Skip to content

Al lo konteni

Ki kalite relasyon ou annan avek Zeova?

Ki kalite relasyon ou annan avek Zeova?

“Apros avek Bondye, e i ava apros avek zot.”ZAK 4:8.

1. Akoz nou bezwen gard nou relasyon avek Zeova solid?

ESKI ou’n dedye ou lavi avek Zeova e batize konman en Temwen Zeova? Si wi, ou annan en keksoz vreman presye, sa i ou relasyon avek Bondye. Me sa relasyon i an danze akoz bann presyon ki egziste dan lemonn Satan e osi akoz nou prop lenperfeksyon. I pour sa rezon alor ki nou bezwen fer sir ki nou gard nou relasyon avek Zeova pli solid posib.

2. (a) Kisisa en relasyon? (Vwar not.) (b) Ki mannyer nou kapab ranforsi nou relasyon avek Zeova?

2 Ki kalite relasyon ou annan avek Zeova? Eski ou ti a kontan ki ou relasyon avek li i vin pli for? Zak 4:8 i dir ou ki mannyer ou kapab fer sa: “Apros avek Bondye, e i ava apros avek zot.” Remarke ki tou le de ou avek Zeova zot annan en rol pour zwe. * Anmezir ki ou fer zefor pour apros avek Bondye, otomatikman li osi i pou apros avek ou. Pli ou fer sa, ou relasyon avek Zeova pou vin deplizanpli pli solid. Sa pou fer ki Zeova i vin pli reel pour ou e ou pou devlop menm konfyans  ki Zezi ler i ti dir: “Sa Enn ki’n anvoy mwan i reel . . . Mon konn li. (Zan 7:28, 29, NW) Me kwa egzakteman ki ou kapab fer pour apros avek Zeova?

Ki mannyer ou kapab kominik avek Bondye? (Vwar paragraf 3)

3. Ki mannyer nou kapab kominik avek Zeova?

3 Si ou anvi apros avek Zeova, i vreman enportan ki zot tou le de zot kominik avek kanmarad regilyerman. Ki mannyer ou kapab kominik avek Bondye? Be ki mannyer ou kominik avek en zanmi ki reste lwen avek ou? Petet zot ekrir kanmarad e koz lo telefonn ase souvan. Ou koz avek Zeova ler ou priy li regilyerman. (Lir Psonm 142:2. *) De lot kote, ou les Zeova koz avek ou ler ou lir son Parol Labib e medit lo la regilyerman. (Lir Izai 30:20, 21. *) Aprezan, annou vwar ki mannyer sa kominikasyon ant ou ek Zeova i kapab ranforsi ou relasyon avek li e fer ki i vin en vre Zanmi pour ou.

LES ZEOVA KOZ AVEK OU LER OU ETIDYE LABIB

4, 5. Ki mannyer Zeova i koz avek ou personnelman atraver Labib? Donn en legzanp.

4 I vre ki Labib in ganny ekrir pour tou dimoun. Me eski Labib i osi kapab ed ou pour apros avek Zeova? Toutafe. Ki mannyer? Anmezir ki ou lir e etidye Labib regilyerman, reflesir lo ki mannyer ou santi lo sa ki ou pe lir. Mazin osi ki mannyer ou kapab aplik sa ki ou aprann dan ou lavi. Ler ou fer sa, ou permet Zeova koz avek ou atraver son Parol. Sa pou ed ou devlop en relasyon pli solid avek li.Ebr. 4:12; Zak 1:23-25.

5 Par egzanp, ki mannyer ou santi ler ou medit lo sa parol Zezi: “Pa akimil zot larises lo later.” Si ou pe deza fer ou mye pour servi Zeova, ou pou santi ki ou pe fer Zeova plezir. De lot kote, i kapab arive ki ou santi ki ou bezwen senplifye ou lavi e konsantre plis lo ou servis pour Bondye. Si sa i leka, Zeova pe ed ou pour konpran kwa ki ou ou bezwen fer pour apros avek li.Mat. 6:19, 20.

6, 7. (a) Ki lefe letid Labib i annan lo nou lanmour pour Zeova e son lanmour pour nou? (b) Ki lobzektif nou devret annan ler nou pe fer nou letid personnel?

6 Letid Labib pa zis fer nou konnen kote nou bezwen progrese spirityelman.  I osi fer nou annan plis lapresyasyon pour bann zoli keksoz ki Zeova in akonpli e fer nou kontan li plis. Anmezir ki nou devlop plis lanmour pour Bondye, son lanmour pour nou i ogmante e sa i fer nou relasyon avek li vin pli solid.Lir 1 Korentyen 8:3.

7 Me pour nou apros avek Zeova, i enportan ki nou etidye avek sa bon lobzektif. Zan 17:3, NW, i dir: “Savedir, pour ganny lavi eternel zot bezwen aprann konn ou konman sel vre Bondye ek sa enn ki ou’n anvoye, Zezi Kri.” Alor, ler nou etidye, nou lobzektif i pa zis pour ganny konnesans me pour arive “konn” Zeova pli byen, setadir konnen ki kalite dimoun i ete.Lir Egzod 33:13; * Ps. 25:4.

