Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  June 2015

Zot bezwen annan landirans

Zot bezwen annan landirans

APRE ki Anita * ti’n batize konman en Temwen Zeova, son msye ti konmans opoz li en kantite. Anita i dir: “I ti anpes mwan asiste bann renyon e menm anpes mwan mansyonn non Bondye. Si mon ti mansyonn sa non Zeova, en sel kou mon msye ti pran en gran lakoler.”

I ti osi difisil pour Anita ansenny son bann zanfan lo Zeova. “Ladorasyon Zeova ti ganny enterdi dan mon prop lakaz. Mon ti bezwen etidye avek mon bann zanfan an kasyet e mon pa ti kapab anmenn zot lasal.”

Parey nou vwar atraver leksperyans Anita, ler nou fanmir i opoz nou sa i kapab vreman teste nou lentegrite konman Kretyen. Bann lezot difikilte tel parey maladi grav, perdi en zanfan ouswa en konzwen dan lanmor oubyen ler enn nou fanmir pros i kit Zeova i osi kapab teste nou lentegrite. Alor, kwa ki kapab ed en Kretyen pour reste fidel anver Zeova?

Si ou ti rankontre sa bann problenm, ki ou ti pou fer? Zapot Pol ti dir: “Zot bezwen annan perseverans [oubyen “landirans,” NW].” (Ebr. 10:36) Me kwa ki kapab ed ou pour andire?

DEPAN LO ZEOVA ATRAVER LAPRIYER

Enn parmi bann pli bon fason ki nou ganny lafors pour andir bann leprev se ler nou depan lo Zeova atraver lapriyer. Annou vwar en legzanp. En Lendi apremidi maler ti frap fanmir Ana. Son msye ki i ti’n marye avek pour 30 an ti mor en sel kou. Ana i dir: “I pa ti zanmen tournen sorti travay e i ti annan zis 52 an.”

Ki mannyer Ana ti fer fas avek sa sityasyon? I ti bezwen retourn travay e sa ti ed li akoz sa louvraz ki i ti fer ti demann bokou konsantrasyon, me selman sa pa ti tir sa douler dan son leker. I dir: “Mon ti devid mon leker avek Zeova e sipliy li pour ed mwan fer fas avek lanmor mon konzwen.” Eski Zeova ti reponn son lapriyer? I asire ki wi. I dir: “Sa lape ki zis Bondye ki kapab donnen ti rekonfort mwan e anpes mwan vin fol. Mon napa okenn dout ki Zeova pou resisit mon msye a lavenir.”Fili. 4:6, 7.

Sa “Enn ki ekout lapriyer” in promet son bann serviter ki i pou donn zot tou sa ki zot bezwen pour reste fidel anver li. (Ps. 65:2) Eski pa sa lasirans i batir ou lafwa? Eski pa i ed ou pour vwar akoz ou osi ou kapab andire?

RENYON KRETYEN —I SOUTENIR NOU

Zeova in soutenir son pep atraver kongregasyon Kretyen. Par egzanp, ler bann Kretyen Tesalonik ti pe ganny persekite severman, Pol ti demann zot pour “ankouraz e fortifye kanmarad, parey zot [ti] pe fer.” (1 Tesa. 2:14; 5:11) Bann Kretyen Tesalonik ti kontan kanmarad, alor zot ti zwenn ansanm pour ed kanmarad e sa ti ed zot pour reste fidel kan zot lafwa ti ganny teste. Zot landirans i en bon legzanp pour nou ozordi e i montre kwa ki kapab ed nou andire.

