Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  September 2015

Ki mannyer nou kapab montre Zeova ki nou kontan li?

Ki mannyer nou kapab montre Zeova ki nou kontan li?

“Nou, nou kontan akoz Bondye in kontan nou an premye.”1 ZAN 4:19.

KANTIK: 56, 138

1, 2. Dapre zapot Zan, ki Zeova in fer pour montre nou ki mannyer pour kontan li?

LAPLIPAR dimoun ti pou dakor ki sa pli bon fason ki en papa i kapab ansenny son zanfan se par son prop legzanp. Zapot Zan ti ekrir: “Nou, nou kontan akoz Bondye in kontan nou an premye.” (1 Zan 4:19) I kler alor ki Zeova in donn sa pli bon legzanp lo lafason ki en papa i kontan son zanfan e sa i ed nou pour kontan li.

2 Ki mannyer Bondye in “kontan nou an premye”? Zapot Pol ti dir: “Bondye in prouv son lanmour pour nou: Kan nou ti ankor peser, Kris in mor pour nou.” (Rom. 5:8) Zeova ti fer en gran sakrifis ler i ti donn son Garson konman en ranson pour bann imen ki krwar dan li. Ler Zeova ti fer sa, i’n montre nou ki sa vedir lanmour. Lanmour i ganny demontre ler nou donnen e met lentere lezot avan sa ki pour nou. Sa zoli kado ki Bondye in donn nou i permet nou apros avek li e benefisye avek son lanmour e an retour nou kapab montre li ki nou kontan li.1 Zan 4:10.

3, 4. Ki mannyer nou montre ki nou kontan Bondye?

3 Lanmour i sa kalite prensipal dan Zeova, alor nou kapab konpran akoz Zezi ti dir ki sa komannman ki pli enportan i: “Kontan Senyer Bondye avek tou ou leker, tou ou lam, tou ou lespri e avek  tou ou lafors.” (Mark 12:30) Dapre sa ki Zezi ti dir, nou aprann ki nou bezwen kontan Bondye avek tou nou leker. Si nou ti kontan en lot dimoun ouswa en lot keksoz plis ki nou kontan Zeova sa ti pou bles li. Me nou osi vwar ki nou bezwen kontan Bondye avek tou nou nanm, lespri ek lafors. Sa i vedir ki nou lanmour pour li pa devret zis en santiman dan nou leker. An plis ki kontan li dan nou leker, nou osi kontan li avek nou lespri e par nou bann aksyon. Dapre profet Mika, se sanmenm sa ki Zeova i anvi nou fer.Lir Mika 6:8. *

4 Ki mannyer nou kapab montre ki nou vreman kontan nou Papa dan lesyel? Nou devret donn tou pour tou pour montre li ki nou kontan li. Zis parey Zezi ti dir, tou nou abilite fizik, emosyonnel e mantal i enplike. Dan sa lartik avan, nou ti diskit lo kat fason ki Zeova in montre ki i vreman kontan son bann zanfan. Aprezan, annou vwar ki mannyer nou kapab kontan Zeova plis e demontre sa lanmour dan bann fason ki akseptab pour li.

MONTRE REKONESANS POUR TOU SA KI ZEOVA I DONNEN

5. Ler nou mazin tou sa ki Zeova in fer pour nou, ki nou anvi fer?

5 Ki ou fer ler ou ganny en kado? I tre probab ki ou pou montre ou lapresyasyon dan en fason ou en lot. Deplis, ou pou servi sa kado olye met li dan en kwen. Zak ti ekrir: “Tou don ekselan, tou kado parfe i sorti lao, kot Bondye, Papa tou lalimyer ki pa zanmen sanze, e kot ki napa menm lonbraz en sanzman.” (Zak 1:17) Zeova i toultan donn nou sa ki nou bezwen pour viv ere. Eski pa sa i pous nou pour kontan li an retour?

6. Ki bann Izraelit ti bezwen fer pour kontinyen ganny benediksyon Zeova?

6 Zeova ti pran swen avek bann Izraelit pour plizyer santenn lannen e i ti beni zot avek bann keksoz materyel e spirityel. (Det. 4:7, 8) Pour zot kapab kontinyen ganny sa bann benediksyon, zot ti bezwen obei Lalwa Bondye. Par egzanp, zot ti bezwen ofer Zeova ‘bann pli bon fri parmi zot bann premye fri mir’ regilyerman. (Egz. 23:19) Ler bann Izraelit ti fer sa, zot ti montre ki zot ti apresye lanmour ek benediksyon Zeova.Lir Deterononm 8:7-11. *

