Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Out 2017

Ki mannyer nou devlop e gard sa nouvo personnalite?

Ki mannyer nou devlop e gard sa nouvo personnalite?

“Kontinyen devlop sa nouvo personnalite.”​—KOLOSYEN 3:10.

KANTIK: 126, 28

1, 2. (a) Ki mannyer nou konnen ki i posib pour nou devlop sa nouvo personnalite? (b) Dapre Kolosyen 3:10-14, ki bann kalite ki form parti sa nouvo personnalite?

DAN Tradiksyon nouvo lemonn, de fwa nou vwar sa lekspresyon “nouvo personnalite.” (Efezyen 4:24; Kolosyen 3:10) Sa pe refer avek en personnalite ki ganny “kree dapre lavolonte Bondye.” Eski i posib pour nou devlop sa nouvo personnalite? Wi. Zeova ti kree bann imen dan son resanblans, alor nou kapab imit son bann zoli kalite.​—Zenez 1:26, 27; Efezyen 5:1.

2 I vre ki nou tou nou annan bann move dezir par ler akoz nou’n erit lenperfeksyon. Nou lanvironnman osi i zwe en rol. Me avek konpasyon ek led Zeova nou kapab vin sa kalite dimoun ki i oule nou vini. Pour ed nou determinen pour fer sa, annou diskit detrwa kalite ki form parti sa nouvo personnalite. (Lir Kolosyen 3:10-14.)  Apre nou pou vwar ki mannyer nou kapab demontre sa bann kalite dan predikasyon.

“ZOT TOU ZOT EN SEL”

3. Ki enn bann kalite ki form parti sa nouvo personnalite?

3 Pol ti eksplike ki en parti enportan dan sa nouvo personnalite se pour pa fer lapreferans. I ti dir: “Napa ni Grek ni Zwif, dimoun sirkonsi oubyen pa sirkonsi, etranze, bann Sit, lesklav ouswa dimoun lib.” * (Vwar not.) Dan kongregasyon, personn pa devret krwar ki i pli siperyer ki lezot akoz son ras, nasyonalite oubyen pozisyon dan kominote. Akoz? Parski konman bann disip Kris, nou “tou [nou] en sel.”​—Kolosyen 3:11; Galat 3:28.

Nou pa tret personn diferaman akoz son ras oubyen lafason ki i’n grandi

4. (a) Ki mannyer bann serviter Zeova i devret tret kanmarad? (b) Ki sityasyon ki kapab fer li difisil pour bann Kretyen ini?

4 Ler nou devlop sa nouvo personnalite, nou tret tou dimoun avek respe ek loner, malgre zot ras ek fason ki zot in grandi. (Romen 2:11) Dan serten parti lemonn, sa i kapab vreman difisil pour fer. Par egzanp, dan lepase, gouvernman Sidafrik ti etabli bann landrwa kot dimoun diferan ras i devret reste. Laplipar dimoun dan sa pei, enkli bann Temwen, i ankor pe viv dan sa bann landrwa. Konsey Direkter ti oule ankouraz nou bann frer ek ser pour “annan plis lanmour.” Alor an Oktob 2013, zot ti aprouv en laranzman spesyal pour ed bann frer ek ser diferan ras aprann konn kanmarad pli byen.​—2 Korentyen 6:13, not.

5, 6. (a) Ki laranzman ti ganny fer dan en pei pour ed pep Bondye vin pli ini? (Vwar portre o konmansman sa lartik.) (b) Ki rezilta sa in anmennen?

5 Bann frer ti organize pour bann Temwen dan de kongregasyon ki koz diferan langaz oubyen sorti dan diferan ras i kapab pas letan ansanm pandan serten wikenn. Bann frer ek ser dan tou le de kongregasyon ti al prese e asiste renyon ansanm e zot ti vizit lakour kanmarad. Plizyer santenn kongregasyon ti partisip dan sa laranzman e biro brans ti ganny bann bon rapor. Sa ti menm enpresyonn serten ki pa ti Temwen. Par egzanp, en minis relizye ti dir: “Mon pa en Temwen, me mon kapab dir ki zot annan en travay predikasyon ki’n byen organize e zot ini avek kanmarad menm si zot sorti dan diferan ras.” Ki mannyer bann frer ek ser ti santi konsernan sa laranzman?

