Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  March 2017

Eski ou pou port latansyon lo sa ki’n ganny ekrir avek tou ou leker?

Eski ou pou port latansyon lo sa ki’n ganny ekrir avek tou ou leker?

“Sa ki ti arive . . . i’n ganny ekrir konman en lavertisman pour nou ki pe viv dan sa bann letan lafen.”1 KORENTYEN 10:11.

KANTIK: 11, 61

1, 2. Akoz nou pou diskit lo legzanp kat lerwa Zida?

SI OU ti vwar en dimoun glise e tonbe ler i ti pe mars dan en santye, i tre probab ki ou ti pou fer atansyon ler ou mars lo sa menm santye. Dan menm fason, ler nou egzamin fot ki lezot in fer dan zot lavi, nou kapab evite fer menm fot. Par egzanp, nou kapab aprann avek fot bann dimoun ki ganny mansyonnen dan Labib.

2 Dan sa lartik avan, nou ti lir konsernan sa kat lerwa Zida ki ti servi Zeova avek tou zot leker, me kantmenm sa, zot ti fer bann fot grav. Sa ki zot ti fer in ganny ekrir dan Labib pour ki nou kapab medit lo sa ki zot ti fer e tir bann leson enportan. Ki nou kapab aprann avek sa ki ti arive avek zot e ki mannyer nou kapab evite fer menm fot ki zot ti fer?Lir Romen 15:4.

 DEPAN LO LASAZES IMEN I ANMENN MOVE KONSEKANS

3-5. (a) Menm si Aza ti devoue anver Zeova avek tou son leker, ki fot ki i ti fer? (b) Akoz Aza ti’n petet depan lo bann imen ler i ti pe lager avek Baasa?

3 Premyerman, annou vwar ki Aza ti fer. Aza ti depan lo Zeova ler en milyon Etyopyen ti atak Zida, me ler i ti al lager kont Baasa lerwa Izrael, i pa ti depan lo Zeova. Aza ti anvi anpes Baasa fortifye lavil Rama ki ti en lavil enportan pour Izrael pros avek lafrontyer Zida. (2 Kronik 16:1-3) Aza ti deside pey lerwa Siri pour ed li. Ler bann Siryen ti atak bann lavil Izrael, Baasa ti deswit “fer aret konstriksyon pour protez Rama.” (2 Kronik 16:5) Premye kou Aza ti’n kapab panse ki i ti’n fer en bon desizyon!

4 Ki mannyer Zeova ti santi? Zeova pa ti kontan akoz Aza pa ti’n depan lo li, alor i ti anvoy profet Anani pour al koz avek Aza. (Lir 2 Kronik 16:7-9.) Anani ti dir Aza: “Ou bann lennmi pou deklar lager kont ou.” Aza ti pran kontrol lavil Rama, me larestan son lavi, li ek son pep ti bezwen toultan lager kont lezot nasyon.

5 Dan sa lartik avan, nou ti vwar ki Zeova ti pran plezir dan Aza. Menm si Aza ti enparfe, Bondye ti vwar ki Aza ti devoue anver li avek tou son leker. (1 Lerwa 15:14, NWT) Kantmenm sa, ler Aza ti fer en move desizyon, i pa ti kapab evit bann konsekans. Akoz i ti depan lo li menm ek lezot imen e non pa lo Zeova? Petet Aza ti panse ki i ti pou kapab servi bann taktik militer pour ganny lager. Oubyen petet i ti’n ekout move konsey ki lezot ti donn li.

