Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  June 2015

I ti kontan dimoun

I ti kontan dimoun

“Mon ti vreman kontan bann imen.”PROV. 8:31.

1, 2. Ki mannyer Zezi in montre ki i vreman kontan bann imen?

GARSON premye ne Bondye i sa pli gran legzanp lasazes Zeova. Zezi ti ganny idantifye konman lasazes li menm, “en zouvriye abil” pour son Papa. Zis mazin sa lazwa ek satisfaksyon ki Zezi ti gannyen anmezir ki son Papa “ti prepar lesyel” e “etabli fondasyon later.” Me parmi tou sa bann keksoz ki son Papa ti kree, Zezi “ti vreman kontan bann imen.” (Prov. 8:22-31) Wi, Zezi i vreman kontan oubyen annan lafeksyon pour bann imen depi avan ki i vin lo later.

2 Pli tar, pour montre ki i fidel e kontan son Papa ek “bann imen,” Garson premye ne Bondye ti volonterman “renons tou sa ki i posede” e vin parey zonm. I ti fer sa pour donn son lavi konman “pri pour liberasyon bokou dimoun.” (Fili. 2:5-8; Mat. 20:28) Pa i vreman kontan bann imen! Kan Zezi ti lo later, Bondye ti donn li pouvwar pour fer mirak e sa ti montre ki kantite i kontan dimoun. Alor Zezi ti demontre bann keksoz merveye ki byento pou arive lo later antye.

3. Ki nou pou vwar dan sa lartik?

 3 Ler Zezi ti vin lo later, sa ti osi permet li pour “anons Bonn Nouvel konsernan Rwayonm Bondye.” (Lik 4:43) Zezi ti konnen ki sa Rwayonm ti pou sanktifye non son Papa e rezourd tou bann problenm limanite dan en fason permanan. Anmezir ki Zezi ti prese, i ti fer bokou mirak. Sa bann mirak ti montre ki i ti vreman enterese avek tou dimoun. Akoz sa i enportan pour nou? Parski sa ki nou aprann pou donn nou konfyans ek lespwar pour lavenir. Annou vwar kat mirak ki Zezi ti fer.

‘PISANS TI AVEK ZEZI POUR FER SA BANN GERIZON’

4. Dekrir sa ki ti arive kan Zezi ti rankontre en lepre.

4 Pandan son minister, Zezi ti al Galile. Dan enn sa bann lavil, i ti zwenn en zonm ki ti ganny en maladi terib ki apel lalep. (Mark 1:39, 40) Sa zonm ti sitan malad, ki Lik ki ti en dokter ti dir ki i ti “kouver avek lalep.” (Lik 5:12) “Kan i ti war Zezi, i ti tonm lafas ater, e i ti sipliy li, ‘Senyer, si ou oule, ou kapab fer mwan prop.’” Sa zonm ti konnen ki Zezi ti annan sa pouvwar pour geri li, me sa ki i ti bezwen konnen se eski Zezi ti annan sa dezir pour fer li? Ki mannyer Zezi ti pou reakte? Ki Zezi ti pe mazinen kan i ti get sa zonm ki tre probab ti’n defigire? Eski Zezi ti pou parey bann Farizyen ki ti napa konpasyon pour bann dimoun ki ti pe soufer avek sa maladi? Ki ou ti pou fer?

5. Kwa ki ti pous Zezi pour dir “mon oule” kan i ti pe geri en lepre?

5 I paret ki sa zonm ki ti’n ganny lalep pa ti kriye, “enpir, enpir!” parey Lalwa Moiz ti demande. Zezi pa ti fer okenn remark lo la. O kontrer, i ti pli enterese avek byennet sa zonm e i ti anvi ed li. (Lev. 13:43-46) Nou pa konn egzakteman kwa ki ti pe pase dan lespri Zezi, me nou konnen kwa ki ti dan son leker. Avek konpasyon Zezi ti fer en keksoz enkrwayab. I ti anvoy son lanmen, tous sa lepre e avek ladouser ek konfyans Zezi ti dir: “Mon oule, vin prop.” Apre “son lalep ti kit li.” (Lik 5:13) Anfet, Zeova ti donn Zezi pwisans pa zis pour demontre ki i kapab fer sa mirak me osi pour demontre son lanmour pour bann dimoun.Lik 5:17.

6. Kwa ki remarkab konsernan bann mirak ki Zezi ti fer e ki zot montre?

6 Pwisans Bondye ti permet Zezi Kri pour fer diferan kalite mirak. I pa ti geri zis bann ki ti ganny lalep, me osi tou sort kalite maladi. Labib i dir: “Bann dimoun ti etonnen ler zot ti war sa bann kozpa koze, bann dimoun bwete marse, bann envalid vin byen, e bann aveg war kler.” (Mat. 15:31) Pour Zezi geri en dimoun, i pa ti bezwen ki en lot dimoun i donn son lorgann. I ti geri sanmenm sa lorgann oubyen parti lekor ki ti’n ganny andomaze. I ti osi geri bann dimoun deswit, par ler menm kan sa dimoun ti lwen avek li. (Zan 4:46-54) Ki sa bann legzanp i montre? I montre ki Zezi ki’n vin Lerwa dan lesyel i napa zis sa pouvwar me osi sa dezir pour geri pour touzour. Ler nou aprann lo fason ki Zezi ti tret bann dimoun, sa i donn nou konfyans ki dan nouvo lemonn sa profesi Labib pou ganny akonplir:  “I pou pran lapenn pour bann dernyen dimoun ek bann ki pov.” (Ps. 72:13) Sa letan, Zezi pou geri tou bann ki soufer akoz i vreman anvi.

