dezir, vis, malis.”Rom. 1:28, 29.

3. (a) Ki kestyon nou kapab demann nou lekor konsernan Bondye? (b) “Lanmen” Zeova i refer avek kwa dan Labib?

3 Me nou ki nou krwar? Kontrerman avek sa ki bokou dimoun i krwar, nou realize ki Zeova i vwar tou sa ki nou fer. Me eski nou osi remarke ki i enterese avek nou e vwar son lanmen dan nou lavi? Deplis, eski nou parmi sa bann ki Zezi ti dir zot “pou war Bondye”? (Mat. 5:8) Pour konnen  ki sa i vedir, annou pran bann legzanp dan Labib lo bann ki ti vwar lanmen Bondye an aksyon e bann ki ti refize vwar. Apre nou pou aprann ki mannyer nou kapab klerman vwar lanmen Zeova dan nou lavi atraver nou lizye lafwa. Anmezir nou egzamin sa bann pwen, gard antet ki souvan Labib i koz lo “lanmen” Bondye kan i pe refer avek son pwisans. Zeova i servi son pwisans pour ed son bann serviter e ganny laviktwar lo bann ki opoz li.Lir Deterononm 26:8. *

ZOT PA TI ARIVE VWAR LANMEN BONDYE

4. Akoz bann lennmi Izrael pa ti arive vwar lanmen Bondye?

4 Boner dan listwar pep Izrael, bann dimoun ti annan sa loportinite pour vwar e tande ki mannyer Bondye ti ed bann Izraelit. Atraver en mirak Zeova ti delivre son pep Lezip e zot ti ranport laviktwar lo bann lerwa enn deryer lot. (Zoz. 9:3, 9, 10) Malgre sa ki laplipar bann lerwa dan rezyon was Zourden ti’n tande e vwar, “zot ti fer en lagreman pour lager kont Zozye ek Izrael.” (Zoz. 9:1, 2) Menm apre ki sa bann lerwa ti’n konmans lager, zot ti annan tou rezon pour vwar lanmen Bondye. Parey Zeova ti dir, “soley pa ti bouze e lalin pa ti bouze ziska ki sa nasyon ti pran revanz lo son bann lennmi.” (Zoz. 10:13) Me Zeova ti “permet zot leker [bann lennmi] vin antete pour ki zot lager kont Izrael.” (Zoz. 11:20) Bann lennmi Izrael ti refize admet ki Bondye ti pe lager pour Izrael e sa ti fer zot perdi lager.

5. Ki Lerwa Aab ti refize admet?

5 Pli tar, move Lerwa Aab ti annan plizyer loportinite pour vwar lanmen Bondye. Eliya ti dir li: “Pou napa laroze oubyen lapli amwen ki mon dir!” (1 Rwa. 17:1) Byensir Zeova ti par deryer sa bann parol, me Aab ti refize aksepte sa laprev. Pli tar, Aab ti vwar dife sorti dan lesyel ler Eliya ti priye pour ki son lofrann i ganny brile. Apre Eliya ti dir ki Zeova ti pou termin sa lasesres, ler i ti dir Aab: “Ale desann pour ki sa gro lapli pa met ou retar!” (1 Rwa. 18:22-45) Aab ti vwar tousala arive, me kantmenm sa, i ti refize admet ki sa ti pwisans Bondye. Sa de legzanp i montre nou en leson enportan, nou bezwen rekonnet lanmen Zeova ler i an aksyon.

ZOT TI VWAR LANMEN ZEOVA

6, 7. Ki serten dan letan Zozye ti klerman remarke?

6 Kontrerman avek sa bann move lerwa ki nou’n mansyonnen, lezot ti vwar lanmen Zeova, menm si zot ti dan menm sityasyon. Par egzanp, dan letan Zozye bann Gibeonnit ti fer lape avek Izrael tandis ki bann lezot nasyon zot ti lager kont Izrael. Akoz? Zot ti dir: “Ou bann serviter i sorti dan en pei byen lwen akoz nou annan respe pour non zot Bondye Zeova, akoz nou’n tann koz lo li e tou sa ki i ti fer.” (Zoz. 9:3, 9, 10) Avek lasazes bann Gibeonnit ti rekonnet ki sa vre Bondye ki ti pe ed nasyon Izrael.

7 Raab osi ti remark lanmen Bondye dan son lavi. Apre ki i ti’n tande ki mannyer Zeova ti’n sov son pep, i ti dir avek de espyon Izraelit: “Mon konnen ki Zeova pou donn zot sa pei.” Menm si i ti danzere pour fer sa, i ti demontre lafwa ki Zeova ti kapab delivre li ek son fanmir.Zoz. 2:9-13; 4:23, 24.

8. Ki mannyer serten Izraelit ti rekonnet lanmen Bondye?

 8 Kontrerman avek move Lerwa Aab, serten Izraelit ki ti vwar ler Zeova ti bril lofrann Eliya ti rekonnet ki Zeova ki ti’n fer sa. Ler zot ti vwar sa, zot ti dir: “Zeova i sa vre Bondye!” (1 Rwa. 18:39) Pour zot sa ti evidan.

