Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2014

Nou devret sen dan tou nou kondwit

Nou devret sen dan tou nou kondwit

“Vin sen dan tou zot kondwit.”1 PYER 1:15.

1, 2. (a) Ki Bondye i ekspekte avek son pep? (b) Ki kestyon nou pou reponn dan sa lartik?

ANBA lenspirasyon, zapot Pyer ti sit liv Levitik pour montre ki bann Kretyen i devret sen zis parey bann Izraelit ti devret sen. (Lir 1 Pyer 1:14-16.) Zeova nou ‘Bondye ki sen’ i ekspekte ki bann Kretyen swazir ek “lezot mouton” i fer tou sa ki zot kapab pour vin sen dan tou zot kondwit, me pa zis dan serten laspe.Zan 10:16NW.

2 Dan sa lartik nou pou egzamin lezot trezor spirityel dan liv Levitik ki pou benefisye nou en kantite e si nou met an pratik sa ki nou aprann sa pou ed nou vin sen dan tou nou kondwit. Nou pou osi reponn bann kestyon parey, ki mannyer nou devret vwar konpromi? Ki liv Levitik i ansenny nou konsernan siport souvrennte Zeova? Ki nou kapab aprann par bann sakrifis ki ti ganny ofer?

FER ATANSYON KONPROMI

3, 4. (a) Akoz bann vre Kretyen i devret evite fer konpromi kont bann lalwa ek prensip Labib? (b) Akoz nou pa devret revanze oubyen gard rankin?

3 Si nou anvi fer plezir Zeova, nou bezwen reste atase avek son bann lalwa ek prensip e pa zanmen adopte en latitid ki pou fer nou vin enpir akoz nou’n fer konpromi kont son bann lalwa.  Menm si nou pa anba Lalwa Moiz, sa Lalwa i fer nou konpran sa ki akseptab e sa ki pa akseptab devan Zeova. Par egzanp, bann Izraelit ti ganny sa konmann: “Ou pa devret revanze, ni gard rankin kont bann garson ou pep e ou devret kontan ou prosen parey ou menm. Mwan mon Zeova.”Lev. 19:18.

4 Zeova pa oule ki nou revanze e gard rankin. (Rom. 12:19) Si nou inyor bann lalwa ek prensip Bondye, sa pou fer plezir Satan e sa i kapab anmenn repros lo Zeova. Menm si en dimoun in bles nou par ekspre, annou pa gard rankin. Labib i dekrir nou konman “bann vaz later” ki pe anmenn en trezor. Sa trezor i nou minister. (2 Kor. 4:1, 7) Alor, nou pa anvi gard rankin ki parey en lasid dan sa menm vaz kot sa trezor i ete.

5. Ki nou kapab aprann avek legzanp Aaron e lanmor son de garson? (Vwar portre lo paz 13.)

5 I fer lapenn sa ki ti arive avek fanmir Aaron dan Levitik sapit 10:1-11. Zot ti bezwen dan sok e tris kan dife sorti dan lesyel ti bril Nadab ek Abiou, sa de garson Aaron kot tabernak. Apre sa, Bondye ti dir Aaron ek son fanmir ki zot pa ti pou kapab dan dey. Pa sa ti’n bezwen teste zot lafwa! Eski ou pe montre ki ou sen par evite asosye avek ou manm fanmir oubyen lezot ki’n ganny ekskli?Lir 1 Korentyen 5:11.

6, 7. (a) Ler nou pe deside si nou pou partisip dan en maryaz ki pou ganny fer kot legliz, ki bann pwen enportan nou bezwen pran an konsiderasyon? (Vwar not anba paz.) (b) Ki mannyer nou kapab eksplik nou fanmir ki pa Temwen konsernan nou pozisyon lo en maryaz ki pou ganny fer kot legliz?