6 O konmansman, Noma, en ser ki koz langaz Xhosa, ti tro per pour envit bann Temwen ki dan kongregasyon Angle pour vin kot li akoz son lakaz ti senp. Me apre ki i ti’n pres avek bann  Temwen blan e vizit zot lakour, i ti santi li pli konfortab. I ti dir: “Zot bann dimoun normal zis parey nou!” Alor ler bann frer ek ser dan kongregasyon Angle ti vin pres avek kongregasyon langaz Xhosa, Noma ti envit serten parmi zot kot li pour pran en repa. I ti enpresyonnen ler i ti vwar en ansyen blan ki i ti’n envite pe asiz lo en crate plastik san konplent. Gras a sa laranzman ki ankor pe ganny fer, bokou frer ek ser in fer nouvo zanmi e zot pe kontinyen aprann konn bann ki annan en lot kiltir.

DEVLOP KONPASYON EK LABONTE

7. Akoz nou bezwen toultan demontre konpasyon?

7 Pep Zeova pou rankontre problenm ziska ler lemonn Satan i ganny detrir. I annan diferan difikilte ki nou kapab rankontre, parey pa ganny en travay, maladi grav, persekisyon, dezas natirel, perdi nou bann byen akoz krim e lezot keksoz ankor. Pour ed kanmarad pandan bann leprev, nou bezwen annan vre konpasyon. Si nou annan konpasyon ek tandres, sa pou pous nou pour tret kanmarad avek labonte. (Efezyen 4:32) Sa bann kalite i form parti sa nouvo personnalite. Zot pou ed nou imit Bondye e rekonfort lezot.​—2 Korentyen 1:3, 4.

8. Ki bann bon keksoz ki kapab arive ler nou demontre konpasyon ek labonte anver tou dan kongregasyon? Donn en legzanp.

8 Ki mannyer nou kapab demontre plis labonte anver bann dan nou kongregasyon ki sorti dan en lot pei oubyen bann ki mwen fortinen? Nou anvi akeyir zot, vin zot zanmi e ed zot vwar ki nou bezwen zot dan kongregasyon. (1 Korentyen 12:22, 25) Par egzanp, Dannykarl ki sorti Filipin ti al reste Zapon. Vi ki i ti en etranze, dan travay i pa ti ganny trete parey lezot travayer. Apre, i ti asiste en renyon Temwen Zeova. Dannykarl ti dir: “Preski laplipar dimoun ti Zaponnen, be kantmenm sa zot ti byen resevwar mwan, konmsi nou ti deza konn kanmarad.” Lefet ki bann frer ek ser ti demontre labonte anver li, sa ti ed li pour vin pros avek Zeova. Avek letan, Dannykarl ti batize e ozordi i servi konman en ansyen. Lezot ansyen dan kongregasyon i kontan ki li ek son madanm Jennifer i form parti kongregasyon e zot dir: “Zot annan en lavi senp konman bann pionye e zot en bon legzanp lo konman pour rod Rwayonm premye.”​—Lik 12:31.

9, 10. Donn legzanp ki montre bann bon rezilta ki nou gannyen ler nou demontre konpasyon dan predikasyon.

9 Nou annan en loportinite pour “fer sa ki byen anver tou dimoun” ler nou pres sa bon nouvel Rwayonm. (Galat 6:10) En kantite Temwen i annan konpasyon pour bann imigran e zot esey aprann zot langaz. (1 Korentyen 9:23) Zot in ganny bann bon rezilta gras a zot zefor. Par egzanp, en ser pionye Lostrali ki apel Tifanny ti aprann Swahili pour li kapab ed en kongregasyon ki koz langaz Swahili dan lavil Brisbane. Menm si i ti difisil pour aprann sa langaz, i pe pli byen servi son lavi aprezan. Tiffany i dir: “Si ou  anvi en predikasyon ki gou, ou pou kontan pour servi dan en kongregasyon ki koz en lot langaz. I konmsi ou pe vwayaze san kit ou lavil. Ou ganny sans eksperyans nou lasosyasyon frer ek ser dan lemonn antye e vwar pour ou menm ki kantite nou ini.”