9. Ki mannyer nou kapab vwar Zeova ek son lanmen ozordi?

9 Sa bann bon e move legzanp ki nou’n vwar i ed nou konpran ki i vedir pour vwar Bondye oubyen pour vwar son lanmen dan bann sityasyon. Anmezir ki nou konn li, nou osi nou kapab vwar son lanmen parski nou remark son bann kalite ek aksyon. (Efe. 1:18) San dout, nou anvi swiv legzanp bann ki’n vwar Zeova siport son pep dan lepase e ozordi. Kantmenm sa, eski nou vreman annan levidans ki Bondye pe ed bann dimoun ozordi?

LEVIDANS LANMEN BONDYE OZORDI

10. Ki levidans nou annan ki Zeova pe ed bann dimoun ozordi? (Vwar portre lo paz 4.)

10 Nou annan bokou rezon pour krwar ki Zeova pe kontinyen ed bann dimoun. Souvan nou tann leksperyans bann dimoun ki’n priye pour ganny led spirityel e zot in ganny li. (Ps. 53:2) Ler Allan ti pe pres port an port lo en pti zil dan Filipin, i ti zwenn en madanm ki ti konmans plere. Allan i dir: “Zis son bomaten, i ti’n priy Zeova pour ki son bann Temwen i pas kot li. Ler i ti zenn i ti’n etidye Labib avek bann Temwen, me i ti’n perdi kontak avek zot ler i ti marye e al reste lo sa zil. Bondye ti reponn son lapriyer sitan vit ki sa ti tous li.” Dan lespas enn an, i ti dedye son lavi avek Zeova.

Eski ou vwar levidans ki Zeova pe ed son pep ozordi? (Vwar paragraf 11-13)

11, 12. (a) Dan ki fason Zeova pe ed son bann serviter? (b) Donn legzanp en dimoun ki ti ganny led avek Bondye.

11 Bokou serviter Bondye in vwar son led kan zot in aret bann adiksyon tel parey fimen, pran drog oubyen get pornografi. Serten i dir ki plizyer fwa zot ti esey arete lo zot menm me zot pa ti reisi. Par kont, ler zot ti rod led avek Zeova, i ti donn zot son “pisans ki napa son parey” e finalman zot ti arive fer li.2 Kor. 4:7; Ps. 37:23, 24.

12 Zeova in ed bokou son bann serviter pour fer fas avek bann defi personnel. Par egzanp, Amy ti vwar li difisil ler i ti ganny demande pour ede konstri en Lasal Rwayonm ek lakaz misyonner lo en pti zil dan Pasifik. I dir: “Nou ti reste dan en pti lotel e tou le zour nou ti mars lo semen kot delo ti’n monte pour al lo santye konstriksyon.” I ti osi bezwen adapte avek zot kiltir e souvan ti napa kouran ni delo. Amy i azoute: “Pour fer keksoz pli pir ankor, mon ti pran lakoler avek en ser ki ti pe travay avek nou. Mon ti al dan lakour byen kanmi. Dan mon lasanm fernwanr dan lotel, mon ti devid mon leker avek Zeova e demann li pour ed mwan.” Ler kouran ti retournen, Amy ti pran en Latour Veyer ki ti annan en lartik lo progranm Gilead, ki ti diskit lo tou bann keksoz ki i ti pe lalit avek: nouvo kiltir, sa lanvi pour retourn se ou e nouvo dimoun pour abitye avek. I dir: “Mon ti santi konmsi Zeova ti pe koz avek mwan sa zour swar. Sa ti donn mwan sa motivasyon pour kontinyen dan mon servis.”Ps. 44:25, 26; Iza. 41:10, 13.

13. Ki laprev nou annan ki Zeova pe siport son pep pour “defann e konsolid levanzil”?

13 En lot laprev ki lanmen Zeova pe siport nou i lefet ki Temwen Zeova in reisi  “defann e konsolid levanzil” sa bon nouvel. (Fili. 1:7) Serten gouvernman in esey aret travay pep Bondye konpletman. Me ler nou get bann dernyen lannen ki’n pase e vwar ki Temwen Zeova in ganny omwen 268 laviktwar dan bann lakour siprenm e 24 ka dan European Court of Human Rights zis depi lannen 2000, i evidan ki personn pa kapab anpes lanmen Zeova azir.Iza. 54:17; lir Izai 59:1. *

14. Ki mannyer nou vwar lanmen Zeova dan predikasyon e lefet ki nou ini?

14 Sa bon nouvel pe ganny prese partou dan lemonn zis avek led Bondye. (Mat. 24:14; Akt 1:8) An plis ki sa, i annan sa lasosyasyon frer ek ser tou sort nasyonalite parmi pep Zeova ozordi ki ini, en keksoz ki lemonn pa kapab imite e nou kapab vwar akoz lezot i admet ki: “Bondye i reelman parmi zot.” (1 Kor. 14:25) Alor konman en pep, nou annan ase levidans ki Bondye pe travay pour son pep. (Lir Izai 66:14. *) Me ou personnelman, eski ou vwar lanmen Zeova dan ou lavi?

