Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2014

“Sa pep ki Zeova i zot Bondye”

“Sa pep ki Zeova i zot Bondye”

“Ere sa pep ki Zeova i zot Bondye!”PS. 144:15.

1. Ki serten dimoun i panse lo bann ki ador Bondye?

BOKOU dimoun i dir ki bann gran larelizyon pa fer bokou pour ed limanite. Serten i dakor ki sa bann larelizyon i mal reprezant Bondye par zot lansennyman ek kondwit, alor i pa kapab ki zot annan laprouvasyon Bondye. Me zot krwar ki dan tou larelizyon i annan dimoun senser e ki Bondye i vwar zot e aksepte zot konman son bann adorater. Alor zot pa vwar li neseser ki sa bann dimoun i kit bann fo larelizyon pour ador Bondye dan en lot fason. Me eski Bondye i vwar keksoz dan sa fason? Pour reponn sa kestyon, annou vwar en pe listwar bann vre adorater Zeova dan Labib.

PEP KI BONDYE TI FER LALYANS AVEK

2. Lekel ki ti vin pep Zeova e kwa ki ti idantifye zot konman son pep? (Vwar portre anler.)

2 Apepre 4,000 an pase, Zeova ti swazir en group dimoun lo later pour vin son pep. Abraam ki ti enn parmi, ti ganny apele “papa tou sa ki annan lafwa” e i ti sef en gran fanmir kot i ti annan plizyer santenn serviter. (Rom. 4:11; Zen.  14:14) Bann dirizan Kanaan ti konsider li konman “en sef” e zot ti tret li avek respe. (Zen. 21:22; 23:6) Zeova ti fer en lalyans avek Abraam ek son desandans. (Zen. 17:1, 2, 19) Bondye ti dir Abraam: “Sa i mon lalyans ant mwan ek ou, ki ou ek ou desandans pou garde: Tou zonm parmi zot i devret ganny sirkonsi. . . . e sa pou en siny sa lalyans ant mwan ek zot.” (Zen. 17:10, 11) Parey zot ti ganny demande, Abraam ek tou bann zonm dan son lakour ti ganny sirkonsi. (Zen. 17:24-27) Sirkonsizyon ti en siny ki ti pou permet ki desandans Abraam i ganny idantifye konman sa sel pep ki Zeova ti’n fer en lalyans avek.

3. Ki mannyer desandans Abraam ti vin en pep?

3 Zakob oubyen Izrael, pti zanfan Abraam ti annan 12 garson. (Zen. 35:10, 22b-26) Avek letan zot ti pou vin bann sef fanmir sa 12 tribi Izrael. (Akt 7:8) Parski i ti annan lafanmin, Zakob ek son fanmir ti al rod refiz Lezip, kot Zozef enn garson Zakob ti’n ganny met ansarz pour distribye manze e ganny apwente sa dezyenm dimoun pli enportan apre Faraon. (Zen. 41:39-41; 42:6) Desandans Zakob ti ogmante e ti vin “en kongregasyon.”Zen. 48:4; Lir Akt 7:17.

ZEOVA I SOV SON PEP

4. O konmansman, ki relasyon ti egziste ant bann Ezipsyen ek desandans Zakob?

4 Pour en pti pe plis ki 200 an, desandans Zakob ti reste Lezip dan en rezyon ki apel Gosenn. (Zen. 45:9, 10) I paret ki apepre lanmwatye sa letan zot ti viv anpe ansanm avek bann Ezipsyen. Zot ti reste dan bann pti lavil e pran swen avek zot mouton ek bef. Faraon ti’n byen akeyir zot parski i ti konn Zozef byen e apresye li. (Zen. 47:1-6) Par kont, bann Ezipsyen ti konsider bann berze konman enferyer. (Zen. 46:31-34) Me zot ti bezwen aksepte ki bann Izraelit i viv dan zot pei.

5, 6. (a) Ki mannyer sityasyon pep Bondye ti sanze Lezip? (b) Ki mannyer Moiz ti ganny sove e ki Zeova ti fer pour Son pep?

5 Me sityasyon ti pou sanze pour pep Bondye. “Avek letan Lezip ti ganny en nouvo lerwa, enn ki pa ti konn Zozef. Alor i ti dir son pep: ‘Gete! Pep Izrael i plis ki nou e zot pli for ki nou.’ Sa ti fer ki bann Ezipsyen ti fors bann Izraelit pour vin lesklav. Zot ti fer zot lavi difisil par fer zot travay dir avek mortar ki’n ganny fer avek later, blok e tou sort kalite travay lesklav dan plantasyon. Zot ti fer zot travay dan bann kondisyon difisil dan tou sort kalite lesklavaz.”Egz. 1:8, 9, 13, 14.

