Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  August 2015

Kontinyen espere!

Kontinyen espere!

“Menm si i tarde, kontinyen espere!”ABA. 2:3.

KANTIK: 128, 45

1, 2. Ki latitid bann serviter Zeova in toultan annan?

TOULTAN bann serviter Zeova in espere ki bann profesi i ganny akonplir. Par egzanp, Zeremi ti profetize ki Zida ti pou ganny detrir par bann Babilonnyen e sanmenm ki ti arive lannen 607 A.N.L. (Zer. 25:8-11) Izai ti ganny enspire pour predir ki Zeova ti pou fer son pep retourn dan zot pei par dir: “Ere tou bann ki kontinyen esper li.” (Iza. 30:18) Mika osi ti profetiz konsernan pep Bondye dan lepase e i ti demontre son determinasyon ler i ti dir: “Se Zeova ki mon pou kontinyen veye.” (Mik. 7:7) Pour plizyer syek, bann serviter Zeova ti osi esper lakonplisman bann profesi konsernan Mesi oubyen Kris.Lik 3:15; 1 Pyer 1:10-12. *

2 Ozordi osi bann serviter Zeova i kontinyen espere, parski lakonplisman bann profesi konsernan Mesi i ankor pe ganny akonplir. Byento Zeova pou met en lafen avek tou soufrans ki imen pe eksperyanse. I pou servi sa Rwayonm dirize par Kris pour detri bann move dimoun e delivre son pep dan sa move lemonn ki dan pouvwar Satan. (1 Zan 5:19) Alor, annou reste vizilan e konsyan ki sa lemonn pe vitman ariv ver son lafen.

3. Ki kestyon nou kapab demande si i fer plizyer lannen ki nou pe esper lafen arive?

 3 Konman bann serviter Zeova, nou enpasyan pour vwar lavolonte Bondye “ganny akonpli lo later parey dan lesyel.” (Mat. 6:10) Me si i fer plizyer lannen ki nou pe esper lafen, sa i kapab fer nou demande, ‘Eski nou ankor annan bann bon rezon pour kontinyen espere?’ Annou vwar.

AKOZ NOU BEZWEN KONTINYEN ESPERE?

4. Ki rezon prensipal nou annan pour kontinyen veye?

4 Labib i montre nou klerman ki kalite latitid nou devret annan konsernan destriksyon sa lemonn ki pros pour vini. Zezi ti dir son bann disip kontinyen “veye.” (Mat. 24:42; Lik 21:34-36) Zis lefet ki Zezi in demann nou pour kontinyen veye, sa dan li menm i en bon rezon pour fer li! Pour ed nou fer sa, lorganizasyon Zeova i en bon legzanp. Dan son bann piblikasyon in kontinyen ankouraz nou pour “esper sa zour, an fezan [nou] mye pour fer sa zour vin pli vit [oubyen “gard antet zour Zeova,” NW]” e fikse nou lespwar lo nouvo lemonn ki Bondye in promet.Lir 2 Pyer 3:11-13.

5. Akoz i vreman enportan pour veye dan nou letan?

5 Menm si bann Kretyen dan premye syek ti bezwen kontinyen espere, ozordi i pli enportan pour nou fer sa. Akoz? Parski sa siny ki Zezi ti donnen i montre ki depi 1914 i’n vin Lerwa dan Rwayonm Bondye e ki nou pe viv dan bann dernyen zour, setadir “konklizyon sa lemonn.” Par egzanp, zis parey Zezi ti’n profetize, kondisyon sa lemonn pe vin pli pir e sa bon nouvel Rwayonm pe ganny anonse partou lo later. (Mat. 24:3, NW, 7-14) Vi ki Zezi pa ti dir konbyen letan sa bann dernyen zour ti pou dire avan lafen i arive, sa i fer ki nou bezwen vizilan e eveye.

