Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  February 2017

Plan Zeova pou ganny akonplir!

Plan Zeova pou ganny akonplir!

“Mon’n koze e mon pou fer sa ki mon’n dir arive. Sa i mon plan e mon pou akonpli li.”IZAI 46:11, NWT.

KANTIK: 147, 149

1, 2. (a) Ki Zeova in revel avek nou? (b) Ki promes nou vwar dan Izai 46:10, 11 ek 55:11?

SA BANN premye parol dan Labib i fer resorti sa mesaz senp me ki vreman profon: “O konmansman, Bondye ti kree lesyel ek later.” (Zenez 1:1) Nou’n vwar zis detrwa keksoz ki Bondye ti kree dan liniver e nou pa konpran preski nanryen an sa ki konsern lespas, lalimyer ek gravite. (Eklezyast 3:11) Me Zeova in revel son plan pour later ek bann imen. I ti kree bann imen dan son resanblans e i ti oule ki zot viv ere lo later. (Zenez 1:26) Zot ti pou son bann zanfan e li i ti pou zot Papa.

2 Dan Zenez sapit trwa, nou vwar ki plan Zeova ti ganny kestyonnen. (Zenez 3:1-7) Me, napa problenm ki Zeova pa kapab rezourd e i pou toultan realiz son plan. (Izai 46:10, 11; 55:11) Nou kapab asire ki plan Zeova pou ganny akonplir egzakteman dan sa moman apropriye!

3. (a) Ki bann lansennyman enportan ki ed nou konpran mesaz Labib? (b) Akoz nou pou diskit lo sa bann lansennyman aprezan? (c) Ki bann kestyon ki nou pou diskit lo la?

 3 San dout, nou konn plan Bondye pour later ek bann imen e rol Zezi dan sa plan. Sa i bann laverite enportan ki dan Labib e i kapab ki sa ti bann premye keksoz ki nou ti aprann ler nou ti konmans etidye Parol Bondye. Aprezan nou anvi ed lezot pour aprann sa bann lansennyman enportan. Nou annan en loportinite spesyal pour fer sa pandan sa mwan ler nou pe envit dimoun pour asiste Memoryal lanmor Kris. (Lik 22:19, 20) Si zot vin sa levennman enportan, zot pou aprann plis lo plan merveye Bondye. Alor, la i sa bon moman pour mazin bann kestyon spesifik ki nou kapab servi pour ankouraz dimoun pour asiste Memoryal. Dan sa lartik, nou pou diskit lo trwa kestyon: Ki plan Bondye pour later ek bann imen? Kwa ki’n al mal? Akoz sakrifis Zezi i sa keksoz prensipal pour plan Bondye ganny akonplir?

KI TI PLAN NOU KREATER?

4. Ki mannyer kreasyon i “rakont laglwar Bondye”?

4 Zeova i en Kreater pwisan. Tou sa ki i’n kree i tre bon. (Zenez 1:31; Zeremi 10:12) Ki nou kapab aprann avek sa labote ek lord ki nou vwar dan kreasyon? Nou aprann ki tou sa ki Zeova in kree, depi sa ki pli pti ziska sa ki pli gran, i pour nou prop byenfe. Ki mannyer ou santi ler ou mazin lo lafason ekstraordiner ki en selil imen in ganny fer, ler ou get en pti baba ki’n fek ne ouswa en zoli soley kouse? Nou admir sa bann keksoz parski Zeova in kree nou avek sa abilite pour konnen kwa ki vreman zoli.—Lir Psonm 19:1; 104:24.

5. Ki Zeova in fer pour ki tou kreasyon i mars byen ansanm?

5 Zeova in met bann limit dan son kreasyon. I ti met bann lalwa dan lanatir e i ti fer bann lalwa lo moralite. I ti fer sa bann lalwa pour ki tou keksoz dan liniver i mars byen ansanm. (Psonm 19:7-9) Tou keksoz dan liniver i annan son plas ek fonksyon. Par egzanp, lalwa gravite i fer ki latmosfer i reste pros avek later e i kontrol bann losean ek mare. San lalwa gravite, i ti pou enposib annan lavi lo later. Sa bann limit ki Zeova in met dan lanatir i fer ki i annan en lord dan liniver. Sa i montre ki i annan en plan pour later ek bann imen. Dan nou minister, nou kapab ed lezot pour konn Kreater sa liniver merveye.Revelasyon 4:11.

6, 7. Ki bann kado ki Zeova ti donn Adan ek Ev?

6 I ti plan Zeova ki bann imen i viv pour touzour lo later. (Zenez 1:28; Psonm 37:29) Vi ki i zenere, i ti donn Adan ek Ev tou sort kalite kado parfe. (Lir Zak 1:17.) Zeova ti donn zot liberte pour swazir, abilite pour rezonnen, pour kontan e pour annan bon relasyon avek lezot. Nou Kreater ti koz avek Adan e i ti enstri li ki mannyer  pour fer sa ki byen. Adan ti osi aprann ki mannyer pour pran swen avek son lekor, avek bann zannimo e avek later. (Zenez 2:15-17, 19, 20) Zeova ti donn Adan ek Ev abilite pour goute, touse, vwar, tande e santi tou sa bann bon keksoz ki i ti’n fer pour zot pour ki zot kapab rezouir lavi dan en paradi lo later. Adan ek Ev ti osi annan bokou travay enteresan pour fer. Zot ti pou kapab kontinyen aprann e dekouver bann nouvo keksoz pour touzour.