Dan tou sityasyon, nou bezwen depan lo Zeova e non pa lo nou prop fason panse

6. Ki nou kapab aprann avek fot ki Aza ti fer? Donn en legzanp.

6 Ki nou kapab aprann avek fot ki Aza ti fer? Dan tou sityasyon, nou bezwen depan lo Zeova e non pa lo nou prop fason panse. Ki swa nou problenm i ptipti ouswa gro, nou bezwen demann li led. I byen pour reflesir lo sa kestyon swivan: Eski parfwa nou depan lo nou menm pour esey rezourd en problenm dan fason ki nou krwar i pli byen? Ouswa, eski premyerman, nou toultan konsider sa ki Labib i dir e servi sa lenformasyon pour rezourd nou problenm? Par egzanp, meton ou fanmir i fer li difisil pour ou al renyon ek lasanble, eski ou pou demann Zeova pour ed ou deside ki pour fer dan en tel sityasyon? Oubyen petet ou’n san en travay pour en bon pe letan e la en dimoun i anvi anploy ou, eski ou pou dir sa dimoun ki ou bezwen asiste ou bann renyon tou le semenn menm si  ou riske pa ganny sa travay? Nenport ki problenm ki kapab arive, pa oubliy konsey sa psalmis: “Met ou lavi dan lanmen Zeova, depan lo li e li i pou azir dan ou faver.”Psonm 37:5, NWT.

KI I KAPAB ARIVE SI NOU MAL SWAZIR NOU ZANMI?

7, 8. Ki bann fot Zeozafat ti fer e avek ki rezilta? (Vwar portre o konmansman sa lartik.)

7 Aprezan annou vwar legzanp Zeozafat, garson Aza. I ti annan bann zoli kalite ki Zeova ti kontan. Ler i ti depan lo Zeova, i ti fer en kantite bon keksoz. Me i ti fer bann move desizyon osi. Par egzanp, i ti fer son garson marye avek fiy move Lerwa Aab. Apre, i ti zwenn Aab pour lager kont bann Siryen menm si profet Mikaya ti’n averti li pour pa fer sa. Pandan batay, bann Siryen ti atak Zeozafat e esey touy li. (2 Kronik 18:1-32) Ler i ti retourn Zerizalenm, profet Zeou ti demann li: “Eski ou devre port sekour en move dimoun? Eski ou devre kontan en dimoun ki deteste [Zeova]?”Lir 2 Kronik 19:1-3.

8 Eski Zeozafat ti aprann son leson avek sa ki ti arive avek li e avek lavertisman sa profet? Malerezman, i pa ti fer sa. Menm si i ti ankor kontan e fer plezir Zeova, i ti fer zanmi avek en zonm ki pa ti ador Zeova. Sa zonm ti Lerwa Aazya, garson Aab. Zeozafat ek Aazya ti travay ansanm pour fer bato. Me sa bann bato ti ganny demoli avan ki sa de lerwa ti kapab servi zot.2 Kronik 20:35-37.

9. Ki i kapab arive si nou mal swazir nou zanmi?

9 Ki nou kapab aprann avek sa ki ti  arive avek Zeozafat? Zeozafat ti fer sa ki byen e i ti “servi [Zeova] avek tou son leker.” (2 Kronik 22:9) Me selman, i ti pas letan avek bann dimoun ki pa ti kontan Zeova e sa ti anmenn bann problenm grav dan son lavi. Anfet, i ti pros pour ganny touye. Rapel sa proverb ki dan Labib: “Si ou frekant en saz, ou menm ou ava vin saz; Si ou frekant dimoun ki bet, ou pou ganny problenm.” (Proverb 13:20) Nou anvi koz avek lezot lo Zeova. Kantmenm sa, i danzere pour fer zanmi avek bann dimoun ki pa servi li.

Eski ou krwar ki Bondye pou satisfer ou dezir pour ganny en konzwen?

10. (a) Si nou anvi marye, ki nou kapab aprann avek Zeozafat? (b) Ki nou devret rapel?

10 Si par egzanp nou anvi marye, ki nou kapab aprann avek Zeozafat? Petet nou kapab annan bann santiman romantik pour en dimoun ki pa kontan Zeova. Nou kapab mazinen ki nou pa pou zanmen trouv en dimoun parmi pep Bondye pour marye avek. I vre ki Zeova in kree nou avek sa dezir pour annan en konzwen. Me si nou pa kapab trouv sa dimoun ki nou kontan pour marye avek, ki nou devret fer? En keksoz ki kapab ed nou se medit lo sa ki ti arive avek Zeozafat. I ti abitye demann Zeova gidans. (2 Kronik 18:4-6) Me ler i ti vin zanmi Aab, ki pa ti kontan Zeova, i ti inyor lavertisman Zeova. Zeozafat ti’n devret rapel ki “lizye Zeova pe get partou lo later pour li donn son lafors tou bann ki servi li avek tou zot leker.” (2 Kronik 16:9, NWT) Nou osi nou devret rapel ki Zeova i oule ed nou. I konpran bann sityasyon ki nou ladan e i kontan nou. Eski ou krwar ki Bondye pou satisfer ou dezir pour ganny en konzwen? Ou kapab asire ki a en serten moman dan ou lavi, i pou fer li!