7. Ki mannyer nou kapab servi nou “bann keksoz valer” pour montre Zeova ki nou kontan li?

7 Me nou ki nou kapab fer? Menm si nou pa bezwen ofer bann sakrifis ki ti ganny demande dan Lalwa, i apropriye ki nou montre ki nou kontan Bondye par servi nou “bann keksoz valer” pour onor li. (Prov. 3:9) Ki mannyer nou kapab fer sa? Parey nou konnen, nou kapab fer bann kontribisyon pour siport sa travay Rwayonm dan nou kongregasyon e dan lemonn antye. Ki swa nou ris oubyen non, sa i en bon fason pour montre Zeova ki nou kontan li. (2 Kor. 8:12) Me i osi annan lezot fason ki nou kapab montre Zeova ki nou kontan li.

8, 9. Ki mannyer nou konfyans dan promes Zeova i relye avek nou lanmour pour li? Donn legzanp.

8 Rapel ki Zezi ti dir son bann disip ki zot pa devret trakas lo ki zot pou manze e ki zot pou mete, me ki zot devret rod plito  Rwayonm Bondye. I ti dir ki nou Papa i konnen kwa ki nou vreman bezwen. (Mat. 6:31-33) Sa kantite konfyans ki nou annan dan sa promes i montre ki kantite nou kontan Zeova parski lanmour ek konfyans i mars ansanm. Nou pa kapab kontan en dimoun si nou napa konfyans dan li. (Ps. 143:8) Alor demann ou lekor: ‘Eski mon bann plan e lafason ki mon servi mon letan ek lenerzi i montre ki mon vreman kontan Zeova? Eski tou le zour mon depan lo Zeova pour donn mwan sa ki mon bezwen?’

9 En Kretyen ki apel Mike ti montre sa kalite lanmour ek konfyans. Ler i ti zenn i ti anvi servi Bondye dan en lot pei. Menm apre ki i ti’n marye e ganny de zanfan i ti ankor anvi fer sa. Ler Mike ek son fanmir ti lir bann lartik lo bann frer ek ser ki ti pe servi kot i annan en pli gran bezwen, zot ti deside pour senplifye zot lavi. Zot ti vann zot lakaz e al reste dan en apartman. Mike ti osi redwir lakantite travay ki son biznes netwayaz ti fer e aprann ki mannyer pour servi Enternet pour okip son biznes si i al dan en lot pei. Mike ek son fanmir ti al servi dan en lot pei e apre de-z-an Mike ti dir: “Nou’n vwar pour nou menm ki parol Zezi dan Matye 6:33 i vre.”

PRAN AKER LAVERITE SORTI KOT BONDYE

10. Parey Lerwa David, akoz i bon pour nou medit lo sa ki nou aprann lo Zeova?

10 Apepre 3,000 an pase, Lerwa David ti enpresyonnen ler i ti obzerv lesyel. Sa ti pous li pour ekrir: “Lesyel pe anons laglwar Bondye e latmosfer pe proklanm travay son lanmen.” I ti osi enpresyonnen par sa lasazes dan Lalwa Bondye e i ti dir: “Lalwa Zeova i parfe, i redonn lafors. Rapel Zeova i diny konfyans, i fer sa ki napa leksperyans saz.” Lefet ki David ti reflesir avek lapresyasyon, ki lefe sa ti annan lo li? David ti kontinyen: “O Zeova mon Ros e mon Liberater, ki bann parol ki sorti dan mon labous ek meditasyon ki sorti dan mon leker i en keksoz agreab pour ou.” I kler ki David ti’n devlop en bon relasyon avek son Bondye.Ps. 19:1, 7, 14.

11. Ki mannyer nou kapab servi sa konnesans ki Zeova i donn nou pour montre li ki nou kontan li? (Vwar portre lo paz 23.)

11 Ozordi, Zeova i ansenny nou en kantite lo li, son plan, son kreasyon ek son Parol. Lemonn i ankouraz dimoun pour fer bann letid avanse. Me i annan bokou ka ki montre ki ler dimoun i fer sa zot perdi zot lafwa dan Bondye e aret kontan li. Par kont, Labib i ankouraz nou pour pa kontant nou zis avek konnesans me pour ganny konprenezon ek lasazes. Sa i vedir ki nou bezwen aprann servi sa konnesans ki Bondye in donn nou pour nou prop dibyen e pour ed lezot. (Prov. 4:5-7) Bondye i “oule ki tou [“sort kalite,” NW] dimoun i ganny sove e ganny konnesans laverite.” (1 Tim. 2:4) Nou montre Zeova ki nou kontan li ler nou anons sa bon nouvel Rwayonm avek tou nou leker e ed lezot aprann konsernan sa zoli plan ki Bondye i annan pour limanite.Lir Psonm 66:16, 17. *