6 Faraon ti menm donn lord ki tou bann garson Ebre ki ti pou ne i ganny touye. (Egz. 1:15, 16) I ti dan sa menm letan ki Moiz ti ne. Ler i ti annan trwa mwan son manman Yokebed ti kasyet li dan bann gran zerb dan Larivyer Nil kot i ti ganny trouve par fiy Faraon. Pli tar, sa fiy ti adopte li. Anmezir Moiz ti pe grandi i ti ganny elve par son manman ki ti fidel e sa ti fer ki li osi i ti vin en serviter fidel Zeova. (Egz. 2:1-10; Ebr. 11:23-25) Zeova “ti port latansyon” lo soufrans son pep e i ti deside pour tir zot dan lesklavaz anba gidans Moiz. (Egz. 2:24, 25; 3:9, 10) Alor zot ti pou vin en pep ki ganny “sove” par Zeova.Egz. 15:13; Lir Deterononm 15:15. *

PEP BONDYE I VIN EN NASYON

7, 8. Ki mannyer pep Zeova ti vin en nasyon sen?

7 Kantmenm Zeova pa ti ankor  organiz bann Izraelit konman en nasyon, i ti konsider zot konman son pep. Se pour sa ki i ti demann Moiz ek Aaron pour al dir Faraon: “La sa ki Zeova Bondye Izrael i dir, ‘Les mon pep ale pour zot kapab selebre en lafet pour mwan dan dezer.’”Egz. 5:1.

8 Pour delivre bann garson Izrael dan lesklavaz Lezip, Zeova ti anvoy dis fleo e detri Faraon ek son larme dan Lanmer Rouz. (Egz. 15:1-4) Mwens ki trwa mwan pli tar, Zeova ti fer en lalyans avek bann Izraelit kot Montanny Sinai e promet zot: “Si zot vreman obei sa ki mon’n dir e gard mon lalyans, zot pou sirman vin mon propriyete spesyal parmi tou pep, . . . en nasyon sen.”Egz. 19:5, 6.

9, 10. (a) Dapre Deterononm 4:5-8 ki mannyer Lalwa ti disteng bann Izraelit ek lezot nasyon? (b) Ki bann Izraelit ti bezwen fer pour montre ki zot “en pep sen pour Zeova”?

9 Pour plizyer syek se bann sef fanmir parmi bann serviter Zeova ki ti servi konman dirizan, ziz ek pret. Ler bann Izraelit ti Lezip, zot ti swiv sa menm sistenm avan ki zot ti vin lesklav. (Zen. 8:20; 18:19; Zob 1:4, 5) Me apre ki Zeova ti’n liber bann Izraelit i ti donn zot bann lalwa ki ti disteng zot avek tou lezot nasyon. (Lir Deterononm 4:5-8; * Ps. 147:19, 20) Dapre Lalwa i ti annan en group ki ti ganny met apar pour servi konman pret e “bann ansyen” ki ti ganny byen respekte pour zot konnesans ek lasazes ti servi konman ziz. (Det. 25:7, 8) Lalwa ti donn sa nouvo nasyon lenstriksyon konsernan zot ladorasyon ek bann aktivite tou le zour.

10 Zis avan ki bann Izraelit ti antre dan Later Promiz, Zeova ti repet son bann lalwa avek zot e Moiz ti dir zot: “Ozordi Zeova in fer ou dir ki ou pou vin son pep, son propriyete spesyal zis parey i’n promet ou e ki ou pou obeir tou son komannman e ki i pou met ou par lao tou lezot nasyon ki i’n fer, donn ou louanz, loner ek laglwar lefet ki ou montre ki ou en pep sen pour Zeova ou Bondye.”Det. 26:18, 19.

LEZOT NASYON TI KAPAB ADOR ANSANM AVEK PEP ZEOVA

11-13. (a) Lekel ki ti vin bann adorater ansanm avek pep Bondye? (b) Si en dimoun ki pa ti Izraelit ti anvi ador Zeova ki i ti pou bezwen fer?

