Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  January 2015

Give Thanks to Jehovah and Be Blessed

Give Thanks to Jehovah and Be Blessed

“Remersye Zeova parski i bon.”PS. 106:1.

1. Akoz Zeova i merite ki nou remersye li?

ZEOVA, sa Enn ki donn ‘tou don ekselan e tou kado parfe’ i vreman merite ki nou remersye li. (Zak 1:17) Parey en berze ki kontan son bann mouton, i pran swen avek tou nou bezwen fizik e spirityel. (Ps. 23:1-3) I’n demontre ki i “refiz ek lafors” sirtou dan bann moman difisil. (Ps. 46:1) San dout, nou toutafe dakor avek sa ki sa psalmis ti ekrir: “Remersye Zeova parski i bon, son lanmour fidel i reste pour touzour.”Ps. 106:1.

Nou teks pour lannen 2015: “Remersye Zeova parski i bon.”Psonm 106:1

2, 3. (a) Ki danze i annan si nou pa apresye sa ki nou gannyen? (b) Ki kestyon nou pou egzaminen dan sa lartik?

2 Akoz i enportan pour nou koz lo remersiman? Parey i’n ganny predir, dan sa bann dernyen zour, dimoun in vin deplizanpli engra. (2 Tim. 3:2) Bokou pa apresye sa ki zot gannyen. Nou viv dan en lemonn kot i annan en kantite piblisite ki ankouraz plizyer milyon dimoun pour aste touzour plis, olye kontant zot avek sa ki zot annan. Nou osi nou kapab ganny afekte avek sa kalite leta lespri kot nou pa apresye sa ki nou annan. Parey bann Izraelit dan lepase, nou kapab pa rekonesan e mank lapresyasyon pour sa relasyon presye ki nou annan avek Zeova ek  bann benediksyon ki nou gannyen avek li.Ps. 106:7, 11-13.

3 Mazin osi lo sa ki kapab arive ler nou pas atraver bann leprev difisil. Ler sa i arive nou kapab fasilman les sa sityasyon fatig nou akoz nou’n bliy nou bann benediksyon. (Ps. 116:3) Alor ki mannyer nou kapab kontinyen devlop rekonesans dan nou leker? Kwa ki kapab ed nou reste pozitif menm ler nou pe pas dan bann gro leprev? Annou vwar.

“KI KANTITE KEKSOZ OU’N FER, O ZEOVA”

4. Ki mannyer nou kapab kontinyen devlop rekonesans dan nou leker?

4 Si nou anvi kontinyen devlop rekonesans dan nou leker, nou bezwen rode e medite lo ki mannyer Zeova in beni nou personnelman e vwar ki mannyer son bann benediksyon i montre ki Zeova i annan lanmour fidel anver nou. Ler sa psalmis ti fer sa, i ti enpresyonnen par sa kantite keksoz merveye ki Zeova ti’n fer.Lir Psonm 40:5; 107:43. *

5. Ki nou kapab aprann avek legzanp zapot Pol lo ki mannyer pour devlop lapresyasyon?

5 Nou kapab aprann en kantite atraver legzanp zapot Pol lo konman pour devlop rekonesans. I evidan ki i ti medit lo bann benediksyon ki i ti gannyen akoz souvan i ti remersye Bondye avek tou son leker. Pol ti konn tre byen ki menm si dan lepase ‘i ti blasfenm, persekit e ensilte’ lezot, i ti remersye Bondye ek Kris akoz malgre sa, zot ti demontre mizerikord anver li e konfye li sa privilez pour pres avek lezot. (Lir 1 Timote 1:12-14.) Pol ti osi apresye son bann frer ek ser Kretyen e souvan i ti remersye Zeova pour zot bann bon kalite ek zot servis fidel. (Fili. 1:3-5, 7; 1 Tesa. 1:2, 3) Kan Pol ti fer fas avek bann sityasyon difisil, i pa ti tarde pour remersye Zeova pour sipor ki i ti gannyen a tan avek son bann frer ek ser spirityel. (Akt 28:15; 2 Kor. 7:5-7) Alor, i pa sirprenan ki bann let Pol i ankouraz bann Kretyen pour: “Viv an rekonesans. . . .  Avek rekonesans loue Bondye an santan bann psonm, kantik ek sanson spirityel.”Kol. 3:15-17.

