Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  July 2017

“I ava . . . realiz tou ou bann plan”

“I ava . . . realiz tou ou bann plan”

“Pran pli gran plezir dan [Zeova]. I ava donn ou, tou sa ki ou leker i dezir.”​—PSONM 37:4.

KANTIK: 89, 140

1. Ki bann zenn i bezwen deside konsernan zot lavenir? Kwa ki kapab ed zot pour pa tro enkyet? (Vwar portre o konmansman sa lartik.)

ZENN, i tre probab ou pou dakor ki avan konmans en vwayaz, i saz pour plàn kote ou pou ale. Lavi i parey en vwayaz e ou bezwen fer plan kote ou anvi ale ler ou ankor zenn. Byensir, petet i pa pou fasil pour fer sa plan. En fiy ki apel Heather ti dir: “I fer per. Ou bezwen deside ki ou pou fer avek larestan ou lavi.” Si ou santi koumsa, rapel ki Zeova i dir: “Pa bezwen enkyet, akoz mwan menm ou Bondye. Mon pou rann ou for, mon pou ed ou.”​—Izai 41:10.

2. Ki mannyer ou konnen ki Zeova i anvi ki ou plàn pour en lavenir ere?

2 Zeova i ankouraz ou pour fer en bon plan pour ou lavenir. (Eklezyast 12:1; Matye 6:20) I anvi ki ou ere. Ler ou vwar, tande e gout bann keksoz ki i’n kree, ou konnen ki sa i vre. Zeova i osi pran swen avek nou dan lezot fason. I konsey e ansenny nou sa pli bon fason pour viv nou lavi. Se pour sa rezon ki i pa kontan ler dimoun i rezet son  konsey saz. I dir bann ki pa swiv son gidans: “Zot ti . . . swazir sa ki pa fer mwan plezir. . . . Mon bann serviter pou dan lazwa, me zot, zot pou dan laont. Mon bann serviter pou sante avek lazwa dan zot leker.” (Izai 65:12-14) Ler nou fer bann bon swa dan lavi, sa i anmenn loner pour Zeova.​—Proverb 27:11.

BANN PLAN KI POU FER OU ERE

3. Ki Zeova i konsey ou pour fer?

3 Ki plan Zeova i konsey ou pour fer? Pour ki ou ere, ou bezwen konn Zeova e servi li. Sa i fason ki Zeova in kree bann imen. (Psonm 128:1; Matye 5:3) Bann zannimo i zis manze, bwar e fer piti, me Zeova i anvi ki ou plàn ou lavi dan en fason ki fer sans e ki pou fer ou ere. Ou Kreater i sa “Bondye lanmour,” “sa Bondye ere” ki’n kree nou “dan son limaz.” (2 Korentyen 13:11; 1 Timote 1:11; Zenez 1:27) Ou pou ere ler ou imit nou Bondye lanmour. Labib i dir: “I annan plis lazwa pour donnen ki pour resevwar.” (Akt 20:35) Pa ou’n deza santi koumsa? Sa i en laverite fondamantal dan lavi. Alor, Zeova i anvi ki ou plan pour lavenir i baze lo lanmour pour lezot e pour li.​—Lir Matye 22:36-39.

Ou pou ere ler ou demontre lanmour

4, 5. Kwa ki ti fer Zezi ere?

Zenn, Zezi in kit en legzanp parfe pour zot. Sirman i ti’n bezwen zwe e anmize ler i ti en zanfan. Parey Parol Bondye i dir, i annan “en letan pour riye” e “en letan pour danse.” (Eklezyast 3:4) Zezi ti osi etidye Lekritir pour vin pros avek Zeova. Ler i ti annan 12 an, bann ansenyan kot tanp ti etonnen par “son larepons ek son lentelizans.”​—Lik 2:42, 46, 47.

5 Ler Zezi ti vin en adilt, i ti ere akoz i ti fer sa ki Zeova ti demann li. Par egzanp, Bondye ti demann li “pour anons bon nouvel avek bann pov” e “pour fer bann aveg vwar kler.” (Lik 4:18) Psonm 40:8 i dekrir bann santiman Zezi: “Mon Bondye! Mon oule fer ou lavolonte.” Zezi ti kontan ansenny bann dimoun lo son Papa. (Lir Lik 10:21.) En fwa, apre ki i ti’n koz lo vre ladorasyon avek en madanm, Zezi ti dir son bann disip: “Mon manze se pour fer lavolonte sa enn ki’n anvoy mwan e pour fini son travay.” (Zan 4:31-34) Zezi ti ere akoz i ti demontre lanmour pour Bondye e pour lezot. Si ou fer parey, ou osi ou pou ere.

