Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Out 2017

Eski ou pare pour esper avek pasyans?

Eski ou pare pour esper avek pasyans?

“Zot osi, zot devret demontre pasyans.”​—ZAK 5:8.

KANTIK: 114, 79

1, 2. (a) Kwa ki kapab fer nou demande: “Ziska kan?” (b) Akoz legzanp bann serviter fidel dan lepase i kapab ankouraz nou ozordi?

“ZISKA kan?” Sa ti kestyon ki de profet fidel, Izai ek Abakouk ti demande. (Izai 6:11; Abakouk 1:2) Ler Lerwa David ti ekri Psonm 13, i ti demann sa menm kestyon kat fwa. (Psonm 13:1, 2) Ler Zezi ti pe koz avek en lafoul dimoun ki ti napa lafwa, li osi i ti demande: “Ziska kan?” (Matye 17:17) Nou osi nou kapab pe demann sa menm kestyon ozordi.

2 Kwa ki kapab fer nou demande: “Ziska kan?” Petet en keksoz enzis in ariv nou. Oubyen petet nou malad ouswa nou pe vin pli aze. Petet nou strese akoz nou pe viv dan en “letan vreman difisil.” (2 Timote 3:1) Oubyen i kapab ki move latitid bann dimoun i fer nou fatige e dekouraze. Nenport rezon ki nou annan, i  ankourazan pour konnen ki Zeova pa ti reprimann son bann serviter fidel ki ti demann sa kestyon dan lepase.

3. Kwa ki kapab ed nou ler nou dan en sityasyon difisil?

3 Kwa ki kapab ed nou ler nou dan en sityasyon ki difisil pour andire? Zak ki ti demi frer Zezi, ti ganny enspire pour dir nou: “Mon bann frer, demontre pasyans ziska ki Senyer i la.” (Zak 5:7) Alor, nou tou nou bezwen demontre pasyans. Me kisisa pasyans e ki mannyer nou kapab demontre sa zoli kalite?

KISISA PASYANS?

4, 5. (a) Kisisa pasyans e ki mannyer nou kapab demontre sa kalite? (b) Ki mannyer Zak i eksplik pasyans? (Vwar portre o konmansman sa lartik.)

4 Labib i dir ki lespri sen Bondye i kapab ed nou devlop pasyans. San led Bondye, i kapab difisil pour bann imen enparfe demontre pasyans ler zot dan bann sityasyon vreman difisil. Pasyans i en kado sorti kot Bondye e nou prouve ki nou kontan Zeova ek lezot ler nou demontre sa kalite. Ler nou napa pasyans, lanmour antre nou ek lezot i diminyen. (1 Korentyen 13:4; Galat 5:22) Ki mannyer nou demontre pasyans? Nou fer sa ler nou andire dan bann sityasyon difisil e an menm tan gard en latitid pozitif. (Kolosyen 1:11; Zak 1:3, 4) Pasyans i osi ed nou reste fidel avek Zeova malgre nenport ki problenm nou annan. I ed nou pour pa revanze ler lezot i fer nou en keksoz mal. Labib i dir ki nou devret pare pour aksepte ki nou bezwen espere. Nou aprann sa leson enportan dan Zak 5:7, 8. (Lir.)

5 Akoz nou devret pare pour esper Zeova azir? Disip Zak i konpar nou sityasyon avek sityasyon en fermye. Menm si en fermye i travay dir pour plante, i pa kapab kontrol letan oubyen vites ki bann plant i pouse. I bezwen esper avek pasyans ziska ki “later i raport son bon rekolt.” Pareyman, i annan en kantite keksoz ki nou pa kapab kontrole anmezir ki nou esper bann promes Zeova vin vre. (Mark 13:32, 33; Akt 1:7) Parey sa fermye, nou bezwen esper avek pasyans.

6. Ki nou kapab aprann avek legzanp profet Mika?

6 Profet Mika ti bezwen andir bann sityasyon difisil zis parey nou ozordi. I ti viv pandan sa letan ki Lerwa Aaz ti pe dirize. Aaz ti en move lerwa. Sa ti fer ki i ti annan en ta koripsyon dan sa pei. Keksoz ti sitan move ki Labib i dir ki bann dimoun ti’n vin bann “eksper dan sa ki mal.” (Lir Mika 7:1-3.) Mika ti konnen ki i pa ti kapab sanz sa sityasyon. Alor, ki i ti pou fer? I dir nou: “Mwan, mon pou tourn ver [Zeova], mon pou esper Bondye, mon sover. Mon Bondye pou antann mwan.” (Mika 7:7) Parey Mika, nou osi nou bezwen “esper Bondye.”

7. Akoz nou bezwen fer plis ki zis esper Zeova akonpli son bann promes?

 7 Si nou annan lafwa parey Mika, nou pou pare pour esper Zeova. Nou sityasyon pa parey pour en prizonnyen dan son kaso ki pe esper sa zour ki i pou ganny egzekite. I napa swa, i oblize espere e i pa pe esper sa zour avek pasyans. Keksoz i diferan pour nou. Nou pare pour esper Zeova parski nou konnen ki i pou akonpli son promes pour donn nou lavi eternel egzakteman dan sa moman apropriye! Alor nou “andir tou keksoz avek pasyans ek lazwa.” (Kolosyen 1:11, 12) Ler nou pe espere, nou fer atansyon ki nou pa konplent konmkwa ki Zeova pa pe azir ase vit. Si nou fer sa i pa pou fer li plezir​—Kolosyen 3:12.

