Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  August 2015

Prepar la konmela pour viv dan nouvo lemonn

Prepar la konmela pour viv dan nouvo lemonn

“Demann zot pour fer sa ki byen . . . koumsa zot ava ganny vre lavi.”1 TIM. 6:18, 19.

KANTIK: 125, 40

1, 2. (a) Ki benediksyon fizik ou pli enpasyan pour vwar dan Paradi lo later? (Vwar portre anler.) (b) Ki benediksyon spirityel i pou annan dan nouvo lemonn?

KI OU mazinen kan ou tann sa lekspresyon “vre lavi”? Pour laplipar nou, sa i fer nou mazin lavi eternel dan Paradi lo later. Anfet, zapot Pol ti relye “lavi eternel” avek “vre lavi.” (Lir 1 Timote 6:12, 19.) Nou pe esper sa lavi ki pou dire pour touzour e anmenn satisfaksyon ek lazwa dirab. I difisil pour mazinen ki tou le bomaten nou pou leve an bonn sante fizikman, mantalman e emosyonnelman. (Iza. 35:5, 6) Zis mazinen ki mannyer i pou gou pour pas letan avek nou fanmir ek zanmi, enkli bann ki’n resisite. (Zan 5:28, 29; Akt 24:15) Nou pou osi annan sa loportinite pour vin pli kalipa dan domenn lasyans, lanmizik, larsitektir oubyen dan lezot domenn ankor.

2 Menm si nou enpasyan pour sa bann bon keksoz, bann benediksyon dan nouvo lemonn pou avan tou bann benediksyon spirityel. Pli gran satisfaksyon nou pou gannyen, se pou konnen ki non Zeova in ganny sanktifye e son souvrennte zistifye! (Mat. 6:9, 10) Nou pou kontan pour vwar plan ki Zeova ti annan depi o konmansman pou limanite ek later ganny akonplir.  Deplis, zis mazinen ki mannyer i pou pli fasil pour apros avek Zeova anmezir ki nou ptitapti vin pli pros avek perfeksyon.Ps. 73:28; Zak 4:8.

3. Ki nou devret pe fer la konmela?

3 Nou annan konfyans ki Zeova pou fer sa bann keksoz merveye parski “pour Bondye tou i posib.” (Mat. 19:25, 26) Me si nou pe espere viv dan sa nouvo lemonn e kontinyen viv apre sa Mil An ki Kris pou dirize, nou bezwen azir la konmela pour “ganny” oubyen sezi lavi eternel. Nou bezwen viv dan en fason pour montre ki nou pe esper lafen sa move lemonn e nou bezwen pran bann pa neseser pour prepar nou la konmela pour viv dan sa nouvo lemonn. Ki mannyer nou kapab fer sa lefet ki nou ankor pe viv dan sa move lemonn?

KI MANNYER POUR PREPAR NOU?

4. Donn en legzanp konman nou kapab prepar nou la konmela pour viv dan nouvo lemonn.

4 Ki mannyer nou kapab prepar nou la konmela pour viv dan nouvo lemonn Bondye? Be, meton nou ti pe plàn pour al reste dan en lot pei. Ki mannyer nou ti pou prepar nou pour sa sanzman? Petet nou ti pou konmans aprann koz langaz sa pei, aprann konsernan zot kiltir e menm gout serten zot manze. Nou ti pou fer konmsi nou pe viv dan sa pei. Apre tou, nou ekspekte viv koumsa kan nou ariv laba. Pareyman, nou kapab prepar nou par viv nou lavi la konmela parey nou ekspekte viv dan nouvo lemonn. An rapor avek sa, annou vwar serten legzanp.

5, 6. Ler nou aprann pour soumet avek lorganizasyon Zeova, ki mannyer sa i montre ki nou pe prepar nou pour viv dan nouvo lemonn?