Pa frekant en dimoun ki pa ador Zeova (Vwar paragraf 10)

PA LES LORGEY DEVLOPE DAN OU LEKER

11, 12. (a) Ki Ezekya ti fer ki ti revel sa ki dan son leker? (b) Akoz Zeova ti pardonn Ezekya?

11 Ki leson nou kapab aprann avek Ezekya? Zeova ti ed Ezekya vwar tou sa ki i ti vreman annan dan son leker. (Lir 2 Kronik 32:31.) Ler i ti tonm byen malad, Bondye ti dir li ki i pou vin an bonn sante e i ti donn li en siny pour rasir li. Zeova ti fer lonbraz rekil dis mars lo leskalye. I paret ki pli tar, bann prens Babilonnyen ti anvi konn plis lo sa siny e zot ti anvoy bann zonm kot Ezekya pour demann li plis lenformasyon. (2 Lerwa 20:8-13, NWT; 2 Kronik 32:24) Zeova pa ti dir Ezekya ki mannyer pour tret sa bann viziter. Labib i dir ki Zeova “ti  les li lib” pour vwar ki i ti pou fer. Ezekya ti montre sa bann zonm sorti Babilonn tou trezor ki i ti annan. Sa ti montre kwa ki ti dan leker Ezekya. Dan ki fason?

12 Malerezman, Ezekya ti’n vin orgeye. An rezilta sa, i “pa ti montre rekonesans pour benediksyon ki i ti gannyen.” Labib pa dir akoz son latitid ti sanze. Petet akoz sa laviktwar lo bann Asiryen ouswa akoz Zeova ti’n geri li. Oubyen petet i akoz i ti’n vin ris e renonmen. Menm si Ezekya ti’n servi Zeova avek tou son leker, pour en serten letan, i ti’n vin orgeye e sa pa ti fer plezir Zeova. Me pli tar, ‘Ezekya ti imilye li’ e Zeova ti pardonn li.2 Kronik 32:25-27; Psonm 138:6.

Lafason ki nou reazir ler lezot i felisit nou i kapab revel sa ki dan nou leker

13, 14. (a) Ki sityasyon ki kapab revel sa ki dan nou leker? (b) Ki mannyer nou devret reazir ler lezot i felisit nou?

13 Ki nou kapab aprann avek Ezekya ek fot ki i ti fer? Rapel ki Ezekya ti azir avek lorgey deswit apre ki Zeova ti’n ed li defet bann Asiryen e apre ki i ti’n geri li. Alor, ler nou ganny bann byenfe ouswa lezot i donn nou loner, ki nou pou fer? Lafason ki nou reazir pou revel sa ki dan nou leker. Par egzanp, en frer in kapab travay dir pour prepar e donn en diskour avek en gran lodyans. Bokou dimoun i felisit li pour sa ki in fer. Ki mannyer i pou reazir avek tou sa felisitasyon?

14 Nou devret toultan rapel sa ki Zezi ti dir: “Ler zot fini fer tou sa ki zot in ganny demande pour fer, dir: ‘Nou bann lesklav bon nanryen. Sa ki nou’n fer, sanmenm ki nou ti’n devret fer.’” (Lik 17:10) Rapel ki ler Ezekya ti vin orgeye, i pa ti demontre lapresyasyon pour led ki Zeova ti’n donn li. Alor, ler lezot i felisit nou pour en diskour ki nou’n fer, kwa ki pou ed nou pour annan limilite? Nou kapab medit lo sa ki Zeova in fer pour nou. Nou kapab osi koz lo li ek ki mannyer in ed nou. Apre tou, Zeova i sa enn ki’n donn nou Labib ek son lespri sen pour nou kapab fer sa diskour.

