Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer  |  No. 6 2017

 LO KOUVERTIR | KI SA PLI BON KADO?

Rod sa pli bon kado

Rod sa pli bon kado

I pa en keksoz fasil pour rod sa pli bon kado pour en dimoun. Apre tou, i sa dimoun ki ganny sa kado ki pou konn valer sa kado. Sa ki bon pour en dimoun i pa neseserman bon pour en lot.

Par egzanp, en adolesan i kapab santi ki en dernyen model mobayl i sa pli bon kado pour li. De lot kote, en adilt i kapab apresye en leritaz ki annan en valer santimantal konman kado. Dan serten kiltir, bann zenn ek aze i prefere ganny larzan konman kado e sa i permet zot servi sa larzan pour rod sa ki zot anvi.

Malgre i pa fasil, bokou dimoun i kontinyen rod sa pli zoli kado pour en dimoun spesyal. Menm si i pa touzour posib pour trouv sa pli zoli kado, si nou gard antet serten keksoz, sa i kapab ed nou pour reisi trouv enn. Alor, annou vwar kat keksoz ki kapab ed nou trouv en kado ki sa lot dimoun i kapab apresye.

Dezir sa dimoun. En zonm ki reste Belfast, Nor Irlann, i dir ki ler i ti apepre 11 an, i ti ganny kado en bisiklet e sa ti sa pli bon kado ki i’n deza gannyen. Akoz i ti dir sa? I ti dir: “Akoz mon ti vreman anvi sa bisiklet.” Sa ki sa zonm ti dir i montre ki dezir en dimoun i annan bokou pour fer avek sa ki i pou apresye. Alor, mazin sa dimoun ki ou anvi donn en kado. Esey vwar kwa ki i kapab apresye, parski sa ki en dimoun i apresye i souvan annan en lenfliyans lo son dezir. Par egzanp, letan ki bann granparan i pase avek zot fanmir i annan en gran valer pour zot. Zot kapab toultan annan sa dezir pour vwar zot zanfan ek pti zanfan pli souvan. Ler bann granparan i ganny enkli dan bann vakans an fanmir, zot pou pli apresye sa ki lezot kado.

Ou bezwen ekout atantivman pour konnen ki en dimoun i kontan. Labib i dir ki nou devret ‘pare pour ekoute e pran letan avan koze.’ (Zak 1:19) Dan bann konversasyon toulezour avek ou zanmi oubyen fanmir, ekout byen bann pti detay ki pou ed ou konnen ki zot kontan e ki  zot pa kontan. Apre, i pou pli fasil pour ou konn sa ki sa dimoun i kontan.

Bezwen sa dimoun. En dimoun i kapab pli byen apresye en pti kado ki pa kout ser si i en keksoz ki i bezwen. Me ki mannyer ou pou konnen ki i bezwen?

Pour konnen ki sa dimoun i bezwen oubyen anvi, petet i pli fasil pour demann li. Par kont, serten dimoun ki pe donn en kado i prefere sirprann sa dimoun. Deplis, menm si serten dimoun i kapab dir ou ki i kontan oubyen pa kontan, souvandfwa zot pa pou dir ou ki zot bezwen.

Alor, ou bezwen obzerv byen sityasyon sa dimoun. Eski i zenn, aze, selibater, marye, divorse, vev, anploye oubyen in pran retret? Alor, reflesir lo en kado ki sa dimoun i kapab bezwen.

Pour annan bon zizman lo bezwen sa dimoun ki ou pe donn sa kado, fodre ou koz avek lezot dimoun ki’n deza dan sa menm sityasyon. Zot kapab koz avek ou lo en keksoz spesifik ki sa dimoun i vreman bezwen. Sa lenformasyon pou ed ou kapab donn en dimoun en kado ki i vreman bezwen e ki lezot pa ti pou’n mazin lo la.

Kan pou donn kado. Labib i dir: “En bon larepons ler fodre, i fer dibyen.” (Proverb 15:23) Sa verse i montre ki i annan en moman apropriye pour koze. Pareyman, i annan en moman apropriye pour azir. Zis parey en parol ki ganny dir dan sa bon moman i fer plezir sa dimoun ki pe ekoute, en kado ki ganny donnen dan sa bon moman oubyen lo sa bon lokazyon i kapab ede fer sa enn ki pe ganny sa kado kontan.

En zanmi pe al marye. En zenn pe fini lekol. En koup pe ekspekte en baba. Sa i serten lokazyon kot kado i ganny donnen. Serten in vwar li pratik pour gard en lalis bann levennman spesyal ki pou arive pandan lannen. Dan sa fason, zot kapab fer plan byen boner ki kado ki zot pou donnen lo sak sa bann lokazyon. *

Byensir, nou pa merit donn kado zis dan bann lokazyon spesyal. Nou kapab eksperyans sa lazwa pour donnen nenport ki ler. Me nou bezwen fer byen atansyon. Par egzanp, si en msye i donn en madanm en kado kot napa vreman en rezon pour fer li, sa madanm i kapab krwar ki sa msye i enterese avek li. Si sa i pa vreman leka, sa i kapab fer ki i annan en mal konprenezon ek en ta konplikasyon. Sa i met lanfaz lo en lot pwen enportan, motivasyon sa dimoun ki donn sa kado.

Motivasyon sa dimoun ki donn kado. Parey sa legzanp ki nou fek vwar, i byen pour vwar si sa enn ki pe ganny sa kado pa mal konpran motivasyon sa enn ki pe donn li sa kado. De lot kote, sa dimoun ki pe donn sa kado i osi bezwen egzamin son prop motivasyon. Menm si laplipar dimoun i krwar ki zot annan en bon motivasyon pour donn kado, bokou i donn kado zis pandan serten letan dan lannen akoz zot santi zot oblize pour fer li. I annan lezot ki donn kado akoz zot ekspekte ganny serten faver.

Ki mannyer ou kapab fer sir ki ou pe donn kado avek sa bon motivasyon? Labib i dir: “Tou sa ki zot fer, fer li avek lanmour.” (1 Korentyen 16:14) Si ou motivasyon pour donnen i ganny fer avek lanmour e akoz ou enterese avek sa dimoun, sa dimoun pou kontan sa kado. Ou pou osi eksperyans sa gran lazwa ki ou gannyen ler ou zenere. Ler ou donn avek tou ou leker, ou osi fer kontan nou Papa ki dan lesyel. Zapot Pol ti felisit bann Kretyen Korent ler zot ti zenere e kontan pour ed zot bann frer Zide. Pol ti dir  zot: “Bondye i kontan sa bann ki donn avek lazwa.”​—2 Korentyen 9:7.

Si ou mazin lo sa bann pwen ki nou’n koz lo la, sa pou ed ou donn bann kado ki pou fer lezot kontan. Sa bann pwen ki nou’n diskite ek lezot ankor, in zwe en rol enportan dan laranzman Bondye pour imen ganny sa pli gro kado. Alor, nou envit ou pour lir sa lot lartik.

^ par. 13 Bokou dimoun i osi donn kado zour lanniverser nesans ek lezot lafet. Par kont, laplipar sa bann lafet i annan bann keksoz ki pa an armoni avek sa ki Labib i dir. Vwar sa lartik “Kestyon sorti kot nou lekter​—Eski bann Kretyen i devret selebre Nwel?” dan sa magazin.