LEGZANP BANN SERVITER FIDEL KI TI DEMONTRE PASYANS

8. Ki nou aprann avek bann zonm ek madanm fidel ki ti viv dan lepase?

8 Kwa ki pou ed nou pour pli pare pour espere? Nou kapab mazin lo bann zonm ek madanm fidel dan lepase ki ti esper avek pasyans pour Zeova akonpli son bann promes. (Romen 15:4) Anmezir ki nou mazin lo zot legzanp, i ti a bon si nou rapel ki kantite letan zot ti bezwen espere, akoz zot ti pare pour espere e ki mannyer Zeova ti beni zot pour zot pasyans.

Abraam ti bezwen esper pour plizyer lannen avan ki son bann pti zanfan, Ezai ek Zakob i ne (Vwar paragraf 9, 10)

9, 10. Konbyen letan Abraam ek Sara ti esper Zeova?

9 Annou vwar legzanp Abraam ek Sara. Parski zot ti demontre “lafwa ek pasyans,” zot ti erit “bann  promes.” Labib i dir nou ki apre ki “Abraam ti’n esper avek pasyans,” Zeova ti promet ki i ti pou beni li e fer li vin papa en gran nasyon. (Ebre 6:12, 15) Akoz Abraam ti bezwen demontre pasyans? Parski i ti pou pran letan pour sa promes ganny akonplir. Le 14 Nizan lannen 1943 avan Kris, Abraam, Sara ek tou bann ki ti avek zot ti travers Larivyer Efrat e antre dan Later Promiz. Me apre sa, Abraam ti bezwen esper 25 an avan son garson Izaak i ne e ankor 60 an avan son bann pti zanfan, Ezai ek Zakob i ne.​—Ebre 11:9.

10 Ki grander bout later Abraam ti erite dan Later Promiz? Labib i dir ki Zeova “pa ti donn li okenn leritaz dan sa pei, non, pa ni menm en bout later grander son lipye. Me i ti promet ki i ti pou donn li ek son desandans sa pei konman zot propriyete, menm si sa letan i pa ti ankor ganny zanfan.” (Akt 7:5) Apre ki Abraam ti’n travers Larivyer Efrat, i ti pran 430 an pour son desandans vin sa nasyon ki ti pou viv dan sa pei.​—Egzod 12:40-42; Galat 3:17.

11. Akoz Abraam ti pare pour espere e ki bann benediksyon i pou gannyen pour son pasyans?

11 Abraam ti pare pour espere parski i ti asire ki Zeova ti pou gard son bann promes. I ti annan lafwa dan Zeova. (Lir Ebre 11:8-12.) Abraam ti kontan pour espere menm si i pa ti vwar tou promes Bondye ganny realize avan i mor. Me zis imazin sa lazwa ki Abraam pou annan ler i resisite dan Paradi lo later. I pou sirprann ler i lir zistwar son lavi ek son fanmir dan plizyer parti Labib. * (Vwar not.) Zis imazin sa kantite lazwa ki i pou gannyen ler i konnen ki i ti zwe en rol enportan dan lakonplisman plan Zeova konsernan sa Mesi ki ti’n ganny promet! Nou kapab asire ki i pou santi ki i ti vo lapenn esper sa bann benediksyon.

12, 13. Akoz Zozef ti bezwen annan pasyans e ki latitid pozitif i ti annan?

12 Zozef, aryer pti zanfan Abraam ti osi pare pour demontre pasyans. I ti pas atraver bokou lenzistis. Premyerman, son bann frer ti vann li dan lesklavaz ler i ti annan apepre 17 an. Apre, i ti annan en fo lakizasyon kont li konmkwa i ti’n esey vyol madanm son met e i ti ganny met dan prizon. (Zenez 39:11-20; Psonm 105:17, 18) Menm si Zozef ti en serviter fidel Bondye, i paret ki i ti ganny pini plito ki ganny beni. Me apre 13 an, tou keksoz ti sanze. Zozef ti ganny large prizon e i ti vin sa dezyenm dirizan pli pwisan Lezip.​—Zenez 41:14, 37-43; Akt 7:9, 10.

Zozef ti konpran ki Zeova ki ti annan kontrol e ki i vo lapenn esper son bann benediksyon

13 Eski sa bann lenzistis ti fer Zozef vin anmer? Eski i ti santi ki Zeova ti’n abandonn li? Non. Zozef ti esper avek pasyans. Kwa ki ti ed li? I ti son lafwa dan Zeova. I ti konpran ki Zeova ki ti annan kontrol. Nou konn sa par sa ki i ti dir son bann frer: “Pa bezwen per.  Eski mon’n pran plas Bondye? Zot ti oule fer mwan ditor, me Bondye in transform tousala an byen. Konmsa, i’n sov lavi bokou dimoun parey zot war ozordi.” (Zenez 50:19, 20) Zozef ti konnen ki i vo lapenn esper bann benediksyon sorti kot Zeova.

