Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  December 2014

Ansanm, annou fer fas avek lafen sa move lemonn

Ansanm, annou fer fas avek lafen sa move lemonn

“Nou tou ansanm nou manm en sel lekor.”EFE. 4:25.

1, 2. Ki mannyer Bondye i anvi son pep, zenn konman vye, i ador li?

ESKI ou en zenn? Si wi, ou kapab asire ki konman en manm kongregasyon Temwen Zeova, nou vreman apresye ou. Dan bokou pei, en kantite parmi bann ki pe batize i bann zenn. Pa i ankourazan pour vwar sa kantite zenn ki’n deside pour servi Zeova!

2 Konman en zenn, eski ou kontan pas letan avek lezot zenn? I tre probab ki wi. Nou kontan ler nou pas bann bon moman avek bann ki menm laz avek nou. Par kont, ki swa nou zenn oubyen vye e nenport ki lorizin ki nou annan, Bondye i anvi ki son pep i ini pour ador li. Zapot Pol ti ekrir ki Bondye i anvi “tou [“sort kalite,” NW] dimoun i ganny sove e ganny konnesans laverite.” (1 Tim. 2:3, 4) Revelasyon 7:9 i dekrir bann adorater Bondye konman bann ki sorti dan “tou nasyon, tribi, pep ek lalang.”

3, 4. (a) Ki leta lespri bokou zenn i annan ozordi? (b) Ki leta lespri ki an armoni avek Efezyen 4:25?

3 I annan en gran diferans ant bann zenn serviter Zeova ek bann zenn dan sa lemonn. Bokou ki pa servi Zeova i enterese zis avek zot lekor e dan sa ki zot anvi. Se pour sa ki  serten serser i apel zot “Zenerasyon Mwan.” Lafason ki zot koze e bann lenz ki zot mete i montre ki zot napa en sou respe pour lezot, sirtou bann aze.

4 Sa leta lespri i partou kot nou ale. Alor i demann en kantite zefor delapar bann zenn serviter Zeova pour zot evit sa leta lespri e aksepte pwennvi Bondye. Menm dan premye syek Pol ti vwar li neseser pour ankouraz bann frer ek ser pour evit “lespri ki aprezan pe travay dan bann zanfan dezobeisans,” sa lespri ki “zot ti pe viv dapre” avan. (Lir Efezyen 2:1-3.) Nou ti a kontan felisit bann zenn ki’n vwar sa nesesite pour evit sa leta lespri e ki ini avek bann frer ek ser. Sa leta lespri i an armoni avek parol Pol kot i ti ekrir ki “nou tou ansanm nou manm en sel lekor.” (Efe. 4:25) I pou pli enportan ankor pour ini avek nou bann frer ek ser anmezir ki nou apros lafen sa move lemonn. Annou vwar serten legzanp ki pou ed nou apresye sa nesesite pour reste atase avek kanmarad, setadir pour ini.

ZOT TI RESTE ATASE AVEK KANMARAD

5, 6. Ki leson nou aprann avek Lot ek son fanmir?

5 Zeova ti protez son pep dan lepase ler zot ti ini e ed kanmarad dan bann sityasyon danzere. Nou tou, zenn konman vye, nou kapab aprann avek sa bann legzanp sorti dan Labib. Annou vwar ki ti arive avek Lot.

6 Lot ek son fanmir ti an danze akoz Zeova ti pe al detrir Sodonm, sa lavil kot zot ti reste. Bann lanz Bondye ti averti Lot pour kit sa lavil e al dan montanny. Zot ti dir: “Sove pour ou pa mor!” (Zen. 19:12-22) Lot ek son de fiy ti obeir e zot ti kit sa lavil. Malerezman, pa tou dimoun dan son fanmir ki ti obeir. Lot ti’n averti sa de zenn onm ki ti pou marye avek son de fiy me pour zot i ti konmsi sa zonm aze “ti pe fer fars.” Sa ti kout zot zot lavi. (Zen. 19:14) Zis Lot ek son de fiy ki ti’n reste atase avek li ki ti sirviv.