6 Petet nou pa pou bezwen pas atraver en tes sever parey Aaron ek son fanmir ti pas ladan. Me ki nou ti pou fer si nou ti ganny envite en maryaz par enn nou fanmir ki pa Temwen e ganny demande pour partisip dan sa seremoni ki pe ganny fer kot legliz? Napa okenn verse Labib ki dir nou pa asiste, me toudmenm, eski i annan bann prensip Labib ki kapab ed nou fer en desizyon? *

7 Nou determinasyon pour montre ki nou sen devan Zeova dan sa sirkonstans ki nou’n mansyonnen i kapab konfiz nou fanmir ki pa Temwen. (1 Pyer 4:3, 4) Byensir, nou pou esey pa ofans zot, alor i bon pour koz avek zot dan en bon fason me fran. Petet sa i kapab ganny fer byen davans. Nou kapab remersi zot e dir zot ki nou kontan ki zot in envit nou pour partisip dan zot maryaz. Apre sa, nou kapab dir ki akoz sa seremoni i enplik bann keksoz ki annan pour fer avek larelizyon, si nou partisip ladan sa i kapab anbarasan pour zot ek zot bann envite me nou ti pou pli kontan ki zot ere sa zour. Sa i en fason ki nou kapab evite fer konpromi kont nou lafwa ek nou krwayans.

SIPORT SOUVRENNTE ZEOVA

8. Ki mannyer liv Levitik i fer resorti souvrennte Zeova?

8 Liv Levitik i fer resorti souvrennte Zeova. Plis ki 30 fwa nou lir ki bann lalwa dan liv Levitik i sorti kot Zeova. Moiz ti rekonnet sa, alor i ti fer sa ki Zeova ti demann li pour fer. (Lev. 8:4, 5) Zis parey Moiz, nou devret touzour fer sa ki nou Souvren Zeova i demann nou. Pour fer sa nou annan sipor lorganizasyon Bondye. Me menm si lorganizasyon Zeova pou ed nou, par ler nou pou tousel ler nou lafwa i ganny teste, parey i ti leka pour Zezi ler i ti dan dezer. (Lik 4:1-13) Si nou konsantre lo souvrennte Bondye e annan konfyans dan li, napa personn ki pou kapab fer nou fer konpromi e les lafreyer dekouraz nou.Prov. 29:25.

9. Akoz dimoun dan lemonn antye i ay pep Bondye?

9 Nou ekspekte ki bann disip Zezi e bann ki Temwen pour Zeova dan lemonn  antye i ganny persekite parski Zezi ti dir: “Zot pou ganny persekite e met a-mor. Tou dimoun pou ay zot akoz mwan.” (Mat. 24:9) Menm si dimoun i ay nou, nou persevere dan predikasyon e kontinyen montre ki nou sen devan Zeova. Akoz dimoun i ay nou kantmenm nou bann dimoun onnet ki viv en lavi pir e bann sitwayen ki obeir lalwa? (Rom. 13:1-7) Parski nou’n swazir Zeova konman nou Souvren Senyer. Nou rann zis “li tousel” en servis sakre e nou pa pou zanmen fer konpromi konsernan son bann lalwa ek prensip drwat.Mat. 4:10.

10. Ki ti arive avek en frer ki ti fer konpromi?

10 Nou osi “pa fer parti lemonn.” I pour sa rezon ki nou pa pran par dan lager ni pran okenn kote dan bann zafer politik sa lemonn. (Lir Zan 15:18-21; Izai 2:4. *) Serten Kretyen pa’n respekte zot dedikasyon, zot in fer konpromi par partisip dan lager e pran par dan politik. I annan en kantite parmi zot ki’n repantir e reganny zot bon relasyon avek nou Papa ki dan lesyel ki demontre mizerikord. (Ps. 51:17) Par kont, serten pa’n repantir. Par egzanp Laongri, pandan Dezyenm Lager Mondyal, bann zofisye ti pran 160 frer, mwens ki 45 an ki ti’n ganny met dan prizon san okenn rezon valab e rasanble zot tou dan en lavil. La zot ti fors sa bann frer pour fer servis militer. Laplipar sa bann frer ti reste fidel e refize, me nef parmi zot ti pret serman militer e aksepte liniform larme. De-z-an pli tar, enn parmi sa nef frer ki ti’n fer konpromi ti parmi sa group zonm ki ti’n ganny demande pour fiziye sa bann Temwen Zeova fidel. Son prop frer ti enn parmi sa bann Temwen ki ti’n ganny anlinyen pour ganny egzekite. Me sa bann frer pa ti ganny egzekite.