8. (a) Ki serten i kapab panse lo Zeova akoz lafason ki i ti tret Lerwa Azarya dan 2 Lerwa 15:1-5? (b) Lefet ki nou konn Zeova, ki mannyer sa i kapab ed nou rezet bann dout konsernan lafason ki i azir?

8 Anmezir ki nou konn Zeova pli byen konman en zanmi, nou pa pou trakase si nou lir serten resi Labib kot nou pa konpran lafason ki i’n reakte. Par egzanp, ki ou reaksyon ler ou lir lafason ki Zeova ti azir anver Azarya ki ti lerwa Zida? (2 Rwa. 15:1-5) Remarke ki menm si “bann dimoun ti ankor pe fer sakrifis e fer monte lafimen bann sakrifis lo bann oter,” Azarya li, “i ti kontinyen fer sa ki byen dan lizye Zeova.” Pourtan, “Zeova ti pini sa lerwa e i ti reste en lepre ziska zour i ti mor.” Akoz? Sa resi pa dir. Eski sa i devret trakas nou oubyen fer nou mazinen ki Zeova ti pini Azarya san okenn rezon valab? Non, nou pa pou mazin koumsa si nou konn byen fason azir Zeova akoz i toultan disiplin “ziska en degre apropriye.” (Zer. 30:11) Lefet ki nou konn sa, nou asire ki zizman Zeova anver Azarya ti bon menm si nou pa konnen akoz I ti azir koumsa.

9. Ki detay ki ed nou konpran akoz Zeova ti pini Azarya avek lalep?

9 Par kont, i annan lezot detay dan Labib konsernan sa resi lo Azarya. Lerwa Azarya ti osi koni konman Lerwa Ouziya. (2 Rwa. 15:7, 32) Dan 2 Kronik 26:3-5, 16-21, nou aprann ki menm si Ouziya ti fer sa ki byen dan lizye Zeova pour en serten letan, pli tar “lorgey ti devlope dan son leker ziska ki i ti fer son maler.” Akoz son larogans, i ti esey fer louvraz ki zis bann pret ti annan drwa fer. Katreven enn pret ti esey anpes li e dir li ki sa ki i ti pe fer ti mal. Ki mannyer Ouziya ti reakte? I ti “pran en gran ankoler” avek bann pret akoz i ti’n vin sitan orgeye. I pa etonan alor ki Zeova ti frap li avek lalep!

10. Akoz nou pa devret toultan bezwen ganny en leksplikasyon pour tou sa ki Zeova i fer? Ki mannyer nou kapab annan plis konfyans ki Zeova i touzour azir dan sa bon fason?

10 Annou gard antet sa pwen enportan. Dan sa resi konsernan Lerwa Azarya, nou annan ase detay pour ed nou konpran akoz Zeova ti pini li. Me ler Labib pa donn tou detay ki ou pou fer? Eski ou pou doute ki Zeova ti vreman azir dan sa bon fason? Oubyen eski ou pou krwar ki Labib i annan ase lenformasyon pour ki ou annan konfyans ki Bondye i touzour fer sa ki byen? (Det. 32:4) Anmezir ki nou konn pli byen ki kalite dimoun Zeova i ete, nou lanmour ek lapresyasyon pour son bann fason azir pou ogmante ziska en pwen kot nou pou nepli bezwen en leksplikasyon pour sak  keksoz ki i fer. Ou kapab asire ki ou lapresyasyon pou ogmante anmezir ki ou fer zefor pour etidye e medit lo sa ki Bondye i dir ou atraver son Parol. (Ps. 77:12, 13) An retour, sa pou ranforsi ou relasyon avek Zeova e i pou vin pli reel pour ou.

OU KOZ AVEK ZEOVA LER OU PRIYE

11-13. Ki mannyer ou konnen ki Zeova i ekout bann lapriyer? (Vwar portre lo paz 19.)

11 Ler nou priye nou apros avek Zeova. Nou loue li, remersye li e rod son gidans. (Ps. 32:8) Me pour ki ou relasyon avek Zeova i vin reel, ou bezwen asire ki i pe ekout ou lapriyer.

12 Serten dimoun i panse ki lapriyer i zis fer ou santi ou pli byen. Zot dir ki si ou krwar ki ou lapriyer in ganny reponn, sa i zis akoz ou’n reflesir lo ou problenm e trouv ou prop larepons. I vre ki lapriyer i kapab ed ou dan sa bann fason, me ki mannyer ou konnen ki Zeova pe vreman ekout ou lapriyer senser?