7. Ki mannyer Zeova ti ed bann ki ti demontre en leta lespri ini ler bann Izraelit ti kit Lezip?

7 Annou vwar en lot legzanp. Ler bann Izraelit ti kit Lezip, zot pa ti form bann pti group epi fer sakenn pour li. Deplis, ler Moiz ti “avans son lanmen par lao lanmer” e Zeova ti separ lanmer an de, Moiz pa ti travers li tousel oubyen avek zis detrwa Izraelit. O kontrer, kongregasyon antye ti travers ansanm e Zeova ti protez zot. (Egz. 14:21, 22, 29, 30) Zot ti demontre en leta lespri ini e “en gran lafoul tou sort kalite dimoun,” bann ki pa ti Izraelit ki ti’n deside pour servi Zeova, ti al avek zot. (Egz. 12:38) Nou pa kapab mazinen ki serten, petet en group zenn, ti’n pou’n separe e pran en semen ki zot zot ti krwar i pli bon. I ti pou’n bet pour fer sa e Zeova pa ti pou’n protez zot.1 Kor. 10:1.

8. Dan letan Yeosafat, ki mannyer pep Bondye ti montre ki zot ini?

8 Dan letan Lerwa Yeosafat, pep Bondye ti bezwen fer fas avek en lennmi danzere, “en gran lafoul” sorti dan tou rezyon dan zalantour. (2 Kron. 20:1, 2) I byen ki bann serviter Bondye pa’n esey defet zot lennmi avek zot prop lafors. O kontrer, zot ti tourn ver Zeova. (Lir 2 Kronik 20:3, 4. *) Zot pa ti fer sakenn pour li oubyen fer lafason ki sakenn ti anvi. Labib i dir nou: “Tou bann  ki sorti Zida ti pe debout devan Zeova ansanm avek zot bann pti zanfan, madanm ek zanfan.” (2 Kron. 20:13) Ki swa zot ti zenn oubyen vye, zot ti met konfyans dan Zeova e swiv son gidans, sa ti fer ki Zeova ti protez zot kont zot lennmi. (2 Kron. 20:20-27) Eski pa sa i en bon legzanp lo ki mannyer pep Bondye i kapab fer fas avek bann sityasyon difisil?

9. Ki nou aprann atraver aksyon ek latitid bann Kretyen dan premye syek konsernan linite?

9 I ti evidan ki bann Kretyen dan premye syek ti osi travay ansanm dan linite. Par egzanp, apre ki bokou Zwif ek bann ki ti’n konverti ti vin Kretyen, zot ti pas bokou letan “pour aprann avek bann zapot, zot ti viv ansanm, an komen konman frer; zot ti kas dipen, e partisip ansanm dan lapriyer.” (Akt 2:42) Sa linite ti sirtou evidan dan bann letan persekisyon, kot zot ti vreman bezwen kanmarad. (Akt 4:23, 24) Eski pa ou pou dakor ki dan bann moman difisil i enportan pour travay ansanm?

INI ANMEZIR KI ZOUR ZEOVA I APROSE

10. Kan ki nou pou pli bezwen ini?

10 Enn parmi bann moman pli terib dan listwar imen pe aprose. Profet Yoel i dekrir sa konman “en zour fernwanr.” (Yoel 2:1, 2; Tsef. 1:14) Pour pep Bondye, i pou en letan kot zot pou bezwen ini. Rapel sa ki Zezi ti dir: “Tou rwayonm kot zabitan i fer lager antre zot i fini par ganny detri.”Mat. 12:25.

11. Ki konparezon dan Psonm 122:3, 4 i kapab ganny aplike avek pep Bondye ozordi? (Vwar portre lo paz 22.)

11 Byento ler sa lemonn pou dan letan difisil, nou pou bezwen vreman ini. Sa linite spirityel ki nou pou bezwen annan antre nou i kapab ganny konpare avek bann lakaz Zerizalenm ki ti pros avek kanmarad. Telman sa bann lakaz ti pros en psalmis ti dekrir Zerizalenm konman “en lavil ki’n zwenn ansanm konman en sel.” Sa ti permet bann zabitan pour ed e protez kanmarad. An plis ki sa, vi ki zot ti pros, sa ti kapab byen reprezant linite spirityel sa nasyon antye kan tou “bann tribi Ya” ti rasanble pour ador li. (Lir Psonm 122:3, 4. *) Pareyman, ozordi e dan bann zour difisil ki pe vini nou bezwen kontinyen “zwenn ansanm konman en sel.”

