Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Septanm 2017

“Pran kouraz e azir”

“Pran kouraz e azir”

“Reste for, pran kouraz e azir. Pa bezwen ni per, ni dekouraze, akoz [Zeova] . . . i avek ou.”​—1 KRONIK 28:20.

KANTIK: 38, 34

1, 2. (a) Ki responsabilite enportan Salomon ti gannyen? (b) Akoz David ti enkyet konsernan Salomon?

SALOMON ti ganny en responsabilite spesyal. Zeova ti swazir li pour sirvey konstriksyon tanp Zerizalenm, ki ti enn bann proze konstriksyon pli enportan ki’n deza ganny fer! Sa tanp ti pou renonmen pour son “labote ekstraordiner.” Pli enportan ankor, i ti pou vin “lakaz [Zeova] Bondye.”​—1 Kronik 22:1, 5, 9-11.

2 Lerwa David ti annan konfyans ki Bondye ti pou siport Salomon. Me Salomon ti “zenn e san leksperyans.” Eski i ti pou annan kouraz pour aksepte sa responsabilite pour konstri sa tanp? Ouswa lefet ki i ti ankor zenn e san leksperyans, eski sa ti pou anpes li desarz sa responsabilite? Pour li reisi, Salomon ti pou bezwen pran kouraz e azir.

3. Ki Salomon ti kapab aprann konsernan kouraz avek son papa?

3 Salomon ti’n sirman aprann bokou konsernan kouraz  avek son papa, David. Menm ler David ti ankor byen zenn, i ti lager avek bann zannimo feros ki ti atak bann mouton son papa. (1 Samyel 17:34, 35) I ti osi demontre bokou kouraz ler i ti lager avek sa zean Golyat ki ti en solda vreman for ki ti fer per. Avek led Bondye, David ti defet Golyat avek en pti gale.​—1 Samyel 17:45, 49, 50.

4. Akoz Salomon ti bezwen pran kouraz?

4 Nou kapab konpran akoz David ti sa pli bon dimoun pour ankouraz Salomon pour pran kouraz e konstri tanp. (Lir 1 Kronik 28:20.) Si Salomon pa ti demontre kouraz, lafreyer ti’n menm kapab anpes li konmans sa travay. Sa ti pou pli pir ki si i pa ti reisi konplet son travay.

Nou bezwen led Zeova pour pran kouraz e fer sa travay ki i donn nou

5. Akoz nou bezwen kouraz?

5 Parey Salomon, nou bezwen led Zeova pour pran kouraz e fer sa travay ki i donn nou. Alor annou etidye legzanp bann dimoun ki ti demontre kouraz dan lepase. Apre nou kapab reflesir lo ki mannyer nou kapab demontre kouraz e akonpli nou travay.

LEGZANP BANN DIMOUN KOURAZE

6. Kwa ki enpresyonn ou avek kouraz Zozef?

6 Zozef ti demontre kouraz ler madanm Potifar ti tant li pour komet imoralite seksyel. Sirman i ti konnen ki son lavi ti pou kapab an danze si i ti refize. Me olye les li ganny tante, i ti demontre kouraz e deswit i ti refiz sa madanm.​—Zenez 39:10, 12.

7. Ki mannyer Raab ti demontre kouraz? (Vwar portre o konmansman sa lartik.)

7 Raab i en lot dimoun ki ti demontre kouraz. Ler bann espyon Izraelit ti al kot son lakour Zeriko, lafreyer ti’n kapab fer li refize ed zot. Me vi ki i ti annan konfyans dan Zeova, i ti pran kouraz, kasyet sa de zonm e ed zot sove sen e sof. (Zozye 2:4, 5, 9, 12-16) Raab ti krwar ki Zeova i sa vre Bondye e i ti annan konfyans ki dan en fason ou en lot Zeova ti pou donn bann Izraelit sa pei. I pa ti les lafreyer zonm, enkli lerwa Zeriko ek son larme anpes li azir. O kontrer, i ti azir avek kouraz e sov son lavi ek son fanmir.​—Zozye 6:22, 23.