OFER ZEOVA OU MEYER

11, 12. Ki leson bann Kretyen ozordi i aprann atraver bann sakrifis ki ti ganny fer dan letan lontan Izrael?

11 Dapre Lalwa Moiz bann Izraelit ti bezwen fer bann sakrifis spesifik. (Lev. 9:1-4, 15-21) Sa bann sakrifis ti bezwen san defo akoz zot ti pe reprezant sa sakrifis parfe ki Zezi ti pou fer. Deplis, zot ti bezwen swiv bann prosedir spesifik pour fer sa bann diferan lofrann oubyen sakrifis. Par egzanp, annou vwar ki en manman ki ti’n fek ganny son pti baba ti bezwen fer. Levitik 12:6 i dir: “Ler bann zour pirifikasyon pour en garson oubyen en fiy i fini ganny fer, sa manman pou anmenn en zenn mal mouton ki dan son premye lannen konman en lofrann brile e en pti pizon oubyen tourtrel konman en lofrann pese kot larantre latant pour renyon, kot sa pret.” Menm si sa ki Bondye ti demann bann Izraelit pour fer ti spesifik, son Lalwa i montre ki i annan lanmour e i rezonnab. Si sa manman ti napa sa mwayen pour ofer en mouton, i ti kapab ofer de tourtrel oubyen de pti pizon. (Lev. 12:8) Menm si sa adorater Bondye ti pov, Bondye ti kontan e apresye li parey sa enn ki ti kapab anmenn en lofrann ki ti pli ser. Ki nou kapab aprann avek sa legzanp?

12 Zapot Pol ti ankouraz son bann konpanyon dan lafwa pour “rann glwar Bondye,” setadir en sakrifis louanz. (Ebr. 13:15) Nou fer sa kan nou koz lo non Zeova avek lezot. Bann frer ek ser ki sourd i servi langaz siny pour loue Bondye. Bann Kretyen ki pa kapab deplase i loue Zeova swa par let, telefonn e menm pres avek bann dimoun ki vin vizit zot kot zot. Pour loue Zeova par fer konnen son non e anons sa bon nouvel i tou depan lo nou lasante ek abilite. Me nou bezwen touzour donn li nou meyer.Rom. 12:1; 2 Tim. 2:15.

13. Akoz nou devret raport nou aktivite predikasyon?

 13 Nou ofer nou bann sakrifis louanz volonterman avek Bondye akoz nou kontan li. (Mat. 22:37, 38) Me nou’n ganny demande pour raport sa ki nou fer dan predikasyon. Alor, ki leta lespri nou devret annan anver sa laranzman? Nou devret pare pour fer sa akoz dan sa fason nou demontre nou latasman pour Bondye. (2 Pyer 1:7) Byensir, personn parmi nou pa devret santi li anba presyon pour fer en kantite erdtan dan predikasyon zis pour donn en rapor pour montre ki i’n pres bokou. I pour sa rezon ki en proklanmater ki dan en lenstitisyon pour bann dimoun aze oubyen ki pa kapab fer bokou dan predikasyon akoz son laz oubyen lasante i kapab rann en rapor 15 minit olye bann erdtan konplet. Vi ki sa i sa meyer ki sa proklanmater i kapab fer, Zeova i apresye sa bann minit. Pour li sa i lafason ki sa proklanmater pe eksprim son lanmour ek lapresyasyon pour sa privilez ki i annan pour servi konman enn Son Temwen. Zis parey bann Izraelit ki zot sirkonstans pa ti permet zot ofer bann sakrifis ki ti kout pli ser, bann serviter Zeova ozordi ki napa sa mwayen pour fer plis i ankor kapab rann en rapor. Nou rapor i enkli dan rapor mondyal e sa i ed lorganizasyon pour fer plan pour lavenir konsernan nou aktivite predikasyon. Alor, ler nou ganny demande pour rann en rapor servis, eski nou vwar sa konman en keksoz ki nou pa kapab fer?