12. Kwa ki pou ed pep Bondye sirviv ler i pou ganny atake?

12 Akoz i pou sitan enportan pour nou “zwenn ansanm” sa letan? Ezekyel sapit 38 i profetize ki “Gog sorti dan pei Magog” pou lans en latak lo pep Bondye. I pa pou en letan pour les nanryen separ nou. Definitivman nou pa pou anvi al rod led avek sa lemonn. O kontrer, nou pou anvi reste pros avek nou bann frer ek ser. Byensir, nou pa pou sirviv zis akoz nou form parti en group. Zeova ek son Garson pou sov bann ki kriy lo son non dan sa letan difisil. (Yoel 2:32; Mat. 28:20) Me nou osi bezwen reste ini avek pep Bondye. Eski ou panse ki Zeova pou sov bann ki deside fer zot prop semen?Mik. 2:12.

13. Ki leson bann zenn ki annan lakrent pour Bondye i kapab aprann dan sa ki nou’n vwar ziska aprezan?

13 Eski pa i kler alor ki i pa saz ditou pour swiv fason fer bann zenn ki izol zot lekor? Ki swa nou zenn oubyen vye, sa letan pe vini kot nou pou vreman bezwen kanmarad. La i le moman pour aprann travay ansanm e devlop sa linite ki pou vreman enportan a lavenir.

 “MANM EN SEL LEKOR”

14, 15. (a) Akoz Zeova pe form nou pour ini ozordi? (b) Ki konsey Zeova i donnen pour ankouraz nou pour ini ansanm?

14 Zeova pe ed nou “servi li zepol kont zepol.” (Tsef. 3:8, 9) I pe form nou pour nou kapab form parti son plan eternel. Ki sa i enplike? I anvi “reini ankor tou keksoz dan Kris.” (Lir Efezyen 1:9, 10.) Wi, i son plan pour ini konman en sel fanmir tou bann ki dan lesyel ek lo later pour ador li. Napa okenn dout, ki i pou arive fer sa. Konman en zenn, eski ou vwar sa nesesite pour travay dan linite avek lorganizasyon Zeova?

15 Zeova pe ansenny nou pour viv dan linite konmela menm, pour nou kapab viv dan linite pour touzour dan lavenir. Plizyer fwa dan Labib Zeova i demann nou pour pran “swen egal” avek kanmarad, “annan en gran lafeksyon pour kanmarad,” “konsol kanmarad” e “fortifye kanmarad.” (1 Kor. 12:25; Rom. 12:10; 1 Tesa. 4:18; 5:11) Zeova i konnen ki son bann serviter i enparfe e ki i kapab difisil pour zot ini ansanm, i pour sa rezon ki nou bezwen kontinyen “pardonn kanmarad.”Efe. 4:32.

16, 17. (a) Nonm en rezon akoz nou annan renyon. (b) Ki bann zenn i kapab aprann avek legzanp Zezi?

16 Zeova i osi donn nou bann renyon Kretyen pour ki nou aprann reste ini ansanm. Nou’n souvan lir sa lankourazman dan Ebre 10:24, 25. En rezon akoz i annan renyon se “pour pous kanmarad pour annan lanmour e fer sa ki byen.” Me i enportan pour note ki i annan sa bann renyon pour ki nou kapab “ankouraz kanmarad sirtou ki la sa Zour Senyer pe aprose.”

17 Konman en zenn, Zezi ti kit en bon legzanp pour montre ki i ti apresye sa laranzman. A laz 12 an i ti avek son paran kot en gran rasanbleman spirityel. I ti ariv en moman kot son paran ti pe rod li. Eski i ti’n al pas letan avek lezot zenn? Non, o kontrer Zozef ek Mari ti trouv li dan tanp pe diskit lo bann keksoz spirityel avek bann ansenyan.Lik 2:45-47.

18. Ki mannyer nou lapriyer i kapab ede ranforsi nou linite?

18 An plis ki devlop lanmour pour kanmarad e servi renyon Kretyen pour ranforsi sa linite ki egziste antre nou, nou kapab priy pour kanmarad. Ler  nou spesifik dan lapriyer konsernan nou bann frer ek ser, sa pou fer nou rapel ki kantite nou kontan zot. Pa zis bann adilt ki kapab e devret fer sa. Si ou en zenn, eski ou’n esey fer sa bann keksoz pour devlop en bon relasyon avek bann frer ek ser dan kongregasyon? Sa pou kapab ed ou fer sir ki ou pa atase avek sa lemonn ler i ariv ver son lafen.