MEDITASYON EK LAPRIYER I NESESER POUR KONTINYEN REKONESAN ANVER ZEOVA

6. Pour ki benediksyon Zeova ou pli rekonesan?

6 Ki mannyer nou kapab devlop e eksprim nou rekonesans par imit legzanp Pol? Parey Pol, nou bezwen medit lo sa ki Zeova in fer pour nou personnelman. (Ps. 116:12) Si ou ti ganny demande, ‘Pour ki benediksyon Zeova ou pli rekonesan,’ ki ou ti pou dir? Eski ou ti pou koz lo ou relasyon presye ki ou annan avek Zeova? Oubyen akoz ou’n ganny pardonnen ou pese akoz ou annan lafwa dan sakrifis Kris? Eski ou ti pou mansyonn non bann frer ek ser ki’n siport ou dan bann letan difisil? Byensir, ou pa ti pou oubliye mansyonn ou konzwen ki ou byen kontan e ou bann zanfan ki presye pour ou. Si nou pran letan pour medit lo sa bann zoli benediksyon ki sorti kot nou Papa, Zeova, nou leker pou ranpli avek rekonesans e sa pou pous nou pour remersye li sak zour.Lir Psonm 92:1, 2. *

7. (a) Akoz nou devret fer bann lapriyer remersiman? (b) Ki byenfe ou pou gannyen si ou eksprim ou rekonesans dan lapriyer?

 7 Ler nou gard dan nou lespri ek leker bann benediksyon ki nou’n gannyen, nou pou pare pour priy Zeova e remersye li. (Ps. 95:2; 100:4, 5) Bokou dimoun i zis fer lapriyer pour demann Bondye keksoz. Par kont, nou nou konnen ki Zeova i kontan ler nou eksprim nou remersiman pour sa ki nou annan. Dan Labib, i annan en kantite lapriyer remersiman ki tousan, sa i enkli lapriyer ki Ana ek Izkiya ti fer. (1 Sam. 2:1-10; Iza. 38:9-20) Alor imit legzanp sa bann serviter fidel ki ti demontre en leta lespri rekonesan. Wi, remersye Zeova dan ou lapriyer pour bann benediksyon ki ou’n gannyen. (1 Tesa. 5:17, 18) Ou pou ganny en kantite byenfe si ou fer sa. Sa pou remont ou moral, ou lanmour pour Zeova pou ogmante e ou pou vin pli pros avek li.Zak 4:8.

Ki benediksyon sorti kot Zeova ki ou apresye? (Vwar paragraf 6, 7)

8. Kwa ki kapab fer nou nepli annan lapresyasyon pour tou sa ki Zeova in fer pour nou?

8 Akoz nou devret toultan veye ki nou pa mank lapresyasyon pour labonte ki Zeova i demontre anver nou? Parski nou enparfe e nou’n erit sa tandans pour pa demontre rekonesans. Annou pran en legzanp, nou premye paran Adan ek Ev ki ti ganny mete dan Paradi. Zot ti ganny tou sa ki zot ti bezwen e zot ti annan sa posibilite pour viv anpe pour touzour. (Zen. 1:28) Me zot pa ti apresye sa ki zot ti annan. Zot ti voras, zot ti anvi plis. Pour fini kont, zot ti perdi tou. (Zen. 3:6, 7, 17-19) Nou pe viv dan en lemonn kot dimoun i engra e nou kapab konmans oubliy tou sa ki Zeova in fer pour nou. Nou kapab konmans pran nou lanmitye avek Li alalezer. Nou kapab perdi sa lapresyasyon pour form parti sa lasosyasyon frer ek ser dan lemonn antye. Petet nou kapab konmans devlop bokou lentere pour bann keksoz sa lemonn ki byento pou disparet. (1 Zan 2:15-17) Pour evite pran sa move lapant, nou merit medit lo bann benediksyon ki nou gannyen e regilyerman remersye Zeova pour sa privilez ki nou annan pour form parti son pep.Lir Psonm 27:4. *

KAN NOU PE FER FAS AVEK BANN LEPREV

9. Ler nou fer fas avek bann gro leprev, akoz nou devret medit lo nou bann benediksyon?

9 Ler nou annan en leker rekonesan, sa  i kapab ed nou fer fas avek bann gro leprev. Nou kapab santi nou dekouraze ler nou sirkonstans dan lavi i sanze en sel kou, par egzanp si nou konzwen pa fidel, en maladi grav, lanmor en dimoun ki nou kontan oubyen en dezas natirel. Dan sa bann moman, nou pou reganny lafors e ganny rekonforte ler nou medit lo nou bann benediksyon. Annou vwar sa bann legzanp swivan.

