Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  September 2015

Ki mannyer Zeova i montre ki i kontan nou?

Ki mannyer Zeova i montre ki i kontan nou?

“Konsidere ki gran lanmour nou Papa i annan pour nou!”1 ZAN 3:1.

KANTIK: 91, 13

1. Ki zapot Zan ti ankouraz bann Kretyen pour reflesir lo la e akoz?

NOU byen bezwen apresye e reflesir lo sa ki zapot Zan ti ekri dan 1 Zan 3:1. Ler Zan ti dir: “Konsidere ki gran lanmour nou Papa i annan pour nou,” i ti pe ankouraz bann Kretyen pour reflesir lo ki kantite Zeova i kontan zot e lo lafason ki i demontre sa. Ler nou fer parey, nou pou kontan Zeova bokou plis e nou relasyon avek li pou vin pli for.

2. Akoz serten i trouv li difisil pour krwar ki Bondye i kontan zot?

2 Malerezman, pour serten i pa normal ki Bondye i annan lanmour pour bann imen. Zot krwar ki nou devret per Bondye e zis obei li. Oubyen, akoz zot krwar dan bann fo lansennyman, zot krwar ki Bondye i kriyel e ki i enposib pour kontan li. De lot kote, i annan serten ki krwar ki Bondye i kontan tou dimoun nenport kwa ki zot fer. Me anmezir ki ou’n etidye Labib, ou’n aprann ki lanmour i kalite prensipal Zeova e ki i sa lanmour ki’n pous li pour donn son Garson konman en ranson pour nou. (Zan 3:16; 1 Zan 4:8) Me selman, bann keksoz ki’n arive dan ou lavi e lafason ki ou’n ganny elve i kapab fer li difisil pour ou konpran ki kantite Zeova i kontan ou.

3. Kwa ki pou ed nou konpran lafason ki Zeova i kontan nou?

3 Alor, ki mannyer Zeova i montre ki i kontan nou? Avan ki nou  reponn sa kestyon, nou bezwen konpran ki kalite relasyon ki egziste ant nou ek Zeova. Byensir, Zeova i nou Kreater. (Lir Psonm 100:3-5. *) Se pour sa ki Labib i apel Adan en “garson Bondye” e Zezi ti ansenny son bann disip pour apel Bondye “nou Papa ki dan lesyel.” (Lik 3:38; Mat. 6:9) Zeova i nou Papa akoz i sa Enn ki’n donn nou lavi. Sa relasyon ki egziste ant nou ek li i menm parey avek sa relasyon ki egziste ant en papa ek son zanfan. Andotmo, Zeova i kontan nou zis parey en bon papa i kontan son zanfan.

4. (a) Ki mannyer Zeova i diferan avek bann papa imen? (b) Ki nou pou diskite dan sa lartik ek sa enn apre?

4 Bann papa imen i enparfe. Menm si zot esey zot mye, zot pa kapab parfetman imit lafason ki Zeova i demontre son lanmour konman en papa. Anfet, serten in pas atraver bann move leksperyans dan zot fanmir e sa in fer ki zot annan bann move souvenir ki’n donn zot bann gro problenm emosyonnel e mantal. Sa i fer lapenn. Me nou kapab asire ki Zeova pa en papa koumsa. (Ps. 27:10) I kontan nou en kantite e i pran swen avek nou dan plizyer fason. Pli nou santi ki Zeova i kontan nou, pli nou pou kontan li. (Zak 4:8) Dan sa lartik nou pou diskit lo kat fason ki Zeova i montre ki i kontan nou. Dan sa lot lartik, nou pou diskit lo kat fason ki nou kapab montre li ki nou kontan li.

ZEOVA I DONN NOU SA KI NOU BEZWEN AVEK LANMOUR

5. Ki zapot Pol ti dir bann dimoun dan Atenn lo Bondye?

5 Ler zapot Pol ti dan lavil Atenn, Lagres, i ti remarke ki sa bann dimoun laba ti annan en ta zidol ki ti pe reprezant zot bann bondye. Zot ti krwar ki sa bann bondye ki ti’n donn zot lavi ek bann keksoz ki zot ti bezwen. Sa ti pous Pol pour dir: “Bondye ki’n fer lemonn ek tou sa ki ladan . . . ki donn tou dimoun, lavi, respirasyon ek tou keksoz. . . .  Atraver li nou ganny lavi, nou kapab mouvmante e nou egziste.” (Akt 17:24, 25, 28) Wi, Zeova i donn nou “tou keksoz” ki nou bezwen pour viv, akoz i kontan nou. Reflesir lo serten sa bann keksoz.