13 Annou pran en legzanp: Avan ki Zezi ti vin lo later, li menm i ti vwar ki Zeova ti reponn lapriyer Son bann serviter lo later. Apre sa, pandan son minister lo later, Zezi ti servi lapriyer konman sa mwayen pour eksprim son santiman avek son Papa dan lesyel. Eski i ti pou’n fer sa e menm priye en lannwit antye, si i ti krwar ki Zeova pa ti pe vreman ekoute? (Lik 6:12; 22:40-46) Eski i ti pou’n ansenny son bann disip ki mannyer pour priye si i ti krwar ki lapriyer ti zis en keksoz ki fer ou santi ou pli byen? I kler alor, ki Zezi ti konnen ki Zeova i vreman ekout bann lapriyer. En fwa, Zezi ti dir: “Papa, mersi ki ou’n ekout mwan. Mon konnen ki ou touzour ekout mwan.” Nou osi nou kapab annan konfyans ki Zeova i “sa Enn ki ekout lapriyer.”Zan 11:41, 42; Ps. 65:2.

14, 15. (a) Ki byenfe nou gannyen kan nou demann bann keksoz spesifik dan nou lapriyer? (b) Ki mannyer lapriyer ti ranforsi relasyon ki en ser ti annan avek Zeova?

14 Kan ou demann bann keksoz spesifik dan ou lapriyer, ou pou konpran pli byen ki mannyer Zeova i reponn ou, menm si i pa sitan evidan. Kan ou lapriyer i ganny reponn, sa pou fer Zeova vin  pli reel pour ou. An plis, pli ou eksprim ou bann santiman personnel avek Zeova, i pou apros pli pre avek ou.

15 Annou vwar leksperyans Kathy. * I pa ti kontan predikasyon menm si i ti al prese souvan. I eksplike: “Mon pa ti kontan predikasyon. Mon dir ou, mon vreman pa ti kontan prese. Me ler mon ti pran retret, en ansyen ti ankouraz mwan pour fer pionye ordiner e i ti menm donn mwan en form pionye. Mon ti deside pour fer pionye, me mon ti osi konmans priye toulezour pour ki Zeova i fer mwan kontan predikasyon.” Eski Zeova ti reponn son lapriyer? I dir: “Aprezan i fer trwa-z-an ki mon pionye. Vi ki mon pas plis letan dan predikasyon e aprann avek lezot ser, ptitapti mon’n amelyor mon abilite pour prese. Ozordi, mon pa zis kontan predikasyon me mon vreman kontan li. An plis ki sa, mon annan en relasyon pli pros avek Zeova ki avan.” Lapriyer ki Kathy ti fer ti vreman ed li pour fer son relasyon avek Zeova vin enn ki reel.

FER OU PAR

16, 17. (a) Ki nou bezwen fer pour ki nou kontinyen ranforsi nou relasyon avek Zeova? (b) Ki nou pou koz lo la dan sa lot lartik?

16 Nou kapab kontinyen vin pli pros avek Zeova tou dilon nou lavi. Nou bezwen pran bann pa pour apros avek Bondye si nou anvi ki i apros avek nou. Alor, annou fer tou sa ki nou kapab pour kontinyen kominik regilyerman avek Bondye atraver letid Labib ek lapriyer. Si nou fer sa, nou pou kontinyen ranforsi nou relasyon avek Zeova e nou pou kapab reisi fer fas avek nou bann difikilte.

Nou kapab kontinyen vin pli pros avek Zeova tou dilon nou lavi (Vwar paragraf 16, 17)

17 Me par ler nou lalit avek bann problenm personnel menm si nou kontinyen priye. Ler sa i arive, i kapab ki nou konmans perdi konfyans dan Zeova. Nou kapab konmans doute si Zeova i vreman tann nou bann lapriyer oubyen si i menm konsider nou konman son zanmi. Ki mannyer nou kapab fer fas avek sa bann difikilte avek konfyans ki nou relasyon avek Bondye i reel? Sa lot lartik pou koz lo la.

^ par. 2 En relasyon i lafason ki de dimoun i santi e azir anver kanmarad. Tou le de i bezwen fer en keksoz pour gard zot relasyon solid.

^ par. 3 Psonm 142:2: “Mon kontinyen dir li tou mon problenm. Mon toultan koz lo mon bann lenkyetid avek li.”

^ par. 3 Izai 30:20, 21: 20 Menm si Zeova pou donn zot dipen ladetres pour manze e delo dominasyon kriyel pour bwar, zot Gran Enstrikter pou nepli kasyet li e zot pou vwar zot Gran Enstrikter avek zot prop lizye. 21 Si an ka ou driv a drwat oubyen a gos, ou zorey pou tann en parol deryer ou pe dir: ‘La sa semen, mars lo la.’”

^ par. 7 Egzod 33:13: “Silvouple, si mon’n trouv faver dan ou lizye, fer mwan konn ou bann semen pour ki mon ava konn ou e kontinyen trouv faver dan ou lizye. Pa oubliye osi ki sa nasyon i ou pep.”

^ par. 15 Non in ganny sanze.