10. Ki mannyer Irina ti benefisye ler i ti medit lo bann benediksyon ki i’n gannyen?

10 Irina * ki en pionye ordiner Nor Lanmerik, ti’n marye avek en ansyen ki ti abandonn li ek zot zanfan pour al avek en lot madanm. Ki led Irina ti gannyen pour kontinyen servi Zeova fidelman? I dir: “Mon rekonesan pour led personnel ki Zeova in donn mwan. Toulezour mon konsantre lo bann benediksyon ki mon gannyen, sa i ed mwan pour vwar ki i en privilez pour annan en Papa dan lesyel ki konn mwan, protez mwan e kontan mwan. Mon konnen ki i pa pou zanmen abandonn mwan.” Menm si Irina in eksperyans bokou sityasyon difisil dan son lavi, i toultan zwaye, sa i ed li e i en sours lankourazman pour lezot.

11. Kwa ki ti ed Kyung-sook pour fer fas avek en maladi grav?

11 Kyung-sook ki reste Lazi ti’n fer pionye avek son msye pour plis ki 20 an. En sel kou, sa ser ti dekouver ki i ti ganny kanser poumon e i ti ganny dir ki i ti reste li trwa a sis mwan pour viv. Menm si li ek son msye ti’n fer fas avek bokou difikilte ki swa gro ouswa pti, zot pa ti’n zanmen enkyet pour zot lasante. Sa ser i dir: “Sa problenm lasante ti tap mwan en kantite. Mon ti santi konmsi mon ti’n perdi tou e mon ti vreman per.” Kwa ki ti ed Kyung-sook pour fer fas avek tousala? I dir: “Tou le swar avan mon al dormi, mon al anler lo trwa nou lakaz e priy aotvwa lo senk keksoz ki mon’n apresye pandan lazournen. Apre sa, mon reganny konfyans e sa i pous mwan pour eksprim mon lanmour pour Zeova.” Ki byenfe Kyung-sook in gannyen atraver sa bann lapriyer ki i fer aswar? I dir: “Mon realize ki Zeova i soutenir nou dan bann sityasyon difisil e ki i annan bokou plis benediksyon ki difikilte dan nou lavi.”

Avek son frer John ki pa ti mor (Vwar paragraf 13)

12. Ki mannyer Jason ti trouv rekonfor apre lanmor son madanm?

12 Jason ki servi kot en biro brans Lafrik i dan servis a plen tan pour plis ki 30 an. I dir: “Set an pase mon madanm ti mor e sa i vreman fermal. Ler mon mazin lo sa ki mon madanm ti pas ladan ler i ti pe lalit avek kanser, sa i tap mwan en kantite.” Kwa ki ti ed Jason pour fer fas avek sa sityasyon? I dir: “En zour, mon ti pe mazin en bon moman ki mon ti’n pase avek mon madanm e mon ti remersye Zeova dan lapriyer pour sa souvenir. En sel kou mon ti santi mwan pli byen e mon ti konmans remersye Zeova souvan pour sa bann bon souvenir. Mon lapresyasyon pour sa bann keksoz in fer mwan vwar keksoz dan en lot fason. Mon ankor santi sa douler akoz mon madanm in mor, me ler mon remersye Zeova pour sa bon lavi maryaz e sa privilez pour servi li avek en dimoun ki ti vreman kontan li, sa in fer mwan vwar keksoz dan en lot fason.”