11 Menm si Zeova ti annan en pep ki i ti’n swazir lo later, i pa ti anpes bann dimoun ki pa ti Izraelit viv parmi son pep. I ti les “en gran lafoul tou sort kalite dimoun” ki pa ti bann Izraelit, enkli bann Ezipsyen, al avek son pep ler i ti delivre zot Lezip. (Egz. 12:38) Ler zot ti pe al ganny frape par setyenm fleo, serten “parmi bann serviter Faraon” ti obeir parol Zeova e san dout zot ti enkli parmi tou sort kalite dimoun ki ti kit Lezip avek bann Izraelit.Egz. 9:20.

12 Zis avan ki bann Izraelit ti travers Larivyer Zourden pour pran Kanaan, Moiz ti dir zot ki zot “bezwen kontan bann rezidan etranze” ki parmi zot. (Det. 10:17-19) Pep Bondye ti devret aksepte nenport etranze ki ti pare pour obeir bann lalwa de baz ki ti’n ganny donnen avek Moiz. (Lev. 24:22) I ti annan serten rezidan etranze ki ti vin  bann adorater Zeova e zot ti annan menm santiman ki Rit en Moabit ki ti dir avek Naomi en Izraelit: “Ou pep pou vin mon pep e ou Bondye mon Bondye.” (Rit 1:16) Sa bann rezidan etranze ti vin bann adorater Zeova e bann zonm ti ganny sirkonsi. (Egz. 12:48, 49) Zeova ti aksepte zot parmi son pep.Nom. 15:14, 15.

Bann Izraelit ti kontan bann rezidan etranze ki ti viv parmi zot (Vwar paragraf 11-13)

13 Kan tanp Salomon ti ganny dedye avek Zeova, i ti annan provizyon ki ti ganny fer pour bann ki pa ti Izraelit. Sa i ganny fer resorti dan lapriyer Salomon, ki dir: “Osi konsernan sa etranze ki pa form parti ou pep Izrael, ki sorti dan en pei lwenten akoz ou gran non, ou lanmen for, ou lebra ouver e i vin priy ver sa lakaz, ki ou ekoute depi lesyel kot ou reste e fer tou sa ki sa etranze i demann ou, pour ki tou pep lo later i konn ou non e annan lakrent, parey pep Izrael i fer e ki zot konnen ki sa lakaz ki mon’n konstri i port ou non.” (2 Kron. 6:32, 33) Menm dan letan Zezi, nenport dimoun ki pa ti Izraelit me ki ti anvi ador Zeova ti bezwen asosye avek Son pep ki i ti’n fer en lalyans avek.Zan 12:20; Akt 8:27.

EN NASYON KI SERVI KONMAN BANN TEMWEN

14-16. (a) Dan ki fason bann Izraelit ti pou en nasyon ki servi konman bann temwen pour Zeova? (b) Ki Bondye ti ekspekte son pep fer?

14 Bann Izraelit ti ador Zeova zot Bondye, tandis ki lezot nasyon zot ti ador zot prop bondye. Alor, en kestyon enportan ti bezwen ganny reponn: Lekel ki ti sa vre Bondye? Dan letan Izai Zeova ti dir ki sa kestyon ti pou bezwen ganny reponn dan menm fason ki en kestyon i ganny reponn ankour. I ti dir ki si bondye bann nasyon ti vre, zot ti bezwen prezant zot prop temwen ankour. I ti dir: “Reini tou bann nasyon dan en landrwa e rasanble tou pep ansanm. Lekel parmi [zot bondye] ki kapab dir sa? Oubyen eski zot kapab dir nou davans sa ki pou arive? Les zot anmenn zot bann temwen pour montre ki zot annan rezon oubyen les zot tande e dir, ‘Sa i vre!’”Iza. 43:9.

 15 Bondye bann nasyon pa ti kapab donn okenn levidans ki zot ti vre parski zot ti zis bann senp zidol ki pa ti kapab koze e menm bezwen en dimoun pour anmenn zot. (Iza. 46:5-7) De lot kote, Zeova ti dir son pep Izrael: “Zot mon bann temwen, wi mon serviter ki mon’n swazir, pour ki zot kapab konn mwan e annan lafwa dan mwan e konpran ki mon pa’n sanze. Avan mwan, i ti napa okenn Bondye e apre mwan i napa en lot. Mwan, mon Zeova e napa okenn sover apard mwan. . . . Alor zot mon bann temwen e mwan, mon Bondye.”Iza. 43:10-12.