Ler nou devlop bann bon lanmitye avek bann frer ek ser dan kongregasyon, sa i kapab ed nou pour partaz “bann keksoz ki rann nou for ansanm dan lafwa.” (Rom. 14:19) Sa i enportan sirtou dan bann moman difisil. Pol li menm ti pas atraver plizyer difikilte e Zeova ti donn li lafors pour andire. Par ler, Bondye ti servi bann frer ek ser pour ankouraz li. Par egzanp, ler Pol ti anvoy salitasyon pour bann frer ek ser dan kongregasyon Kolos, i ti dir sa konsernan zot: “Zot in en gran rekonfor pour mwan.” (Kol. 4:10, 11) Wi, zot lanmour pour Pol ti pous zot pour rekonfort e ankouraz li ler i ti bezwen led. Petet ou osi ou’n ganny lankourazman ek sipor avek bann frer ek ser dan ou kongregasyon.

 BANN ANSYEN I DONN SIPOR

Bondye i osi donn nou sipor bann ansyen dan kongregasyon Kretyen. Sa bann zonm ki matir spirityelman i kapab “parey en landrwa kasyet kont divan, parey en landrwa maske kont tanpet lapli, parey bann pti larivyer dan en landrwa sek, parey lonbraz en gro ros dan en dezer.” (Iza. 32:2) Pa sa lasirans i rekonfortan! Eski ou’n servi sa provizyon? Bann ansyen i kapab ed ou pour andire par donn ou sa lankourazman ek sipor ki ou bezwen.

Byensir, bann ansyen pa kapab regle tou ou problenm. Zot bann imen enparfe parey ou. (Akt 14:15) Kantmenm sa, ler zot priy pour ou senserman sa i kapab annan en gran lefe. (Zak 5:14, 15) En frer Itali ki’n lalit avek en maladi grav ki apel muscular dystrophy pour plizyer lannen ti dir: “Lanmour ek lafeksyon bann frer ek ser e lefet ki zot vizit mwan souvan, sa in ed mwan pour andire.” Eski ou kapab benefisye plis ankor avek sa provizyon ki Zeova in donnen, setadir bann ansyen?

GARD EN BON PROGRANM SPIRITYEL

I annan lezot keksoz ki nou kapab fer pour andire. Enn se pour gard en bon progranm spirityel. Annou vwar legzanp John ki annan 39 an e ki’n ganny en kanser ki rar. I admet: “Mon ti santi ki i pa normal pour mwan ganny sa maladi vi ki mon ti sitan zenn.” Sa letan, garson John ti annan zis trwa-z-an. John i dir: “Sa ti vedir ki mon madanm ti bezwen pran swen, pa zis avek nou pti garson, me osi avek mwan e ed mwan avek tou mon bann apwentman medikal.” Bann tretman chemotherapy ti fer John vreman fatige e ti fer son lestoman lour. Pa se tou ki ti arive, John ti aprann ki son papa ti’n ganny en maladi e ki i pa ti pou geri alor son fanmir ti bezwen pran swen avek li.

Ki mannyer John ek son fanmir ti fer fas avek sa sityasyon difisil? I dir: “Malgre mon lafatig, mon ti fer sir ki nou fanmir ti gard en bon progranm spirityel. Nou ti asiste tou renyon, partisip dan predikasyon sak semenn e annan en Ladorasyon Fanmir regilye menm ler i ti difisil.” Byensir, John ti rekonnet ki i ti bezwen gard son spirityalite pour li kapab andir tou son bann leprev. Eski i annan okenn konsey pour donn bann ki pe fer fas avek en sityasyon difisil? I dir: “Ler ou’n refer apre sa sok, bann panse ki trakas ou pou ganny ranplase avek lanmour ek lafors Zeova. Zeova i kapab fer ou for, zis parey i’n fer pour mwan.”

San dout, avek led Bondye nou kapab andir bann sityasyon ek sirkonstans difisil ki nou rankontre la konmela e dan lavenir. Annou depan lo Zeova atraver lapriyer, devlop bann bon lanmitye avek bann frer ek ser dan nou kongregasyon, rod sipor bann ansyen e gard en bon progranm spirityel. Si nou fer sa, nou pe azir an armoni avek parol Pol: “Zot bezwen annan landirans.”

^ par. 2 Serten non in ganny sanze.