6. Akoz i byen pour koz avek lezot konsernan ou plan pour lavenir?

6 Plizyer Kretyen ti konmans fer pionye ler zot ti ankor zenn e sa ti fer zot ere. Eski ou kapab koz avek zot konsernan ou plan? “En proze pa reisi si nou pa demann konsey; me i reisi kan i annan bokou konseye.” (Proverb 15:22) I tre probab ki sa bann frer ek ser pou dir ou ki fer pionye i donn ou en ledikasyon ki pou ed ou tou dilon ou lavi. Zezi ti aprann en kantite  keksoz avek son Papa ler i ti dan lesyel. Apre sa, i ti kontinyen aprann pandan son minister lo later. I ti ganny lazwa anmezir ki i ti anons sa bon nouvel avek lezot e gard son lentegrite ler i ti pas dan bann sityasyon difisil. (Lir Izai 50:4; Ebre 5:8; 12:2) Aprezan, annou vwar akoz servis a plen tan i kapab fer ou ere.

AKOZ FER DISIP I SA PLI BON TRAVAY?

7. Akoz bokou zenn i kontan fer disip?

7 Zezi ti dir nou al “kot bann dimoun . . . e fer zot vin mon disip” e ansenny zot. (Matye 28:19, 20) Si ou pe plàn pour fer sa travay fer disip ou karyer, ou pou annan en lavi satisfezan ki onor Bondye. Parey avek tou karyer, ou bezwen pran letan pour vin efikas. En frer ki apel Timothy ki ti konmans fer pionye ler i ti en adolesan ti dir: “Mon kontan servi Zeova a plen tan parski sa i fason pour montre ki mon kontan li. O konmansman, mon pa ti kapab konmans okenn letid, me pli tar mon ti al dan en lot teritwar e zis dan en mwan mon ti konmans plizyer letid. Enn parmi sa bann etidyan ti konmans vin renyon kot Lasal Rwayonm. Apre ki mon ti’n asiste Lekol pour bann frer selibater pour de mwan, mon ti ganny en nouvo servis kot mon’n konmans kat letid. Mon kontan ansenny bann dimoun parski mon kapab vwar ki mannyer lespri sen i sanz zot lavi.” * (Vwar not.)​—1 Tesalonisyen 2:19.

8. Ki serten zenn in fer pour pres avek plis dimoun?

8 Serten zenn in aprann en lot langaz. Par egzanp, Jacob ki reste Nor Lanmerik i ekri: “Ler mon ti annan set an, bokou mon bann kanmarad lekol ti bann Vyetnanmyen. Mon ti anvi koz avek zot lo Zeova, alor apre en pe letan, mon ti fer plan pour aprann zot langaz. Laplipar ditan, mon ti aprann par konpar Latour Veyer edisyon Angle ek edisyon Vyetnanmyen. Mon ti osi fer zanmi avek bann ki ti dan en kongregasyon ki koz langaz Vyetnanmyen ki pa ti tro lwen. Ler mon ti ganny 18 an, mon ti konmans fer pionye. Pli tar, mon ti asiste Lekol pour bann frer selibater. Sa in ed mwan avek mon servis pionye la konmela kot mon sa sel ansyen dan en group ki koz langaz Vyetnanmyen. Bokou Vyetnanmyen i etonnen ki mon’n aprann zot langaz. Zot envit mwan anndan kot zot e souvandfwa mon kapab etidye Labib avek zot. Serten in fer progre ziska batenm.”​—Konpar Akt 2:7, 8.

9. Ki nou aprann atraver sa travay pour fer disip?

9 Sa travay pour fer disip i montre ou ki mannyer pour annan en bon latitid konsernan travay, ki mannyer pour kominik byen avek dimoun, ki mannyer pour servi bon zizman ler ou koze e pour vin en dimoun konfidan. (Proverb 21:5; 2 Timote 2:24) Me sa travay i donn bokou lazwa parski ou aprann ki mannyer pour prouve ki ou krwayans i baze lo Labib. Ou osi aprann ki mannyer pour travay ansanm avek Zeova.​—1 Korentyen 3:9.