5 Dan nouvo lemonn, tou dimoun pou siport souvrennte Bondye. Pa sa pou en gran diferans konpare avek lemonn Satan ki ankouraz dimoun pour domin zot prop lekor! Pour serten dimoun zot lendepandans i pli enportan e zot touy lekor pour ganny keksoz dan zot fason, me ki rezilta sa in anmennen? Malerezman sa in anmenn soufrans, sagrinasyon e menm maler. (Zer. 10:23) Me Zeova i en Dirizan ki annan lanmour. San okenn dout, i pou gou pour viv dan nouvo lemonn ler tou dimoun pou obei li!

6 I pou en plezir pour swiv bann laranzman ki Zeova in met an plas dan nouvo lemonn pour ede transform later pour vin en zoli paradi, ansenny bann ki pou resisite e pour fer lavolonte Zeova. Me ki nou ti pou fer si nou ti ganny demande pour fer en travay ki nou pa tro tro kontan? Eski nou ti pou swiv sa lenstriksyon e fer nou mye pour fer sa travay e menm fer li avek en sourir? Laplipar nou ti pou dir wi! Me eski la konmela nou deza annan sa labitid pour soumet avek bann lenstriksyon ki nou gannyen avek lorganizasyon Zeova? Si nou pe fer li, sa i montre ki nou pe prepar nou pour viv pour touzour anba dominasyon Zeova.

7, 8. (a) Akoz nou devret devlop en leta lespri korperasyon? (b) Ki bann sanzman serten Kretyen in eksperyanse? (c) Ki nou kapab asire konsernan lavi dan nouvo lemonn?

7 Nou pe prepar nou pour viv dan nouvo lemonn ler nou soumet avek bann laranzman ki Zeova in met an plas ozordi, me osi ler nou devlop lakontantman e pare pour korpere. Si nou korpere avek bann ki pe diriz travay predikasyon ozordi e petet trouv lazwa ek lakontantman ler nou ganny en nouvo servis, i tre probab ki nou pou annan menm latitid dan nouvo lemonn. (Lir Ebre 13:17.) Kan bann Izraelit ti antre dan Later Promiz zot ti ganny dir kote pour reste. (Nom. 26:52-56; Zoz. 14:1, 2) I vre ki nou tou  ozordi nou pa konnen kote nou pou ganny demande pour reste dan nouvo lemonn. Par kont, si nou korpere nou pou ganny lazwa ek lakontantman ler nou fer lavolonte Zeova nenport ki kote nou pou reste lo later.

8 Ler nou mazin sa privilez pour viv anba dominasyon Rwayonm, nou vwar ki tou zefor ki nou fer pour korpere avek lorganizasyon Zeova e desarz bann responsabilite teokratik i vo lapenn. Byensir nou sirkonstans i kapab sanze avek letan. Par egzanp, serten Betelit Leta-z-ini in ganny anvoye dan teritwar e aprezan zot pe ganny en ta benediksyon dan lezot form servis a plen tan. I osi annan bann sirveyan rezyonal ki’n ganny anvoye konman pionye spesyal akoz problenm lasante oubyen lezot rezon ankor. Si nou devlop lakontantman, priy Bondye pour son led e fer tou sa ki nou kapab dan son servis, nou pou trouv lazwa e ganny bokou benediksyon, menm dan sa bann dernyen zour difisil. (Lir Proverb 10:22. *) Me ki lespwar nou annan pour lavenir? Nou kapab annan en nide kote nou ti a kontan reste dan nouvo lemonn, me i kapab ki nou ganny demande pour al reste en lot landrwa. Nenport landrwa kot nou pou servi e nenport kwa ki nou pou fer, nou kapab asire ki nou pou rekonesan, annan satisfaksyon e zwaye.Nee. 8:10.

9, 10. (a) Akoz petet nou pou bezwen demontre pasyans dan nouvo lemonn? (b) Ki mannyer nou kapab montre ki nou annan pasyans?

9 Dan nouvo lemonn, petet i pou annan letan kot nou pou bezwen demontre pasyans. Par egzanp, nou kapab tande ki serten in resisite e ki zot fanmir ek zanmi i byen kontan. Me i kapab ki nou nou bezwen espere pour sa dimoun ki nou kontan ganny resisite. Si sa i leka, eski nou pou rezouir avek lezot e annan pasyans? (Rom. 12:15) Ler nou aprann esper avek pasyans lakonplisman bann promes Zeova la konmela, sa pou ed nou pour demontre pasyans sa letan.Ekle. 7:8.