6. Akoz nou kapab ekspekte ki bann kondisyon dan lemonn pou vin pli pir anmezir ki lafen i aprose?

6 Nou kapab demande: Eski i posib ki “konklizyon sa lemonn” pe refer avek en letan a lavenir ler bann kondisyon dan lemonn pou vin pli pir? Labib i dir ki lemal pou ogmant en kantite “dan bann dernyen zour.” (2 Tim. 3:1, 13; Mat. 24:21; Rev. 12:12) Alor nou kapab ekspekte ki bann kondisyon lemonn pou kontinyen deteryore e vin pli pir ki i deza ete la konmela.

7. Ki Matye 24:37-39 i montre konsernan kondisyon sa lemonn pandan bann dernyen zour?

7 Me ki kantite ou ekspekte ki bann kondisyon sa lemonn i deteryore avan “gran ladetres”? (Rev. 7:14, NW) Par egzanp, eski ou ekspekte ki i pou annan lager dan tou pei, personn napa manze e ki dimoun i malad partou? Si sa ti arive, menm bann ki doute ti pou forse admet ki bann profesi Labib ti pe ganny akonplir. Par kont, Zezi ti dir ki laplipar dimoun “pa ti [pou] pran kont” son prezans me ki zot pou kontinyen viv zot lavi normal ziska ki i tro tar. (Lir Matye 24:37-39.) Alor, Labib i montre ki bann kondisyon lemonn dan bann dernyen zour pa pou vin telman ekstrenm kot tou dimoun pou forse krwar ki lafen i pros.Lik 17:20; 2 Pyer 3:3, 4.

8. Kwa ki evidan pour bann ki pe ekout lord Zezi pour kontinyen “veye”?

8 De lot kote, pour sa siny akonpli son bi, son lakonplisman ti pou bezwen  ase kler pour bann ki pe obei konsey Zezi pour kontinyen “veye.” (Mat. 24:27, 42) Sa in leka depi 1914. Depi sa letan, bann laspe sa siny pe ganny akonplir. I kler ki ozordi nou pe viv pandan “konklizyon sa lemonn,” setadir sa peryod letan ki anmenn ver lafen e ki osi enkli destriksyon sa move lemonn.

9. Ki rezon nou annan pour kontinyen esper lafen sa lemonn?

9 Alor, akoz bann Kretyen ozordi i devret kontinyen espere? Parski nou obei Zezi e nou rekonnet siny son prezans. Nou konnen ki lafen i pros, pa akoz nou krwar tou sa ki nou tande, me akoz nou konvenki ki tou bann profesi Labib pe ganny akonplir. Nou bezwen reste vizilan e pare pour lafen.

KI KANTITE LETAN?

10, 11. (a) Akoz Zezi ti dir son bann disip “kontinyen veye”? (b) Ki Zezi ti dir son bann disip fer si zot ti bezwen esper lafen pli lontan ki zot ti’n ekspekte? (Vwar portre lo paz 14.)

10 Bokou parmi nou in reste eveye spirityelman pour plizyer dizenn lannen. Alor, annou pa les tou sa letan ki nou’n espere afeblir nou determinasyon pour kontinyen espere. Nou bezwen pare ler Zezi i vini pour egzekit zizman lo lemonn Satan. Rapel ki Zezi ti ankouraz son bann disip: “Fer atansyon, veye, parski zot pa konnen kan sa ler pou arive. I pou parey en zonm ki pe al fer en vwayaz. Kan i kit son lakour i met son bann serviter ansarz; i donn sakenn son louvraz e i konmann gardyen pour veye. Veye alor, akoz zot pa konnen kan zot met pou arive, si i pou vin dan lasware, minwi, kok-sante oubyen soley-leve. I kapab vini san ki zot pe ekspekte, e war zot pe dormi. Sa ki mon dir avek zot, mon dir avek tou dimoun: [“Kontinyen,” NW] veye.”Mark 13:33-37.