Kwa ki pous bann Kretyen pour anvi ed bann imigran? (Vwar paragraf 10)

10 En fanmir Zapon ti fer menm parey. Zot fiy Sakiko, i dir: “Souvandfwa nou ti zwenn bann imigran sorti Brezil ler nou ti dan predikasyon. Ler nou ti montre zot bann verse dan zot Labib Portige, parey Revelasyon 21:3, 4 oubyen Psonm 37:10, 11, 29, zot ti ekout byen e par ler zot ti menm plere.” Sa fanmir ti annan konpasyon pour sa bann imigran e zot ti anvi ed zot aprann laverite, alor zot ti konmans aprann Portige. Pli tar, sa fanmir ti ede konmans en kongregasyon langaz Portige. Diran bann lannen, zot in ed en kantite imigran pour vin bann serviter Zeova. Sakiko i dir: “Nou ti bezwen fer en ta zefor pour aprann Portige, me bann benediksyon i bokou plis ki sa bann zefor. Nou vreman rekonesan anver Zeova.”​—Lir Akt 10:34, 35.

DEVLOP LIMILITE

11, 12. (a) Akoz nou bezwen annan sa bon rezon pour devlop sa nouvo personnalite? (b) Kwa ki pou ed nou kontinyen annan limilite?

11 Rezon ki nou devret anvi devlop sa nouvo personnalite i pour onor Zeova, pa pour ki lezot i felisit nou. Rapel ki menm en lanz parfe ti vin orgeye e i ti fer pese. (Konpar Ezekyel 28:17.) Nou enparfe, alor i bokou pli difisil pour nou evite vin orgeye. Toudmenm, nou kapab devlop limilite. Kwa ki pou ed nou fer sa?

12 En keksoz ki pou ed nou devlop limilite se lir Parol Bondye sak zour e medit lo sa ki nou lir. (Deterononm 17:18-20) Nou sirtou bezwen medit lo sa ki Zezi ti ansenny nou e lo son zoli legzanp limilite. (Matye 20:28) Zezi ti telman annan limilite ki i ti lav lipye son bann zapot. (Zan 13:12-17) En lot keksoz ki nou kapab fer i priy Zeova pour donn nou son lespri sen. Son lespri sen i kapab ed nou lalit kont okenn tandans pour santi ki nou pli siperyer ki lezot.​—Galat 6:3, 4; Filipyen 2:3.

Ler nou annan limilite, kongregasyon pou pli anpe e ini

13. Ki byenfe nou gannyen ler nou annan limilite?

13 Lir Proverb 22:4. Zeova i ekspekte  ki nou annan limilite. Nou ganny en kantite byenfe ler nou annan limilite. Ler nou annan limilite, kongregasyon pou pli anpe e ini. Deplis, Zeova pou demontre son labonte ekstraordiner anver nou. Zapot Pyer ti dir: “Zot tou, demontre limilite anver kanmarad parski Bondye i opoz bann ki arogan me i demontre son labonte ekstraordiner anver bann ki annan limilite.”​—1 Pyer 5:5.

DEVLOP LADOUSER EK PASYANS

14. Lekel sa pli bon legzanp ladouser ek pasyans?

14 Dan sa lemonn ozordi, si en dimoun i dous e pasyan, souvandfwa dimoun i krwar ki i en kapon. Me sa pa vre. Sa bann zoli kalite i sorti kot Zeova, sa Personnaz pli for dan liniver. I sa pli bon legzanp ladouser ek pasyans. (2 Pyer 3:9) Par egzanp, mazin lo ki kantite pasyans Zeova ti annan ler i ti reponn Abraam ek Lot atraver Son bann lanz. (Zenez 18:22-33; 19:18-21) Mazin lo ki kantite pasyans Zeova ti annan avek nasyon Izrael ki ti dezobeisan pour plis ki 1,500 an.​—Ezekyel 33:11.

15. Ki legzanp Zezi in kite lo konman pour demontre ladouser ek pasyans?

15 Zezi ti “dous.” (Matye 11:29) I ti demontre bokou pasyans anver son bann disip ki ti annan bann febles. Pandan son minister lo later, souvandfwa Zezi ti ganny kritike e akize san rezon. Me i ti annan ladouser ek pasyans ziska son lanmor. Ler Zezi ti pe soufer lo poto martir, i ti demann son Papa pour pardonn bann zonm ki ti responsab pour son lanmor. I ti dir: “Zot pa konnen ki zot pe fer.” (Lik 23:34) Menm ler Zezi ti anba presyon oubyen dan douler, i ti reste dous e annan pasyans.​—Lir 1 Pyer 2:21-23.