10 Nou osi kapab prepar nou pour viv dan nouvo lemonn par demontre pasyans ler nou ganny bann azisteman lo nou konprenezon bann laverite dan Labib. Eski ou kontan etidye sa bann nouvo leksplikasyon e annan pasyans si ou pa vreman konpran zot? Si wi, i tre probab ki i pou fasil pour demontre pasyans dan nouvo lemonn anmezir ki Zeova i revel sa ki i ekspekte avek nou.Prov. 4:18; Zan 16:12.

11. Ki Zeova pe ansenny nou la konmela konsernan nou lanmitye avek kanmarad e ki mannyer sa pou benefisye nou dan nouvo lemonn?

11 En lot kalite ki pou itil dan nouvo lemonn se en leta lespri pare pour pardonnen. Pandan sa Mil An ki Kris pou dirize, i kapab ki i pou pran en pe letan avan ki bann dimoun i rezet bann move tre. (Akt 24:15) Eski nou pou kapab azir avek lanmour anver lezot pandan sa letan? Si la konmela nou pare pour pardonnen e viv byen antre nou, i pou pli fasil pour fer sa dan nouvo lemonn.Lir Kolosyen 3:12-14.

12. Eksplike ki lyen i annan ant sa ki nou ekspekte a lavenir e nou fason viv la konmela.

12 Dan nouvo lemonn petet nou pa pou toultan ganny sa ki nou anvi, ler nou anvi. Nou pou bezwen apresye e kontant nou dan nenport ki sityasyon ki nou pou ladan e demontre bann kalite ki Zeova pe ansenny nou pou devlope la konmela. Ler nou aprann demontre sa bann kalite nou montre ki “sa monn nouvo ki pe vini” i reel pour nou e ki nou pe prepar  nou pour lavi eternel. (Ebre 2:5; 11:1) An plis, nou pou demontre ki nou vreman anvi viv dan en lemonn kot tou dimoun i obeir Zeova.

KONSANTRE LO BANN LOBZEKTIF SPIRITYEL

Partisip plennman dan predikasyon

13. Kwa ki pou pli enportan dan nouvo lemonn?

13 Annou vwar en lot fason ki nou kapab prepar nou pour sa vre lavi. Kantmenm nou’n ganny promet ki manze ek lezot nesesite pour annabondans dan nouvo lemonn, sa ki pou fer nou pli zwaye se lefet ki nou bezwen spirityel pou ganny satisfe. (Mat. 5:3, NW) Bann aktivite spirityel pou sa keksoz pli enportan e nou pou demontre ki nou kontan pour servi Zeova. (Ps. 37:4) Ler nou met bann keksoz spirityel premye dan nou lavi ozordi, nou pe prepar nou pour vre lavi a lavenir.Lir Matye 6:19-21.

14. Ki lobzektif spirityel ki kapab ed bann zenn gard antet lavi eternel?

14 Ki mannyer nou kapab trouv plis lazwa dan bann aktivite teokratik? En fason pour fer sa se ler nou fikse bann lobzektif spirityel. Si ou en zenn e ou pe mazin seryezman pour fer en karyer dan servis Zeova, akoz ou pa revwar bann lartik ki’n ganny pibliye lo diferan form servis a plen tan e fikse enn konman ou lobzektif? * Ou osi kapab koz avek serten dimoun ki’n fer servis a plen tan pour plizyer lannen. Par fer en karyer dan servis a plen tan, ou pe prepar ou pour kontinyen servi Bondye dan nouvo lemonn kot ou formasyon teokratik ek leksperyans pou annan en gran valer.