11 Ler bann disip Zezi ti rekonnet ki prezans Zezi ti konmans an 1914, zot ti met zot pare e ekspekte lafen nenport ler. Zot ti fer sa par pres plis lo Rwayonm Bondye. Zezi ti montre ki i kapab vin pli tar, setadir “kok-sante oubyen soley-leve.” Si sa ti arive, ki bann disip Zezi ti pou bezwen fer? I ti dir: ‘Kontinyen veye.’ Alor menm si nou santi ki nou pe esper depi en pake letan, sa pa vedir ki lafen i lwen oubyen ki i pa pou vin dan nou letan.

12. Ki Abakouk ti demann Zeova e ki mannyer Zeova ti reponn?

12 Annou vwar legzanp profet Abakouk ki ti ganny sa misyon pour predir destriksyon Zerizalenm. Lezot profet avan li ti’n osi pres sa mesaz pour plizyer lannen. Kondisyon ti’n ariv ziska en pwen kot ‘bann move ti antour bann ki drwat e i ti napa lazistis.’ Alor i pa etonan ki Abakouk ti demande: “O Zeova, konbyen letan mon pou bezwen kriy osekour?” Dan plas reponn sa kestyon direkteman, Zeova ti asir son profet fidel ki sa destriksyon ki ti’n ganny predir “pa [ti] pou an retar.” Bondye ti dir Abakouk “kontinyen espere.”Lir Abakouk 1:1-4; 2:3. *

13. Ki latitid Abakouk ti’n kapab annan e akoz i pa ti pou saz pour mazin koumsa?

 13 Meton Abakouk ti’n dekouraze e dir dan li menm: ‘I fer en pake lannen depi ler mon tande ki Zerizalenm pou ganny detrir. Me si i pa vin konmela? I pa paret fer sans pour kontinyen profetize konmsi sa lavil pou ganny detrir en sel kou. Mon ava les lezot fer sa.’ Si Abakouk ti’n mazin koumsa i ti pou’n perdi laprouvasyon Zeova e petet menm son lavi kan Zerizalenm ti ganny detrir par bann Babilonnyen.

14. Akoz nou kapab asire ki ler nou kontinyen espere, nou pa pou dezapwente?

14 Dan nouvo lemonn, nou pou annan rezon reflesir lo lefet ki tou bann profesi konsernan lafen sa move lemonn ti’n vreman arive. Ler nou pou medit lo sa ki’n arive sa pou ranforsi nou konfyans dan Zeova e dan son bann lezot promes ki pa pou ankor ganny akonplir. (Lir Zozye 23:14. *) Nou pou apresye ki Bondye ki’n ‘fikse ler ek moman par son prop desizyon’ ti ankouraz nou pour gard antet ki ‘lafen tou keksoz ti pros.’Akt 1:7; 1 Pyer 4:7.

KONTINYEN PRESE ANMEZIR NOU ESPERE

Eski ou devoue pour pres sa bon nouvel? (Vwar paragraf 15)

15, 16. Akoz fer plis dan predikasyon i sa pli bon fason pour reazir dan sa letan ki nou pe viv?

15 Nou ekspekte ki lorganizasyon Zeova pou kontinyen rapel nou ki nou bezwen servi Zeova e gard antet ki lafen i pros. Sa bann rapel pa zis gard nou okipe dan servis Bondye me i ed nou kontinyen gard antet ki siny prezans Kris pe ganny akonplir. Ki sa pli bon fason pour reazir dan sa letan ki nou pe viv? Nou devret kontinyen rod plito Rwayonm Bondye ek son lazistis par pres sa bon nouvel avek devouman.Mat. 6:33; Mark 13:10.