LAFASON KI NOU ETIDYE E LOUE BONDYE

14. Eksplike akoz nou devret egzamin lafason ki nou etidye?

14 La ki nou’n dekouver detrwa trezor spirityel dan liv Levitik ou kapab pe mazinen, ‘Aprezan mon pli byen konpran akoz sa liv in ganny enkli dan Parol enspire Bondye.’ (2 Tim. 3:16) I kapab ki aprezan ou pli determinen pour montre ki ou sen, pa zis akoz Zeova i demann ou pour vin sen me akoz i merit tou ou zefor pour fer li plezir. Petet sa ki ou’n aprann lo Levitik dan sa de lartik in motiv ou pour anvi etidye Labib pli o profon. (Lir Proverb 2:1-5. *) Priye pour ki ou amelyor lafason ki ou etidye. Sirman ou anvi ofer bann sakrifis louanz ki Zeova pou aksepte. Eski ou’n remarke ki ou pe les bann progranm lo televizyon, zwe video, bann aktivite sportif oubyen bann pastan distrer ou e anpes ou fer bann progre spirityel? Si sa i leka, ou kapab vwar li itil pour medit lo sa ki zapot Pol ti ekrir dan liv Ebre.

Eski ou pe fer Ladorasyon Fanmir ek letid Labib en priyorite dan ou lavi? (Vwar paragraf 14)

15, 16. Akoz Pol ti sitan fran ler i ti ekrir bann Kretyen Ebre?

15 Pol ti fran kan i ti ekrir son bann frer ek ser Ebre. (Lir Ebre 5:7, 11-14.) Sa zapot pa ti pas par kat semen pour dir sa ki i ti annan pour dir. I ti dir zot ki kantmenm zot tande zot “lapenn konpran.” Akoz Pol ti sitan serye e fran? I ti pe demontre lanmour  ek lentere ki Zeova i annan pour bann Kretyen ki ti pe esey viv lo dile spirityel. I vre ki nou bezwen konn bann lansennyman de baz lo Labib. Me si nou anvi progrese dan laverite e vin en Kretyen matir nou bezwen “nouritir solid.”

16 Olye progrese ziska ki zot ti kapab ansenny lezot, bann Ebre zot menm ti bezwen ki en dimoun i ansenny zot. Akoz? Parski zot pa ti manz “manze solid.” Alor, demann ou lekor: ‘Eski mon annan sa bon leta lespri konsernan nouritir spirityel ki solid? Eski mon enpasyan pour etidye? Oubyen eski mon negliz lapriyer ek letid Labib o profon? Si wi, eski mon problenm i relye avek lafason ki mon etidye?’ Nou pa zis ganny demande pour pres avek lezot me nou osi ganny demande pour ansenny zot e fer disip.Mat. 28:19, 20.

17, 18. (a) Akoz nou devret regilyerman manz nouritir spirityel ki solid? (b) Ki pwennvi nou bezwen annan konsernan servi lalkol avan ki nou al renyon?

17 Bokou parmi nou pa vwar li fasil pour etidye Labib. Me Zeova pa fors son pep pour etidye Labib. Par kont, ki swa nou’n batize pour plizyer lannen oubyen pa tro lontan, nou devret kontinyen manz nouritir spirityel ki solid si nou anvi viv en lavi ki sen.

