Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Out 2017

 DAN NOU ARSIV

“Kan ki nou pou ganny en lot lasanble?”

“Kan ki nou pou ganny en lot lasanble?”

I LAFEN Novanm 1932 dan lavil Mexico kot plis ki en milyon dimoun i reste. Zis en semenn avan, bann lalimyer trafik ti fek ganny enstale. Me la aprezan bann dimoun i eksite pour en lot keksoz. I annan bann zournalis kot stasyon tren avek zot kamera pe esper en envite spesyal. Lekel sa envite? Joseph Rutherford, prezidan Watch Tower Society. Bann Temwen ki reste dan sa landrwa osi pe espere pour akeyir Frer Rutherford ki’n vin pour asiste zot lasanble trwa zour.

Magazin The Golden Age ti dir: “San dout sa lasanble pou ganny rapel konman en levennman enportan dan listwar” ki ede propaz laverite Meksik. Me sa ti en pti lasanble ki zis 150 dimoun ti asiste. Me alor, akoz i ti sitan enportan?

Avan sa lasanble, laverite pa ti’n propaz bokou Meksik. Depi 1919, i ti’n annan bann pti lasanble, me apre sa lannen, lakantite kongregasyon ti’n diminyen. Ler en biro brans ti ouver dan lavil Mexico an 1929, i ti paret ki keksoz ti pou amelyore, me i ti ankor annan bann lobstak pour sirmonte. Lorganizasyon ti’n donn bann pionye lenstriksyon pour pa fer biznes ek predikasyon an menm tan. En pionye ti sitan ankoler akoz sa ki i ti kit laverite e konmans son prop group letid Labib. Pandan sa menm letan, sirveyan biro brans ti bezwen ganny ranplase akoz son move kondwit. Bann Temwen fidel Meksik ti bezwen lankourazman.

Pandan vizit Frer Rutherford, i ti fer de zoli diskour kot lasanble e senk diskour ki ti ganny transmet lo radyo e sa ti vreman ankouraz bann frer ek ser ki ti’n reste fidel. Sa ti premye fwa ki bann frer ti servi radyo pour propaz sa bon nouvel Meksik. Apre lasanble, en nouvo sirveyan biro brans ti ganny apwente pour organiz sa travay. Aprezan bann Temwen ti ranpli avek devouman e avek laprouvasyon Zeova zot ti kontinyen prese.

Lasanble an 1941, lavil Mexico

Son lannen apre an 1933, i ti annan de lasanble dan sa pei. Enn ti ganny fer Veracruz e lot lavil Mexico. Bann frer ek ser ti pe travay dir dan teritwar e zot ti pe ganny bann bon rezilta. Par egzanp, an 1931 i ti annan 82 proklanmater. Me an 1941, i ti annan dis fwa plis frer ek ser! Apepre 1,000 dimoun ti al lavil Mexico pour asiste sa lasanble an 1941.

 “ZOT IN PRAN TOU SEMEN”

An 1943 bann Temwen ti konmans anons sa lasanble ki son tenm ti “Free Nation’s” ki ti pou ganny fer dan 12 lavil Meksik. * (Vwar not.) Zot ti servi bann plakar pour fer sa. Zot ti pran de gran plakar, azout li ansanm e met li lo zot zepol. En plakar ti tonm devan e lot par deryer. Depi 1936 bann Temwen ti pe servi plakar pour anons zot bann lasanble.

En bout en magazin an 1944 ki montre bann frer avek zot plakar dan lavil Mexico

Vi ki sa metod pour anons lasanble avek bann plakar ti telman mars byen lavil Mexico, magazin La Nación ti ekri sa konsernan bann Temwen ki ti pe asiste sa lasanble: “Premye zour, zot ti ganny demande pour envit plis dimoun. Son lannmen, sa landrwa ti tro pti pour tou sa dimoun.” Legliz Katolik pa ti kontan sa ditou, alor zot ti opoz bann Temwen. Me bann frer ek ser pa ti per. Zot ti kontinyen anons sa lasanble. En lot lartik dan sa magazin La Nación ti dir: “Tou dimoun dan lavil ti vwar zot.” I ti kontinyen par dir ki bann frer ek ser ti “ganny transformen pour vin bann ‘plakar’ lanons.” Sa lartik ti osi montre en portre bann frer lo semen lavil Mexico. Anba sa portre i ti annan sa not: “Zot in pran tou semen.”

BANN LILI KI TI “PLI MOU E PLI SO KI ATER LO LESTIK”

Diran sa bann lannen, laplipar Temwen ti bezwen fer bann gro sakrifis pour asiste sa detrwa lasanble ki ti ganny fer Meksik. En kantite frer ek ser ki ti asiste sa bann lasanble ti sorti dan bann vilaz izole ki ti lwen avek okenn stasyon tren ek semen. En kongregasyon ti ekri, “Sel laliny ki pas o bor sa landrwa i en laliny telegraf.” Alor bann delege ti bezwen mont zot mile oubyen mars plizyer zour pour al pran en tren ki ti pou anmenn zot dan sa lavil kot lasanble ti pe ganny fer.

Laplipar Temwen ti pov e zot ti preski napa ase larzan pour al lasanble. Ler zot ti ariv laba, en kantite zot ti reste avek bann Temwen dan sa landrwa, ki ti demontre lanmour ek lospitalite anver zot. Lezot ti dormi dan Lasal Rwayonm. En fwa, apepre 90 frer ek ser ti reste kot biro brans kot zot ti dormi lo bann bwat liv. Sa Yearbook ti dir ki bann frer ek ser ti kontan akoz bann bwat ti “pli mou e pli so ki ater lo lestik.”

Pour zwenn ansanm avek lezot frer ek ser ti vo plis ki nenport sakrifis pour sa bann Temwen. Ozordi i annan plis ki 850,000 Temwen Meksik e zot annan sa menm leta lespri rekonesan. * (Vwar not.) En rapor dan Yearbook lannen 1949 ti dir ki bann sakrifis ki bann frer ek ser ti’n fer pa ti’n diminyen zot devouman pour ladorasyon Zeova. Sak lasanble ki zot ti fer ti “enn bann keksoz ki zot ti koz plis lo la pour en bon pe letan apre.” Sa kestyon ki bann frer ek ser ti toultan demande i, “Kan ki nou pou ganny en lot lasanble?”​—Dan nou arsiv Lanmerik Santral.

^ par. 9 Dapre Yearbook lannen 1944, sa lasanble ti fer bann Temwen Zeova vin byen koni Meksik.

^ par. 14 An 2016, i ti annan 2,262,646 dimoun ki ti asiste Memoryal Meksik.