7 Kwa ankor ki ti dan plan Bondye? Zeova ti donn Adan ek Ev abilite pour fer bann zanfan parfe e zot zanfan ti pou osi ganny bann zanfan ziska ki later i ranpli. Zeova ti oule ki bann paran i kontan zot zanfan zis parey i ti kontan son de premye zanfan, Adan ek Ev. I ti donn sa fanmir imen later ek tou sa bann zoli keksoz ki ti lo la. Later ti pou zot landrwa reste pour touzour.Psonm 115:16.

KWA KI’N AL MAL?

8. Akoz Bondye ti donn Adan ek Ev sa lalwa ki trouve dan Zenez 2:16, 17?

8 Keksoz pa ti deswit mars parey Zeova ti oule? Ki ti arive? Zeova ti donn Adan ek Ev en senp lalwa pour ki zot kapab konn limit zot laliberte. I ti dir: “Ou kapab manz tou fri ki dan zarden; me fodre pa ki ou manz fri sa pye . . . konnesans lebyen ek lemal, akoz zour ki ou manz sa fri, ou pou mor.” (Zenez 2:16, 17) Sa lalwa pa ti difisil pour zot konpran e pour obei parski i ti annan en kantite lezot bon manze dan zarden.

9, 10. (a) Lo kwa Satan ti akiz Zeova? (b) Ki Adan ek Ev ti deside fer? (Vwar portre o konmansman sa lartik.)

9 Satan ti servi en serpan pour anbet Ev pour ki i dezobei Zeova, son Papa. (Lir Zenez 3:1-5; Revelasyon 12:9) Satan ti dir ki Bondye ti defann son bann zanfan manz “tou fri dan zarden.” I ti konmsi Satan ti pe dir: ‘Ou oule dir mwan ki ou pa kapab fer sa ki oule?’ Apre i ti dir Ev: “Zot pa pou mor.” Satan ti koz manti e i ti esey konvenk Ev ki i pa ti bezwen ekout Bondye. Satan ti dir: “Bondye i konnen ki letan zot pou manz sa fri, zot lizye pou ouver.” Satan ti pe dir ki Zeova pa ti oule ki zot manz sa fri parski sa ti pou fer zot ganny en konnesans spesyal. Finalman, i ti fer en fo promes: “Zot pou vin parey Bondye e zot pou konn lebyen ek lemal.”

10 Adan ek Ev ti bezwen deside ki pour fer. Eski zot ti pou obei Bondye ouswa ekout sa serpan? Malerezman, zot ti deside pour dezobei Bondye. Zot ti rezet Zeova konman zot Papa e zot ti zwenn ansanm avek Satan. Aprezan, zot ti tousel e san proteksyon Zeova.Zenez 3:6-13.

11. Akoz Zeova pa ti kapab les pase pese Adan ek Ev?

11 Ler Adan ek Ev ti kas lalwa Bondye, zot ti nepli parfe. An plis, zot ti vin lennmi Bondye parski i ay sa ki mal. Son “lizye i tro pir pour  kontanple lemal.” (Abakouk 1:13) Si Zeova pa ti fer nanryen konsernan pese Adan ek Ev, byennet tou sa ki i ti’n kree ti pou’n vin an danze. Bann lanz ek imen ti pou’n demann zot lekor si zot kapab annan konfyans dan li. Me Zeova i touzour azir dapre son bann standar drwat e i pa zanmen kas zot. (Psonm 119:142) Menm si Adan ek Ev ti annan liberte pour swazir, zot pa ti pou kapab sap konsekans zot rebelyon kont Zeova. Pour fini kont, zot ti mor e retourn dan sa lapousyer ki zot ti ganny kree avek.Zenez 3:19.

12. Ki ti arive avek bann zanfan Adan?

12 Ler Adan ek Ev ti manz sa fri, Zeova pa ti kapab aksepte zot konman son fanmir. I ti fer zot sorti dan zarden Edenn e zot pa ti pou zanmen retourn laba ankor. (Zenez 3:23, 24) Zeova ti fer zot pey konsekans zot desizyon. (Lir Deterononm 32:4, 5.) An rezilta sa, zot ti nepli kapab imit Zeova parfetman. Adan e tou son bann zanfan ti perdi en lavenir merveye. Adan ti kapab zis pas lenperfeksyon, pese ek lanmor avek son bann zanfan. (Romen 5:12) Adan ti fer zot perdi sa sans pour viv pour touzour. Adan ek Ev pa ti pou zanmen kapab fer en zanfan parfe e zot zanfan osi pa ti pou kapab fer bann zanfan parfe. Depi ki Satan ti fer Adan ek Ev vir kont Bondye, Dyab in esey enfliyans tou imen pour fer parey.Zan 8:44.

