Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  June 2015

Viv an armoni avek lapriyer model—Dezyenm parti

Viv an armoni avek lapriyer model—Dezyenm parti

“Parski Bondye zot Papa i konnen sa ki zot bezwen.”MAT. 6:8.

1-3. Akoz en ser ti asire ki Zeova i konn sa ki nou bezwen?

LANA, en pionye ordiner, pa pou zanmen oubliye ki ti arive ler i ti al Lalmanny an 2012. I santi ki son de lapriyer spesifik ti ganny reponn. I ti fer sa premye lapriyer ler i ti dan tren pe al erport. I ti demann Zeova pour donn li en loportinite pour rann temwannyaz. Ler i ti ariv erport i ti aprann ki son avyon ti’n ganny retar, i ti pou al nek son landmen, la i ti fer son dezyenm lapriyer. Lana ti demann Zeova led akoz i ti’n servi preski tou son larzan e i ti napa okenn landrwa reste sa zour swar.

2 Dek ki Lana ti fini son dezyenm lapriyer i ti tann en dimoun dir, “Alo Lana, ki ou pe fer la?” I ti en zenn onm ki ti’n al lekol avek li. I ti avek son manman ek son granmanman ki ti’n vin dir li orevwar akoz i ti pe al Sidafrik. Ler Lana ti dir zot ki ti’n arive, Elke, manman son zanmi, ti envit li pour vin reste kot zot. Elke ek son manman ti demontre lospitalite anver Lana e zot ti demann li en ta kestyon konsernan son krwayans e son travay konman en pionye.

 3 Son landmen bomaten, apre en bon gadyak, Lana ti reponn plis kestyon lo Labib. Lana ti demann zot zot kontak pour ki en dimoun ti kapab kontinyen reponn zot bann kestyon. Lana ti retourn kot li sen e sof e i ankor pe fer servis pionye. I santi ki “sa Enn ki ekout lapriyer” ti annan en rol pour zwe dan lafason ki keksoz ti deroule.Ps. 65:2.

4. Ki bezwen nou pou koz lo la?

4 I fasil pour nou priye ler nou rankontre en problenm ki nou pa ti pe ekspekte e Zeova i kontan pour ekout lapriyer son bann fidel. (Ps. 34:15; Prov. 15:8) Me si nou medit lo lapriyer model nou pou trouve ki i annan lezot bezwen pli enportan ki nou kapab oubliye. Par egzanp, annou vwar ki mannyer nou bann bezwen spirityel i ganny revele dan sa trwa dernyen demann dan sa lapriyer model. Eski i annan plis ki nou kapab fer pour viv an armoni avek sa katriyenm demann pour ganny nou dipen neseser sak zour?Lir Matye 6:11-13. *

“DONN NOU SAK ZOUR NOU DIPEN NESESER”

5, 6. Akoz Zezi ti ansenny nou pour demann pour ganny nou dipen sak zour menm si nou annan ase manze?

5 Zezi ti ansenny nou pour demann pour “nou” dipen sak zour, pa “mon” dipen sak zour. Victor, en sirveyan rezyonal Lafrik i eksplike: “Souvandfwa mon remersye Zeova ki mwan ek mon madanm nou pa bezwen tro trakas lo ki mannyer nou pou ganny en lot repa e nou pa bezwen trakas lo lekel ki pou pey lakaz. Bann frer i pran swen avek nou tou le zour. Me mon priye ki bann ki pe ed nou i kapab fer fas avek bann presyon ekonomik ki zot rankontre.”

6 Si nou annan ase manze pour plizyer zour, nou kapab mazin bann frer ek ser ki reste dan lapovrete ouswa ki’n ganny afekte par bann dezas natirel. Nou kapab priy pour zot e osi azir an armoni avek nou lapriyer. Par egzanp, nou kapab partaz sa ki nou annan avek nou bann frer ek ser ki dan bezwen. Nou osi kapab kontribye regilyerman pour sa travay mondyal. Nou konnen ki sa bann kontribisyon i ed nou bann frer ek ser ki dan bezwen.1 Zan 3:17.