8. Ki lefe kouraz Zezi ti annan lo bann zapot?

8 Bann zapot fidel Zezi ti osi demontre bokou kouraz. Zot ti’n vwar kouraz ki Zezi ti’n demontre e sa ti ed zot pour imit li. (Matye 8:28-32; Zan 2:13-17; 18:3-5) Ler bann Sadiseen ti esey anpes zot ansenny konsernan Zezi, bann zapot ti refize.​—Akt 5:17, 18, 27-29.

9. Ki mannyer 2 Timote 1:7 i ed nou pour konpran kote kouraz i sorti?

9 Zozef, Raab, Zezi ek bann zapot ti determinen pour fer sa ki byen. Zot ti demontre kouraz, pa akoz zot ti annan konfyans dan zot prop abilite, me akoz zot ti depan lo Zeova. Parfwa ler nou bezwen kouraz, nou osi nou  bezwen depan lo Zeova, non pa lo nou prop lekor. (Lir 2 Timote 1:7.) Annou vwar de domenn dan lavi kot nou bezwen kouraz: dan nou fanmir e dan kongregasyon.

BANN SITYASYON KI DEMANN KOURAZ

10. Akoz bann zenn Kretyen i bezwen kouraz?

10 I annan plizyer sityasyon kot bann zenn Kretyen i bezwen demontre kouraz pour servi Zeova. Zot kapab aprann avek Salomon e swiv son legzanp. I ti demontre kouraz ler i ti fer bann bon desizyon pour fini konstri tanp. Menm si bann zenn i kapab e devret ganny gide par zot paran, zot annan zot prop desizyon enportan pour fer. (Proverb 27:11) Zot bezwen kouraz pour fer bann bon desizyon konsernan swa zot zanmi, sa ki zot pou fer pour divertisman, ki mannyer zot pou reste pir moralman e kan ki zot pou batize. Zot bezwen sa kalite kouraz parski zot pe al kont lavolonte Satan, sa enn ki provok Bondye.

11, 12. (a) Ki mannyer Moiz ti demontre kouraz? (b) Ki mannyer bann zenn i kapab imit legzanp Moiz?

11 Bann zenn i bezwen deside ki bann lobzektif zot pou annan. Sa i en desizyon vreman enportan. Dan serten pei, presyon i ganny mete lo bann zenn pour fer bann letid avanse e pour ganny en travay ki pey en kantite larzan. Dan lezot pei, i annan problenm lekonomi e bann zenn i kapab santi ki zot bezwen konsantre lo zot travay pour ed zot fanmir. Si ou dan enn sa bann sityasyon, mazin lo legzanp Moiz. I ti ganny elve par fiy Faraon, alor i ti’n kapab annan sa lobzektif pour vin vreman ris oubyen enportan. Zis imazin sa presyon ki son fanmir Ezipsyen, bann ansenyan ek bann konseye ti met lo li! Me Moiz ti kouraze e i ti swazir pour avek pep Bondye. Apre ki i ti kit Lezip ek tou larises sa pei, i ti depan konpletman lo Zeova. (Ebre 11:24-26) An retour, Zeova ti beni li en kantite e i pou beni li plis ankor a lavenir.

12 Ler bann zenn i demontre kouraz par fikse bann lobzektif dan servis Zeova e met Rwayonm premye dan zot lavi, Zeova pou beni zot. I pou ed zot pran swen avek bezwen zot fanmir. Dan premye syek, en zenn onm ki ti apel Timote ti pas son lavi dan servis Zeova e ou osi ou kapab fer parey. * (Vwar not.)​—Lir Filipyen 2:19-22.