LANMITYE AVEK BONDYE I POSIB GRAS A RANSON

13. Ki Bondye i oule pour bann imen?

13 Zeova pa ti aret kontan bann imen. Menm si Adan ek Ev ti’n kit li, i ti oule ki imen i annan en bon relasyon avek li. I pa ti oule ki personn parmi zot i mor. (2 Pyer 3:9) Alor, deswit Bondye ti fer bann laranzman pour ki bann imen i kapab revin son zanmi. Ki mannyer i ti pou fer sa san ki i al kont son standar? Annou vwar.

Menm si Adan ek Ev ti’n rezet Bondye, deswit i ti fer bann laranzman pour ki bann imen i kapab revin son zanmi

14. (a) Dapre Zan 3:16, ki Bondye ti fer pour retir bann imen dan pese ek lanmor? (b) Ki kestyon nou kapab diskit avek bann dimoun?

14 Lir Zan 3:16. Bokou dimoun ki vin Memoryal i konn sa verse par ker. Me ki mannyer sakrifis Zezi i fer li posib pour ganny lavi eternel? Nou annan sa loportinite pour ed dimoun konpran larepons sa kestyon ler nou envit zot Memoryal, ler nou asiste Memoryal ansanm avek zot e ler nou vizit zot apre Memoryal. Pli zot konpran ranson, pli zot pou kapab realize ki degre Zeova i kontan bann imen e ki i en Bondye ki saz. Lo ki pwen  konsernan ranson nou kapab koz lo la avek zot?

15. Dan ki fason Zezi ti diferan avek Adan?

15 Zeova ti donn nou en zonm parfe ki ti pou kapab donn son lavi konman en ranson. Sa zonm parfe ti pou bezwen reste fidel avek Zeova. I ti pou bezwen pare donn son lavi pour bann imen. (Romen 5:17-19) Zeova ti transfer lavi Zezi, son premye garson spirityel lo later. (Zan 1:14) Alor Zezi ti vin en imen parfe, zis parey Adan. Me kontrerman avek Adan, Zezi ti swiv standar Zeova parey en zonm parfe ti ekspekte fer. Menm ler i ti ganny teste severman, Zezi pa ti zanmen kas okenn lalwa Bondye.

16. Akoz ranson i en kado sitan presye?

16 Par mor konman en zonm parfe, Zezi ti kapab sov imen dan pese ek lanmor. I ti koresponn egzakteman avek tou sa ki Adan ti’n devret ete. Zezi ti en zonm parfe ki ti obeisan e fidel avek Bondye. (1 Timote 2:6) I ti mor pour nou e son sakrifis i donn tou zonm, madanm ek zanfan loportinite pour viv pour touzour. (Matye 20:28) Ranson i sa keksoz prensipal dan lakonplisman plan Bondye.2 Korentyen 1:19, 20.

ZEOVA TI FER LARANZMAN POUR KI NOU KAPAB RETOURNEN

17. Ki ranson i fer posib?

17 I ti kout Zeova bokou pour li fourni ranson. (1 Pyer 1:19) I sitan kontan nou ki i ti pare pour les son  Garson byenneme mor pour nou. (1 Zan 4:9, 10) Dan en sans, Zezi ti vin nou papa dan plas Adan. (1 Korentyen 15:45) Zezi in fer li posib pour ki nou pa zis viv pour touzour, me osi pour en zour, retourn dan fanmir Bondye. Ranson i fer li posib pour ki bann imen i vin parfe e ki Zeova i aksepte nou dan son fanmir san ki i kas son bann lalwa. Pa i pou en keksoz merveye ler tou bann ki fidel avek Zeova i vin parfe! A lafen defen, tou sa ki dan lesyel e lo later pou ini konman en sel fanmir e nou tou nou pou vin zanfan Bondye.Romen 8:21.

18. Kan ki Zeova pou vin “tou pour tou dimoun”?

18 Menm si nou premye paran ti rezet Zeova, i pa ti aret kontan imen e demontre son lanmour, i ti pey en ranson. Menm si nou enparfe, Satan pa kapab anpes nou reste fidel avek Zeova. Par mwayen ranson, Zeova pou ed nou vin konpletman drwat. Zis imazin ki mannyer lavi pou ete ler tou dimoun “ki aksepte Garson e demontre lafwa dan li” pou ganny lavi eternel! (Zan 6:40) Nou Papa ki saz e ki kontan nou pou akonpli son plan pour ed bann imen vin parfe. Apre sa, Zeova pou vin “tou pour tou dimoun.”1 Korentyen 15:28.

19. (a) Ki nou rekonesans pour ranson i devret motiv nou pour fer? (Vwar sa bwat “ Annou kontinyen rode lekel ki merite.”) (b) Ki nou pou vwar dan sa lot lartik?

19 Nou rekonesans pour ranson i devret motiv nou pour koz avek lezot lo sa kado presye. Dimoun i devret konnen ki atraver ranson ki Zeova in donnen avek lanmour, tou limanite in ganny ofer sa loportinite pour viv pour touzour. Me ranson i fer plis ki sa, i reponn sa kestyon ki Satan ti souleve dan zarden Edenn. Nou pou vwar sa dan sa lot lartik.