7. Ki legzanp Zezi ti donnen pour montre ki nou pa devret “trakas pour demen”?

7 Ler Zezi ti refer avek nou dipen sak zour i tre probab ki i ti pe mazin nou bann bezwen de baz. Zezi ti fer resorti ki Bondye i pran swen avek bann fler e apre i ti dir: “Pa i plis ki sir ki Bondye i a donn zot lenz. Me zot ki kalite lafwa zot annan! Alor pa bezwen pran traka e demann zot lekor . . . ‘Ki nou pou mete?’” Pour konklir, i ti repet sa konsey enportan: “Pa trakas pour demen.” (Mat. 6:30-34) Sa i montre nou ki nou devret kontant nou avek bann bezwen neseser sak zour dan plas tay deryer keksoz materyel. Sa bann bezwen i kapab enkli en landrwa reste ki apropriye, en plas travay pour nou kapab pran swen avek nou fanmir e lasazes pour fer bann bon desizyon konsernan nou lasante. Par kont, si nou ti priy zis pour nou bann bezwen fizik sa ti pou montre ki nou pa ekilibre. Nou annan bann bezwen spirityel ki bokou pli enportan.

8. Ki parol Zezi konsernan nou dipen sak zour i devret fer nou rapel? (Vwar portre lo paz 25.)

8 Parol Zezi konsernan nou dipen sak zour i devret fer nou rapel ki nou bezwen  nouritir spirityel. Nou Met ti dir: “Zonm pa viv zis lo dipen tousel me lo tou parol ki sorti dan labous Bondye.” (Mat. 4:4) Alor nou devret kontinyen priye ki Zeova i kontinyen donn nou nouritir spirityel kan i ler.

“PARDONN NOU NOU DET”

9. Dan ki sans nou pese i en “det”?

9 Akoz Zezi ti servi sa mo “det” tandis ki pli tar i ti servi sa mo “pese”? (Mat. 6:12; Lik 11:4) Plis ki 60 an pase, sa magazin ti eksplike: “En pese kont lalwa Bondye i fer nou annan en det anver li. . . . Vi ki nou fer pese Bondye ti kapab demann e pran nou lavi. . . . I ti kapab tir son lape lo nou e met en lafen avek son relasyon avek nou. . . . Nou drwa li nou lanmour ki nou eksprimen atraver nou lobeisans e ler nou fer pese nou pa arive pey nou det lanmour anver li, parski ler nou komet pese nou pa demontre lanmour anver Bondye.”1 Zan 5:3.

10. Akoz Zeova i kapab pardonn nou pese e ki mannyer nou devret santi konsernan sa?

10 Pa nou vreman rekonesan ki Zeova in donn Zezi konman en ranson pour nou kapab ganny pardonnen nou bann pese! Menm si ranson ti ganny peye apepre 2,000 an pase, nou devret apresye li konmsi i ti en kado ki nou fek gannyen ozordi. “Sa pri ranson” pour nou lavi “i sitan presye” ki napa nanryen ki okenn imen enparfe ti kapab fer pour pey sa pri. (Lir Psonm 49:7-9; * 1 Pyer 1:18, 19.) Byensir, nou pa devret zanmen aret remersye Zeova pour sa zoli kado. Sa lekspresyon “nou pese” e non pa “mon pese,” i devret fer nou rapel ki nou tou nou bezwen sa provizyon. I kler alor ki Zeova i anvi ki nou konsernen pa zis avek byennet nou prop spirityalite me osi avek sa ki pour lezot, enkli bann ki’n fer pese kont nou. Laplipar ditan, i pa bann pese grav e sa i donn nou en loportinite pour montre ki nou vreman kontan nou bann frer ek ser e ki nou pare pour pardonnen parey Bondye in pardonn nou.Kol. 3:13.