ESKI OU VWAR LANMEN ZEOVA DAN OU LAVI?

15. Eksplike akoz par ler nou kapab pa vwar lanmen Zeova dan nou lavi.

15 Kwa ki kapab anpes nou vwar lanmen Zeova dan nou lavi? Bann defi dan lavi i kapab trakas nou bokou. Ler sa i arive, nou kapab aret konsantre lo bann fason ki Zeova in ed nou. Kan Larenn Zezabel ti menase pour touy profet Eliya, a sa moman, menm Eliya ti bliye ki mannyer Bondye ti’n azir dan lepase pour ed li. Labib i dir ki Eliya ti “demande pour li mor.” (1 Rwa. 19:1-4) Ki ti  solisyon problenm Eliya? I ti bezwen rod lankourazman avek Zeova.1 Rwa. 19:14-18.

16. Ki nou kapab fer pour vwar Bondye parey Zob?

16 Zob ti telman konsantre lo son bann problenm, ki i pa ti reisi vwar keksoz dan lafason ki Bondye i vwar. (Zob 42:3-6) Parey Zob, i kapab ki nou osi nou bezwen fer plis zefor pour vwar Bondye. Ki mannyer nou kapab fer sa? Nou bezwen etidye Labib e rod bann resi ek prensip ki relye avek nou sityasyon. Anmezir ki nou vwar sipor Zeova, i pou vin pli reel pour nou. Apre sa, parey Zob, nou kapab dir: “Mon’n tann koz lo ou, me aprezan mon vwar ou avek mon lizye.”

Eski Zeova pe servi ou pour ed lezot vwar li? (Vwar paragraf 17, 18)

17, 18. (a) Dan ki fason nou kapab rekonnet ki Zeova pe ed nou? (b) Donn en leksperyans ki demontre ki mannyer Bondye pe ed nou ozordi.

17 Ki mannyer nou kapab vwar lanmen Zeova? Annou vwar serten legzanp: Petet ou santi ki lafason ki ou’n aprann laverite i gras a led Zeova. Eski ou’n deza tann en keksoz dan en renyon e dir: “Sanmenm sa ki mon ti bezwen”? Eski ou’n vwar enn ou lapriyer ganny reponn? Petet ou ti deside fer plis dan ou minister e ou ti enpresyonnen avek lafason ki Zeova ti ed ou. Oubyen eski ou’n deza kit en travay pour bann rezon spirityel e vwar laverite sa promes Bondye: “Mon pa pou zanmen abandonn ou”? (Ebr. 13:5) Ler nou eveye spirityelman, nou kapab rekonnet ki mannyer Zeova in ed nou dan bokou fason.

18 Sarah ki sorti Kenya i rakont son leksperyans: “Mon ti priy konsernan en letid ki mon ti santi i pa ti kontan son letid Labib. Mon ti demann Zeova si mon devret aret sa letid. Deswit konman mon ti dir ‘Amenn,’ mon telefonn ti sonnen. Sa letid ti telefonnen pour demande si i ti kapab asiste renyon avek mwan! Mon ti sirprann!” Ler ou eveye, ou osi ou kapab vwar ki mannyer Zeova pe ed ou. Rhonna, en ser ki reste Lazi i dir: “I demann serten leksperyans pour rekonnet ki Zeova pe gid ou. Me enn fwa ou rekonnet sa, i enpresyonan pour vwar ki kantite i enterese avek nou!”

19. Kwa ankor ki nou bezwen fer pour parmi bann ki vwar Bondye?

19 Zezi ti dir: “Byennere bann ki annan leker pir, akoz zot pou war Bondye.” (Mat. 5:8) Ki mannyer nou kapab annan “en leker pir”? Nou bezwen prop anndan e aret okenn move kondwit. (Lir 2 Korentyen 4:2.) Anmezir ki nou vin for spirityelman e gard en bon kondwit, nou pou parmi bann ki kapab vwar Bondye. Dan sa lot lartik, nou pou vwar kwa ki kapab ed nou remark lanmen Zeova dan nou lavi.

^ par. 3 Deterononm 26:8: “Finalman Zeova ti tir nou Lezip avek en lanmen for, en lebra ki’n file, bann keksoz fer per, bann siny ek mirak.”

^ par. 13 Izai 59:1: “Gete! Lanmen Zeova pa tro kourt pour sove, ni son zorey tro bouse pour tande.”

^ par. 14 Izai 66:14: “Zot pou vwar sa e zot leker pou rezouir, zot lezo pou fleri zis parey nouvo zerb. Bann serviter Zeova pou vwar son lanmen, me i pou denons son bann lennmi.”