“LEVE, PRAN OU NAT E MARSE”

7, 8. Eksplike akoz Zezi ti al kot en zonm ki ti paralize kot basen Betzata.

7 Detrwa mwan apre ki Zezi ti’n geri sa lepre Galile, i ti kit laba e al Zide kot i ti kontinyen pres sa bon nouvel konsernan Rwayonm Bondye. I bezwen ki plizyer milye dimoun ti tann mesaz Zezi e zot ti ganny touse par sa lanmour ki i ti annan pour zot. I kler ki Zezi ti anvi anons bon nouvel avek bann pov, anons laliberte avek bann ki dan prizon e pans sa bann ki annan leker brize.Iza. 61:1, 2; Lik 4:18-21.

8 Mwan Nizan, Zezi ti al Zerizalenm pour selebre Lapak. Lavil ti okipe anmezir ki dimoun ti pe vin selebre sa lafet spesyal. Lo kote nor tanp i ti annan en basen ki ti apel Betzata e laba Zezi ti zwenn en zonm malad.

9, 10. (a) Akoz bann dimoun ti al kot basen Betzata? (b) Ki Zezi ti fer kot sa basen e ki sa i ansenny nou? (Vwar portre lo paz 8.)

9 I ti annan en kantite dimoun malad ki ti al Betzata. Akoz? Parski zot ti panse ki zot ti pou kapab ganny geri dan en fason mirakile si zot ti al dan sa basen kan delo ti bouze. Zis mazinen ki mannyer sa bann dimoun ki ti la ti pe santi. San dout zot ti dezespere, enkyet e san okenn lespwar. Zezi ti parfe e sirman i pa ti bezwen ganny geri, alor akoz i ti laba? Son lanmour pour bann dimoun ti fer li al laba e laba i ti zwenn en zonm ki ti malad pli lontan ki Zezi ti’n viv lo later.Lir Zan 5:5-9.

10 Zezi ti demann sa zonm si i ti anvi byen. Mazin sagrinasyon sa zonm ler i ti dir Zezi ki i ti anvi ganny geri me i ti napa personn pour met li dan basen. Zezi ti demann sa zonm pour fer en keksoz ki enposib. I ti dir li anmas son nat e marse. Alor, sa zonm ti anmas son nat e konmans marse. Sa mirak ti en avangou sa ki Zezi pou fer dan nouvo lemonn. Sa i osi montre ki Zezi i vreman kontan bann dimoun. I ti rod bann dimoun ki ti bezwen led. Legzanp Zezi i devret ankouraz nou pour kontinyen rod bann dimoun dan nou teritwar ki dan depresyon akoz bann move keksoz ki pe arive dan sa lemonn.

“LEKEL KI’N TOUS MON LENZ?”

11. Ki mannyer Mark 5:25-34 i montre ki Zezi i annan konpasyon pour bann ki malad?

11 Lir Mark 5:25-34. I ti annan en madanm ki ti pe soufer avek en maladi anbarasan pour 12 an. Son maladi ti afekte li dan tou laspe son lavi enkli son ladorasyon. Menm si “i ti’n soufer bokou e ti’n depans tou sa ki i ti posede avek bokou dokter,” keksoz ti’n vin pli pir. Me en zour, sa madanm ti annan en lot plan pour li ganny geri. I ti fer en fason pour li al dan bor en zonm ki ti apel Zezi. I ti vin parmi en lafoul e tous lenz Zezi. (Lev. 15:19, 25) Zezi ti realize ki en lafors ti’n sorti dan li, alor i ti demande lekel ki’n tous li. An “tranblan avek lafreyer” sa madanm “ti tonm azenou devan li e ti dir li tou laverite.” Kan Zezi ti realize ki son Papa Zeova ki  ti’n geri sa madanm, Zezi ti dir li avek ladouser: “Ma-fiy ou lafwa in sov ou, al an-pe, e ganny delivre avek ou maladi.”

Kan Zezi ti fer bann mirak i ti montre ki i vreman enterese avek nou e ki i pran nou problenm aker (Vwar paragraf 11, 12)

12. (a) Ki mannyer ou ti pou dekrir Zezi baze lo sa ki nou’n aprann lo li? (b) Ki legzanp Zezi in kite pour nou?

