Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Novanm 2017

Sant avek lazwa!

Sant avek lazwa!

“I bon sant louanz pour nou Bondye!”​—PSONM 147:1.

KANTIK: 10, 2

1. Ki sante i ed nou fer?

EN FWA, en konpoziter renonmen ki ekri bann sanson ti dir: “Bann mo i fer ou reflesir. Lanmizik i annan en lefe lo ou santiman. Me en sanson i fer tou le de, i annan en lefe lo ou santiman e i fer ou reflesir.” Atraver nou bann kantik, nou loue nou Papa Zeova e eksprim nou lanmour pour li. Bann kantik i fer nou santi nou pli pros avek Zeova. Alor, i fasil pour konpran akoz sante i annan en rol enportan dan vre ladorasyon, ki swa nou pe sant tousel ouswa avek nou bann frer ek ser.

2, 3. (a) Ki mannyer serten i kapab santi lo sant kantik dan kongregasyon? (b) Ki kestyon nou pou diskite dan sa lartik?

2 Me selman, ki mannyer ou santi lo sant kantik dan kongregasyon? Eski ou anbarase? Dan serten kiltir, bann frer pa santi zot alez pour sant devan lezot. Sa latitid i kapab annan en lefe negatif lo kongregasyon antye, sirtou si bann ansyen i ezite pour sante oubyen si zot tro okipe avek lezot keksoz ler bann kantik pe ganny sante.​—Psonm 30:12.

 3 Sante i form par nou ladorasyon pour Zeova. Alor, nou pa pou al deor pandan ki kantik pe ganny sante oubyen mank sa parti nou renyon. Alor, nou devret demann nou lekor: ‘Ki mannyer mon santi lo sant kantik dan renyon? Ki mon kapab fer si mon pa alez pour sant devan lezot? Ki mannyer mon kapab sant avek santiman?’

SANT KANTIK I ANNAN EN ROL ENPORTAN DAN VRE LADORASYON

4, 5. Ki laranzman pour sante ti annan kot tanp dan letan lontan an Izrael?

4 Tou dilon listwar, bann adorater Zeova in servi lanmizik pour loue li. I enteresan pour note ki ler bann Izraelit ti fidel avek Zeova, sante ti annan en rol enportan dan zot ladorasyon. Par egzanp, ler David ti fer bann preparasyon pour konstriksyon tanp, i ti fer laranzman pour ki 4,000 Levit i loue Zeova avek lanmizik. Parmi sa bann levit, 288 zot “ti annan leksperyans ek bon formasyon pour loue [Zeova].”​—1 Kronik 23:5; 25:7.

5 Lanmizik ek sante ti osi enportan ler bann Izraelit ti partisip dan dedikasyon tanp. Labib i dir nou: “Bann santer, bann zwer tronpet ti zwenn ansanm dan larmoni, pour rann glwar e remersye [Zeova]: [Zeova] i bon; son fidelite i reste pour touzour. Sa ti ganny akonpannyen par bann son senbal avek lezot lenstriman lanmizik. . . . Laglwar [Zeova] ti ranpli tanp Bondye.” Zis mazinen ki mannyer sa lokazyon ti’n kapab batir lafwa bann Izraelit!​—2 Kronik 5:13, 14; 7:6.

6. Ki laranzman Neemya ti fer pour sante e zwe lanmizik ler i ti gouverner Zerizalenm?

6 Neemya ti fer laranzman pour bann Izraelit rekonstri miray Zerizalenm e i ti osi fer laranzman pour bann Levit sante e zwe lanmizik. Sa ti fer ki dedikasyon miray Zerizalenm ti en levennman pli zwaye ankor. Neemya ti form “de gran lakoral” pour remersye Bondye. Sa de lakoral ti mars lo bann miray lavil dan diferan direksyon ziska ki zot ti zwenn kot miray ki ti pli pros avek tanp. Sa tapaz ti sitan for ki bann dimoun ti kapab tande dan lwen. (Neemya 12:27, 28, 31, 38, 40, 43) Nou kapab asire ki Zeova ti byen kontan pour tann son bann adorater pe loue li avek lantouzyasm par sant bann kantik louanz.

7. Ki mannyer Zezi ti montre ki sant kantik ti pou annan en rol enportan dan ladorasyon bann Kretyen?

7 Ler Zezi ti lo later, lanmizik ti osi annan en rol enportan dan vre ladorasyon. Mazin sa ki ti arive sa zour swar pli enportan dan listwar imen. Apre ki Zezi ek son bann disip ti’n selebre Repa Senyer, zot ti sant kantik louanz pour Zeova.​—Lir Matye 26:30.

