Skip to content

Al lo konteni

Kestyon lekter

Kestyon lekter

Akoz bann lennmi Zezi ti kritik li lo kestyon lav lanmen?

Lav lanmen ti enn parmi plizyer keksoz ki bann lennmi Zezi ti kritik li ek son bann disip. Lalwa Moiz i eksplike kwa ki ti pou fer en dimoun vin enpir, par egzanp, bann desarz sorti dan lekor, lalep ek tous lekor mor en dimoun ouswa lekor mor en zannimo. Lalwa ti osi eksplik lo ki mannyer pour revin pir. Sa ti kapab ganny fer par sakrifis, pran en ben oubyen fann delo pirifikasyon lo sa enn ki pe ganny pirifye.Levitik, sapit 11-15; Nonm, sapit 19.

Bann profeser Zwif ti azout zot prop lareg avek sa bann lalwa. Dapre en resers, zot ti fer en bann lareg detaye lo konman en dimoun ti kapab vin enpir e ki mannyer sa dimoun enpir ti kapab fer lezot vin enpir. Bann profeser Zwif ti osi fer bann lareg konsernan bann lobze ek resipyan ki kapab vin enpir ek bann ki pa kapab vin enpir e bann seremoni ki bann dimoun ti bezwen fer pour revin pir.

Bann lennmi Zezi ti demann li: “Akoz ou bann disip pa swiv tradisyon bann zanset, me zot manz avek lanmen enpir?” (Mark 7:5) Sa bann Farizyen pa ti pe refer avek lizyenn kot ou bezwen lav lanmen avan manze. Bann Farizyen ti’n fer en lareg ki avan en dimoun i manze, delo ti bezwen ganny vide lo lanmen sa dimoun konman parti en seremoni. Dapre sa menm resers, bann sef relizye ti “osi argimante lo ki resipyan ki devret ganny servi ler pe vid delo, ki kalite delo ki devret ganny servi, lekel ki devret vid delo ek ki parti lanmen ki devret ganny kouver avek delo.”

Ki mannyer Zezi ti reazir anver tou sa bann lalwa ki ti’n ganny fer par zonm? I ti dir bann sef relizye Zwif: “Bann ipokrit! Izai ti byen profetize lo zot, parey in ganny ekrir: Sa pep i onor mwan avek zot labous me zot leker i lwen avek mwan [Zeova]. Zot ladorasyon i initil; zot ansenny bann komannman ki’n ganny fer par zonm. Zot met dekote komannman Bondye e zot obeir bann tradisyon zonm.”Mark 7:6-8.