6. Ki mannyer later i montre ki Bondye i kontan nou? (Vwar portre lo paz 18.)

6 Pran par egzanp later ki Zeova in “donn bann imen.” (Ps. 115:15, 16) Bann syantis in depans en ta larzan pour eksplor lespas pour rod en plannet ki parey later. Menm si zot in dekouver plizyer santenn plannet, zot dezapwente akoz napa ni enn sa bann plannet ki annan bann kondisyon neseser pour bann imen viv lo la parey later. I paret ki later i inik parmi bann keksoz ki Bondye in kree. Zis mazin sa en kou, parmi tou sa plannet ki egziste dan Lavwa Lakte (Milky Way) e pli lwen ki sa, Zeova in kree later avek tou sa ki nou bezwen e an plis, i en zoli landrwa konfortab e an sekirite kot nou kapab viv byen. (Iza. 45:18) Pa sa i montre ki Zeova i bezwen vreman kontan nou!Lir Zob 38:4, 7; Psonm 8:3-5. *

7. Ki mannyer lafason ki Zeova in kree nou i montre ki i vreman kontan nou?

7 Menm si Zeova in kree en zoli later pour nou viv lo la, i konnen ki nou bezwen plis ki bann keksoz fizik pour nou vreman  ere. En lot fason ki Zeova i montre ki i kontan nou, se ki i’n kree nou dan son resanblans. (Zen. 1:27) Sa i fer ki nou kapab santi ki i kontan nou e nou kapab montre li ki nou kontan li an retour. Apre tou, en zanfan i pli ere ler i santi ki son paran i kontan li. Deplis, Zezi ti dir: “Ere bann ki konsyan zot bezwen spirityel.” (Mat. 5:3, NW) Konman en Papa ki kontan nou, Zeova i “donn nou tou keksoz,” ki swa fizik oubyen spirityel, “an labondans pour nou zouir.”1 Tim. 6:17; Ps. 145:16.

ZEOVA I ANSENNY NOU LAVERITE AVEK LANMOUR

8. Akoz nou anvi Zeova i ansenny nou?

8 Bann papa i kontan zot zanfan e zot pa anvi ki zot zanfan i ganny anbete. Me bokou paran pa kapab donn zot zanfan sa bon gidans akoz zot menm zot zot pa pe swiv bann standar Labib. Laplipar ditan sa i fer ki tou manm fanmir i konfize e fristre. (Prov. 14:12) De lot kote, Zeova i “Bondye laverite.” (Ps. 31:5) I kontan son bann zanfan e i en plezir pour li gid zot avek son lalimyer laverite dan tou laspe zot lavi, sirtou sa ki konsern zot ladorasyon. (Lir Psonm 43:3. *) Alor, kwa ki Zeova in ansenny nou ki montre ki kantite i kontan nou?

Bann papa Kretyen i imit Zeova ler zot ansenny zot zanfan laverite e ed zot devlop en relasyon avek zot Papa dan lesyel (Vwar paragraf 8-10)

9, 10. Ki mannyer Zeova i montre ki i kontan nou ler i dir nou laverite lo (a) li menm? (b) nou menm?

9 Premyerman, Zeova i dir nou laverite lo li menm. I dir nou son non, ki aparet plis ki okenn lezot non dan Labib. Dan sa fason, Zeova i apros avek nou e i les nou aprann konn li. (Zak 4:8) Zeova i osi dir nou ki kalite Bondye i ete. Ler nou obzerv liniver nou aprann konsernan pwisans ek lasazes Zeova e atraver Labib nou aprann lo son lazistis e son gran lanmour. (Rom. 1:20) I pa zis en papa ki for e saz, me i osi zis e demontre lanmour e sa i fer li fasil pour son bann zanfan annan en bon relasyon avek li.

10 Pour nou prop dibyen, Zeova i osi dir nou laverite lo nou menm, setadir ki plas nou annan dan son plan. Sa i ede ki i annan lape ek linite dan son fanmir iniversel. Dan Labib nou aprann ki bann imen pa’n ganny kree avek sa drwa pour diriz zot prop lekor, san pran kont Bondye dan zot lavi. Si nou inyor sa laverite nou ganny bann move konsekans. (Zer. 10:23) Zeova i konnen kwa ki pli bon pour nou. Sa sel fason ki nou kapab viv anpe e ere, se par aksepte lotorite Bondye e obei li. Zeova in ansenny nou sa laverite enportan parski i kontan nou.