10. Ki mannyer ou kapab trouv lazwa dan sa travay fer disip menm si napa bokou dimoun ki anvi etidye Labib dan ou teritwar?

 10 Ou kapab ganny lazwa dan sa travay fer disip menm si napa bokou dimoun ki anvi etidye Labib dan ou teritwar. Pour fer bann disip, kongregasyon antye i travay ansanm konman en lekip. Menm si zis en frer oubyen ser ki kapab trouv en dimoun ki vin en disip, nou tou nou dan lazwa parski nou tou nou’n ede pour trouv sa dimoun. Par egzanp, Brandon, ki ti fer pionye pour ne-v-an dan en teritwar kot i ti napa bokou dimoun ki ti etidye Labib i dir: “Mon kontan pres sa bon nouvel parski sanmenm sa ki Zeova i demann nou pour fer. Pa bokou letan apre ki mon ti’n fini lekol mon ti konmans fer pionye. Mon kontan ankouraz bann zenn frer dan nou kongregasyon e vwar zot progre spirityel. Apre ki mon ti’n asiste Lekol pour bann frer selibater, mon ti ganny anvoye dan en lot landrwa pour fer pionye. I vre ki mon pa’n zanmen trouv en dimoun ki’n progrese ziska batenm dan sa teritwar, me lezot in kapab fer li. Mon kontan ki mon ti fer plan pour fer sa travay fer disip a plen tan.”​—Eklezyast 11:6.

KI LEZOT LOPORTINITE OU KAPAB GANNYEN?

11. Dan ki lezot fason bann zenn in kontan pour servi Zeova?

11 I annan en kantite loportinite pour servi Zeova. Par egzanp, bokou zenn i ede dan travay konstriksyon. Nou bezwen plizyer santenn nouvo Lasal Rwayonm. Sa bann landrwa ladorasyon i anmenn loner pour Zeova, alor, ou kapab trouv lazwa ler ou ede pour konstri zot. Ou pou osi ganny sa lazwa ki nou gannyen ler nou travay avek bann frer ek ser. Ou osi kapab aprann bokou keksoz, tel parey konman pour fer en bon travay anmezir ki ou swiv bann mezir sekirite e ki mannyer pour korpere avek ou bann sirveyan.

Bann ki fer servis a plen tan pou ganny bokou benediksyon (Vwar paragraf 11-13)

12. Ki lezot loportinite ou kapab gannyen ler ou fer servis pionye?

12 En frer ki apel Kevin i dir: “Depi ki mon ti en pti garson, mon ti anvi servi Zeova a plen tan. Finalman, ler mon ti ganny 19 an mon ti nobou konmans fer pionye. Mon ti siport mon lekor finansyerman par travay a mitan avek en frer ki ti travay dan konstriksyon. Mon ti aprann met twa lakaz, lafnet ek laport. Pli tar, pour de-z-an mon ti travay avek en lekip sekour ki rekonstri bann Lasal Rwayonm ek lakaz bann frer ek ser dan bann landrwa kot siklonn in tape. Ler mon ti tande ki i ti annan en bezwen dan travay konstriksyon Sidafrik, mon ti fer laplikasyon e mon ti ganny aksepte pour al travay laba. Isi dan Lafrik, mon travay lo en  proze konstriksyon Lasal Rwayonm ki dire pour detrwa semenn. Ler sa proze i fini, mon bouze e al travay lo en lot. Sa lekip konstriksyon ki mon ladan i parey en fanmir. Nou viv ansanm, etidye Labib ansanm e travay ansanm. Sak semenn mon osi kontan pres ansanm avek bann frer ek ser ki dan sa kongregasyon. Bann plan ki mon ti fer ler mon ti en pti garson in fer mwan ganny lazwa dan bann fason ki mon pa ti pe ekspekte.”