Eski ou determinen pour demontre kouraz dan tou laspe ou lavi? (Vwar paragraf 13-17)

13. Ki mannyer kouraz ti ed en zenn ser pour atenn son lobzektif?

13 En ser ki reste Alabama, Leta-z-ini, ti bezwen kouraz pour fikse bann lobzektif dan servis Bondye. I ekri: “Ler mon ti pe grandi, mon ti en dimoun vreman timid. Mon ti preski pa kapab koz avek dimoun kot Lasal Rwayonm, prezan esey mazin mwan pe al tap laport dimoun ki mon pa konnen!” Avek led son paran ek lezot dan kongregasyon, sa zenn Kretyen ti atenn son lobzektif pour vin en pionye ordiner. I dir: “Lemonn Satan i promot letid avanse, popilarite, larzan ek posed bokou  keksoz materyel konman bann bon lobzektif.” Me i ti osi realize ki laplipar dimoun pa zanmen kapab atenn sa bann lobzektif e ki zot anmenn zis stres ek douler lo zot. I azoute: “Par kont, servi Zeova in donn mwan sa pli gran lazwa ek satisfaksyon.”

14. Kan ki bann paran Kretyen i bezwen kouraz?

14 Bann paran Kretyen osi i bezwen kouraz. Par egzanp, ou anplwayer i kapab regilyerman demann ou pour fer overtaym dan bann zour ki ou’n deza fikse pour ladorasyon fanmir, predikasyon ek bann renyon kongregasyon. Ou bezwen kouraz pour dir ou anplwayer non e kit en bon legzanp pour ou zanfan. Ouswa petet serten paran dan kongregasyon i les zot zanfan fer bann keksoz ki ou pa anvi ou zanfan i fer. Ler sa bann paran i demann ou akoz, eski ou pou pran kouraz e eksplik zot avek respe?

15. Ki mannyer Psonm 37:25 ek Ebre 13:5 i kapab ed bann paran?

15 I demann kouraz pour ed ou zanfan fikse e atenn bann lobzektif dan servis Bondye. Par egzanp, serten paran i kapab per pour ankouraz zot zanfan pour fer servis pionye zot karyer, pour servi kot i annan en pli gran bezwen, pour servi dan Betel ouswa pour ede dan konstriksyon bann Lasal Rwayonm ek Lasal Lasanble. Petet zot  per ki zot zanfan pa pou kapab pran swen avek zot ler zot vin vye. Par kont, bann paran ki saz i demontre kouraz e zot annan lafwa ki Zeova pou gard son promes. (Lir Psonm 37:25; Ebre 13:5.) Bann paran ki demontre sa kalite kouraz e depan lo Zeova, i ed zot zanfan pour fer parey.​—1 Samyel 1:27, 28; 2 Timote 3:14, 15.

16. Ki mannyer serten paran in ed zot zanfan pour fikse bann lobzektif dan servis Bondye e ki mannyer sa in benefisye zot zanfan?

16 En koup ki reste Leta-z-ini ti ed zot zanfan pour konsantre lo servi Zeova. Sa papa i dir: “Avan ki nou zanfan ti konmans marse e koze, nou ti koz avek zot lo sa lazwa ki ou gannyen ler ou fer pionye e servi dan kongregasyon. Ozordi sa i zot lobzektif.” I azoute ki vi ki zot zanfan in fikse e atenn sa bann lobzektif, sa in ed zot pour reziste bann tantasyon sa lemonn Satan e pour konsantre lo servi Zeova. En frer ki annan de zanfan ti ekri: “En kantite paran i fer bokou zefor e depans bokou larzan pour ed zot zanfan atenn zot bann lobzektif tel parey dan sport, detant ek ledikasyon. I fer bokou plis sans pour fer bokou zefor e depans bokou larzan pour ed nou zanfan atenn bann lobzektif ki pou ed zot gard en bon relasyon avek Zeova. Nou’n ganny bokou satisfaksyon, pa zis pour vwar nou bann zanfan atenn bann lobzektif spirityel, me pour ed zot arive fer li.” Ou kapab asire ki bann paran ki ed zot zanfan pour fikse e atenn bann lobzektif dan servis Bondye i annan son laprouvasyon.