11. Ki promes Zeova in fer ki montre nou ki i kontan nou?

11 En papa ki kontan son zanfan i mazin seryezman lo zot lavenir e i anvi ki zot viv en bon lavi. Malerezman, laplipar dimoun pa konnen ki pou arive a lavenir oubyen zot gaspiy zot lavi e travay pour ganny bann keksoz ki pa pou dir lontan. (Ps. 90:10) Konman zanfan Bondye, nou santi ki Zeova i vreman kontan nou akoz i’n promet nou en zoli lavenir. Sa i donn nou en vre bi dan lavi.

ZEOVA I KONSEY E DISIPLIN SON ZANFAN

12. Ki mannyer sa konsey ek gidans ki Zeova ti donn Kaen ek Barouk ti demontre son lanmour pour zot?

12 Kan Zeova ti vwar ki Kaen ti pe al dan en move semen, i ti esey ed li par demann li: “Akoz ou sitan ankoler koumsa e akoz  ou figir i long? Si ou konmans fer sa ki byen, pa mon pou repran plezir dan ou? . . . Eski ou pou kontrol [ou pese]?” (Zen. 4:6, 7) Kaen pa ti aksepte led Zeova e sa ti anmenn maler lo li. (Zen. 4:11-13) En lot fwa, ler Zeova ti remarke ki Barouk, sekreter Zeremi, ti fatige e dekouraze, i ti donn li konsey pour ed li vwar kote son problenm ti ete. Barouk pa ti fer parey Kaen, o kontrer, i ti ekout konsey Zeova e sa ti sov son lavi.Zer. 45:2-5.

13. Akoz Zeova ti permet son bann serviter pour pas atraver bann leprev?

13 Pol ti ekrir: “Parski Senyer i koriz bann ki i kontan, e i pini tou sa ki i rekonnet konman son garson.” (Ebr. 12:6) Disiplin pa vedir zis pinisyon. I annan diferan kalite disiplin pa zis pour koriz nou, me osi pour form nou. Dan Labib nou lir konsernan bann serviter fidel ki Zeova ti formen pour vin bann pli bon dimoun. Par egzanp, Zozef, Moiz ek David ti pas atraver bann moman difisil. Zeova ti avek zot pandan sa bann leprev. Deplis, sa ki zot ti aprann pandan sa bann leprev ti ed zot ler Zeova ti donn zot plis responsabilite. Anmezir ki nou lir Labib e vwar ki mannyer Zeova i soutenir e form son pep, nou santi ki Zeova i vreman kontan nou.Lir Proverb 3:11, 12. *

14. Ki mannyer Zeova i montre ki i kontan nou ler nou fer en keksoz mal?

14 Nou aprann plis lo lanmour Zeova atraver son disiplin. Ler en dimoun ki’n fer en keksoz mal i ganny disiplinen avek Zeova e i aksepte sa disiplin e repantir, Zeova  “i pare pour pardonnen.” (Iza. 55:7) Ki sa i vedir? Lafason ki David ti dekrir pardon Zeova i montre nou ki nou annan en Papa ki ranpli avek konpasyon: “I pardonn tou ou fot e geri tou ou maladi. I sov ou dan lanmor e demontre lanmour fidel ek konpasyon anver ou. Parey kot soley i leve i lwen avek kot soley i kouse, pareyman i’n met tou nou bann lofans lwen avek nou.” (Ps. 103:3, 4, 12) Annou touzour ekout konsey Zeova e pa tarde pour aksepte son disiplin akoz nou rekonnet ki sa i en fason ki i montre ki i vreman kontan nou.Ps. 30:5.

ZEOVA I PROTEZ NOU

15. Kwa ki montre ki pep Zeova i annan en gran valer pour li?

15 Definitivman en papa ki kontan son fanmir i anvi protez zot kont tou danze. Zeova, nou Papa dan lesyel i fer sanmenm. En psalmis i dir sa konsernan Zeova: “I pe protez bann ki fidel avek li e i delivre zot dan lanmen bann move dimoun.” (Ps. 97:10) Mazin sa: Zis parey ou reakte vitman pour protez ou lizye akoz zot annan en gran valer pour ou, Zeova i reakte vitman pour protez son pep parski zot annan en gran valer pour li.Lir Zekarya 2:8. *

16, 17. Dekrir bann fason ki Zeova in protez son pep dan lepase e dan nou letan.