14, 15. (a) Akoz pasyans David i enpresyonan? (b) Kwa ki ti ed David pour esper avek pasyans?

14 Lerwa David osi ti soufer akoz bokou lenzistis. Zeova ti swazir li pour vin lerwa Izrael ler i ti ankor zenn. Me David ti bezwen espere pour 15 an avan ki i ti vin lerwa menm lo son prop tribi. (2 Samyel 2:3, 4) Pandan sa letan, David ti bezwen sove e kasyet akoz Lerwa Sail ti anvi touy li. * (Vwar not.) Akoz sa, David pa ti kapab annan son prop lakaz. I ti bezwen reste dan en pei etranze oubyen dan bann kavern dan dezer. Pour fini kont, Sail ti ganny touye dan en batay. Kantmenm sa, David ti bezwen esper ankor apepre set an pour li vin lerwa pep Izrael antye.​—2 Samyel 5:4, 5.

15 Akoz David ti pare pour esper avek pasyans? I donn nou larepons dan sa menm Psonm kot i ti demann kat fwa: “Ziska kan?” I dir: “Me mwan, mon’n met mon konfyans dan ou fidelite. Mon leker i kontan akoz ou’n delivre mwan. Mon pou sant pour . . . [Zeova] akoz in fer mwan bokou dibyen.” (Psonm 13:5, 6) David ti konnen ki Zeova ti kontan li e ki i ti pou toultan fidel anver li. I ti mazin sa bann moman kot Zeova ti’n ed li dan lepase e i ti esper avek enpasyans pour sa letan kot Zeova ti pou retir son bann leprev. David ti konnen ki i vo lapenn esper bann benediksyon Zeova.

Zeova pa’n demann nou pour fer en keksoz ki i pa pare pour fer li menm

16, 17. Ki mannyer Zeova ek Zezi i sa pli bon legzanp pare pour espere?

16 Zeova pa’n demann nou pour fer en keksoz ki i pa pare pour fer li menm. I sa pli bon legzanp enn ki pare pour espere. (Lir 2 Pyer 3:9.) Par egzanp, plizyer milye lannen pase dan zarden Edenn, Satan ti akiz Zeova konmkwa i enzis. Zeova “pe esper avek pasyans” pour sa letan kot son non pou konpletman ganny sanktifye. Sa pou anmenn bann benediksyon merveye pour bann ki pe “kontinyen esper li.”​—Izai 30:18, NWT.

17 Zezi osi in pare pour espere. Ler i ti lo later, i ti fidel ziska son lanmor. Lannen 33, i ti prezant valer son sakrifis avek Zeova dan lesyel. Me i ti bezwen esper ziska 1914 pour li  konmans dirize konman Lerwa. (Akt 2:33-35; Ebre 10:12, 13) Kantmenm sa, Zezi i ankor bezwen esper ziska lafen son Renny Mil An pour ki tou son bann lennmi i ganny detrir. (1 Korentyen 15:25) Sa i en kantite letan pour espere. Pourtan, i vo lapenn espere pour ganny sa bann benediksyon.

KWA KI POU ED NOU?

18, 19. Kwa ki pou ed nou pour pare pour esper avek pasyans?

18 I kler ki Zeova i anvi ki nou annan pasyans e pare pour espere. Kwa ki pou ed nou fer sa? Nou bezwen demann Bondye son lespri sen dan lapriyer. Rapel ki se lespri sen Bondye ki ed nou devlop pasyans. (Efezyen 3:16; 6:18; 1 Tesalonisyen 5:17-19) Alor, sipliy Zeova pour ed ou pour andire avek pasyans!

19 Rapel osi, kwa ki ti ed Abraam, Zozef ek David pour esper avek pasyans pour bann promes Zeova ganny realize. I ti zot lafwa ek konfyans dan Zeova. Zot pa ti mazin zis zot prop lekor e sa ki zot ti anvi. Ler nou mazin lo ki mannyer keksoz ti vin meyer pour zot, nou osi nou pou ganny ankouraze pour demontre pasyans.

20. Ki nou devret determinen pour fer?

20 Alor, menm si nou bezwen lalit kont bann leprev, nou determinen pour “esper Bondye.” Par ler nou kapab demande: “Ziska kan, O [Zeova]?” (Izai 6:11) Me avek led lespri sen Bondye, nou kapab imit profet Zeremi e dir: “[Zeova] i mon sel trezor. Alor, mon met tou mon lespwar dan li.”​—Lamantasyon 3:21, 24.

^ par. 11 I annan apepre 15 sapit ki diskit lo lavi Abraam dan liv Zenez. Bann ekriven Lekritir Grek Kretyen i osi refer avek Abraam plis ki 70 fwa.

^ par. 14 Zeova ti rezet Sail apre ki i ti’n diriz pour en pti pe plis ki de-z-an. Kantmenm sa, Sail ti kontinyen dirize pour ankor 38 an ziska son lanmor.​—1 Samyel 13:1; Akt 13:21.