Si ou anvi Bondye i pardonn ou, ou bezwen pardonn lezot (Vwar paragraf 11)

11. Akoz i enportan pour pare pour pardonnen?

 11 Vi ki nou enparfe malerezman par ler nou gard rankin avek lezot. (Lev. 19:18) Si nou koz lo sa ki’n arive, lezot i kapab pran nou kote e sa i kapab kree divizyon dan kongregasyon. Si nou les sa sityasyon kontinyen i ti pou demontre ki nou mank lapresyasyon pour mizerikord Bondye ek ranson. Ler nou pa pardonn lezot, Zeova pa kapab pardonn nou. (Mat. 18:35) Zezi ti elabor lo sa size deswit apre ki i ti donn sa lapriyer model. (Lir Matye 6:14, 15.) Finalman, pour benefisye avek pardon Bondye nou bezwen fer zefor pour evite pratik bann pese grav. Nou lanvi pour evite pratik pese i pous nou pour fer sa demann ki nou pou egzaminen aprezan.1 Zan 3:4, 6.

“PA PERMET KI NOU GANNY TANTE”

12, 13. (a) Ki ti arive avek Zezi pa bokou letan apre ki i ti batize? (b) Akoz nou pa devret blanm lezot si nou ganny tante? (c) Ki Zezi ti montre lefet ki i ti reste fidel ziska son lanmor?

12 Ler nou mazin sa ki ti arive avek Zezi pa bokou letan apre ki i ti batize, sa i ed nou pour konpran akoz nou bezwen demande: “Pa permet ki nou ganny tante.” Lespri sen Bondye ti anmenn Zezi dan dezer. Pour ki rezon? “Pour li ganny tante par dyab.” (Mat. 4:1; 6:13) Eski sa i devret sirprann nou? Pa si nou konpran akoz Bondye ti anvoy son Garson lo later. I ti ganny anvoye pour reponn sa kestyon ki ti ganny souleve ler Adan ek Ev ti rezet souvrennte Bondye. I ti bezwen les letan pase pour bann kestyon ganny reponn. Par egzanp, eski i ti annan en problenm avek lafason ki Bondye ti’n kree bann imen? Eski i ti posib pour en imen enparfe reste fidel avek Zeova ler i ti ganny tante par “sa enn ki move”? Eski i ti pou pli bon pour bann imen si zot ti diriz zot lekor parey Satan ti sizere? (Zen. 3:4, 5) I ti pou demann letan pour reponn sa bann kestyon e sa ti pou montre tou dimoun ensi ki bann lanz ki Zeova i egzers son souvrennte dan sa pli bon fason.

13 Zeova i sen, alor i pa zanmen esey tant personn pour fer sa ki mal. O kontrer, se Dyab ki “tant” dimoun. (Mat. 4:3, NW) Dyab i kapab kree bann sityasyon pour tant nou. Me i depan lo sakenn de nou ki swa nou les nou ganny tante oubyen non. (Lir Zak 1:13-15.) Zezi li, i ti rezet sak tantasyon deswit par sit en verse apropriye dan Parol Bondye. Sa ti fer ki Zezi ti siport drwa Bondye pour dirize. Me Satan pa ti aret lanmenm. I ti esper “ziska en pli bon lokazyon.” (Lik 4:13) Zezi ti kontinyen reziste tou zefor Satan pour fer li kas son lentegrite. Zezi ti toultan obei Bondye konman son Dirizan. I ti montre ki en imen parfe i kapab fidel anver Zeova menm dan bann sityasyon vreman difisil. Me Satan i osi esey tant bann disip Zezi, enkli ou, pour dezobei Zeova.

14. Ki nou bezwen fer pour ki nou pa ganny tante?

14 Bann kestyon konsernan drwa Zeova pour dirize pa ankor ganny reponn, alor Zeova i permet Dyab pour servi son lemonn pour tant nou. Bondye pa tant nou. O kontrer, i annan konfyans dan nou e i anvi ed nou. Zeova i respekte nou liberte pour swazir, alor i pa otomatikman anpes nou ganny tante. Nou bezwen fer de keksoz, reste eveye spirityelman e kontinyen priye. Ki mannyer Zeova i reponn nou lapriyer?