12 I tousan pour vwar ki Zezi ti vreman demontre lanmour pour bann dimoun sirtou bann ki ti malad. Satan i anvi fer nou krwar ki Zeova pa kontan nou oubyen ki nou pa vo nanryen. Kan i ti fer sa bann mirak i ti montre ki i vreman enterese avek nou e ki i pran nou problenm aker. Pa nou kontan ki nou annan en Lerwa ek en Gran Pret ki senpatiz avek nou! (Ebr. 4:15) Petet i difisil pour nou konpran santiman bann ki soufer avek en maladi kronik, sirtou si nou pa malad. Me pa oubliye ki Zezi ti senpatiz avek bann malad menm si i pa ti zanmen malad. Nou osi annou fer tou sa ki nou kapab pour demontre lanmour parey li anver bann ki malad.1 Pyer 3:8.

“ZEZI TI PLERE”

13. Ki rezireksyon Lazar i montre nou konsernan personnalite Zezi?

13 Soufrans bann dimoun ti tous leker Zezi. Kan Zezi ti vwar lezot pe plere akoz son zanmi Lazar ti’n mor, “son leker ti touse e i ti emosyonnen.” I ti santi koumsa menm si i ti konnen ki byento i ti pou resisit Lazar. (Lir Zan 11:33-36.) Zezi pa ti kanmi pour demontre son lemosyon. Bann ki ti la ti kapab vwar ki kantite Zezi ti kontan Lazar ek son fanmir.  Pa Zezi ti demontre konpasyon kan i ti servi pwisans ki Bondye ti’n donn li pour resisit son zanmi!Zan 11:43, 44.

14, 15. (a) Kwa ki montre ki Zeova i vreman anvi retir soufrans? (b) Kwa ki enteresan avek sa mo Grek ki’n ganny tradwir konman “tonbo”?

14 Labib i dir ki Zezi i egzakteman parey son Papa Zeova. (Ebr. 1:3) Alor, par son bann mirak, Zezi ti demontre ki li ek son Papa zot annan sa dezir pour retir douler ki maladi ek lanmor i anmennen. Byento Zeova ek Zezi pou resisit plis dimoun ankor. Zezi ti dir: “Sa ler pe arive kan tou bann mor ki dan tonbo pou . . . sorti.”Zan 5:28, 29.

15 Sa mo Grek ki’n ganny tradwir konman “tonbo” i sorti dan sa verb Grek ki vedir ‘pour fer rapel.’ Sa i apropriye parski Bondye Tou Pwisan, sa Enn ki’n kree sa gran liniver i kapab mazin tou detay lo sa dimoun ki nou ti kontan ki’n mor enkli son personnalite. (Iza. 40:26) I pa zis ki i kapab mazinen, me li ek son Garson zot anvi fer li. Rezireksyon Lazar ek lezot rezireksyon dan Labib i montre sa ki pou arive dan nouvo lemonn.

SA KI NOU APRANN AVEK BANN MIRAK ZEZI

16. Ki privilez bokou serviter fidel pou annan?

16 Si nou reste fidel, petet nou pou kapab vwar enn parmi bann pli gran mirak dan listwar, sa i pou sirviv gran ladetres. Deswit apre lager Armagedon, i pou annan plis mirak ankor kot dimoun pou reganny en bon lasante. (Iza. 33:24; 35:5, 6; Rev. 21:4) Mazinen ou pe vwar dimoun zet zot linet, baton, bekiy, wiltyer ek hearing aid. Zeova i konnen ki tou bann ki sirviv Armagedon pou bezwen for e an bonn sante parski zot pou annan bokou travay pour fer. Zot sa bann ki pou fer nou zoli later vin en paradi.Ps. 115:16.

17, 18. (a) Akoz Zezi ti fer bann mirak? (b) Akoz ou bezwen fer tou sa ki ou kapab pour viv dan nouvo lemonn Bondye?

17 Sa “gran lafoul” i ganny ankouraze ler zot lir lo lafason ki Zezi ti geri bann dimoun. (Rev. 7:9) Sa bann mirak i fortifye nou lespwar pour nou ganny geri avek tou kalite maladi a lavenir. I osi montre ki kantite Garson premye ne Bondye i kontan limanite. (Zan 10:11; 15:12, 13) Konpasyon Zezi i demontre ki kantite Zeova i vreman kontan sak son bann serviter.Zan 5:19.

18 Sa lemonn ozordi i ranpli avek douler, soufrans ek lanmor. (Rom. 8:22) Nou bezwen nouvo lemonn Bondye kot tou dimoun pou annan en lasante parfe parey Bondye in promet. Malaki 4:2 i donn nou rezon pour annan konfyans ki bann ki pou ganny geri pou “sot sote parey bann pti bef angrese,” eksite e kontan pour ganny libere avek pese. Nou espere ki nou rekonesans pour Zeova ek nou lafwa dan son bann promes i motiv nou pour fer tou sa ki nou kapab pour kalifye pour antre dan sa nouvo lemonn. Pa i ankourazan pour konnen ki sa bann mirak ki Zezi ti fer, ti en avangou sa soulazman dirab ki limanite pou gannyen pandan son renny!