8. Ki mannyer bann premye Kretyen in kit en legzanp lo konman pour loue Bondye avek bann kantik?

8 Bann premye Kretyen in kit en bon legzanp lo loue Bondye avek bann kantik. Bann Izraelit ti bezwen al kot tanp pour ador Zeova, me bann premye Kretyen ti zwenn dan bann lakour prive. Menm si sa bann lakour pa ti sitan zoli e enpresyonan parey tanp, bann  frer ek ser ti sant avek lantouzyasm. Anfet, zapot Pol ti dir son bann frer Kretyen: “Kontinyen ansennyen e ankouraz kanmarad avek bann psonm, louanz pour Bondye, sanson spirityel ki ganny sante avek rekonesans, sant avek tou zot leker pour Zeova.” (Kolosyen 3:16) Nou bann kantik dan nou liv i definitivman devret ganny “sante avek rekonesans.” Zot form parti sa “manze dan sa moman apropriye” ki “sa lesklav fidel e pridan” i donn nou.​—Matye 24:45.

KI MANYER OU KAPAB SANT AVEK KONFIDANS?

9. (a) Akoz serten pa alez pour sant avek lazwa dan nou bann renyon ek lasanble? (b) Ki mannyer nou devret sant louanz pour Zeova e lekel ki devret montre legzanp ler pe sant kantik? (Vwar portre o konmansman sa lartik.)

9 Ki serten rezon ki kapab fer ou pa alez pour sante? Petet sante pa en keksoz ki dan ou kiltir oubyen ki ou fanmir in abitye fer. Petet ler ou konpar ou fason sante avek fason sante bann santer profesyonnel ki ou tande lo radyo ouswa lo televizyon, ou santi ou anbarase oubyen dezapwente. Me nou tou nou annan sa responsabilite pour sant bann louanz pour Zeova. Alor, met ou liv kantik byen o, lev ou latet e sant avek lantouzyasm! (Ezra 3:11; lir Psonm 147:1.) Dan plizyer Lasal Rwayonm, i annan bann lekran ki montre parol ki dan nou bann kantik e sa i kapab ed nou pour sant byen. I enteresan pour konnen ki sant kantik Rwayonm i aprezan form parti Lekol Minister Rwayonm pour bann ansyen. Sa i montre ki degre i enportan pour bann ansyen dan kongregasyon montre legzanp ler zot pe sant kantik dan bann renyon.

10. Ki nou devret rapel si nou per pour sant for?

 10 Plizyer frer ek ser i per pour sant for akoz zot panse ki zot pou sant tro for oubyen akoz zot napa en zoli lavwa. Par kont, mazinen: “Nou tou nou souvan fer fot” ler nou koze, me sa pa anpes nou koze. (Zak 3:2) Alor, akoz nou devret les nou lavwa enparfe anpes nou sant bann louanz pour Zeova?

11, 12. ki mannyer nou kapab amelyor nou fason sante?

11 Petet nou per pour sante akoz nou pa konnen ki mannyer pour sante. Pourtan, i annan plizyer keksoz senp ki nou kapab fer pour amelyor nou fason sante. *​—Vwar not.

12 Ou kapab sant avek en lavwa for par aprann pour respir byen. Zis parey elektrisite i alim en glob, ler ou byen respire sa i fer ou lavwa sorti byen ler ou koze oubyen sante. Ou devret sant for parey ler ou pe koze ouswa menm pli for. (Vwar bann sizesyon dan liv Benefisye atraver Ledikasyon Lekol Minister Teokratik paz 182-184 anba soutit “Kontrol byen ou Respirasyon.”) Anfet, parfwa Labib i dir bann adorater Zeova “kriye dan lazwa” ler zot pe sant bann kantik.​—Psonm 33:1-3.

13. Eksplike ki mannyer nou kapab sant avek plis konfidans.

13 Pandan ladorasyon fanmir ouswa ler ou tousel, esey sa: Swazir ou kantik prefere. Lir son bann parol avek en lavwa for e avek konfidans. Apre, avek menm volim lavwa, dir sa fraz antye dan en sel lalenn. Apre, sant sa menm fraz avek sa menm volim lavwa. (Izai 24:14) Ler ou sante, ou lavwa pou vin pli for e sa i en bon keksoz. Pa les sa fer ou per oubyen anbaras ou!

14. (a) Ki mannyer ler nou ouver nou labous gran i kapab amelyor nou fason sante? (Vwar bwat “ Pour amelyor ou fason sante.”) (b) Ki sizesyon ou vwar itil pour sirmont bann problenm lavwa?