16 Parey bann temwen ki pas ankour, pep Zeova ti annan sa loner pour rann temwannyaz ki Zeova i sa sel vre Bondye. I ti apel zot “sa pep ki mon’n formen pour mwan, pour ki zot koz lo mon louanz.” (Iza. 43:21) Zot ti sa pep ki ti port son non. Zeova ti’n sov zot Lezip, alor i ti toutafe normal ki i ti ekspekte ki zot obeir li volonterman e siport son souvrennte devan tou pep lo later. Profet Mika ti eksprim sa leta lespri ki zot ti’n devret annan, i ti dir: “Tou pep pou mars sakenn o non zot bondye, me nou pou mars o non nou Bondye Zeova pour touzour.”Mik. 4:5.

PEP BONDYE I REBEL

17. Devan Zeova ki mannyer Izrael ti vin “en pye rezen etranze ki’n dezenere”?

17 Malerezman, bann Izraelit pa ti fidel anver zot Bondye Zeova. Zot ti les zot ganny enfliyanse par bann nasyon ki ti ador bann bondye ki ti’n ganny fer avek dibwa ek ros. Dan wityenm syek A.N.L., profet Osea ti ekrir: “Izrael i en pye rezen ki dezenere . . . I fer plis lotel. . . . Zot ipokrit dan zot leker, aprezan zot pou ganny trouve koupab.” (Ose. 10:1, 2) Apepre 150 an pli tar, Zeova ti demann Zeremi pour dir sa avek Son pep enfidel: “Mon ti plant ou konman sa pli bon pye rezen rouz, zot ti bann bon lagrenn, alor ki mannyer ou’n sanze devan mwan pour vin bourzon en pye rezen etranze ki’n dezenere? . . . Oli ou bann bondye ki ou ti fer pour ou menm? Les zot leve si zot kapab sov ou dan ou maler . . . Mon prop pep in oubliy mwan.”Zer. 2:21, 28, 32.

18, 19. (a) Ki mannyer Zeova ti predir ki i ti pou annan en nouvo pep pour son non? (b) Ki nou pou egzaminen dan sa lartik ki swiv?

18 Olye prodwir bon fri, nasyon Izrael ti prodwir move fri akoz zot ti pe ador zidol, alor zot ti rezet vre ladorasyon e ti pe nepli azir konman bann temwen fidel pour Zeova. I pour sa rezon ki Zezi ti dir bann sef relizye Zwif ipokrit dan son letan: “Zot pou ganny arase Rwayonm Bondye, e ganny donnen a en lot nasyon ki pou prodwi son fri.” (Mat. 21:43) Zis bann ki dan sa “nouvo lalyans” ki ti’n ganny predir par Zeova atraver son profet Zeremi ki ti kapab form parti sa nouvo nasyon, setadir Izrael spirityel. Konsernan bann Izraelit spirityel avek ki sa nouvo lalyans ti pou ganny fer, Zeova ti dir: “Mon pou vin zot Bondye e zot pou vin mon pep.”Zer. 31:31-33.

19 Zis parey in ganny fer resorti, apre ki nasyon Izrael ti vin enfidel, Zeova ti swazir Izrael spirityel pour vin son pep dan premye syek. Be lekel ki son pep lo later ozordi? Ki mannyer bann dimoun senser i kapab idantifye bann vre adorater Bondye? Nou pou reponn sa bann kestyon dan sa lartik ki swiv.

^ par. 6 Deterononm 15:15: “Rapel ki ou ti vin en lesklav Lezip e ki ou Bondye Zeova ti sov ou. Se pour sa rezon ki mon pe demann ou pour fer sa ozordi.”

^ par. 9 Deterononm 4:5-8: Gete, mon’n ansenny zot regilasyon ek zizman, zis parey mon Bondye Zeova in donn mwan lord pour fer, pour ki zot obeir zot dan sa pei ki zot pou pran. Zot devret gard e aplik zot, akoz sa pou montre ki zot annan lasazes ek konprenezon devan tou dimoun ki pou antann konsernan tou sa bann regilasyon e zot pou dir, ‘Sa gran nasyon i en pep ki vreman saz e ki annan konprenezon.’ Akoz lekel sa gran nasyon ki annan bann bondye pros avek li parey Zeova nou Bondye ki toultan la ler nou kriy li? Lekel sa gran nasyon ki annan bann regilasyon ek zizman ki drwat parey sa Lalwa ki mon pe met devan zot ozordi?”