Gard ou spirityalite ek devouman dan predikasyon (Vwar paragraf 15)

15, 16. (a) Ki serten tantasyon ki nou bezwen reziste? (b) Lekel ki responsab si en dimoun i tonm dan tantasyon?

15 Zeova i donn nou son lespri sen ki kapab donn nou lafors e ed nou pour reziste tantasyon. Bondye i osi averti nou  atraver son Parol ek kongregasyon konsernan bann sityasyon ki nou bezwen evite, tel parey depans tro bokou letan, larzan ek lenerzi lo bann keksoz materyel ki pa neseser. Espen ek Janne i viv dan en pei Lerop ki byen ris. Pour plizyer lannen zot ti pe fer servis pionye ordiner dan en rezyon dan zot pei kot i annan en pli gran bezwen. Ler zot premye zanfan ti ne zot ti bezwen aret fer pionye e la aprezan zot annan en lot zanfan. Espen i dir: “Nou priy Zeova souvan pour nou pa ganny tante la ki nou nepli kapab pas menm kantite letan dan bann aktivite teokratik parey avan. Nou demann Zeova pour ed nou gard nou spirityalite ek devouman dan predikasyon.”

16 En lot tantasyon ki’n vin pli popiler dan nou letan se pornografi. Si nou ganny tante pour get pornografi, nou pa kapab blanm Satan. Akoz? Parski Satan ek son lemonn pa kapab fors nou pour fer okenn keksoz ki nou pa anvi. Serten in ganny tante pour get pornografi akoz zot in les zot lespri mazin sa ki mal. Me nou kapab reziste, zis parey plizyer milye nou bann frer ek ser in fer.1 Kor. 10:12, 13.

“DELIVRE NOU KONT SA ENN KI MOVE”

17. (a) Ki mannyer nou kapab viv an armoni avek nou demann pour ganny delivre kont sa enn ki move? (b) Ki soulazman nou pou gannyen byento?

17 Pour viv an armoni avek sa demann “delivre nou kont sa enn ki move,” nou bezwen “pa fer parti lemonn” Satan. Nou bezwen “pa . . . kontan lemonn [Satan] ni sa bann keksoz ki dan lemonn.” (Zan 15:19; 1 Zan 2:15-17) Nou pou toultan bezwen lalit pour reisi fer sa. Pa i pou en soulazman ler Zeova i reponn sa demann par retir Satan e detri son move lemonn! Par kont, nou bezwen rapel ki ler Satan ti ganny zete lo later, i ti konnen ki i reste li ankor zis en pti pe letan. Akoz i annan en gran lakoler, i pe fer tou sa ki i kapab pour fer nou kas nou lentegrite. Alor nou bezwen kontinyen priye pour nou ganny delivre kont li.Rev. 12:12, 17.

18. Ki nou bezwen kontinyen fer pour ki nou sirviv ler lemonn Satan i ganny detrir?

18 Eski ou ti a kontan viv dan en lemonn kot Satan i nepli la? Si wi, kontinyen priye ki Rwayonm Bondye i sanktifye non Bondye e fer ki son lavolonte i ganny akonplir lo later. Depan lo Zeova pour ou nouritir fizik e spirityel. Wi, reste determinen pour viv an armoni avek sa lapriyer model.

^ par. 4 Matye 6:11-13: 11 Donn nou sak zour nou dipen neseser; 12 Pardonn nou nou pese [oubyen “det,” NW] parey nou pardonn bann ki’n fer nou ditor. 13 Pa permet ki nou ganny tante, me [“delivre nou kont sa enn ki move,” NW].”

^ par. 10 Psonm 49:7-9: Okenn ant zot, pa zanmen kapab reaste en frer oubyen donn Bondye en ranson pour li, (Sa pri ranson pour zot lavi i sitan presye ki zot pa pou zanmen kapab peye), pour ki i viv pour touzour e pa vwar latonm.”