16 Parfwa Zeova i servi son bann lanz pour protez son pep. (Ps. 91:11) Ler larme Asiryen ti pe al lager kont Zerizalenm, en sel lanz ti touy 185,000 solda dan en lannwit. (2 Rwa. 19:35) En lanz ti sov Pyer, Pol ek lezot ler zot ti dan prizon. (Akt 5:18-20; 12:6-11) Dan nou letan osi lanmen Zeova pa tro kourt. En reprezantan biro prensipal ki ti vizit en biro brans Lafrik ti dir ki bann lager politik e relizye ti’n detrir sa pei. Sa pei ti’n devir anba lao akoz i ti annan en kantite lager, dimoun ti pe vole, pe vyole e pe touy kanmarad. Kantmenm sa, pa ni menm enn nou bann frer ek ser ki ti perdi zot lavi menm si bokou zot ti perdi tou sa ki zot ti annan. Ler zot ti ganny demande ki mannyer zot ete, tou dimoun ti reponn avek en gran sourir lo zot figir: “Gras a Zeova tou i byen!” Zot ti santi ki Zeova i kontan zot.

17 I annan bann letan kot Zeova in permet son bann lennmi pour pran lavi enn son serviter fidel, tel parey Etyenn. Me Zeova i protez son pep konman en group par averti zot lo bann riz Satan. (Efe. 6:10-12) Atraver son Parol ek bann piblikasyon baze lo Labib nou aprann ki i danzere pour kontan larzan, get bann film, lir bann liv ouswa zwe bann zwe ki vyolan e imoral oubyen mal servi Enternet. I kler ki Zeova i parey en Papa ki kontan son pep e protez zot.

EN GRAN PRIVILEZ

18. Ki mannyer ou santi lefet ki Zeova i kontan ou?

18 Apre ki nou’n diskit zis detrwa fason enkrwayab ki Zeova i montre ki i kontan nou, i normal ki nou santi parey Moiz. Ler Moiz ti reflesir lo tou sa lannen ki i ti’n pase dan servis Zeova, i ti dir: “Demontre ou lanmour fidel anver nou dan bomaten pour nou kapab kriye avek lazwa ek lakontantman tou le zour dan nou lavi.” (Ps. 90:14) Sa pli gran privilez ek benediksyon ki nou kapab gannyen ozordi se pour konpran e santi ki Zeova i kontan nou. Parey zapot Zan, nou ganny pouse pour dir: “Konsidere ki gran lanmour nou Papa i annan pour nou!”1 Zan 3:1.

^ par. 3 Psonm 100:3-5: 3 Zot bezwen konnen ki Zeova i Bondye. Li ki’n fer nou e nou nou pour li. Nou son pep e son bann mouton ki i pran swen avek. 4 Vin kot baro tanp pour remersye Bondye, dan lakour tanp pour loue li. Remersye li e loue son non. 5 Parski Zeova i bon. Son lanmour fidel i pour touzour e son fidelite i pour zenerasyon apre zenerasyon.”

^ par. 6 Zob 38:4, 7: 4 Kote ou ti ete kan mon ti poz fondasyon later? Dir mwan si ou krwar ki ou konpran.” “7 Ler bann zetwal bomaten ti kriye ansanm dan lazwa e tou bann garson Bondye ti konmans loue li byen for?” Psonm 8:3-5: 3 Kan mon vwar ou lesyel, travay ou ledwa, lalin ek zetwal ki ou’n fer, 4 ki imen i ete ki ou gard li antet e en garson zonm ki ou pran swen avek li? 5 Ou’n fer li en pti pe pli ba ki bann lanz e ou’n met laglwar ek splander lo li konman en kouronn.”

^ par. 8 Psonm 43:3: “Anvoy ou lalimyer ek laverite pour gid mwan. Mon swete ki zot gid mwan kot ou montanny sen e kot ou gran tabernak.”

^ par. 13 Proverb 3:11, 12: 11 Mon garson pa rezet disiplin Zeova e pa deteste son reprimann. 12 Parski Zeova i reprimann sa bann ki i kontan, zis parey en papa ki pran plezir dan son garson.”

^ par. 15 Zekarya 2:8: “La sa ki Zeova bann larme i dir, apre ki i’n ganny glorifye in anvoy mwan kot sa nasyon ki ti pe vol ou: ‘Sa ki tous zot, i tous mon kannet lizye.’”