DEMONTRE KOURAZ DAN KONGREGASYON

17. Donn legzanp bann ki demontre kouraz dan kongregasyon Kretyen.

17 Nou osi bezwen demontre kouraz dan kongregasyon. Par egzanp, bann ansyen i bezwen kouraz ler zot pe disiplin en dimoun ki’n fer en pese grav ouswa ler zot ed bann ki zot lavi i an danze akoz en ka dirzans. Serten ansyen i vizit prizon pour etidye avek bann ki enterese ouswa pour fer renyon. Me ki nou pou dir lo bann ser selibater? Zot annan plizyer loportinite pour demontre kouraz e servi Zeova. Zot kapab fer pionye, al servi dan bann landrwa kot i annan en pli gran bezwen, travay avek Local Design/​Construction program e fer laplikasyon pour Lekol pour bann Predikater Rwayonm. Serten i menm ganny envite pour al Lekol Gilead.

18. Ki mannyer bann ser pli aze i kapab demontre kouraz?

18 Nou kontan nou bann ser pli aze e nou rekonesan ki nou annan zot dan kongregasyon! Menm si petet serten pa kapab fer parey zot ti fer avan dan servis Bondye, zot touzour kapab demontre kouraz e azir. (Lir Tit 2:3-5.) Par egzanp, en ser pli aze i bezwen demontre kouraz si bann ansyen i demann li pour koz avek en ser pli zenn lo son fason sanze. I pa pou dispit avek sa ser konsernan son resanz, me zantiman i pou ed li reflesir lo akoz i devret sanz dan en fason modes e lo ki lefe son bann swa i kapab annan lo lezot. (1 Timote 2:9, 10) Ler bann ser pli aze  i demontre zot lanmour dan bann tel fason, zot kapab batir kongregasyon.

19. (a) Ki mannyer bann frer batize i kapab pran kouraz? (b) Ki mannyer Filipyen 2:13 ek 4:13 i kapab ed bann frer pour ganny kouraz?

19 Bann frer batize osi i bezwen pran kouraz e azir. Ler zot pare pour servi konman bann serviter kongregasyon ek ansyen, kongregasyon i benefisye bokou. (1 Timote 3:1) Par kont, serten i kapab ezite pour fer sa. Petet en frer in fer fot dan lepase e la i santi ki i pa diny pour vin en serviter kongregasyon ouswa ansyen. En lot frer i kapab santi ki i napa bann abilite ki neseser pour servi. Si ou santi koumsa, Zeova i kapab donn ou kouraz. (Lir Filipyen 2:13; 4:13.) Mazin legzanp Moiz. Li osi i ti santi ki i pa kapab fer sa ki Zeova ti demann li pour fer. (Egzod 3:11) Me Zeova ti donn li kouraz pour fer sa ki neseser. Ki mannyer en frer batize i kapab ganny sa kalite kouraz? I kapab priy Zeova pour ed li e lir Labib toulezour. I kapab medit lo legzanp bann dimoun dan Labib ki ti demontre kouraz. Avek limilite i kapab demann bann ansyen pour form li e ofer pour ede dan nenport ki fason dan kongregasyon. Nou sipliy tou bann frer batize pour pran kouraz e travay dir pour kongregasyon!

“[ZEOVA] . . . I AVEK OU”

20, 21. (a) Ki David ti fer Salomon rapel? (b) Ki nou kapab asire?

20 Lerwa David ti fer Salomon rapel ki Zeova ti pou avek li ziska ki i fini konstri tanp. (1 Kronik 28:20) Sirman Salomon ti medit lo sa bann parol e i pa ti permet son zenes ek mank leksperyans anpes li fer sa travay. O kontrer, i ti demontre bokou kouraz e avek led Zeova i ti reisi fini konstriksyon sa tanp ekstraordiner dan set an edmi.

21 Zeova ti ed Salomon e i osi kapab ed nou pour pran kouraz pour akonpli nou travay dan nou fanmir e dan kongregasyon. (Izai 41:10, 13) Si nou demontre kouraz anmezir ki nou servi Zeova, nou kapab asire ki i pou beni nou depi la konmela e dan lavenir. Alor, “pran kouraz e azir.”

^ par. 12 Ou pou trouv detrwa sizesyon lo ki mannyer pour fikse en lobzektif dan servis Bondye dan sa lartik “Use Spiritual Goals to Glorify Your Creator,” ki dan Latour Veyer le 15 Zilyet 2004 an Angle.