12. Ki en zenn ser ti dir konsernan en kado sorti kot Zeova?

12 Bann zenn osi i kapab montre Zeova ki zot kontan li par demontre lapresyasyon pour son bann provizyon spirityel. Shannon i rakonte ki ti arive ler i ti asiste en lasanble distrik ki son tenm ti, “Godly Devotion,” ansanm avek son paran ek son pti ser. I ti annan 11 an e son pti ser ti annan 10 an. Pandan en sesyon tou bann zenn ti ganny demande pour asiz dan en seksyon spesyal.  I ti en pti pe per me i ti ale. I ti byen kontan ler sak zenn ti ganny sa zoli liv Questions Young People Ask—Answers That Work. Ki mannyer sa kado ti fer li santi anver Zeova? I dir: “I ti a sa moman ki mon ti realize ki Zeova i egziste e ki i vreman kontan mwan en kantite.” Shannon i kontinyen par dir: “Pa nou vreman kontan ki nou Bondye Zeova i volonterman donn nou sa bann zoli kado parfe!”

AKSEPTE KONSEY EK DISIPLIN ZEOVA

13, 14. Ki mannyer nou devret reazir ler Zeova i disiplin nou e akoz?

13 Labib i fer nou rapel ki “Zeova i reprimann sa bann ki i kontan, zis parey en papa ki pran plezir dan son garson.” (Prov. 3:12) Me ki mannyer nou devret reazir ler nou ganny disiplinen? Sa ki Zapot Pol ti ekri i vre: “Pour sa moman, koreksyon i rann malere plito ki donn lazwa.” Pa akoz Pol in dir sa ki i vedir i ti pe diminyen lenportans oubyen valer disiplin, parski apre i ti dir: “Me pli tar, i prodwi fri lape ek lazistis pour tou bann ki’n ganny disiplinen par li.” (Ebr. 12:11) Si nou kontan Zeova, nou bezwen fer sir ki son konsey pa zis antre dan en kote zorey sorti dan lot kote oubyen pran lakoler si nou pa kontan en keksoz ki nou tande. Sa i kapab vreman difisil pour serten, me akoz nou kontan Zeova nou ekout li e fer bann sanzman ki neseser.

14 Dan lepok Malaki, bokou Zwif pa ti ekout konsey Zeova. Zot pa ti fatig zot kantmenm Zeova pa ti kontan bann sakrifis ki zot ti pe fer. Alor Zeova ti bezwen donn zot konsey ki ti vreman serye. (Lir Malaki 1:12, 13. *) Ki kantite sa sityasyon ti grav? Me zis ekout parol Zeova: “Mon pou donn ou en malediksyon e mon pou sanz ou bann benediksyon an malediksyon. Wi, mon’n sanz ou bann benediksyon an malediksyon parski ou pa pe pran [mon komannman] aker.” (Mal.  2:1, 2) I kler ki si nou fer li en labitid pour inyor konsey Zeova oubyen pour pran li alalezer, sa pou anmenn bann move konsekans.

Mazin lo sa ki Zeova i anvi, olye sa ki popiler dan lemonn (Vwar paragraf 15)

15. Ki kalite fason panse nou devret evite?

15 Dan sa lemonn ki nou viv ozordi dimoun i fyer e mazin zis zot prop lekor. Bokou dimoun pa kontan ganny korize oubyen ganny dir ki zot devret fer. Serten i ekout konsey akoz zot napa swa. Me nou pa devret koumsa, parski Labib i dir nou “pa swiv bann koutim sa monn konmela.” Plito, nou devret konpran e fer “lavolonte Bondye . . . ki parfe.” (Rom. 12:2) Zeova i servi son lorganizasyon pour donn nou konsey a tan. Par egzanp, nou ganny bann rapel lo ki mannyer nou devret konport nou avek en dimoun lot sèks, swazir bann zanmi e deside ki nou pou fer pour detann nou. Ler nou aksepte sa bann gidans e met zot an pratik dan nou lavi, nou montre ki nou rekonesan e ki dan fon nou leker nou vreman kontan Zeova.Zan 14:31; Rom. 6:17.

DEPAN LO ZEOVA POUR ED E PROTEZ OU

16, 17. (a) Akoz nou devret rode ki Zeova i panse avan ki nou pran en desizyon? (b) Ki mannyer bann Izraelit ti montre ki zot ti mank konfyans ek lanmour pour Zeova?