16 En ser ti dir: “Ler nou anons sa bon nouvel konsernan Rwayonm Bondye nou . . . kapab ede pour sov lavi bann dimoun dan sa katastrof ki pe vini.” Sa ser i konnen ki savedir ganny sove, parski li ek son msye ti sirviv enn parmi bann dezas pli terib ki’n deza arive lo lanmer kot bato Wilhelm Gustloff ti koule an 1945. Menm pandan sa sityasyon danzere en dimoun ti kapab annan en move pwennvi lo kwa ki vreman enportan. Sa ser i rapel ki en madanm ti pe kontinyen kriye: “Mon bann valiz! Mon bann valiz! Mon bann bizou! Tou mon  bizou i anba dan kabin. Mon’n perdi tou keksoz!” De lot kote, serten pasaze ki ti pare pour ede ti riske zot lavi pour travay dir pour sov bann dimoun ki ti’n tonm dan sa lanmer ki ti byen fre. Parey sa bann pasaze ki pa ti egois, nou fer tou sa ki nou kapab pour ed dimoun. Nou gard antet ki i irzan pour fer sa travay predikasyon e ed lezot pour sirviv sa katastrof ki pe vini avan i tro tar.

Eski ou fer bann desizyon saz pour ki ou pa ganny distrer e nepli vwar sa travay konman irzan? (Vwar paragraf 17)

17. Ki rezon nou annan pour krwar ki lafen i kapab vin nenport ler?

17 Bann levennman dan lemonn i montre nou klerman ki bann profesi Labib pe ganny akonplir e ki lafen sa move lemonn i lanmenm anba nou lipye. Alor, nou pa devret mazinen ki i pou pran en ta letan avan ki kondisyon sa lemonn i ariv a en pwen kot “dis korn” “sa bebet” dan Revelasyon 17:16 i atak Gran Babilonn, setadir tou fo larelizyon. Annou gard antet ki Bondye pou “plas dan zot leker” sa lanvi pour fer sa e sa i kapab ariv deswit e nenport ler. (Rev. 17:17) Lafen sa move lemonn i pros. Alor sa i en bon rezon akoz nou devret ekout lavertisman Zezi ki dir: “Fer byen atansyon zot menm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez.” (Lik 21:34, 35; Rev. 16:15) Annou reste vizilan e reste okipe dan servis Zeova e annan konfyans ki i pou “azir an faver bann ki kontinyen esper li.”Iza. 64:4.

18. Ki kestyon nou pou diskit lo la dan lot lartik?

18 Anmezir ki nou esper lafen sa move lemonn, annou ekout parol enspire ki Zid ti ekrir: “Byenneme, kontinyen fer progre dan zot lafwa ki tre sen, e priye par Sent-Espri. Reste dan lanmour Bondye, an atandan ki nou Senyer Zezi-Kri, dan son labonte, i donn zot lavi eternel.” (Zid 20, 21) Me ki mannyer nou kapab montre ki nou pe kontinyen esper sa nouvo lemonn ki Bondye in promet e ki nou enpasyan pour vwar? Nou pou diskit lo la dan lot lartik.

^ par. 1 Pour vwar en lalis konsernan serten profesi lo Mesi e zot lakonplisman, vwar liv Ki Labib i vreman dir? lo paz 200.

^ par. 12 Abakouk 1:1-4: 1 En mesaz ki profet Abakouk ti gannyen dan en vizyon: 2 O Zeova, konbyen letan mon pou bezwen kriy osekour me ou pa tann mwan? Konbyen letan mon pou demann ou led pour fer fas avek vyolans me ou pa sov mwan? 3 Akoz ou fer mwan vwar sa ki mal? Akoz ou toler labi? Akoz destriksyon ek vyolans i la devan mwan? Akoz i annan en kantite dispit ek konfli? 4 Alor lalwa i nepli marse e lazistis pa zanmen ganny fer. Parski bann move in antour bann ki drwat, se pour sa ki i napa lazistis.” 2:3: “Parski sa vizyon i pour en letan fikse, i pe vitman al ver son lafen e i pa pou en mansonz. Menm si i tarde, kontinyen espere! Parski sirman i pou arive. I pa pou an retar!”

^ par. 14 Zozye 23:14: “Ekoute aprezan! Mon pros pour mor e ou konn byen ki avek tou ou leker e avek tou ou nanm ki napa en parol parmi tou bann bon promes ki Zeova ou Bondye in dir zot ki pa’n reisi. Tousala in vin vre pour zot. Napa en parol ki pa’n vin vre.”