Partisip dan bann aktivite teokratik

15. Ki lobzektif spirityel bann proklanmater Rwayonm i kapab fikse?

15 Ki lobzektif spirityel nou kapab fikse konman bann proklanmater Rwayonm? Nou kapab fer li en lobzektif pour amelyor nou abilite dan en serten laspe predikasyon. Oubyen nou kapab fer zefor pour pli byen konpran bann prensip Labib e zot laplikasyon. Nou osi kapab devlop nou abilite pour lir an piblik e vin en pli bon orater oubyen fer bann pli bon komanter dan renyon. San dout ou kapab mazin lezot keksoz ankor. Sa ki enportan se ki: Ler ou fikse bann lobzektif spirityel, sa pou fer ou annan plis lantouzyazm pour fer bann aktivite teokratik e ed ou prepar ou pour viv dan nouvo lemonn.

 DEZA NOU PE GANNY BENI!

Demontre lapresyasyon pour bann nouritir spirityel

16. Akoz servi Zeova i sa pli bon fason viv?

16 Ler nou servi nou letan pour prepar nou pour viv dan nouvo lemonn Bondye, eski sa i vedir ki nou pa pe profit lavi ozordi? Non. Servi Zeova i sa pli bon fason viv. Nou pa servi li akoz nou ganny forse oubyen zis pour sirviv gran ladetres. Nou’n ganny kree pour servi Zeova e se sa ki donn nou pli gran lazwa. Gidans ek lanmour Zeova i sa pli meyer keksoz ki nou kapab annan dan lavi. (Lir Psonm 63:1-3. *) I vre, nou pa bezwen esper nouvo lemonn pour ganny bann benediksyon spirityel ki nou gannyen ler nou servi Zeova avek tou nou leker, nou kapab eksperyans zot la konmela! Byensir, serten parmi nou pe ganny sa bann benediksyon pour plizyer dizenn lannen e nou konnen par leksperyans ki napa en lot fason viv ki kapab anmenn pli gran satisfaksyon.Ps. 1:1-3; Iza. 58:13, 14.

Rod gidans sorti dan Labib

17. Ki plas bann keksoz ki nou ti a kontan fer e detant pou annan dan Paradi?

17 Dan Paradi nou pou annan letan pour fer sa ki nou ti a kontan e osi letan pour detant. Apre tou, i pa ti pou fer sans ki Bondye in kree nou avek sa dezir pour anmiz nou lekor si i ti napa lentansyon pour nou satisfer sa dezir. (Ekle. 2:24) Dan sa fason ek lezot fason ankor, Zeova pou touzour “satisfer dezir tou sa ki vivan.” (Ps. 145:16) Nou bezwen annan en letan pour rilaks e detann nou, me sa detant pou pli gou ler nou met nou relasyon avek Zeova premye. Koumsa keksoz pou ete dan nouvo lemonn. Pa i saz pour nou aprann rod plito Rwayonm Bondye an premye avan nou lentere personnel e konsantre lo bann benediksyon spirityel ki nou pe gannyen la konmela!Mat. 6:33.

18. Ki mannyer nou kapab montre ki nou pe prepare pour lavi eternel dan Paradi?

18 Dan Paradi, nou pou eksperyans en lazwa ki nou pa’n zanmen eksperyanse avan. Alor, annou montre ki kantite nou anvi vre lavi, par prepar nou la konmela menm. Annou devlop bann kalite Bondye e devoue pour pres sa mesaz Rwayonm parey nou’n ganny demande pour fer. Annou pran plezir pour pourswiv bann lobzektif spirityel. Nou annan konfyans total ki dan nouvo lemonn, Zeova pou fer tou sa ki i’n promet. Alor, annou viv konmsi nou deza laba!

^ par. 8 Proverb 10:22: “I benediksyon Zeova ki fer en dimoun ris e i pa azout okenn douler avek.”

^ par. 14 Vwar liv Young People Ask—Answers That Work, Volim 2 paz 311-318.

^ par. 16 Psonm 63:1-3: 1 O Bondye, ou mon Bondye, mon pe kontinyen rod ou. Mon swaf pour ou. Mon feb parski mon telman anvi ou dan en landrwa sek kot napa delo. 2 Alor, mon’n get ou dan sa landrwa sen e mon’n vwar ou lafors ek ou laglwar. 3 Parski ou lanmour fidel i meyer ki lavi, mon pou loue ou avek mon labous.”