14 Pour kapab annan en lavwa for ler ou pe sante, ou bezwen ouver byen ou labous. Alor, ler ou sante ouver ou labous pli gran ki ler ou pe koze normalman.  Me ki ou devret fer si ou santi ki ou lavwa pa for oubyen i tro fen? Ou kapab trouv bann sizesyon dan sa bwat “Sirmont problenm spesifik” dan liv Benefisye atraver Ledikasyon Lekol Minister Teokratik lo paz 184.

SANT AVEK TOU OU LEKER

15. (a) Ki lanons ki ti ganny fer pandan renyon annyel 2016? (b) Ki serten rezon liv kantik in ganny revize?

15 Tou dimoun ki ti la pour renyon annyel 2016 ti byen kontan ler Frer Stephen Lett ki lo Konsey Direkter ti anons sa nouvo liv kantik ki annan pour tit Sant pour Zeova avek lazwa. Frer Lett ti eksplike ki en rezon ki nou bezwen en nouvo liv kantik i akoz Labib New World Translation of the Holy Scriptures in ganny revize. Bann parol dan kantik ti sanze pour ranplas bann lekspresyon ki nepli dan New World Translation. I osi annan bann nouvo kantik lo predikasyon ek ranson ki’n ganny azoute. Deplis, vi ki sant kantik i annan en rol enportan dan nou ladorasyon, Konsey Direkter ti anvi fer sorti en liv kantik ki pli o nivo. Alor, kouvertir sa liv i parey New World Translation.

16, 17. Ki serten sanzman ki’n ganny fer dan sa nouvo liv kantik?

16 Pour fer li pli fasil pour servi sa  liv, bann kantik in ganny mete par size. Par egzanp, sa premye 12 kantik i lo Zeova, sa 8 ki swiv i lo Zezi ek ranson e ensidswit. I annan en lalis konplet tou bann size o konmansman sa liv kantik. Sa i fer li pli fasil pour bann frer rod en kantik pour en diskour piblik.

17 Pour ed tou dimoun sant avek tou zot leker, bann parol dan kantik ti ganny sanze pour ki mesaz sa bann kantik i vin pli kler. Bann mo ki pa ganny servi souvan in ganny ranplase par bann mo pli fasil. I ti osi neseser pour met “nou” dan plas “ou” dan serten kantik. Akoz? Avan, ler en dimoun ti pe sant bann parol ki dan serten kantik, i ti konmsi i ti pe dir lezot ki pour fer. Sa ti kapab anbaras bann nouvo, bann ki enterese, bann zenn ek bann ser ki asiste nou bann renyon ek lasanble. Alor serten tit ek parol in ganny sanze.

Sant bann kantik pandan ladorasyon fanmir (Vwar paragraf 18)

18. Akoz nou devret aprann sa bann kantik ki dan sa nouvo liv kantik? (Vwar not.)

18 Bokou kantik dan Sant pour Zeova avek lazwa i parey bann lapriyer. Sa bann kantik i kapab ed ou pour dir Zeova sa ki ou santi. Lezot kantik pou ed nou ankouraz nou bann frer ek ser “pour demontre lanmour e fer bann bon aksyon.” (Ebre 10:24) Nou anvi konn bann lanmizik, ritm ek parol nou bann kantik. En fason pour fer sa i par ekout lanrezistreman bann kantik ki nou frer ek ser in sante. Sa bann lanrezistreman i disponib lo jw.org. Ler ou sant sa bann kantik kot lakour, ou kapab aprann sant avek konfidans ek santiman. *​—Vwar not.

19. Ki mannyer tou dimoun dan kongregasyon i kapab ador Zeova?

19 Pa bliye ki sante i zwe en rol enportan dan nou ladorasyon. Sa i en bon fason pour montre Zeova ki nou kontan li e ki nou rekonesan pour tou sa ki i’n fer pour nou. (Lir Izai 12:5.) Ler ou sant avek lantouzyasm, ou ankouraz lezot pour fer parey. Ki swa ou en zenn, aze ouswa nouvo dan laverite, tou dimoun dan kongregasyon i kapab ador Zeova par sant kantik. Alor, pa ezite pour sant avek tou ou leker. Obei sa ki en psalmis ti dir: “Sant pour Zeova!” Wi, sant avek lazwa!​—Psonm 96:1, NWT.

^ par. 11 Pour plis sizesyon lo konman pour amelyor nou lavwa pour sante, vwar JW Broadcasting pour Desanm 2014 (dan bann video FROM OUR STUDIO).

^ par. 18 Dan sesyon bomaten ek apremidi nou bann lasanble, sak sesyon i konmans avek en progranm lanmizik dis minit. Sa progranm lanmizik i ed nou pour anvi sante e pour ekout progranm lasanble. Alor, nou tou nou devret dan nou plas e pare pour ekoute ler lanmizik i konmanse.