LES ZEOVA GID OU LER OU PE FER BANN DESIZYON

15, 16. Ki Zosya ti fer ki ti kout li son lavi?

15 Finalman, ki nou kapab aprann avek Zosya? Menm si Zosya ti en bon lerwa, i ti fer en fot ki ti kout li son lavi. (Lir 2 Kronik 35:20-22.) Ki ti arive? Menm si i ti napa okenn rezon pour fer li, Zosya ti deklar lager kont Neko, lerwa Lezip. Anfet, Neko ti dir Zosya ki i pa ti anvi lager kont li. Labib i dir ki mesaz ki Neko ti anvoy kot Yosiya “ti sorti kot Bondye.” Me Zosya ti al lager e i ti ganny touye. Alor,  akoz i ti lager kont Neko? Labib pa dir.

16 Zosya ti’n devret rode si sa ki Neko ti’n dir ti vreman sorti kot Zeova. Ki mannyer i ti pou fer sa? I ti’n kapab demann Zeremi ki ti en profet Zeova. (2 Kronik 35:23, 25) Zosya ti’n osi kapab vwar ki Neko ti pe al Karkemis pour lager kont en lot nasyon e non pa kont Zerizalenm. Neko ti osi annan respe pour Zeova e pour son pep. Zosya pa ti reflesir byen avan fer son desizyon. Ki leson nou aprann? Ler nou annan en problenm e nou bezwen fer en desizyon, nou devret premyerman rode ki Zeova ti pou anvi nou fer.

17. Ler nou annan bann problenm, ki mannyer nou kapab evite fer sa menm fot ki Zosya?

17 Ler nou annan en desizyon pour fer, nou premyerman bezwen mazin lo bann prensip Labib ki kapab ed nou e ki mannyer nou kapab aplik zot. Dan serten ka, nou kapab fer resers dan nou bann piblikasyon e nou menm kapab demann konsey avek en ansyen. I kapab ed nou mazin lo lezot prensip Labib. Reflesir lo sa sityasyon: En ser in marye avek en msye ki pa temwen. I fer plan pour al prese en zour spesifik. (Akt 4:20) Me ler sa zour pour li al prese i arive, son msye pa anvi ki i al prese. I dir li ki tou resaman zot pa’n pas ase letan avek kanmarad e ki i ti a kontan anmenn li en landrwa kot zot pou kapab pas letan ansanm. Alor, sa ser i mazin lo bann verse Labib ki kapab ed li fer en bon desizyon. I konnen ki i bezwen obei Bondye e ki Zezi ti donn sa lord pour fer disip. (Matye 28:19, 20; Akt 5:29) Me i osi rapel ki en madanm i bezwen soumet avek son msye e ki bann serviter Bondye i devret rezonnab. (Efezyen 5:22-24; Filipyen 4:5) Eski son msye pe esey anpes li al prese oubyen i zis anvi pas letan avek li sa zour? Konman bann serviter Zeova, nou anvi fer bann desizyon ki rezonnab e ki fer li plezir.

KONTINYEN SERVI ZEOVA AVEK TOU NOU LEKER E REZOUIR

18. Ki ou kapab aprann ler ou medit lo legzanp sa kat lerwa Zida?

18 Par ler, nou osi nou kapab fer sa bann fot ki sa kat lerwa Zida ti fer. Nou kapab (1) depan lo nou prop fason panse, (2) mal swazir nou zanmi, (3) vin orgeye, oubyen (4) fer bann desizyon san mazinen kwa ki lavolonte Bondye. Menm si sa i leka, i napa okenn rezon pour santi ki nou pa pou zanmen kapab fer plezir Zeova. I vwar sa ki bon dan nou, zis parey i ti vwar sa ki bon dan sa kat lerwa. Zeova i osi vwar ki kantite nou kontan li e ki nou vreman anvi servi li avek tou nou leker. Se pour sa rezon ki i’n donn nou sa bann legzanp ki pou ed nou pour pa fer bann fot grav. Alor, annou medit lo sa bann resi ki dan Labib e demontre rekonesans pour sa bann resi ki Zeova in donn nou!