“Mon vreman rekonesan ki Zeova i mon Bondye.”—Sheryl

13. Kwa ki ti ed Sheryl fer fas avek lanmor laplipar son fanmir?

13 Kan Siklonn Haiyan ti tap Filipin lafen lannen 2013, Sheryl ki ti annan zis 13 an sa letan ti perdi tou. I ti dir: “Mon ti perdi mon lakour e preski tou mon fanmir.” Son papa, manman, frer ek de ser ti mor dan sa gro tanpet. Kwa ki’n ed Sheryl fer fas avek sa maler san perdi lespwar? I rekonesan e i apresye bann benediksyon  ki i ankor annan. “Mon ti vwar tou sa ki bann frer ek ser ti fer pour ed e ankouraz bann ki ti bezwen led. Mon ti konnen ki bann fer ek ser dan lemonn antye ti pe priy pour mwan.” I ti osi dir: “Mon vreman rekonesan ki Zeova i mon Bondye. I toultan donn nou sa ki nou bezwen.” Vreman, ler nou apresye bann benediksyon ki nou gannyen, sa i ed nou pour pa les sagrinasyon anvair nou. Kan nou annan lapresyasyon dan nou leker, sa i ed nou pour pa konpletman dekouraze menm ler nou fer fas avek leprev.Efe. 5:20; lir Filipyen 4:6, 7.

“ME MWAN MON POU REZOUIR EN KANTITE AKOZ ZEOVA”

14. Ki bann byenfe eksitan ki pe esper ou? (Vwar portre lo paz 8.)

14 Tou dilon listwar, pep Zeova in toultan dan lazwa akoz bann benediksyon ki zot gannyen. Par egzanp, apre ki zot ti’n ganny delivre avek Faraon ek son larme dan Lanmer Rouz, bann Izraelit ti eksprim zot lazwa par sant bann kantik pour loue e remersye Bondye. (Egz. 15:1-21) Ozordi, sa privilez pli presye ki nou annan se sa lespwar pour ganny delivre avek tou sa ki fer nou ditor e soufer. (Ps. 37:9-11; Iza. 25:8; 33:24) Zis mazinen ki mannyer nou pou santi ler Zeova i detri tou son bann lennmi e fer nou antre dan sa nouvo lemonn kot pou annan lape ek lazistis. Pa nou pou anvi remersye li sa zour.Rev. 20:1-3; 21:3, 4.

15. Ki ou determinen pour fer pandan lannen 2015?

15 Nou enpasyan pour ganny en kantite benediksyon spirityel sorti kot Zeova pandan lannen 2015. Byensir nou kapab osi pas atraver bann difikilte. Nenport kwa ki kapab arive, nou konnen ki Zeova pa pou zanmen abandonn nou. (Det. 31:8; Ps. 9:9, 10)) I pou kontinyen donn nou tou keksoz ki nou bezwen pour servi li fidelman. Alor, annou determinen pour annan menm leta lespri ki profet Abakouk ki ti dir: “Menm si pye fig pa fleri, pye rezen ek pye zoliv pa raport fri, napa manze dan plantasyon, menm si i nepli annan troupo dan berkay e napa bef dan park me mwan mon pou rezouir en kantite akoz Zeova, mon pou zwaye akoz mon Bondye pou sov mwan.” (Aba. 3:17, 18) Pandan sa lannen ki pe vini, annou mazin lo bann benediksyon ki nou gannyen e ganny ankouraze pour swiv sa konsey ki dan teks lannen 2015 ki dir: “Remersye Zeova parski i bon.”Ps. 106:1.

^ par. 4 Psonm 40:5: “O Zeova mon Bondye, ou’n fer en kantite keksoz pour nou, ou bann travay merveye e ou bann panse anver nou. Napa personn ki kapab ganny konpare avek ou, si mon ti bezwen dir e esey koz lo zot, i ti pou tro bokou pour rakonte!” 107:43: “Sa ki saz pou obzerv sa bann keksoz e egzamin byen lafason ki Zeova in demontre lanmour fidel.”

^ par. 6 Psonm 92:1, 2: “I bon pour remersye Zeova e sant louanz pour ou non, ou sa Enn Tre O. Pour fer konnen ou lanmour fidel dan bomaten e ou fidelite pandan lannwit.”

^ par. 8 Psonm 27:4: “I annan en keksoz ki mon’n demann Zeova, sanmenm ki mon pou rode, se ki mon kapab reste dan lakaz Zeova tou mon lavi, pour admir labote Zeova e get son tanp avek lapresyasyon.”

^ par. 10 Serten non dan sa lartik in sanze.