“Bann plan ki mon ti fer ler mon ti en pti garson in fer mwan ganny lazwa dan bann fason ki mon pa ti pe ekspekte”

13. Akoz bokou zenn i kontan servi Zeova kot Betel?

13 Serten ki ti fer pionye pe aprezan servi kot Betel. Ou ganny bokou lazwa ler ou pe servi dan Betel parski tou sa ki ou fer laba i pour Zeova. Fanmir Betel i ede prodwir Labib ek bann piblikasyon baze lo Labib pour ki bann dimoun i kapab aprann laverite. En Betelit ki apel Dustin ti dir: “Ler mon ti annan ne-v-an, mon ti met sa lobzektif pour fer servis a plen tan e ler mon ti fini lekol mon ti konmans fer pionye. Apre enn an edmi, mon ti ganny envite pour servi dan Betel kot mon ti aprann travay avek masin ki enprimen e pli tar pour fer bann progranm pour konpiter. Kot Betel, mon kontan ler mon tann bann progre ki pe ganny fer dan lemonn antye konsernan sa travay  fer disip. Mon kontan servi isi parski sa ki nou fer i ed bann dimoun pour vin pli pros avek Zeova.”

KI PLAN OU POU FER POUR LAVENIR?

14. Ki ou kapab fer la konmela pour prepar ou pour servis a plen tan?

14 Ki mannyer ou kapab prepare pour fer servis a plen tan? Pour kapab servi Zeova dan sa pli bon fason, ou bezwen devlop bann kalite Kretyen. Etidye Parol Bondye regilyerman, medit o profon lo li e esey partisipe pandan renyon. Pandan ki ou pe lekol ou kapab amelyor ou abilite pour koz avek lezot lo sa bon nouvel. Aprann demontre lentere dan lezot dimoun par servi bon zizman pour demann zot zot lopinyon e ekout zot larepons. Osi, ou kapab volonter pour fer bann keksoz dan kongregasyon, tel parey netway e repar Lasal Rwayonm. Zeova i kontan pour servi bann ki annan limilite e pare pour travay. (Lir Psonm 110:3; Akt 6:1-3) Zapot Pol ti demann Timote pour servi konman misyonner parski “bann frer . . . ti koz an byen lo li.”​—Akt 16:1-5.

Pandan ki ou pe lekol ou kapab amelyor ou abilite pour koz avek lezot lo sa bon nouvel

15. Ki ou kapab fer pour ganny en travay ki pou ed ou fer pionye?

15 Laplipar serviter a plen tan i bezwen annan en travay. (Akt 18:2, 3) Petet ou kapab fer en pti kors kot lekol ki pou ed ou ganny en travay a mitan kot ou reste. Koz avek ou sirveyan rezyonal ek lezot pionye konsernan ou plan e demann zot bann sizesyon. Apre, parey Labib i dir, “konfye ou travay avek [Zeova], e ou ava realiz ou bann proze.”​—Proverb 16:3; 20:18.

16. Ki mannyer servis a plen tan i kapab prepar ou pour lezot responsabilite ki ou pou gannyen a lavenir?

16 Ou kapab asire ki Zeova i oule ki ou “met tou [ou] konfyans dan sa lespwar” pour ganny en lavenir ere. (Lir 1 Timote 6:18, 19.) Servis a plen tan i ed ou pour vin en Kretyen matir anmezir ki ou travay avek lezot serviter a plen tan. Deplis, plizyer serviter a plen tan ki ti konmans zot servis ler zot ti ankor zenn, in vwar ki pli tar sa in ed zot dan zot maryaz. Souvandfwa, bann ki ti fer pionye avan marye ti kontinyen fer pionye ansanm apre ki zot ti’n marye.​—Romen 16:3, 4.

17, 18. Ki mannyer ou leker i enplike ler ou pe fer ou bann plan?

17 Psonm 20:4 i dir sa lo Zeova: “I ava akord ou sa ki ou leker i dezire e realiz tou ou bann plan.” Ler ou pe fer plan pour ou lavenir, mazin lo sa ki ou ti a vreman kontan fer avek ou lavi. Mazin lo sa ki Zeova pe fer dan nou letan e kwa ki ou kapab fer dan son travay. Apre, plàn pour fer sa ki fer li plezir.

18 Ler ou servi ou lavi pour servi Zeova e onor li, ou pou ere. Ou pou “pran pli gran plezir dan [Zeova]. I ava donn ou, tou sa ki ou leker i dezir.”​—Psonm 37:4.

^ par. 7 Sa lekol in ganny ranplase par Lekol pour bann predikater Rwayonm.