16. Ki mannyer nou kapab demontre ladouser ek pasyans?

16 Pol ti mansyonn en fason ki nou kapab demontre ladouser ek pasyans ler i ti ekri: “Kontinyen siport kanmarad e pardonn kanmarad volonterman menm si en dimoun i annan rezon pour konplent akoz en lot. Parey Zeova in volonterman pardonn zot, zot osi zot devret fer parey.” (Kolosyen 3:13) Pour nou kapab pardonn lezot, nou bezwen annan ladouser ek pasyans. Sa pou promot e prezerv linite dan kongregasyon.

17. Akoz ladouser ek pasyans i enportan?

17 Zeova i ekspekte ki nou demontre ladouser ek pasyans anver lezot. Sa bann kalite i esansyel si nou anvi viv dan son nouvo lemonn. (Matye 5:5; Zak 1:21) Ler nou dous e annan pasyans, nou onor Zeova e ed lezot pour fer parey.​—Galat 6:1; 2 Timote 2:24, 25.

DEVLOP LANMOUR

18. Ki mannyer lanmour i relye avek pa fer lapreferans?

18 Tou sa bann kalite ki nou’n diskit  lo la i relye avek lanmour. Par egzanp, disip Zak ti bezwen konsey son bann frer ek ser akoz zot ti tret bann dimoun ris pli byen ki bann pov. I ti eksplike ki sa ti kont komannman Bondye ki dir “kontan ou prosen parey ou kontan ou prop lekor.” Apre i ti azoute: “Si zot kontinyen fer lapreferans, zot pe fer pese.” (Zak 2:8, 9) Si nou kontan dimoun, nou pa pou ziz dimoun akoz zot ledikasyon, ras ouswa ran sosyal. Nou pa kapab zis fer krwar ki nou pa fer lapreferans. Nou bezwen fer li avek senserite.

19. Akoz i enportan ki nou devlop lanmour?

19 Lanmour i osi “pasyan e i bon” e “i pa orgeye.” (1 Korentyen 13:4) Nou bezwen annan pasyans, labonte ek limilite pour nou kapab kontinyen anons sa bon nouvel avek nou bann vwazen. (Matye 28:19) Sa bann kalite i osi fer li pli fasil pour nou annan en bon relasyon avek tou nou bann frer ek ser dan kongregasyon. Ler nou tou nou demontre sa kalite lanmour, nou bann kongregasyon pou ini e i pou anmenn loner lo Zeova. Lezot dimoun pou vwar sa linite e zot pou ganny atire ver laverite. I apropriye ki Labib i fini par dekrir sa nouvo personnalite par dir: “An plis ki sa, demontre lanmour parski i soud keksoz ansanm dan en fason parfe.”​—Kolosyen 3:14.

“KONTINYEN RENOUVLE ZOT”

20. (a) Ki kestyon nou devret demann nou lekor? Akoz? (b) Ki zoli lavenir nou pe esper avek enpasyans?

20 Nou tou nou devret demann nou lekor, ‘Ki sanzman mon ankor bezwen fer pour mwan kapab debaras mwan avek sa vye personnalite e fer sir ki mon pa repran li?’ Nou bezwen priy Zeova e sipliy li pour ed nou. Nou bezwen travay dir pour rezet bann move panse oubyen aksyon pour nou kapab “antre dan Rwayonm Bondye.” (Galat 5:19-21) Nou osi bezwen demande, ‘Eski mon ankor pe kontinyen aziste mon fason panse pour fer plezir Zeova?’ (Efezyen 4:23, 24) Nou enparfe, alor nou bezwen kontinyen travay dir pour devlop e gard sa nouvo personnalite. Sa i en keksoz ki nou bezwen kontinyen fer. Pa lavi pou gou ler tou dimoun vivan pou’n devlop sa nouvo personnalite e imit bann zoli kalite Zeova parfetman!

^ par. 3 Dan letan Labib, bann dimoun ti krwar ki bann Sit pa ti sivilize, alor zot ti ay bann Sit.