Nou tou nou kapab priy pour nou bann frer ek ser (Vwar paragraf 18)

MONTRE KI ‘NOU FORM BANN MANM INI DAN EN SEL LEKOR’

19-21. (a) Dan ki fason remarkab nou kapab montre ki ‘nou form bann manm ini dan en sel lekor’? Donn legzanp. (b) Ki leson ou aprann atraver lafason ki serten frer ti reazir ler i ti annan dezas?

19 Pep Zeova pe deza aplik sa prensip dan Romen 12:5 ki dir: “Nou form bann manm ini parey dan en sel lekor.” Nou vwar sa ler i annan bann dezas. Par egzanp, an Desanm 2011 ti annan en tanpet tropikal ki ti lakoz en gro linondasyon Mindanao, en zil Filipin. Zis dan en swar plis ki 40,000 lakaz ti ganny inonde, enkli lakaz plizyer frer ek ser. Me, biro brans i raporte ki “menm avan ki komite sekour dan sa pei ti konmans donn son led, bann frer ek ser Kretyen sorti dan lezot landrwa ti pe anvoy led.”

20 Pareyman, ler i ti annan en gran tranblemandter ki ti lakoz en sounami dan les Zapon, bann frer ek ser ti perdi bokou keksoz. Serten ti’n perdi tou apre sa sounami. Par egzanp, Yoshiko ki ti reste 40 kilomet avek Lasal Rwayonm ti perdi son lakaz. I dir: “Pli tar, nou ti etonnen ler nou ti aprann ki son lannmen apre sa tranblemandter, sirveyan rezyonal ek en lot frer ti’n vin rod nou.” I osi azoute avek en gran sourir: “Nou ti vreman apresye ki kongregasyon ti pran byen swen avek nou bezwen spirityel. An plis ki sa, nou ti ganny bann gran dyaket, soulye, sak ek lenz dormi.” En manm komite led sekour i fer sa remark: “Bann frer dan Zapon antye ti azir dan linite e esey ed kanmarad. I ti annan menm bann frer ki ti sorti Leta-z-ini ki ti vin ede. Ler zot ti ganny demande akoz zot ti pare pour vwayaz sa gran zistans pour vin ede, zot ti dir, ‘Nou ini avek nou bann frer ek ser Zapon e zot bezwen led.’” Eski pa ou fyer pour form parti sa lorganizasyon ki pran byen swen avek son bann manm? Ou kapab asire ki Zeova i vreman kontan pour vwar sa kalite linite.

21 Si nou annan sa kalite linite antre nou la konmela, sa pou ed nou reste ini ler nou fer fas avek bann sityasyon difisil ki pou arive byento. Menm si i kapab ki nou pou nepli annan kontak avek bann frer ek ser dan lezot parti lemonn, nou pou reste ini avek nou bann frer ek ser dan nou kongregasyon. En ser zanponnen ki apel Fumiko e ki ti sirviv en siklonn Zapon i dir: “Lafen i vreman pros. Nou bezwen kontinyen ed nou bann frer ek ser anmezir ki nou pe esper sa letan kot pou nepli annan dezas.”

22. Ki byenfe nou pou gannyen a lavenir si nou ini?

22 Ki swa ou zenn oubyen vye, ler ou fer tou sa ki ou kapab pour ini ozordi ou pe prepar ou lekor pour sirviv lafen sa move lemonn kot i annan divizyon. Parey dan lepase, nou Bondye pou delivre son pep. (Iza. 52:9, 10) Gard antet ki ou kapab parmi bann ki ganny delivre si ou fer zefor pour form parti pep Bondye ki ini. En lot keksoz ki pou ed nou, se si nou pli apresye sa ki nou’n deza gannyen. Nou pou vwar sa dan lot lartik.

^ par. 8 2 Kronik 20:3, 4: Yeosafat ti per e i ti deside pour rod Zeova. Alor i ti demann Zida antye pour zennen. Pep Zida ti rasanble ansanm pour rod Zeova, zot ti sorti dan tou lavil Zida pour rod konsey avek Zeova.”

^ par. 11 Psonm 122:3, 4: Zerizalenm in ganny konstri konman en lavil ki’n zwenn ansanm konman en sel. Bann tribi in mont laba, bann tribi Ya, parey Izrael ti’n ganny rapel pour fer, pour remersye non Zeova.”