18 Nou bezwen byen egzamin Labib e fer sa ki Bondye i demann nou pour nou kapab vin sen. Gete ki ti arive avek Nadab ek Abiou bann garson Aaron ki ti ganny touye akoz zot ti ofer lansan ki pa ti annakor avek Lalwa, petet apre ki zot ti’n bwar. (Lev. 10:1, 2) Remarke ki Bondye ti dir Aaron apre sa. (Lir Levitik 10:8-11. *) Eski sa resi i vedir ki nou pa devret bwar okenn lalkol avan ki nou asiste renyon? Mazin sa bann pwen: Nou pa anba Lalwa. (Rom. 10:4) Dan serten pei nou bann frer ek ser i servi lalkol avek moderasyon pandan zot repa avan ki zot al renyon. Kat lakoup diven ti ganny servi pandan Lapak. Kan Zezi ti entrodwir Memoryal i ti fer son bann disip bwar diven ki ti reprezant son disan. (Mat. 26:27) Me Labib i defann bwar en kantite e osi kondann bann soular. (1 Kor. 6:10; 1 Tim. 3:8) An plis, konsyans bokou Kretyen i pous zot pour pa bwar lalkol ditou avan ki zot fer okenn servis sakre. Me nou konnen ki sirkonstans i diferan dan sak pei, alor sa ki enportan pour bann Kretyen se pour konn “disteng ant sa ki sen e sa ki pa sen” pour zot kapab vin sen dan tou zot kondwit e fer plezir Bondye.

19. (a) Ki nou devret gard antet konsernan Ladorasyon Fanmir ek letid personnel? (b) Ki ou determinen pour fer pour montre ki ou sen?

19 Ou pou dekouver bokou trezor spirityel si ou fouy dan Parol Bondye. Servi bann zouti resers ki disponib pandan ou Ladorasyon Fanmir ek letid personnel pour ki i pli enteresan. Aprann plis lo Zeova ek son plan e kontinyen apros avek li. (Zak 4:8) Priy Bondye parey sa Psalmis ki ti sante: “Ouver mon lizye pour ki mon kapab vwar klerman bann keksoz merveye dan ou lalwa.” (Ps. 119:18) Pa zanmen fer konpromi kont bann lalwa ek prensip Labib. Pare pour obeir lalwa Zeova nou ‘Bondye ki sen’ e partisip avek devouman dan sa ‘servis sakre pour anons Bonn Nouvel Bondye.’ (1 Pyer 1:15; Rom. 15:16) Montre ki ou sen pandan sa bann dernyen zour ki difisil. Annou sen dan tou nou kondwit e koumsa nou pou kapab siport souvrennte Zeova, nou Bondye ki sen.

^ par. 6 Vwar “Kestyon lekter” dan Latour Veyer le 15 Me 2002, an Angle.

^ par. 10 Izai 2:4: “I pou ziz bann nasyon e remet keksoz drwat pour bokou pep. Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.”

^ par. 14 Proverb 2:1-5: Mon garson, si ou obei mon parol e apresye mon bann komannman parey en trezor par port latansyon lo lasazes avek ou zorey e ouver ou leker ver disernman, an plis, si ou kriy ver konprenezon e ou kriy for ver disernman, si ou kontinyen rod li konmsi larzan e si ou kontinyen rod li konmsi ou pe rod bann trezor kasyet, alor, ou pou konpran ki si sa lakrent pour Zeova e ou pou trouv konnesans konsernan Bondye.”

^ par. 18 Levitik 10:8-11: Apre Zeova ti dir Aaron: ‘Pa bwar diven oubyen labwason for, ou avek ou bann garson, kan zot vin dan latant pour renyon, pour ki zot pa mor. Sa i en lalwa pour zot zenerasyon pour en letan endefini. 10 Sa i pour disteng ant sa ki sen e sa ki pa sen, ant sa ki enpir e sa ki pir 11 e pour ansenny bann Izraelit tou regilasyon ki Zeova in dir zot atraver Moiz.’”