16 Ler bann pti manrmay i per, deswit zot tay kot zot paran. Anmezir ki zot grandi, zot aprann pour depan plis lo zot menm e fer zot prop desizyon. Sa i form parti zot devlopman pour vin adilt. Kantmenm sa, bann ki pros avek zot paran i pare pour demann zot lopinyon ek konsey avan pran en desizyon. I parey spirityelman. Zeova in donn nou son lespri sen ki donn nou “sa dezir ek lafors pour azir.” Me si nou ti fer bann desizyon san pran son lavolonte an konsiderasyon, sa ti pou montre ki nou mank konfyans dan li e ki nou pa vreman kontan li.Fili. 2:13NW.

17 Dan letan Samyel, bann Izraelit ti perdi en batay kont bann Filisten. Sityasyon pep Bondye ti kritik, zot ti bezwen led ek proteksyon. Ki zot ti fer? Zot ti dir: “Annou pran lars lalyans Zeova ki Silo avek nou, pour ki i ava avek nou e sov nou dan lanmen nou bann lennmi.” Eski sa ti fer en diferans? “Zot ti ganny masakre. Lo kote Izrael ti annan 30,000 solda apye ki ti mor. Deplis, Lars Bondye ti ganny sezi.” (1 Sam. 4:2-4, 10, 11) Nou kapab mazinen ki bann Izraelit ti pe rod led Zeova ler zot ti pran Lars avek zot. Me an realite, zot pa ti’n rod gidans Zeova, zot ti pe fer sa ki zot zot ti krwar i byen e sa ti anmenn en ta soufrans.Lir Proverb 14:12. *

18. Ki mannyer nou devret santi pour rod led avek Zeova?

18 En psalmis ti montre en bon latitid ler i ti ekrir: “Esper Bondye parski mon pou loue li ankor konman mon Gran Sover. Mon Bondye, mon dan dezespwar. Sanmenm sa mon mazin ou.” (Ps. 42:5, 6) Pa sa psalmis ti vreman kontan Zeova! Eski ou osi ou’n devlop sa kalite lanmour pour nou Papa dan lesyel e depan lo li? Menm si ou larepons i wi, petet ou kapab depan plis lo li parey Labib i ankouraz nou: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon e i pou fer drwat ou bann santye.”Prov. 3:5, 6.

19. Dan ki fason ou anvi montre Zeova ki ou kontan li?

19 Lefet ki Zeova in kontan nou an premye, i’n montre nou ki mannyer pour kontan li. Annou touzour gard antet tou sa ki Zeova in fer pour nou e ki kantite i kontan nou. Deplis, annou montre li plis ankor ki nou kontan li ‘avek tou nou leker, tou nou lam, tou nou lespri e avek tou nou lafors.’Mark 12:30.

^ par. 3 Mika 6:8: “O zonm, i’n dir ou sa ki bon. Ki Zeova pe demann ou an retour? Zis pour demontre lazistis, kontan fidelite e mars dan en fason modes avek ou Bondye!”

^ par. 6 Deterononm 8:7-11: 7 Parski Zeova ou Bondye pe anmenn ou dan en bon pei, en pei kot i annan bann larivyer, sours delo, sours souteren ki koule dan bann vale ek montanny, 8 en pei kot i annan dible, lorz, plantasyon rezen, pye fig ek pye grenad, en pei kot i annan delwil zoliv ek dimyel, 9 en pei kot pou annan ase manze e ou pa pou mank nanryen, en pei kot i annan fer dan bann ros e kot ou pou tir kwiv dan bann montanny. 10 ‘Ler ou’n manze e satisfe, ou bezwen loue Zeova ou Bondye pour sa bon pei ki i’n donn ou. 11 Fer atansyon ki ou pa oubliy Zeova ou Bondye e negliz son bann komannman, son bann zizman drwat ek lalwa ki mon pe ordonn ou ozordi.’”

^ par. 11 Psonm 66:16, 17: 16 Zot tou ki annan lakrent pour Bondye, vin ekout mwan e mon pou rakont zot sa ki i’n fer pour mwan. 17 Avek mon labous mon ti kriy li e avek mon lalang mon ti glorifye li.”

^ par. 14 Malaki 1:12, 13: “‘12 Me zot pe mank respe pour li ler zot dir, “Latab Zeova i sal, son bann lofrann i en manze ki pa vo nanryen.” 13 Zot osi dir, “Gete! Pa i fatigan!” e zot mepriz li,’ sanmenm ki Zeova bann larme in dir. Zeova in osi dir ‘Zot anmenn bann zannimo ki’n ganny vole, ki pe bwete e ki malad. Wi, zot anmenn sa bann keksoz konman en lofrann! Eski mon devret aksepte sa ki zot pe ofer?’”

^ par. 17 Proverb 14:12: “I annan en semen ki paret drwat pour en zonm, me a lafen i anmenn ver lanmor.”