Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  March 2016

Esey konpran ki led pratik, sipor emosyonnel oubyen lankourazman sorti dan Labib ou bann frer ek ser i bezwen

Eski ou kapab ede dan ou kongregasyon?

Eski ou kapab ede dan ou kongregasyon?

AVAN Zezi ti mont dan lesyel, i ti dir son bann disip: “Zot a vin mon bann temwen . . . ziska tou bann landrwa pli elwannyen lo later.” (Akt 1:8) Ki mannyer zot ti pou arive pres partou lo later?

Martin Goodman, en profeser Liniversite Oxford, i dir ki “bann Kretyen ti santi ki zot ti annan en misyon pour fer e sa ti fer ki dan lanpir Romen zot ti diferan avek lezot group relizye, enkli bann Zwif.” Zezi ti al dan diferan landrwa pour prese. Bann vre Kretyen ti bezwen imit son legzanp e pres sa “Bonn Nouvel konsernan Rwayonm Bondye” partou. Zot ti bezwen rod dimoun ki ti anvi konn laverite. (Lik 4:43) Sanmenm sa dan premye syek, i ti annan bann “zapot,” en mo ki vedir bann ki’n ganny anvoye pour fer en keksoz. (Mark 3:14) Zezi ti donn son bann disip sa lord: “Ale e fer tou pep vin mon bann disip.”Matye 28:18-20.

Sa 12 zapot Zezi i nepli lo later, me bokou serviter Zeova i imit zot legzanp dan predikasyon. Ler zot ganny demande pour pres dan en landrwa kot i annan plis bezwen zot dir: “La mon la! Anvoy mwan.” (Izai 6:8) Par egzanp, i annan serten ki’n al servi dan lezot pei, tel parey sa plizyer milye ki’n ganny zot diplonm Lekol Gilead. Lezot in al servi en lot landrwa dan zot prop pei. Bokou in aprann en nouvo langaz pour ed en kongregasyon oubyen en group. I pa ti toultan fasil, me tou sa bann frer ek ser ti pare pour fer bann sakrifis  pour montre zot lanmour pour Zeova ek son pep. Alor zot ti fer en bon plan e servi zot letan, lenerzi ek larzan pour ede pres kot i annan en pli gran bezwen. (Lik 14:28-30) Sa ki sa bann frer ek ser pe fer i annan en gran valer.

I vre ki pa nou tou ki kapab al servi kot i annan en pli gran bezwen oubyen aprann en nouvo langaz. Me nou tou nou kapab vin parey en misyonner dan nou prop kongregasyon.

VIN EN MISYONNER DAN OU PROP KONGREGASYON

Donn led . . .

Dan premye syek, bann Kretyen ti devoue dan predikasyon menm si laplipar zot ti reste dan zot prop lavil e zot pa ti misyonner. Pol ti dir Timote: “Fer ou travay konman predikater levanzil, e ranpli ou devwar dan servis Bondye.” (2 Timote 4:5) Sa bann parol ti aplik pour bann premye Kretyen e i ankor aplik pour nou ozordi. Tou Kretyen i devret obeir sa lord pour pres sa mesaz Rwayonm e fer disip. Menm dan nou prop kongregasyon, i annan bokou fason ki nou kapab vin parey en misyonner.

Par egzanp, ler bann misyonner i al reste dan en lot pei, keksoz i diferan e zot bezwen adapte avek sa nouvo fason viv. Menm si nou pa kapab al servi kot i annan en pli gran bezwen, eski nou kapab trouv bann nouvo fason pour pres avek dimoun? Par egzanp, an 1940, nou bann frer ek ser ti ganny ankouraze pour konmans donn temwannyaz lo semen en fwa par semenn. Eski ou’n deza esey donn temwannyaz lo semen? Eski ou’n deza servi prezantwar? Andotmo, eski ou pare pour servi bann nouvo metod pour pres sa bon nouvel?

par ankouraz lezot pour “travay konman predikater”

Si ou annan en leta lespri pozitif, ou pou devoue e pres avek lantouzyazm. Souvan bann ki al servi kot i annan en pli gran bezwen oubyen aprann en nouvo langaz i bann proklanmater byen eksperyanse e zot kapab en gran led pour kongregasyon. Par egzanp, zot vin en bon legzanp dan predikasyon. Souvan bann misyonner i osi diriz kongregasyon ziska ki bann frer dan sa landrwa i kalifye pour fer li. Si ou en frer batize, eski ou pe “swete” desarz plis responsabilite,  setadir, eski ou pare pour servi ou bann frer ek ser dan ou kongregasyon konman en asistan ministeryel oubyen ansyen?1 Timote 3:1.

VIN “EN LED FORTIFYAN”

par donn bann led pratik

Nou osi kapab ed nou kongregasyon dan lezot fason. Nou tou, ki swa zenn oubyen vye, frer ouswa ser, nou kapab vin “en led fortifyan” pour bann frer ek ser ki dan bezwen.Kolosyen 4:11NW.

Si nou anvi ed nou bann frer ek ser, nou bezwen konn zot byen. Labib i ankouraz nou pour “rode konman pous kanmarad,” setadir pour mazin bezwen nou bann frer ek ser ler nou zwenn ansanm. (Ebre 10:24) Sa pa vedir ki nou bezwen esey rod tou pti detay lo lavi prive lezot. I vedir ki nou devret esey konpran nou bann frer ek ser e sa ki zot bezwen. Zot kapab bezwen bann led pratik, sipor emosyonnel oubyen lankourazman sorti dan Labib. I vre ki dan serten ka zis bann ansyen ek asistan ministeryel ki kapab ed zot. (Galat 6:1) Me nou tou nou kapab ed bann frer ek ser aze oubyen bann fanmir ki pe rankontre problenm.

par donn sipor emosyonnel bann ki pe rankontre problenm

Salvatore ti ganny sa menm led. Vi ki i ti annan en gro problenm finansyel, i ti bezwen vann son biznes, son lakaz ek bokou keksoz ki li ek son fanmir ti annan. I ti enkyet bokou pour son fanmir. En lot fanmir dan kongregasyon ti vwar ki zot ti bezwen led. Zot ti donn Salvatore en pti larzan e ed li ek son madanm pour trouv en louvraz. Zot ti osi pas plizyer sware avek son fanmir pour ekout zot e ankouraz zot. Zot ti vin bann bon zanmi. Aprezan sa de fanmir i annan bann bon souvenir bann letan zot ti pase ansanm pandan sa letan difisil.

Bann vre Kretyen pa ezite pour partaz zot krwayans avek lezot. Nou bezwen imit Zezi e fer tou dimoun konn sa bann zoli promes ki Bondye in fer. Ki swa nou kapab al dan en lot pei oubyen non, nou tou nou fer nou mye pour ed lezot dan nou prop kongregasyon. (Galat 6:10) Ler nou pare pour donnen, nou pou kontan e nou pou kontinyen ‘prodwi fri par nou bon travay.’Kolosyen 1:10; Akt 20:35.